Biblica® Open Lao Contemporary Version
ເພງສັນລະເສີນ 60
(ພສສ 108:6-13)
(ເຖິງຫົວໜ້ານັກຮ້ອງ ທຳນອງ “ລີລາແຫ່ງຄຳໝັ້ນສັນຍາ”. ມິກທາມຂອງດາວິດ. ເພື່ອສອນ. ເມື່ອດາວິດສູ້ກັບອາຣາມ ນາຮະຣາອິມກັບອາຣາມ ໂຊບາ ແລະ ເມື່ອໂຢອາບຂ້າຊາວເອໂດມຈຳນວນ 12.000 ຄົນ ຢູ່ທີ່ຮ່ອມພູເກືອ)
ຂ້າແດ່ພຣະເຈົ້າ ພຣະອົງໄດ້ປະຕິເສດພວກຂ້ານ້ອຍ ແລະ ລະເບີດທີ່ໝັ້ນຂອງພວກຂ້ານ້ອຍ;
ພຣະອົງໄດ້ໃຈຮ້າຍ ບັດນີ້ ຂໍໂຜດເຮັດໃຫ້ພວກຂ້ານ້ອຍໄດ້ກັບຄືນສູ່ສະພາບດີ!
ພຣະອົງໄດ້ສັ່ນແຜ່ນດິນ ແລະ ເຮັດໃຫ້ແຍກອອກ;
ຂໍພຣະອົງປະສານຮອຍແຕກ ເພາະຂະນະນີ້ແຜ່ນດິນກຳລັງສັ່ນສະເທືອນ.
ພຣະອົງໄດ້ໃຫ້ປະຊາຊົນຂອງພຣະອົງປະເຊີນກັບຊ່ວງເວລາແຫ່ງຄວາມໝົດຫວັງ,
ພຣະອົງໄດ້ໃຫ້ເຫລົ້າອະງຸ່ນທີ່ເຮັດໃຫ້ພວກຂ້ານ້ອຍຍ່າງເຊເໝືອນກັບຄົນທີ່ເມົາເຫລົ້າ.
ແຕ່ສຳລັບຜູ້ທີ່ຢຳເກງພຣະອົງນັ້ນ ພຣະອົງໄດ້ຍົກທຸງຂຶ້ນ
ກາງອອກຕ້ານທະນູ.
ຂໍຊ່ວຍກອບກູ້ພວກຂ້ານ້ອຍດ້ວຍມືຂວາຂອງພຣະອົງ
ເພື່ອບັນດາຜູ້ທີ່ພຣະອົງຮັກຈະຫລຸດພົ້ນ.
ພຣະເຈົ້າໄດ້ກ່າວຈາກບ່ອນນະມັດສະການຂອງພຣະອົງວ່າ:
“ໃນໄຊຊະນະ ເຮົາຈະແບ່ງຊີເຄມ
ແລະ ກຳນົດເຂດຮ່ອມພູຊຸກໂກດ.
ກີເລອາດເປັນຂອງເຮົາ ແລະ ມານາເຊກໍເປັນຂອງເຮົາ
ເອຟຣາອິມຄືໝວກເກາະຂອງເຮົາ,
ຢູດາຄືໄມ້ຄາທາຂອງເຮົາ.
ໂມອາບເປັນອ່າງຊຳລະຂອງເຮົາ,
ເຮົາໂຍນເກີບຂອງເຮົາລົງເທິງເອໂດມ
ແລະ ເຮົາຈະໂຫ່ຮ້ອງດ້ວຍຄວາມມີໄຊເໜືອຟີລິດສະຕິນ”.
ຜູ້ໃດຈະພາຂ້ານ້ອຍໄປຍັງເມືອງປ້ອມປ້ອງກັນ?
ຜູ້ໃດຈະນຳຂ້ານ້ອຍໄປຍັງເອໂດມ?
ພຣະອົງບໍ່ແມ່ນບໍ, ຂ້າແດ່ພຣະເຈົ້າ ບັດນີ້ພຣະອົງຜູ້ໄດ້ປະຕິເສດພວກຂ້ານ້ອຍ.
ແລະ ບໍ່ຮ່ວມທັບກັບພວກຂ້ານ້ອຍອີກຕໍ່ໄປ?
ຂໍຊ່ວຍພວກຂ້ານ້ອຍຕໍ່ສູ້ສັດຕູ
ເພາະຄວາມຊ່ວຍເຫລືອຂອງມະນຸດນັ້ນໄຮ້ຄ່າ
ໂດຍພຣະເຈົ້າພວກເຮົາຈະໄດ້ຮັບໄຊຊະນະ
ພຣະອົງຈະຢຽບສັດຕູທັງຫລາຍຂອງພວກເຮົາ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.