Biblica® Open Lao Contemporary Version
ເພງສັນລະເສີນ 58
(ເຖິງຫົວໜ້ານັກຮ້ອງ ທຳນອງ “ຢ່າທຳລາຍ” ມິກທາມຂອງດາວິດ)
ພວກເຈົ້າຜູ້ເປັນນັກປົກຄອງເວົ້າຢ່າງຍຸຕິທຳແທ້ບໍ?
ພວກເຈົ້າຕັດສິນດ້ວຍຄວາມສະເໝີພາບບໍ?
ບໍ່ເປັນເຊັ່ນນັ້ນ, ໃຈຂອງພວກເຈົ້າຄິດການອັນບໍ່ຍຸຕິທຳ
ມືຂອງພວກເຈົ້າແຈກຈ່າຍຄວາມຮຸນແຮງຢູ່ເທິງແຜ່ນດິນໂລກ.
ຕັ້ງແຕ່ເກີດມາ ຄົນຊົ່ວກໍຫລົງທາງ
ຕັ້ງແຕ່ອອກມາຈາກມົດລູກ ພວກເຂົາກໍເອົາແຕ່ໃຈ, ເວົ້າຕົວະ.
ພິດຂອງພວກເຂົາເໝືອນກັບພິດຂອງງູ,
ເໝືອນກັບງູເຫົ່າທີ່ອັດຫູໄວ້,
ບໍ່ຍອມຟັງສຽງສະກົດຈາກໝໍງູ,
ບໍ່ວ່າໝໍງູຈະເກັ່ງເທົ່າໃດກໍຕາມ.
ຂ້າແດ່ພຣະເຈົ້າ ຂໍພຣະອົງຫັກແຂ້ວໃນປາກຂອງພວກເຂົາ,
ຂ້າແດ່ພຣະເຈົ້າຢາເວ ຂໍພຣະອົງຫັກແຂ້ວຂອງບັນດາສິງດ້ວຍ!
ຂໍໃຫ້ພວກເຂົາລະລາຍໄປດັ່ງນ້ຳທີ່ໄຫລຜ່ານໄປ
ເມື່ອພວກເຂົາເນັ່ງຄັນທະນູ ຂໍໃຫ້ລູກທະນູຂອງພວກເຂົາຕົກໄປ.
ຂໍໃຫ້ພວກເຂົາເປັນເໝືອນທາກທີ່ລະລາຍໄປຂະນະທີ່ມັນຄືບຄານໄປມາ,
ຄືກັບເດັກນ້ອຍທີ່ຫລຸອອກມາທີ່ບໍ່ໄດ້ເຫັນຕາເວັນ.
ກ່ອນທີ່ໝໍ້ຂອງເຈົ້າຈະຮ້ອນໄຟຈາກໄມ້ໜາມ ບໍ່ວ່າໄມ້ສົດ ຫລື ແຫ້ງ
ຄົນຊົ່ວຮ້າຍຈະຖືກກວາດລ້າງໄປຢ່າງໄວ.1
ຄົນຊອບທຳຈະຍິນດີ ເມື່ອພຣະເຈົ້າໄດ້ແກ້ແຄ້ນແທນພວກເຂົາ,
ເມື່ອພວກເຂົາເອົາເລືອດຂອງຄົນຊົ່ວມາລ້າງຕີນຂອງຕົນ.
ແລ້ວຄົນທັງຫລາຍກໍຈະເວົ້າວ່າ:
“ແນ່ນອນແລ້ວ ຄົນຊອບທຳຈະຍັງໄດ້ຮັບບຳເໜັດ;
ແນ່ນອນແລ້ວ ມີພຣະເຈົ້າຜູ້ພິພາກສາໂລກ”.
Source notes (1)
- Footnote ໃນພາສາເຮັບເຣີຂໍ້ນີ້ມີຄວາມຫມາຍບໍ່ຊັດເຈນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.