Biblica® Open Lao Contemporary Version
ເພງສັນລະເສີນ 5
ເຖິງຫົວໜ້ານັກຮ້ອງ, ເປົ່າຂຸ່ຍ, ບົດເພງສັນລະເສີນຂອງດາວິດ)
ຂ້າແດ່ພຣະເຈົ້າຢາເວ ໂຜດຟັງຄຳອະທິຖານຂອງຂ້ານ້ອຍ,
ຂໍໂຜດສົນໃຈການຄ່ຳຄວນຂອງຂ້ານ້ອຍດ້ວຍ.
ຂ້າແດ່ພຣະເຈົ້າຂອງຂ້ານ້ອຍ ແລະ ຜູ້ເປັນກະສັດຂອງຂ້ານ້ອຍ
ຂໍໂຜດຟັງຄຳຮ້ອງຂໍຄວາມຊ່ວຍເຫລືອຂອງຂ້ານ້ອຍ,
ເພາະຂ້ານ້ອຍອະທິຖານຕໍ່ພຣະອົງ.
ຂ້າແດ່ພຣະເຈົ້າຢາເວ, ໃນເວລາເຊົ້າພຣະອົງໄດ້ຍິນສຽງຂ້ານ້ອຍ
ໃນເວລາເຊົ້າຂ້ານ້ອຍຈຶ່ງໄດ້ນຳເອົາຄຳຮ້ອງຂໍຂອງຂ້ານ້ອຍມາຢູ່ຕໍ່ໜ້າພຣະອົງ
ແລະ ຈົດລໍຖ້າຢ່າງມີຄວາມຫວັງ.
ເພາະພຣະອົງບໍ່ແມ່ນພຣະເຈົ້າທີ່ພໍໃຈໃນສິ່ງຊົ່ວຮ້າຍ;
ຄົນຊົ່ວບໍ່ອາດຢູ່ຮ່ວມກັບພຣະອົງໄດ້.
ຄົນຈອງຫອງບໍ່ອາດຢືນຢູ່
ຕໍ່ໜ້າພຣະອົງໄດ້.
ພຣະອົງກຽດຊັງທຸກຄົນທີ່ເຮັດຜິດ;
ພຣະອົງທຳລາຍບັນດາຄົນທີ່ເວົ້າຕົວະ.
ສ່ວນຄົນທີ່ກະຫາຍຫາເລືອດ ແລະ ຄົນຫລອກລວງ
ພຣະເຈົ້າຢາເວກຽດຊັງ.
ແຕ່ໂດຍຄວາມຮັກອັນຍິ່ງໃຫຍ່ຂອງພຣະອົງ
ຂ້ານ້ອຍຈຶ່ງສາມາດເຂົ້າມາຍັງວິຫານຂອງພຣະອົງ;
ຂ້ານ້ອຍກາບລົງດ້ວຍຄວາມເຄົາລົບ
ຕໍ່ໜ້າວິຫານອັນສັກສິດຂອງພຣະອົງ.
ຂ້າແດ່ພຣະເຈົ້າຢາເວ, ຂໍໂຜດນຳຂ້ານ້ອຍໄປໃນຄວາມຊອບທຳຂອງພຣະອົງ
ເພາະສັດຕູຂອງຂ້ານ້ອຍ
ຂໍໂຜດເຮັດຫົນທາງຂອງພຣະອົງໃຫ້ຊື່ໄປຕໍ່ໜ້າຂ້ານ້ອຍ.
ຄຳເວົ້າຈາກປາກຂອງພວກເຂົາແມ່ນບໍ່ສາມາດໄວ້ໃຈໄດ້;
ຫົວໃຈຂອງພວກເຂົາເຕັມໄປດ້ວຍການຄິດຮ້າຍ.
ຄໍຂອງພວກເຂົາຄືຫລຸມຝັງສົບທີ່ເປີດຢູ່;
ພວກເຂົາເວົ້າຕົວະດ້ວຍລີ້ນຂອງພວກເຂົາ.
ຂ້າແດ່ພຣະເຈົ້າ! ຂໍໂຜດປະກາດຄວາມຜິດແກ່ພວກເຂົາ,
ຂໍໃຫ້ພວກເຂົາຫລົ້ມຈົມດ້ວຍກົນອຸບາຍຂອງຕົນເອງ.
ຂໍໂຜດຂັບໄລ່ພວກເຂົາໄປເພາະຄວາມບາບທັງຫລາຍຂອງພວກເຂົາ,
ເພາະພວກເຂົາໄດ້ກະບົດຕໍ່ພຣະອົງ.
ແຕ່ຂໍໃຫ້ທຸກຄົນທີ່ລີ້ໄພຢູ່ໃນພຣະອົງນັ້ນມີຄວາມຍິນດີ;
ໃຫ້ພວກເຂົາຮ້ອງເພງຊື່ນຊົມຍິນດີຢູ່ສະເໝີ,
ຂໍໂຜດກະຈາຍການປົກປ້ອງຄຸ້ມຄອງເໜືອ, ພວກເຂົາ
ເພື່ອວ່າບັນດາຜູ້ທີ່ຮັກນາມຂອງພຣະອົງຈະຊື່ນຊົມຍິນດີໃນພຣະອົງ.
ຂ້າແດ່ພຣະເຈົ້າຢາເວ, ພຣະອົງອວຍພອນຄົນຊອບທຳຢ່າງແນ່ນອນ;
ຄວາມເມດຕາກະລຸນາຂອງພຣະອົງເປັນດັ່ງໂລ່ໂອບອ້ອມພວກເຂົາໄວ້.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.