Biblica® Open Lao Contemporary Version
ເພງສັນລະເສີນ 65
(ເຖິງຫົວໜ້ານັກຮ້ອງ. ບົດເພງສັນລະເສີນຂອງດາວິດ. ບົດເພງ)
ຂ້າແດ່ພຣະເຈົ້າ ການສັນລະເສີນລໍຄອຍຖ້າ1ພຣະອົງຢູ່ໃນຊີໂອນ;
ພວກຂ້ານ້ອຍຈະເຮັດຕາມທີ່ໄດ້ປະຕິຍານໄວ້ກັບພຣະອົງ.
ຂ້າແດ່ພຣະເຈົ້າ ຜູ້ຟັງຄຳອະທິຖານ,
ທຸກຄົນຈະມາເຂົ້າມາຫາພຣະອົງ.
ເມື່ອພວກຂ້ານ້ອຍຖືກຄວາມບາບຄອບງຳ
ພຣະອົງໄດ້ອະໄພ2ໃຫ້ການລ່ວງລະເມີດຂອງພວກຂ້ານ້ອຍ.
ຄວາມສຸກຍ່ອມມີແກ່ຜູ້ທີ່ພຣະອົງໄດ້ເລືອກໄວ້
ແລະ ນຳມາໃກ້ເພື່ອໃຫ້ຢູ່ໃນສານຂອງພຣະອົງ!
ພວກຂ້ານ້ອຍຈະອິ່ມເຕັມດ້ວຍສິ່ງດີຈາກວິຫານຂອງພຣະອົງ,
ຈາກວິຫານອັນສັກສິດຂອງພຣະອົງ.
ພຣະອົງໄດ້ຕອບພວກຂ້ານ້ອຍດ້ວຍການກະທຳທີ່ໜ້າອັດສະຈັນ ແລະ ຊອບທຳ,
ຂ້າແດ່ພຣະເຈົ້າ ພຣະຜູ້ຊ່ວຍໃຫ້ພົ້ນຂອງພວກຂ້ານ້ອຍ,
ຜູ້ເປັນຄວາມຫວັງຂອງທົ່ວທຸກມຸມໂລກ
ແລະ ຂອງທະເລທີ່ໄກທີ່ສຸດ,
ພຣະອົງຜູ້ຕັ້ງພູເຂົາທັງຫລາຍໄວ້ໂດຍລິດອຳນາດຂອງພຣະອົງ,
ມີກຳລັງເປັນອາວຸດໃຫ້ພຣະອົງເອງ,
ຜູ້ລະງັບສຽງດັງຂອງທະເລ,
ສຽງດັງຂອງຄື້ນທະເລ,
ແລະ ສຽງສັບສົນວຸ້ນວາຍຂອງຊົນຊາດຕ່າງໆ.
ທົ່ວທັງແຜ່ນດິນໂລກເຕັມໄປດ້ວຍຄວາມຢຳເກງຕໍ່ຄວາມອັດສະຈັນຂອງພຣະອົງ.
ໃນບ່ອນທີ່ມີຍາມຮຸ່ງເຊົ້າ ແລະ ໃນບ່ອນທີ່ມີຍາມແລງຈາງຫາຍໄປ,
ພຣະອົງໄດ້ໃຫ້ມີບົດເພງແຫ່ງຄວາມຍິນດີ.
ພຣະອົງເບິ່ງແຍງຜືນແຜ່ນດິນ ແລະ ຫົດນ້ຳໃຫ້ແຜ່ນດິນ;
ບຳລຸງແຜ່ນດິນໃຫ້ອຸດົມສົມບູນ.
ສາຍນ້ຳຂອງພຣະເຈົ້ານັ້ນເຕັມດ້ວຍນ້ຳ
ເພື່ອຈັດຕຽມເຂົ້າໃຫ້ແກ່ຄົນທັງຫລາຍ,
ເພາະພຣະອົງໄດ້ສັ່ງແຜ່ນດິນໄວ້ຢ່າງນັ້ນ.3
ພຣະອົງໃຫ້ຝົນຫົດຕາມຮອຍໄຖ ແລະ ປັບລະດັບໜ້າດິນ;
ແລະ ເຮັດໃຫ້ດິນອ່ອນລົງດ້ວຍການຫົດນ້ຳ ແລະ ອວຍພອນຜົນລະປູກຂອງດິນນັ້ນ.
ພຣະອົງອວຍພອນການເກັບກ່ຽວຢ່າງອຸດົມສົມບູນ,
ແລະ ກຽນຂອງພຣະອົງກໍລົ້ນດ້ວຍຄວາມອຸດົມສົມບູນ.
ທົ່ງຫຍ້າຂຽວສົດໃນທະເລຊາຍ;
ໂນນພູຕ່າງກໍປົກຄຸມດ້ວຍຄວາມຍິນດີ.
ທົ່ງຫຍ້າກໍເຕັມໄປດ້ວຍຝູງສັດ
ແລະ ຮ່ອມພູປົກຄຸມໄປດ້ວຍເມັດພືດ;
ພວກເຂົາພາກັນໂຫ່ຮ້ອງຊື່ນຊົມຍິນດີ ແລະ ຮ້ອງເພງ.
Source notes (3)
- Footnote ຫລື ເໝາະກັບ ໃນພາສາເຮັບເຣີຄຳນີ້ມີຄວາມຫມາຍບໍ່ຊັດເຈນ
- Footnote ຫລື ເຮັດການລຶບລ້າງຄວາມບາບສຳລັບ
- Footnote ຫລື ເພາະພຣະອົງຕຽມຜືນແຜ່ນດິນໄວ້ຢ່າງນັ້ນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.