Biblica® Open Lao Contemporary Version
ເພງສັນລະເສີນ 66
(ເຖິງຫົວໜ້ານັກຮ້ອງ, ບົດເພງ, ບົດເພງສັນລະເສີນ)
ທົ່ງທັງແຜ່ນດິນໂລກ, ຈົ່ງໂຫ່ຮ້ອງຊື່ນຊົມຍິນດີແດ່ພຣະເຈົ້າ!
ຈົ່ງຮ້ອງເພງເທີດທູນສະຫງ່າລາສີແຫ່ງນາມຂອງພຣະອົງ;
ຈົ່ງໃຫ້ການສັນລະເສີນພຣະອົງເຕັມດ້ວຍສະຫງ່າລາສີ!
ຈົ່ງເວົ້ກັບພຣະເຈົ້າວ່າ: “ພາລະກິດຂອງພຣະອົງໜ້າອັດສະຈັນຫລາຍ!
ລິດອຳນາດຂອງພຣະອົງຍິ່ງໃຫຍ່ແທ້ໆ
ຈົນບັນດາສັດຕູຂອງພຣະອົງຕ້ອງໝອບລົງຕໍ່ໜ້າພຣະອົງ.
ຄົນທົ່ວໂລກຈະກາບລົງນະມັດສະການພຣະອົງ
ພວກເຂົາຮ້ອງເພງສັນລະເສີນພຣະອົງ
ພວກເຂົາຮ້ອງສັນລະເສີນນາມຂອງພຣະອົງ”.
ຈົ່ງມາ ເບິ່ງສິ່ງທີ່ພຣະເຈົ້າໄດ້ເຮັດ,
ພາລະກິດອັນຍິ່ງໃຫຍ່ຂອງພຣະອົງສຳລັບມວນມະນຸດ!
ພຣະອົງໄດ້ປ່ຽນທະເລໃຫ້ກາຍເປັນພື້ນແຫ້ງ,
ພວກເຂົາໄດ້ຍ່າງຂ້າມນ້ຳໄປ
ຈົ່ງມາ ໃຫ້ພວກເຮົາຊື່ນຊົມຍິນດີໃນພຣະອົງ.
ພຣະອົງໄດ້ຄອບຄອງຢູ່ຕະຫລອດໄປດ້ວຍລິດອຳນາດຂອງພຣະອົງ,
ຕາຂອງພຣະອົງກໍຈ້ອງເບິ່ງທີ່ຊົນຊາດທັງຫລາຍ
ຢ່າໃຫ້ບັນດາຄົນທີ່ກະບົດລຸກຂຶ້ນມາຕໍ່ສູ້ພຣະອົງ.
ຊົນຊາດທັງຫລາຍ, ຈົ່ງສັນລະເສີນພຣະເຈົ້າຂອງພວກເຮົາ
ໃຫ້ສຽງສັນລະເສີນພຣະອົງໄດ້ຍິນທົ່ວເຖິງກັນ
ພຣະອົງໄດ້ຮັກສາຊີວິດຂອງພວກເຮົາໄວ້
ແລະ ຮັກສາຕີນຂອງພວກເຮົາບໍ່ໃຫ້ມື່ນໄປ.
ຂ້າແດ່ພຣະເຈົ້າ ພຣະອົງທົດສອບພວກຂ້ານ້ອຍ;
ພຣະອົງໄດ້ຫລໍ່ຫລອມພວກຂ້ານ້ອຍໃຫ້ບໍລິສຸດເໝືອນກັບຫລອມເງິນ.
ພຣະອົງໄດ້ນຳພວກຂ້ານ້ອຍເຂົ້າໄປໃນຄຸກ
ແລະ ວາງພາລະໜັກໄວ້ເທິງຫລັງພວກຂ້ານ້ອຍ.
ພຣະອົງໃຫ້ຄົນບັງຄັບມ້າທຸບຫົວຂອງພວກຂ້ານ້ອຍ;
ພວກຂ້ານ້ອຍຕ້ອງຜ່ານໄປ ແລະ ລຸຍນ້ຳ,
ແຕ່ພຣະອົງກໍນຳພວກຂ້ານ້ອຍມາສູ່ດິນແດນອັນອຸດົມສົມບູນ.
ຂ້ານ້ອຍຈະມາທີ່ວິຫານຂອງພຣະອົງພ້ອມດ້ວຍເຄື່ອງເຜົາບູຊາ
ແລະ ເຮັດຕາມຄຳປະຕິຍານທີ່ໃຫ້ໄວ້ກັບພຣະອົງ
ຕາມທີ່ຮີບສົບຂອງຂ້ານ້ອຍໄດ້ສັນຍາ ແລະ ຕາມທີ່ປາກຂອງຂ້ານ້ອຍໄດ້ກ່າວໄວ້
ເມື່ອເວລາທີ່ຂ້ານ້ອຍຢູ່ໃນຄວາມເດືອດຮ້ອນ.
ຂ້ານ້ອຍຈະຖວາຍສັດອ້ວນພີເປັນເຄື່ອງບູຊາແກ່ພຣະອົງ.
ແລະ ຖວາຍແກະຜູ້
ຂ້ານ້ອຍຈະຖວາຍງົວຜູ້ ແລະ ແບ້.
ຈົ່ງມາ ແລະ ຟັງ, ພວກທ່ານທຸກຄົນທີ່ຢຳເກງພຣະເຈົ້າ;
ຂ້າພະເຈົ້າຈະເລົ່າໃຫ້ຟັງວ່າພຣະອົງໄດ້ກະທຳສິ່ງໃດເພື່ອຂ້າພະເຈົ້າແດ່.
ຂ້າພະເຈົ້າໄດ້ຮ້ອງຫາພຣະອົງດ້ວຍປາກຂອງຂ້າພະເຈົ້າ;
ສັນລະເສີນພຣະອົງດ້ວຍລີ້ນຂອງຂ້າພະເຈົ້າ.
ຖ້າຂ້າພະເຈົ້າໄດ້ບົ່ມຄວາມຊົ່ວໄວ້ໃນໃຈ
ອົງພຣະຜູ້ເປັນເຈົ້າຄົງຈະບໍ່ຮັບຟັງ;
ແຕ່ແນ່ນອນວ່າພຣະເຈົ້າໄດ້ຮັບຟັງ
ແລະ ໄດ້ຍິນຄຳອະທິຖານຂອງຂ້າພະເຈົ້າ.
ສັນລະເສີນພຣະເຈົ້າ,
ຜູ້ບໍ່ປະຕິເສດຄຳອະທິຖານຂອງຂ້າພະເຈົ້າ
ຫລື ຢັບຢັ້ງຄວາມຮັກໝັ້ນຄົງຂອງພຣະອົງຈາກຂ້ານ້ອຍ!
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.