Biblica® Open Lao Contemporary Version
ເພງສັນລະເສີນ 75
(ເຖິງຫົວໜ້ານັກຮ້ອງ, ທຳນອງ “ຢ່າທຳລາຍ”, ບົດເພງສັນລະເສີນຂອງອາສັບ, ບົດເພງ)
ຂ້າແດ່ພຣະເຈົ້າ ພວກຂ້ານ້ອຍຂໍສັນລະເສີນພຣະອົງ,
ພວກຂ້ານ້ອຍສັນລະເສີນພຣະອົງ ເພາະນາມຂອງພຣະອົງຢູ່ໃກ້;
ຄົນທັງຫລາຍໄດ້ເລົ່າເຖິງການກະທຳອັນອັດສະຈັນຂອງພຣະອົງ
ພຣະອົງກ່າວວ່າ “ເຮົາເລືອກເວລາທີ່ກຳນົດໄວ້
ເຮົານີ້ແຫລະເປັນຜູ້ພິພາກສາທີ່ທ່ຽງທຳ.
ເມື່ອໂລກສັ່ນສະເທືອນ ແລະ ຊາວໂລກທຸກຄົນສັ່ນສະທ້ານຢ້ານກົວ,
ເຮົານີ້ແຫລະເປັນຜູ້ທີ່ຢຶດເສົາຫລັກຂອງໂລກໄວ້ໃຫ້ຕັ້ງໝັ້ນຄົງຢູ່.
ເຮົາເວົ້າກັບຄົນຈອງຫອງວ່າ ‘ຢ່າອວດອ້າງອີກຕໍ່ໄປ’
ແລະ ເວົ້າກັບຄົນຊົ່ວວ່າ ‘ຢ່າຍົກເຂົາສັດຂອງເຈົ້າຂຶ້ນ1
ຢ່າຍົກເຂົາສັດຂອງເຈົ້າຂຶ້ນຕໍ່ຟ້າສະຫວັນ
ຢ່າເວົ້າທ້າທາຍຫລາຍ’ ”.
ບໍ່ມີຜູ້ໃດທີ່ມາຈາກທິດຕາເວັນອອກ ຫລື ທິດຕາເວັນຕົກ
ຫລື ມາຈາກຖິ່ນແຫ້ງແລ້ງກັນດານຈະຍົກຍ້ອງຕົນເອງໄດ້.
ແຕ່ພຣະເຈົ້າແມ່ນພຣະເຈົ້າທີ່ເປັນຜູ້ຕັດສິນ.
ພຣະອົງເອົາຄົນໜຶ່ງລົງ ແລະ ພຣະອົງກໍຍົກອີກຄົນໜຶ່ງຂຶ້ນ.
ໃນມືຂອງພຣະເຈົ້າຢາເວນັ້ນມີຈອກເຫລົ້າອະງຸ່ນ
ທີ່ເຕັມໄປດ້ວຍຟອງເຫລົ້າຟູປະສົມເຄື່ອງເທດ,
ພຣະອົງເທມັນອອກມາ ແລະ ຄົນຊົ່ວໃນໂລກທຸກຄົນ
ກໍດື່ມມັນຈົນໝົດ ບໍ່ເວັ້ນແມ່ນແຕ່ຂີ້ຕະກອນທີ່ຢູ່ກົ້ນຈອກ.
ສຳລັບຂ້ານ້ອຍ, ຂ້ານ້ອຍຈະປະກາດເລື່ອງນີ້ຕະຫລອດໄປ;
ຂ້ານ້ອຍຈະຮ້ອງເພງສັນລະເສີນພຣະເຈົ້າຂອງຢາໂຄບ,
ພຣະອົງເວົ້າວ່າ “ເຮົາຈະຕັດເຂົາຂອງຄົນຊົ່ວທັງໝົດ
ແຕ່ເຂົາຂອງຄົນຊອບທຳຈະຖືກຍົກຂຶ້ນ”.
Source notes (1)
- Footnote ເຂົາຢູ່ທີ່ນີ້ໝາຍເຖິງສັນຍາລັກຂອງກຳລັງ ເຊັ່ນດຽວກັບຂໍ້ 5
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.