Biblica® Open Lao Contemporary Version
ເພງສັນລະເສີນ 80
(ເຖິງຫົວໜ້ານັກຮ້ອງ, ທຳນອງ “ລີລາແຫ່ງຄຳໝັ້ນສັນຍາ”, ບົດເພງສັນລະເສີນຂອງອາສັບ)
ຂ້າແດ່ພຣະຜູ້ລ້ຽງຂອງອິດສະຣາເອນ ຂໍໂຜດຮັບຟັງ,
ພຣະອົງຜູ້ນຳພາໂຢເຊັບເໝືອນດັ່ງນຳຝູງສັດ.
ພຣະອົງຜູ້ນັ່ງຢູ່ເທິງບັນລັງລະຫວ່າງເຄຣຸບ,
ຂໍໂຜດສະແດງສະຫງ່າລາສີຂອງພຣະອົງ ຕໍ່ໜ້າເອຟຣາອິມ, ເບັນຢາມິນ ແລະ ມານາເຊ.
ຂໍສະແດງຄວາມຍິ່ງໃຫຍ່ຂອງພຣະອົງ;
ໂຜດມາ ແລະ ຊ່ວຍພວກຂ້ານ້ອຍດ້ວຍ.
ຂ້າແດ່ພຣະເຈົ້າ ຂໍໃຫ້ພວກຂ້ານ້ອຍຄືນສູ່ສະພາບດີ
ຂໍໃຫ້ໃບໜ້າຂອງພຣະອົງສ່ອງແສງເທິງພວກຂ້ານ້ອຍ,
ເພື່ອພວກຂ້ານ້ອຍຈະໄດ້ພົ້ນ.
ຂ້າແດ່ພຣະເຈົ້າຢາເວ ພຣະເຈົ້າຜູ້ມີລິດອຳນາດຍິ່ງໃຫຍ່,
ຄວາມໃຈຮ້າຍຂອງພຣະອົງຈະອັດອັ້ນ
ຕໍ່ຄຳອະທິຖານຂອງປະຊາຊົນຂອງພຣະອົງໄປອີກດົນເທົ່າໃດ?
ພຣະອົງໃຫ້ພວກເຂົາກິນນ້ຳຕາຕາງອາຫານ;
ພຣະອົງເຮັດໃຫ້ພວກເຂົາດື່ມນ້ຳຕາເຕັມຖ້ວຍ.
ພຣະອົງໄດ້ເຮັດໃຫ້ພວກຂ້ານ້ອຍເປັນທີ່ດູໜິ່ນຂອງບັນດາເພື່ອນບ້ານຂອງພວກຂ້ານ້ອຍ,
ແລະ ສັດຕູທັງຫລາຍຂອງພວກຂ້ານ້ອຍກໍເຢາະເຢີ້ຍພວກຂ້ານ້ອຍ.
ຂ້າແດ່ພຣະເຈົ້າຜູ້ມີລິດອຳນາດຍິ່ງໃຫຍ່, ຂໍໃຫ້ພວກຂ້ານ້ອຍຄືນສູ່ສະພາບດີ;
ຂໍໃຫ້ໃບໜ້າຂອງພຣະອົງສ່ອງແສງໃສ່ພວກຂ້ານ້ອຍ,
ເພື່ອພວກຂ້ານ້ອຍຈະໄດ້ພົ້ນ.
ພຣະອົງໄດ້ນຳເຄືອອະງຸ່ນອອກມາຈາກເອຢິບ
ພຣະອົງໄດ້ຂັບໄລ່ຊົນຊາດຕ່າງໆອອກໄປ ແລະ ປູກເຄືອອະງຸ່ນນັ້ນໄວ້.
ພຣະອົງໄດ້ໄຖ ແລະ ຄາດດິນສຳລັບເຄືອອະງຸ່ນ,
ແລ້ວເຄືອອະງຸ່ນກໍຢັ່ງຮາກ ແລະ ງອກຂຶ້ນທົ່ວແຜ່ນດິນ.
ບັນດາພູເຂົາທັງຫລາຍກໍປົກຄຸມໄປດ້ວຍຮົ່ມຂອງເຄືອອະງຸ່ນ,
ກົກແປກທີ່ສູງໃຫຍ່ກໍປົກຄຸມໄປດ້ວຍງ່າທັງຫລາຍຂອງເຄື່ອອະງຸ່ນ.
ງ່າຂອງມັນແຜ່ໄປໄກຈົນຮອດທະເລ1
ຂະແໜງຂອງມັນກໍປົ່ງໄປໄກຈົນຮອດແມ່ນ້ຳ.2
ດ້ວຍເຫດໃດພຣະອົງຈຶ່ງໄດ້ພັງກຳແພງຂອງມັນລົງ
ເພື່ອໃຫ້ທຸກຄົນທີ່ຜ່ານໄປມາເກັບໝາກອະງຸ່ນ?
ໝູປ່າທີ່ມາຈາກປ່າກໍມາທຳລາຍເຄືອອະງຸ່ນ
ແລະ ແມງໄມ້ທັງຫລາຍທີ່ມາຈາກທົ່ງນາກໍມາກັດກິນເຄືອອະງຸ່ນ.
ຂ້າແດ່ພຣະເຈົ້າຜູ້ມີລິດອຳນາດຍິ່ງໃຫຍ່! ຂໍໂຜດກັບມາຫາພວກຂ້ານ້ອຍດ້ວຍ,
ໂຜດແນມມາຈາກຟ້າສະຫວັນ ແລະ ເບິ່ງ!
ມາເບິ່ງແຍງເຄືອອະງຸ່ນນີ້ດ້ວຍ,
ຮາກທີ່ມືຂວາຂອງພຣະອົງໄດ້ປູກໄວ້
ບຸດ3ທີ່ພຣະອົງໄດ້ຍົກຂຶ້ນເພື່ອພຣະອົງເອງ.
ເຄືອອະງຸ່ນຂອງພຣະອົງຖືກຕັດລົງ, ມັນຖືກຈູດດ້ວຍໄຟ;
ເມື່ອພຣະອົງຕຳໜິ ບັນດາປະຊາຊົນຂອງພຣະອົງກໍພິນາດຈິບຫາຍ.
ຂໍໃຫ້ມືຂອງພຣະອົງຢູ່ເໜືອຜູ້ນັ້ນທີ່ຢູ່ເບື້ອງຂວາມືຂອງພຣະອົງ,
ຜູ້ເປັນບຸດມະນຸດທີ່ພຣະອົງໄດ້ຍົກຂຶ້ນເພື່ອພຣະອົງເອງ.
ແລ້ວພວກຂ້ານ້ອຍຈະບໍ່ຫັນໜີໄປຈາກພຣະອົງອີກ
ຂໍຟື້ນຟູພວກຂ້ານ້ອຍ ແລະ ພວກຂ້ານ້ອຍຈະຮ້ອງອອກນາມຂອງພຣະອົງ.
ຂ້າແດ່ພຣະເຈົ້າຢາເວຜູ້ມີລິດອຳນາດຍິ່ງໃຫຍ່ ຂໍໃຫ້ພວກຂ້ານ້ອຍຄືນສູ່ສະພາບດີ;
ຂໍໃຫ້ໃບໜ້າຂອງພຣະອົງສ່ອງແສງໃສ່ພວກຂ້ານ້ອຍ,
ເພື່ອພວກຂ້ານ້ອຍຈະໄດ້ພົ້ນ.
Source notes (3)
- Footnote ອາດຈະເປັນ ທະເລເມດີແຕຣາເນ
- Footnote ຄື ແມ່ນ້ຳເອີຟຣັດ
- Footnote ຫລື ກິ່ງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.