Biblica® Open Lao Contemporary Version
ເພງສັນລະເສີນ 57
(ພສສ 108:1-5)
(ເຖິງຫົວໜ້ານັກຮ້ອງ ທຳນອງ “ຢ່າທຳລາຍ” ມິກທາມຂອງດາວິດ ເມື່ອໜີຈາກໂຊນເຂົ້າໄປໃນຖ້ຳ)
ຂ້າແດ່ພຣະເຈົ້າ ຂໍເມດຕາຂ້ານ້ອຍ ຂໍເມດຕາຂ້ານ້ອຍດ້ວຍ,
ເພາະຂ້ານ້ອຍໄດ້ລີ້ໄພຢູ່ໃນພຣະອົງ.
ຂ້ານ້ອຍຈະລີ້ໄພຢູ່ໃນຮົ່ມປີກຂອງພຣະອົງ
ຈົນກວ່າໄພພິບັດນີ້ຈະຜ່ານພົ້ນໄປ.
ຂ້ານ້ອຍຮ້ອງຕໍ່ພຣະເຈົ້າອົງສູງສຸດ
ຕໍ່ພຣະເຈົ້າ ຜູ້ເຮັດໃຫ້ຄວາມປະສົງຂອງພຣະອົງສຳເລັດເພື່ອຂ້ານ້ອຍ.
ພຣະອົງໄດ້ສົ່ງຄວາມຊ່ວຍເຫລືອຈາກຟ້າສະຫວັນມາ ແລະ ຊ່ວຍຂ້ານ້ອຍ,
ພຣະອົງປາບຜູ້ທີ່ໄລ່ຕາມຂ້ານ້ອຍຢ່າງດຸເດືອດ
ພຣະເຈົ້າສົ່ງຄວາມຮັກໝັ້ນຄົງ ແລະ ຄວາມສັດຊື່ຂອງພຣະອົງລົງມາ.
ຂ້ານ້ອຍຢູ່ກາງວົງລ້ອມຂອງສິງທັງຫລາຍ;
ຂ້ານ້ອຍນອນຢູ່ໃນທ່າມກາງສັດຮ້າຍທີ່ຫິວເຫຍື່ອ
ຄືບັນດາຄົນທີ່ມີແຂ້ວເປັນຫອກ ແລະ ລູກທະນູ,
ບັນດາຄົນທີ່ມີລິ້ນເປັນດາບຄົມ.
ຂ້າແດ່ພຣະເຈົ້າ ຂໍໃຫ້ພຣະອົງເປັນທີ່ຍົກຍ້ອງເໜືອຟ້າສະຫວັນ;
ຂໍໃຫ້ສະຫງ່າລາສີຂອງພຣະອົງປົກຄຸມໄປທົ່ວໂລກ.
ພວກເຂົາກາງຕາໜ່າງເພື່ອຈັບຕີນຂອງຂ້ານ້ອຍ
ຂ້ານ້ອຍໝອບລົງດ້ວຍຄວາມທຸກໃຈ.
ພວກເຂົາຂຸດຂຸມດັກຕາມທາງຂອງຂ້ານ້ອຍ
ແຕ່ແມ່ນພວກເຂົາເອງທີ່ຕົກລົງໄປໃນຂຸມນັ້ນ.
ຂ້າແດ່ພຣະເຈົ້າ ຈິດໃຈຂອງຂ້ານ້ອຍນັ້ນໝັ້ນຄົງ
ຈິດໃຈຂອງຂ້ານ້ອຍໝັ້ນຄົງ;
ຂ້ານ້ອຍຈະຮ້ອງເພງ ແລະ ຫລິ້ນດົນຕີ.
ຈິດວິນຍານຂອງຂ້ານ້ອຍ ຈົ່ງຕື່ນຂຶ້ນ!
ພິນໃຫຍ່ ແລະ ພິນເຂົາຄູ່ ຈົ່ງບັນເລງ!
ຂ້ານ້ອຍຈະປຸກອາລຸນວັນໃໝ່.
ຂ້າແດ່ອົງພຣະຜູ້ເປັນເຈົ້າ ຂ້ານ້ອຍຈະສັນລະເສີນພຣະອົງທ່າມກາງປະຊາຊາດທັງຫລາຍ;
ຂ້ານ້ອຍຈະຮ້ອງເພງສັນລະເສີນພຣະອົງທ່າມກາງປະຊາຊົນທັງຫລາຍ.
ເພາະຄວາມຮັກຂອງພຣະອົງຍິ່ງໃຫຍ່ຈຸເຖິງຟ້າສະຫວັນ;
ຄວາມສັດຊື່ຂອງພຣະອົງຈຸເຖິງທ້ອງຟ້າ.
ຂ້າແດ່ພຣະເຈົ້າ ຂໍໃຫ້ພຣະອົງເປັນທີ່ຍົກຍ້ອງເໜືອຟ້າສະຫວັນ
ຂໍໃຫ້ສະຫງ່າລາສີຂອງພຣະອົງປົກຄຸມໄປທົ່ວໂລກ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.