Biblica® Open Lao Contemporary Version
ເພງສັນລະເສີນ 72
(ບົດປະພັນຂອງໂຊໂລໂມນ)
ຂ້າແດ່ພຣະເຈົ້າ ຂໍມອບຄວາມຍຸຕິທຳຂອງພຣະອົງແກ່ກະສັດຜູ້ນັ້ນ
ແລະ ລູກຊາຍຂອງກະສັດດ້ວຍຄວາມຊອບທຳຂອງພຣະອົງ.
ກະສັດຈະ1ພິພາກສາປະຊາຊົນຂອງພຣະອົງດ້ວຍຄວາມຊອບທຳ,
ໃຫ້ຄວາມຍຸຕິທຳແກ່ຜູ້ທຸກຍາກລຳບາກ.
ຂໍໃຫ້ພູເຂົາທັງຫລາຍນຳຄວາມຮັ່ງມີມາສູ່ປະຊາຊົນ
ແລະ ໂນນພູກໍໃຫ້ຜົນຜະລິດແຫ່ງຄວາມຊອບທຳ.
ຂໍໃຫ້ເພິ່ນປົກປ້ອງຜູ້ທຸກຍາກລຳບາກທີ່ຢູ່ໃນທ່າມກາງປະຊາຊົນ
ແລະ ຊ່ວຍກອບກູ້ເອົາລູກຫລານຂອງຜູ້ທີ່ຂັດສົນ;
ຂໍໃຫ້ເພິ່ນບຸກໂຈມຕີຄົນທີ່ຂົ່ມເຫັງທັງຫລາຍ.
ຂໍໃຫ້ເພິ່ນໝັ້ນຍືນ2ຕະຫລອດໄປເໝືອນດັ່ງດວງຕາເວັນ,
ໝັ້ນຍືນຕະຫລອດໄປເໝືອນດັ່ງດວງເດືອນ ຕະຫລອດທຸກຊົ່ວອາຍຸຄົນ.
ຂໍໃຫ້ເພິ່ນເປັນເໝືອນຝົນທີ່ຕົກລົງມາຫົດທົ່ງຫຍ້າ,
ເໝືອນກັບຝົນທີ່ຫົດລົງແຜ່ນດິນໂລກ.
ຜູ້ຊອບທຳຈະຈະເລີນຮຸ່ງເຮືອງໃນສະໄໝຂອງເພິ່ນ
ແລະ ມີຄວາມຈະເລີນຮຸ່ງເຮືອງໄປຈົນກວ່າດວງເດືອນຈະດັບສູນ.
ຂໍໃຫ້ເພິ່ນປົກຄອງຈາກທະເລຟາກໜຶ່ງຈົນເຖິງທະເລອີກຟາກໜຶ່ງ
ແລະ ຈາກແມ່ນ້ຳນັ້ນ3 ຈົນເຖິງສຸດປາຍແຜ່ນດິນໂລກ.
ຂໍໃຫ້ຊົນເຜົ່າຕ່າງໆໃນຖິ່ນແຫ້ງແລ້ງກັນດານໝອບກາບເພິ່ນ
ແລະ ສັດຕູຂອງເພິ່ນຈະຟຸບລົງເກືອກຝຸ່ນ.
ຂໍໃຫ້ບັນດາກະສັດແຫ່ງຕາກຊິດ ແລະ ແຫ່ງໝູ່ເກາະທັງຫລາຍ
ນຳເຄື່ອງບັນນາການມາມອບໃຫ້ເພິ່ນ.
ບັນດາກະສັດຈາກເຊບາ ແລະ ເສບາ
ຈະນຳຂອງຂັວນມາມອບໃຫ້ເພິ່ນ.
ຂໍໃຫ້ບັນດາກະສັດມານ້ອມຄຳນັບເພິ່ນ
ແລະ ປະຊາຊາດທັງໝົດຈະມາຮັບໃຊ້ເພິ່ນ.
ເພາະເພິ່ນຈະຊ່ວຍກອບກູ້ເອົາຄົນຂາດເຂີນຜູ້ທີ່ຮ້ອງຂໍ,
ຊ່ວຍເຫລືອຜູ້ທຸກຍາກລຳບາກທີ່ບໍ່ມີຜູ້ໃດຊ່ວຍ.
ເພິ່ນມີໃຈສົງສານຜູ້ທີ່ອ່ອນແອ ແລະ ຜູ້ທີ່ຂັດສົນ
ແລະ ຊ່ວຍຊີວິດຜູ້ທີ່ຂາດເຂີນອອກຈາກຄວາມຕາຍ.
ເພິ່ນຈະຊ່ວຍພວກເຂົາໃຫ້ພົ້ນຈາກການກົດຂີ່ຂົ່ມເຫັງ ແລະ ຈາກຄວາມຮຸນແຮງ,
ເພາະເລືອດຂອງພວກເຂົາມີຄ່າຫລາຍໃນສາຍຕາຂອງເພິ່ນ.
ຂໍໃຫ້ເພິ່ນມີອາຍຸຍືນຍາວ!
ຂໍໃຫ້ມີຜູ້ທີ່ນຳເອົາຄຳຈາກເຊບາມາມອບໃຫ້ເພິ່ນ.
ຂໍໃຫ້ຄົນທັງຫລາຍອະທິຖານເພື່ອເພິ່ນຕະຫລອດໄປ
ແລະ ອວຍພອນເພິ່ນຕະຫລອດເວລາ.
ຂໍໃຫ້ມີເຂົ້າອຸດົມສົມບູນໄປທົ່ວແຜ່ນດິນ;
ແມ່ນແຕ່ຢູ່ເທິງຍອດພູເຂົາກໍຍັງຊູຮວງແກວ່ງໄປມາ.
ຂໍໃຫ້ພືດງອກງາມເໝືອນດັ່ງເລບານອນ
ແລະ ຂໍໃຫ້ລະເລີນງອກງາມເໝືອນດັ່ງຫຍ້າທີ່ຢູ່ໃນທົ່ງ.
ຂໍໃຫ້ນາມຂອງເພິ່ນດຳລົງຢູ່ຕະຫລອດໄປ;
ແລະ ຂໍໃຫ້ນາມນັ້ນໝັ້ນຍືນດັ່ງດວງຕາເວັນ.
ແລ້ວທຸກຊົນຊາດກໍຈະໄດ້ຮັບພອນເພາະເພິ່ນ4
ແລະ ພວກເຂົາຈະເອີ້ນເພິ່ນວ່າຜູ້ໄດ້ຮັບພອນ.
ຂໍຖວາຍສັນລະເສີນແດ່ພຣະເຈົ້າ ພຣະເຈົ້າຢາເວ, ພຣະເຈົ້າແຫ່ງອິດສະຣາເອນ,
ພຣະອົງຜູ້ດຽວເທົ່ານັ້ນທີ່ກະທຳການອັນອັດສະຈັນ.
ຂໍຖວາຍສັນລະເສີນແດ່ນາມອັນຮຸ່ງເຮືອງຂອງພຣະອົງຕະຫລອດໄປ;
ຂໍໃຫ້ທົ່ວໂລກເຕັມໄປດ້ວຍສະຫງ່າລາສີຂອງພຣະອົງ
ອາແມນ ແລະ ອາແມນ.
ຈົບຄຳອະທິຖານຂອງດາວິດ ລູກຊາຍຂອງເຢຊີພຽງເທົ່ານີ້.
Source notes (4)
- Footnote ຫລື ຂໍໃຫ້ກະສັດ ເຊັ່ນດຽວກັບຂໍ້ 3-11 ແລະ 17
- Footnote ພາສາເຮັບເຣີວ່າ ເພິ່ນຈະເປັນທີ່ຢຳເກງ
- Footnote ຄື ແມ່ນ້ຳເອີຟຣັດ
- Footnote ຫລື ຈະໃຊ້ນາມຂອງເພິ່ນໃນການອວຍພອນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.