Biblica® Open Lao Contemporary Version
ເພງສັນລະເສີນ 7
ຊິກກາໂຢນຂອງດາວິດ ທີ່ລາວໄດ້ຮ້ອງຖວາຍແດ່ພຣະເຈົ້າຢາເວ ກ່ຽວກັບກູເຊ ຊາວເບັນຢາມິນ.
ຂ້າແດ່ພຣະເຈົ້າຢາເວ ພຣະເຈົ້າຂອງຂ້ານ້ອຍ, ຂ້ານ້ອຍໄດ້ລີ້ໄພໃນພຣະອົງ
ຂໍໂຜດກອບກູ້ ແລະ ປົດປ່ອຍຂ້ານ້ອຍຈາກທຸກຄົນທີ່ໄລ່ຕາມຂ້ານ້ອຍ,
ບໍ່ດັ່ງນັ້ນພວກເຂົາຈະຈີກຂ້ານ້ອຍຄືກັບສິງ
ແລະ ຈີກຂ້ານ້ອຍອອກເປັນຕ່ອນໆໂດຍບໍ່ມີຜູ້ໃດຊ່ວຍຂ້ານ້ອຍ.
ຂ້າແດ່ພຣະເຈົ້າຢາເວ ພຣະເຈົ້າຂອງຂ້ານ້ອຍ, ຖ້າຂ້ານ້ອຍໄດ້ເຮັດຢ່າງນີ້
ແລະ ມີຄວາມຜິດຕິດຢູ່ມືຂອງຂ້ານ້ອຍ
ຖ້າຂ້ານ້ອຍໄດ້ຕອບແທນພັນທະມິດຂອງຂ້ານ້ອຍດ້ວຍຄວາມຊົ່ວຮ້າຍ
ຫລື ໄດ້ປຸ້ນສັດຕູຂອງຂ້ານ້ອຍໂດຍບໍ່ມີສາເຫດ
ກໍຂໍໃຫ້ສັດຕູຂອງຂ້ານ້ອຍນັ້ນໄລ່ຕາມ ແລະ ຕາມທັນຂ້ານ້ອຍ;
ໃຫ້ລາວຢຽບຢ່ຳຊີວິດຂອງຂ້ານ້ອຍຈົນຈົມດິນ
ແລະ ເຮັດໃຫ້ຂ້ານ້ອຍນອນໃນຂີ້ຝຸ່ນດິນ.
ຂ້າແດ່ພຣະເຈົ້າຢາເວ ຂໍໂຜດລຸກຂຶ້ນດ້ວຍຄວາມໃຈຮ້າຍຂອງພຣະອົງ;
ຂໍໂຜດລຸກຂຶ້ນຕໍ່ສູ້ກັບຄວາມຮ້ອນຮົນຂອງສັດຕູຂອງຂ້ານ້ອຍ.
ຂ້າແດ່ພຣະເຈົ້າ ຂໍໂຜດຕື່ນຂຶ້ນ ຂໍໂຜດສັ່ງຄວາມຍຸຕິທຳ.
ຂໍໃຫ້ຊົນຊາດທັງຫລາຍມາເຕົ້າໂຮມກັນຢູ່ອ້ອມພຣະອົງ,
ໃນຂະນະທີ່ພຣະອົງນັ່ງຢູ່ເທິງບັນລັງສູງເໜືອພວກເຂົາ.
ຂໍໃຫ້ພຣະເຈົ້າຢາເວ ພິພາກສາຄົນທັງຫລາຍ.
ຂ້າແດ່ພຣະເຈົ້າຢາເວ ຂໍໃຫ້ຕັດສິນຂ້ານ້ອຍຕາມຄວາມຊອບທຳຂອງຂ້ານ້ອຍ,
ຕາມຄວາມສັດຊື່ຂອງຂ້ານ້ອຍດ້ວຍ, ອົງຜູ້ສູງສຸດ.
ຂໍໂຜດຢຸດຕິຄວາມໂຫດຮ້າຍຂອງຄົນຊົ່ວ
ແລະ ເຮັດໃຫ້ຄົນຊອບທຳປອດໄພ
ຂ້າແດ່ພຣະເຈົ້າຜູ້ຊອບທຳ
ຜູ້ສຳຫລວດຄວາມຄິດ ແລະ ຈິດໃຈ.
ພຣະເຈົ້າອົງສູງສຸດ ຜູ້ເປັນໂລ່1ຂອງຂ້ານ້ອຍ,
ຜູ້ຊ່ວຍຄົນທີ່ມີຈິດໃຈທ່ຽງທຳໃຫ້ລອດພົ້ນ.
ພຣະເຈົ້າຜູ້ເປັນຜູ້ພິພາກສາທີ່ຊອບທຳ,
ເປັນພຣະເຈົ້າຜູ້ສະແດງຄວາມໂກດຮ້າຍທຸກໆວັນ.
ຖ້າລາວບໍ່ຫັນກັບມາຈາກຄວາມບາບ
ພຣະອົງ2ຈະລັບດາບຂອງພຣະອົງໄວ້;
ພຣະອົງຈະກົ່ງທະນູຂອງພຣະອົງ ແລະ ຕຽມຍິງ.
ພຣະອົງໄດ້ຕຽມອາວຸດອັນຮ້າຍແຮງຂອງພຣະອົງໄວ້;
ພຣະອົງໄດ້ຕຽມລູກສອນໄຟຂອງພຣະອົງໄວ້ພ້ອມແລ້ວ.
ຜູ້ໃດກໍຕາມທີ່ຖືພາດ້ວຍຄວາມຊົ່ວຮ້າຍ
ກໍໃຫ້ກຳເນີດຄວາມເດືອດຮ້ອນ ແລະ ກໍ່ໃຫ້ເກີດຄວາມທໍ້ຖອຍ.
ຜູ້ໃດກໍຕາມທີ່ຂຸດຂຸມໄວ້
ກໍຕົກລົງໄປໃນຂຸມທີ່ພວກເຂົາຂຸດໄວ້ນັ້ນ.
ຄວາມເດືອດຮ້ອນທີ່ພວກເຂົາກໍ່ຂຶ້ນນັ້ນກໍກັບມາຫາພວກເຂົາເອງ;
ຄວາມທາລຸນຂອງພວກເຂົາກໍໄດ້ຕົກໃສ່ຫົວຂອງພວກເຂົາເອງ.
ຂ້ານ້ອຍຈະຂອບພຣະຄຸນພຣະເຈົ້າຢາເວ ເພາະຄວາມຊອບທຳຂອງພຣະອົງ;
ຂ້ານ້ອຍຈະຮ້ອງສັນລະເສີນນາມຂອງພຣະເຈົ້າຢາເວ ອົງສູງສຸດ.
Source notes (2)
- Footnote ຫລື ເຈົ້າຊີວິດ
- Footnote ຫລື ຫາກຜູ້ໃດບໍ່ກັບໃຈຈາກບາບ ພຣະເຈົ້າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.