Biblica® Open Lao Contemporary Version
ເພງສັນລະເສີນ 73
ໝວດທີ 3
ພສສ 73–89
(ບົດເພງສັນລະເສີນຂອງອາສັບ)
ແນ່ນອນ ພຣະເຈົ້າດີຕໍ່ອິດສະຣາເອນ
ຕໍ່ບັນດາຜູ້ທີ່ມີໃຈບໍລິສຸດ.
ແຕ່ສຳລັບຂ້ານ້ອຍ, ຕີນຂອງຂ້ານ້ອຍເກືອບຈະມືນພາດ
ຂ້ານ້ອຍເກືອບຈະເສຍຫລັກ.
ເພາະຂ້ານ້ອຍອິດສາຄົນຈອງຫອງ
ເມື່ອຂ້ານ້ອຍເຫັນຄວາມຈະເລີນຮຸ່ງເຮືອງຂອງຄົນຊົ່ວຮ້າຍ.
ພວກເຂົາບໍ່ຕ້ອງໄດ້ດິ້ນຮົນຕໍ່ສູ້;
ຮ່າງກາຍຂອງພວກເຂົາມີສຸຂະພາບດີ ແລະ ແຂງແຮງ.1
ພວກເຂົາບໍ່ຕ້ອງໄດ້ແບກພາລະເໝືອນກັບຄົນອື່ນໆ
ພວກເຂົາບໍ່ຕ້ອງເປັນທຸກດ້ວຍໂລກໄພໄຂ້ເຈັບ.
ເຫດສະນັ້ນພວກເຂົາຈຶ່ງຄ້ອງຄວາມຈອງຫອງເປັນສາຍຄໍຂອງຕົນ;
ພວກເຂົາສວມຄວາມຮຸນແຮງເປັນເຄື່ອງນຸ່ງໃຫ້ຕົນ.
ຄວາມຊົ່ວຊ້າອອກມາຈາກໃຈທີ່ຕາຍດ້ານຂອງພວກເຂົາ2
ຄວາມຄິດຊົ່ວໃນຈິດໃຈຂອງພວກເຂົາໄຮ້ຂີດຈຳກັດ.
ພວກເຂົາເຢາະເຢີ້ຍ ແລະ ເວົ້າດ້ວຍຄວາມມຸ່ງຮ້າຍ
ພວກເຂົາຄຸກຄາມກົດຂີ່ດ້ວຍຄວາມຈອງຫອງ.
ປາກຂອງພວກເຂົາອ້າງສິດເໜືອຟ້າສະຫວັນ,
ລິ້ນຂອງພວກເຂົາອວດອ້າງກຳມະສິດເໜືອແຜ່ນດິນໂລກ.
ເຫດສະນັ້ນ ຄົນຂອງພວກເຂົາຈຶ່ງຫັນໄປຫາພວກເຂົາ
ແລະ ດື່ມນ້ຳໝົດໄປຢ່າງຫລວງຫລາຍ.3
ພວກເຂົາເວົ້າວ່າ “ພຣະເຈົ້າຈະຮູ້ໄດ້ຢ່າງໃດ?
ອົງຜູ້ສູງສຸດຈະຮູ້ຫຍັງ?”
ຄົນຊົ່ວຮ້າຍກໍເປັນເຊັ່ນນີ້
ສຸກສະບາຍຢູ່ເລື້ອຍ, ພວກເຂົາຮັ່ງມີຂຶ້ນເລື້ອຍໆ.
ແນ່ນອນ ຂ້ານ້ອຍໄດ້ຮັກສາໃຈໃຫ້ບໍລິສຸດ
ແລະ ຊຳລະມືໃຫ້ປາດສະຈາກມົນທິນໂດຍບໍ່ມີປະໂຫຍດ.
ຂ້ານ້ອຍຖືກລຸມທຳຮ້າຍຢູ່ຕະຫລອດທັງວັນ
ແລະ ຖືກລົງໂທດໃໝ່ຢູ່ທຸກເຊົ້າ.
ຖ້າຂ້ານ້ອຍໄດ້ເວົ້າອອກມາຢ່າງນັ້ນ,
ຂ້ານ້ອຍກໍຄົງຈະໄດ້ທໍລະຍົດຕໍ່ບັນດາລູກຂອງພຣະອົງ.
ເມື່ອຂ້ານ້ອຍພະຍາຍາມທີ່ຈະເຂົ້າໃຈທັງໝົດນີ້
ກໍເຮັດໃຫ້ຂ້ານ້ອຍລຳບາກໃຈຫລາຍ
ຈົນຂ້ານ້ອຍໄດ້ເຂົ້າໄປຍັງບ່ອນນະມັດສະການຂອງພຣະເຈົ້າ;
ຂ້ານ້ອຍຈຶ່ງເຂົ້າໃຈເຖິງຈຸດໝາຍປາຍທາງສຸດທ້າຍຂອງພວກເຂົາ.
ແນ່ນອນ ພຣະອົງໃຫ້ພວກເຂົາຢືນຢູ່ເທິງບ່ອນມື່ນ
ພຣະອົງໂຍນພວກເຂົາລົງສູ່ຄວາມຈິບຫາຍ.
ພວກເຂົາຖືກທຳລາຍໄປໃນທັນທີ,
ຖືກກວາດລ້າງໄປໝົດສິ້ນດ້ວຍຄວາມຢ້ານ!
ຂ້າແດ່ອົງພຣະຜູ້ເປັນເຈົ້າ
ເມື່ອພຣະອົງລຸກຂຶ້ນກໍເໝືອນຄົນທີ່ຕື່ນຈາກຝັນ
ພຣະອົງຈະດູຖູກຢຽດຢາມພວກເຂົາວ່າເປັນພຽງພາບໃນຄວາມຝັນ.
ເມື່ອຈິດໃຈຂອງຂ້ານ້ອຍທຸກໂສກ
ແລະ ຈິດວິນຍານຂອງຂ້ານ້ອຍຂົມຂື່ນ,
ຂ້ານ້ອຍກໍບໍ່ຮູ້ຈັກຄິດ ແລະ ໂງ່ຈ້າ
ຂ້ານ້ອຍເປັນເໝືອນສັດເດຍລະສານຕໍ່ພຣະອົງ.
ແຕ່ເຖິງປານນັ້ນ ຂ້ານ້ອຍກໍຍັງຢູ່ກັບພຣະອົງສະເໝີ;
ພຣະອົງໄດ້ຈັບມືຂວາຂອງຂ້ານ້ອຍໄວ້.
ພຣະອົງໄດ້ນຳພາຂ້ານ້ອຍດ້ວຍຄຳປຶກສາຂອງພຣະອົງ
ແລະ ພາຍຫລັງພຣະອົງກໍຈະຮັບຂ້ານ້ອຍເຂົ້າສູ່ສະຫງ່າລາສີ.
ນອກຈາກພຣະອົງແລ້ວຂ້ານ້ອຍມີຜູ້ອື່ນໃດໃນຟ້າສະຫວັນບໍ?
ແລະ ໃນໂລກນີ້ຂ້ານ້ອຍບໍ່ປາຖະໜາສິ່ງໃດນອກຈາກພຣະອົງ.
ຮ່າງກາຍ ແລະ ຈິດໃຈຂອງຂ້ານ້ອຍອາດຈະເສື່ອມໄປ,
ແຕ່ພຣະເຈົ້າກໍເປັນພະລັງໃນຈິດໃຈຂອງຂ້ານ້ອຍ
ແລະ ເປັນສ່ວນມໍລະດົກຂອງຂ້ານ້ອຍຕະຫລອດໄປ.
ບັນດາຜູ້ທີ່ຢູ່ຫ່າງໄກຈາກພຣະອົງກໍຈະຈິບຫາຍ;
ພຣະອົງທຳລາຍທຸກຄົນທີ່ບໍ່ສັດຊື່ຕໍ່ພຣະອົງ.
ແຕ່ສ່ວນຂ້ານ້ອຍ ດີແທ້ໆທີ່ໄດ້ເຂົ້າມາໃກ້ພຣະເຈົ້າ.
ຂ້ານ້ອຍໄດ້ໃຫ້ພຣະເຈົ້າຢາເວອົງເຈົ້ານາຍເປັນບ່ອນລີ້ໄພຂອງຂ້ານ້ອຍ;
ຂ້ານ້ອຍຈະເລົ່າເຖິງທຸກສິ່ງທີ່ພຣະອົງພຣະອົງໄດ້ເຮັດ.
Source notes (3)
- Footnote ຫລື ດິ້ນລົນຕໍ່ສູ້ເມື່ອພວກເຂົາຈະຕາຍ ຮ່າງກາຍຂອງພວກເຂົາມີສຸຂະພາບດີ
- Footnote ພາສາເຮັບເຣີວ່າ ຕາຂອງພວກເຂົາເຕັມໄປດ້ວຍໄຂມັນ
- Footnote ໃນພາສາເຮັບເຣີຂໍ້ນີ້ມີຄວາມຫມາຍບໍ່ຊັດເຈນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.