Biblica® Open Lao Contemporary Version
ເພງສັນລະເສີນ 62
(ເຖິງຫົວໜ້ານັກຮ້ອງ ເຖິງເຢດູທູນ ບົດເພງສັນລະເສີນຂອງດາວິດ)
ຈິດວິນຍານຂອງຂ້ານ້ອຍພັກສະຫງົບໃນພຣະເຈົ້າແຕ່ຜູ້ດຽວ
ຄວາມພົ້ນຂອງຂ້ານ້ອຍມາຈາກພຣະອົງ.
ພຣະອົງແຕ່ພຽງຜູ້ດຽວເປັນສີລາຂອງຂ້ານ້ອຍ ແລະ ເປັນຄວາມພົ້ນຂອງຂ້ານ້ອຍ
ພຣະອົງເປັນປ້ອມປ້ອງກັນຂອງຂ້ານ້ອຍ ຂ້ານ້ອຍຈະບໍ່ມີວັນຫວັ່ນໄຫວ.
ພວກເຈົ້າຈະທຳຮ້າຍຄົນໜຶ່ງຄົນດຽວໄປອີກດົນປານໃດ?
ພວກເຈົ້າທັງໝົດຈະໂຄ່ນລົ້ມລາວ
ຜູ້ເປັນເໝືອນກຳແພງເນີ້ງ ແລະ ຮົ້ວທີ່ຄອນນີ້ບໍ?
ພວກເຂົາຕັ້ງໃຈປົດລາວລົງ
ຈາກຕຳແໜ່ງສູງ;
ພວກເຂົາຍິນດີໃນການຕົວະ.
ປາກຂອງພວກເຂົາກ່າວອວຍພອນ
ແຕ່ໃນໃຈຂອງພວກເຂົານັ້ນ ພວກເຂົາສາບແຊ່ງ.
ຈິດວິນຍານຂອງຂ້ານ້ອຍ, ຈົ່ງພັກສະຫງົບໃນພຣະເຈົ້າແຕ່ຜູ້ດຽວ
ຄວາມຫວັງຂອງຂ້ານ້ອຍແມ່ນມາຈາກພຣະອົງ.
ພຣະອົງແຕ່ພຽງຜູ້ດຽວທີ່ເປັນສີລາຂອງຂ້ານ້ອຍ ແລະ ເປັນຄວາມພົ້ນຂອງຂ້ານ້ອຍ;
ພຣະອົງເປັນປ້ອມປ້ອງກັນຂອງຂ້ານ້ອຍ ຂ້ານ້ອຍຈະບໍ່ຫວັ່ນໄຫວ.
ຄວາມພົ້ນຂອງຂ້ານ້ອຍ ແລະ ກຽດຂອງຂ້ານ້ອຍກໍຢູ່ທີ່ພຣະເຈົ້າ;1
ພຣະອົງເປັນສີລາອັນມີລິດຂອງຂ້ານ້ອຍ, ເປັນທີ່ລີ້ໄພຂອງຂ້ານ້ອຍ.
ປະຊາຊົນທັງຫລາຍ ຈົ່ງໄວ້ວາງໃຈໃນພຣະອົງຕະຫລອດເວລາ;
ຈົ່ງເທຄວາມໃນໃຈຂອງພວກເຈົ້າອອກຕໍ່ພຣະອົງ,
ເພາະພຣະເຈົ້າເປັນທີ່ລີ້ໄພຂອງພວກເຮົາ.
ຄົນຜູ້ຕ່ຳຕ້ອຍເປັນພຽງລົມຫາຍໃຈບາດໜຶ່ງ
ຄົນຜູ້ສູງສັກກໍເປັນພຽງຄຳຕົວະ.
ເມື່ອຂຶ້ນຊັ່ງເບິ່ງນ້ຳໜັກ ພວກເຂົາກໍບໍ່ມີຄ່າອັນໃດ
ທັງສອງເປັນພຽງແຕ່ລົມຫາຍໃຈບາດດຽວ.
ຢ່າເພິ່ງພາການບັງຄັບຂູ່ເຂັນ
ຢ່າພາກພູມໃຈໃນຂອງທີ່ລັກມາ
ເຖິງແມ່ນວ່າຊັບສົມບັດຂອງພວກເຈົ້າມີເພີ່ມຂຶ້ນ
ກໍຢ່າປັກໃຈຢູ່ກັບສິ່ງເຫລົ່ານັ້ນ.
ສິ່ງໜຶ່ງທີ່ພຣະເຈົ້າໄດ້ກ່າວແລ້ວ,
ສອງສິ່ງທີ່ຂ້ານ້ອຍໄດ້ຍິນ
ຄື “ຂ້າແດ່ພຣະເຈົ້າ ອຳນາດເປັນຂອງພຣະອົງ
ແລະ ຂ້າແດ່ອົງພຣະຜູ້ເປັນເຈົ້າ ຄວາມຮັກອັນໝັ້ນຄົງນັ້ນແມ່ນມີຢູ່ໃນພຣະອົງ”
ແລະ “ພຣະອົງໄດ້ໃຫ້ລາງວັນທຸກຄົນ
ຕາມສິ່ງທີ່ພວກເຂົາໄດ້ເຮັດ”.
Source notes (1)
- Footnote ຫລື ພຣະເຈົ້າສູງສຸດເປັນຄວາມພົ້ນ ແລະ ກຽດຂອງຂ້ານ້ອຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.