Biblica® Open Lao Contemporary Version
ເພງສັນລະເສີນ 56
ເຖິງຫົວໜ້ານັກຮ້ອງ ທຳນອງ “ນົກເຂົາຢູ່ເທິງຕົ້ນໂອກ” ມິກທາມຂອງດາວິດ ເມື່ອຊາວຟີລິດສະຕິນຈັບດາວິດໃນເມືອງກາດ)
ຂ້າແດ່ພຣະເຈົ້າ ຂໍເມດຕາຂ້ານ້ອຍ
ເພາະສັດຕູຂອງຂ້ານ້ອຍໄລ່ຕາມມາຢ່າງຮ້ອນຮົນ;
ພວກເຂົາບຸກກະໜ່ຳເຂົ້າມາໂຈມຕີຕະຫລອດທັງວັນ.
ສັດຕູຂອງຂ້ານ້ອຍໄດ້ໄລ່ຕາມຂ້ານ້ອຍຕະຫລອດເວລາ;
ພວກເຂົາໄດ້ໂຈມຕີຂ້ານ້ອຍຢ່າງໜັກ.
ເມື່ອຂ້ານ້ອຍຢ້ານ ຂ້ານ້ອຍຈະໄວ້ວາງໃຈໃນພຣະອົງ.
ຢູ່ໃນພຣະເຈົ້າ ຜູ້ທີ່ຂ້ານ້ອຍສັນລະເສີນພຣະຄຳ
ໃນພຣະເຈົ້າທີ່ຂ້ານ້ອຍໄວ້ວາງໃຈ ແລະ ຂ້ານ້ອຍຈະບໍ່ຢ້ານກົວ.
ມະນຸດທີ່ຕ້ອງຕາຍຈະເຮັດຫຍັງໃຫ້ຂ້ານ້ອຍໄດ້?
ພວກເຂົາບິດເບືອນຄຳເວົ້າຂອງຂ້ານ້ອຍຕະຫລອດເວລາ
ພວກເຂົາຄິດຫາທາງທຳຮ້າຍຂ້ານ້ອຍຢູ່ສະເໝີ.
ພວກເຂົາຮ່ວມຫົວກັນ ພວກເຂົາຊຸ້ມຢູ່,
ພວກເຂົາຈັບຕາເບິ່ງບາດກ້າວຂອງຂ້ານ້ອຍ,
ຫວັງຈະເອົາຊີວິດຂອງຂ້ານ້ອຍ.
ເພາະຄວາມຊົ່ວຮ້າຍຂອງພວກເຂົາ ຂໍຢ່າໄດ້ປ່ອຍໃຫ້ພວກເຂົາໜີໄປໄດ້;
ຂ້າແດ່ພຣະເຈົ້າ ຂໍນຳຊົນຊາດຕ່າງໆລົງດ້ວຍຄວາມໃຈຮ້າຍຂອງພຣະອົງ.
ຂໍບັນທຶກຄຳຄ່ຳຄວນຂອງຂ້ານ້ອຍໄວ້
ຂໍນັບນ້ຳຕາຂອງຂ້ານ້ອຍໄວ້ໃນໜັງສືມ້ວນຂອງພຣະອົງ1
ສິ່ງເຫລົ່ານີ້ຢູ່ໃນບັນທຶກຂອງພຣະອົງແລ້ວແມ່ນບໍ?
ແລ້ວສັດຕູຂອງຂ້ານ້ອຍຈະຫັນກັບໄປ
ເມື່ອຂ້ານ້ອຍຮ້ອງຂໍຄວາມຊ່ວຍເຫລືອ.
ແລ້ວຂ້ານ້ອຍຈະຮູ້ວ່າພຣະເຈົ້າຢູ່ຝ່າຍຂ້ານ້ອຍ.
ໃນພຣະເຈົ້າ ຜູ້ທີ່ຂ້ານ້ອຍສັນລະເສີນພຣະຄຳ
ໃນພຣະເຈົ້າຢາເວ ຜູ້ທີ່ຂ້ານ້ອຍສັນລະເສີນພຣະຄຳ
ໃນພຣະເຈົ້າ ຂ້ານ້ອຍໄວ້ວາງໃຈ ແລະ ຂ້ານ້ອຍຈະບໍ່ຢ້ານກົວ.
ມະນຸດຈະເຮັດຫຍັງໃຫ້ຂ້ານ້ອຍໄດ້?
ຂ້າແດ່ພຣະເຈົ້າ ຂ້ານ້ອຍຈະເຮັດຕາມທີ່ໄດ້ປະຕິຍານໄວ້ກັບພຣະອົງ;
ຂ້ານ້ອຍຈະຖວາຍເຄື່ອງບູຊາຂອບພຣະຄຸນແດ່ພຣະອົງ.
ເພາະພຣະອົງໄດ້ກອບກູ້ຂ້ານ້ອຍ2ອອກມາຈາກຄວາມຕາຍ
ແລະ ໄດ້ຊ່ວຍກອບກູ້ຕີນຂອງຂ້ານ້ອຍອອກມາຈາກການສະດຸດລົ້ມ,
ເພື່ອວ່າຂ້ານ້ອຍຈະດຳເນີນຢູ່ຕໍ່ໜ້າພຣະເຈົ້າ
ໃນຄວາມສະຫວ່າງຂອງຊີວິດ.3
Source notes (3)
- Footnote ຫລື ເກັບນ້ຳຕາຂອງຂ້ານ້ອຍໄວ້ໃນຖົງເຫລົ້າອະງຸ່ນຂອງພຣະອົງ
- Footnote ຫລື ຈິດວິນຍານຂອງຂ້ານ້ອຍ
- Footnote ຫລື ໃນດິນແດນຂອງຜູ້ມີຊີວິດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.