Biblica® Open Lao Contemporary Version

ເພງສັນລະເສີນ 37:4

Verse 4 is marked below, with the whole chapter around it. Read from the start

(ບົດປະພັນຂອງດາວິດ)

ຢ່າຮ້ອນໃຈເພາະບັນດາຄົນຊົ່ວ

ຫລື ຢ່າອິດສາບັນດາຄົນທີ່ເຮັດຜິດ;

ເພາະວ່າອີກບໍ່ດົນພວກເຂົາກໍຈະຫ່ຽວແຫ້ງໄປເໝືອນຕົ້ນຫຍ້າ

ແລະ ພວກເຂົາຈະຕາຍໄປເໝືອນພືດພັນ.

ຈົ່ງໄວ້ວາງໃຈໃນພຣະເຈົ້າຢາເວ ແລະ ເຮັດຄວາມດີ;

ຈົ່ງອາໄສຢູ່ໃນແຜ່ນດິນນັ້ນ ແລະ ມ່ວນຊື່ນຢູ່ໃນທົ່ງຫຍ້າຢ່າງປອດໄພ.

ຈົ່ງຍິນດີໃນພຣະເຈົ້າຢາເວ,

ແລະ ພຣະອົງຈະໃຫ້ສິ່ງທີ່ໃຈຂອງເຈົ້າປາຖະໜາ.

ຈົ່ງມອບທາງຂອງເຈົ້າໄວ້ກັບພຣະເຈົ້າຢາເວ

ຈົ່ງໄວ້ວາງໃຈໃນພຣະອົງ ແລະ ພຣະອົງຈະເຮັດສິ່ງເຫລົ່ານີ້ ຄື:

ພຣະອົງຈະໃຫ້ບຳເໜັດຄວາມຊອບທຳຂອງເຈົ້າເໝືອນດັ່ງແສງອາລຸນ,

ໃຫ້ຄວາມທ່ຽງທຳຂອງເຈົ້າເໝືອນດັ່ງແສງອາທິດໃນຍາມທ່ຽງ.

ຈົ່ງສະຫງົບຢູ່ຕໍ່ໜ້າພຣະເຈົ້າຢາເວ

ແລະ ອົດທົນລໍຖ້າພຣະອົງ;

ຢ່າຮ້ອນໃຈເມື່ອຄົນທັງຫລາຍປະສົບຄວາມສຳເລັດໃນທາງຂອງພວກເຂົາ

ເມື່ອແຜນຊົ່ວຂອງພວກເຂົາລຸລ່ວງໄປດ້ວຍດີ.

ຈົ່ງລະເວັ້ນຈາກຄວາມໃຈຮ້າຍ ແລະ ຫັນຈາກຄວາມໂກດຮ້າຍ;

ຢ່າຮ້ອນໃຈ ເຊິ່ງມັນມີແຕ່ຈະນຳໄປສູ່ຄວາມຊົ່ວຮ້າຍ.

ເພາະບັນດາຄົນຊົ່ວຮ້າຍຈະຖືກທຳລາຍ

ແຕ່ບັນດາຜູ້ທີ່ຫວັງໃນພຣະເຈົ້າຢາເວ ກໍຈະໄດ້ແຜ່ນດິນນັ້ນເປັນມໍລະດົກ.

ອີກຊົ່ວຂະນະໜຶ່ງ, ຄົນຊົ່ວກໍຈະໝົດໄປ

ເຖິງວ່າເຈົ້າຈະຊອກຫາພວກເຂົາ ແຕ່ກໍຈະບໍ່ພົບພວກເຂົາ.

ສ່ວນຄົນທີ່ຖ່ອມຕົວຈະໄດ້ຮັບແຜ່ນດິນນັ້ນເປັນມໍລະດົກ

ແລະ ຊື່ນຊົມຍິນດີກັບສັນຕິສຸກ ແລະ ຄວາມຈະເລີນຮຸ່ງເຮືອງ.

ຄົນຊົ່ວຮ້າຍວາງແຜນປອງຮ້າຍຜູ້ຊອບທຳ

ແລະ ກັດແຂ້ວຂອງຕົນໃສ່ພວກເຂົາ;

ແຕ່ອົງພຣະຜູ້ເປັນເຈົ້າຫົວຂັວນໃສ່ຄົນຊົ່ວຮ້າຍ,

ເພາະພຣະອົງຮູ້ວ່າວັນເວລາຂອງພວກເຂົານັ້ນໃກ້ຈະມາເຖິງແລ້ວ.

ຄົນຊົ່ວຮ້າຍຖອດດາບ

ແລະ ກົ່ງຄັນທະນູ

ເພື່ອໂຄ່ນລົ້ມຄົນທຸກຍາກ ແລະ ຂັດສົນ,

ເພື່ອຂ້າຄົນທີ່ດຳເນີນໃນທາງທ່ຽງທຳ.

ແຕ່ດາບຂອງພວກເຂົາເອງຈະແທງທະລຸຫົວໃຈຂອງພວກເຂົາເອງ,

ແລະ ທະນູຂອງພວກເຂົາຈະຖືກຫັກທຳລາຍ.

ສິ່ງເລັກນ້ອຍທີ່ຄົນຊອບທຳມີຢູ່ນັ້ນ

ກໍດີກວ່າຄວາມຮັ່ງມີຂອງຄົນຊົ່ວຮ້າຍ;

ເພາະອຳນາດຂອງຄົນຊົ່ວຮ້າຍຈະຖືກກຳຈັດໄປ

ແຕ່ພຣະເຈົ້າຢາເວ ຈະຊູຜູ້ຊອບທຳໄວ້.

ຄົນທີ່ບໍ່ມີຕຳໜິກໍໃຊ້ຊີວິດຢູ່ພາຍໃຕ້ການເບິ່ງແຍງຂອງພຣະເຈົ້າຢາເວ,

ມໍລະດົກຂອງພວກເຂົາຈະຍືນຍົງຕະຫລອດໄປ.

ໃນຍາມເກີດໄພພິບັດ ພວກເຂົາຈະບໍ່ອັບອາຍ

ໃນຍາມກັນອຶດຢາກອາຫານ ພວກເຂົາກໍຈະຊື່ນຊົມໃນຄວາມອຸດົມສົມບູນ.

ສ່ວນຄົນຊົ່ວຮ້າຍກໍຈະຈິບຫາຍ

ເຖິງວ່າສັດຕູຂອງພຣະເຈົ້າຢາເວຈະເປັນເໝືອນດອກໄມ້ໃນທົ່ງຫຍ້າ,

ພວກເຂົາກໍຈະສູນສິ້ນໄປເໝືອນຄວັນ.

ຄົນຊົ່ວຮ້າຍຂໍຢືມແລ້ວບໍ່ໃຊ້ຄືນ

ສ່ວນຄົນຊອບທຳໃຫ້ດ້ວຍໃຈກວ້າງຂວາງ;

ບັນດາຜູ້ທີ່ພຣະເຈົ້າຢາເວອວຍພອນຈະໄດ້ແຜ່ນດິນນັ້ນເປັນມໍລະດົກ,

ແຕ່ບັນດາຜູ້ທີ່ພຣະອົງສາບແຊ່ງນັ້ນຈະຕ້ອງຖືກທຳລາຍ.

ຖ້າພຣະເຈົ້າຢາເວເຮັດໃຫ້ບາດກ້າວ

ຂອງຄົນທີ່ຍິນດີໃນພຣະອົງນັ້ນໝັ້ນຄົງ;

ເຖິງວ່າລາວສະດຸດ ລາວກໍຈະບໍ່ລົ້ມລົງ

ເພາະມືຂອງພຣະເຈົ້າຢາເວຄ້ຳຊູລາວໄວ້.

ຂ້ານ້ອຍເຄີຍເປັນຊາຍໜຸ່ມ ແລະ ດຽວນີ້ກໍເຖົ້າແກ່ແລ້ວ,

ແຕ່ຍັງບໍ່ເຄີຍເຫັນຄົນຊອບທຳຖືກປະຖິ້ມ

ຫລື ລູກຫລານຂອງພວກເຂົາຕ້ອງຂໍທານເພື່ອລ້ຽງຊີວິດ.

ພວກເຂົາເອື້ອເຟື້ອເພື່ອແຜ່ສະເໝີ ແລະ ໃຫ້ຢືມຢ່າງບໍ່ຂີ້ຖີ່;

ລູກຫລານຂອງພວກເຂົາກໍໄດ້ຮັບພອນ.

ຈົ່ງປະຖິ້ມຄວາມຊົ່ວ ແລະ ເຮັດຄວາມດີ

ແລ້ວທ່ານຈະອາໄສຢູ່ໃນແຜ່ນດິນນັ້ນຕະຫລອດໄປເປັນນິດ.

ເພາະພຣະເຈົ້າຢາເວຮັກຄົນທ່ຽງທຳ

ແລະ ຈະບໍ່ປະຖິ້ມຄົນສັດຊື່ຂອງພຣະອົງ.

ຄົນທີ່ເຮັດຊົ່ວຈະຖືກທຳລາຍລົງຈົນໝົດສິ້ນ

ແຕ່ລູກຫລານຂອງຄົນຊົ່ວຮ້າຍຈະພິນາດ.

ຄົນຊອບທຳຈະໄດ້ແຜ່ນດິນນັ້ນເປັນມໍລະດົກ

ແລະ ຈະອາໄສຢູ່ທີ່ນັ້ນຕະຫລອດໄປ.

ປາກຂອງບັນດາຜູ້ຊອບທຳເວົ້າເຖິງສະຕິປັນຍາ

ແລະ ລິ້ນຂອງພວກເຂົາກໍເວົ້າສິ່ງທີ່ຍຸຕິທຳ.

ກົດບັນຍັດຂອງພຣະເຈົ້ານັ້ນຢູ່ໃນໃຈຂອງພວກເຂົາ

ຕີນຂອງພວກເຂົາຈະບໍ່ພາດພັ້ງ.

ຄົນຊົ່ວຮ້າຍໝອບຄອຍຖ້າຄົນຊອບທຳ

ເຈດຕະນາເອົາຊີວິດຂອງພວກເຂົາ,

ແຕ່ພຣະເຈົ້າຢາເວຈະບໍ່ປ່ອຍພວກເຂົາໃຫ້ຢູ່ໃນກຳມືຂອງຄົນຊົ່ວຮ້າຍ

ຫລື ໃຫ້ຄົນຊອບທຳຖືກຕັດສິນລົງໂທດເມື່ອຂຶ້ນສານ.

ຈົ່ງມີຄວາມຫວັງໃນພຣະເຈົ້າຢາເວ

ແລະ ເດີນຕາມທາງຂອງພຣະອົງ.

ພຣະອົງຈະຍົກເຈົ້າໃຫ້ໄດ້ແຜ່ນດິນນັ້ນເປັນມໍລະດົກ

ທ່ານຈະເຫັນຄົນຊົ່ວຮ້າຍຖືກທຳລາຍ.

ຂ້ານ້ອຍເຫັນຄົນຊົ່ວຮ້າຍ ແລະ ໂຫດຮ້າຍ

ຈະເລີນຮຸ່ງເຮືອງເໝືອນດັ່ງຕົ້ນໄມ້ພື້ນເມືອງທີ່ອຸດົມສົມບູນ,

ແຕ່ບໍ່ດົນລາວກໍຈາກໄປ ແລະ ດັບສູນ

ເຖິງວ່າຂ້ານ້ອຍໄດ້ຊອກຫາລາວ ແຕ່ກໍບໍ່ພົບລາວອີກເລີຍ.

ຈົ່ງພິຈາລະນາຄົນທີ່ບໍ່ມີທີ່ຕິ, ສັງເກດເບິ່ງຄົນທ່ຽງທຳ;

ບັນດາຄົນທີ່ສະແຫວງຫາສັນຕິກໍຈະມີອະນາຄົດ.1

ແຕ່ຄົນບາບທຸກຄົນຈະຖືກທຳລາຍໄປ;

ຄົນຊົ່ວຈະບໍ່ມີອະນາຄົດ.

ຄວາມພົ້ນຂອງຄົນຊອບທຳມານັ້ນຈາກພຣະເຈົ້າຢາເວ;

ພຣະອົງເປັນປ້ອມປ້ອງກັນຂອງພວກເຂົາໃນຍາມເດືອດຮ້ອນ.

ພຣະເຈົ້າຢາເວຊ່ວຍພວກເຂົາ ແລະ ກອບກູ້ພວກເຂົາ;

ພຣະອົງຈະກອບກູ້ພວກເຂົາຈາກຄົນຊົ່ວຮ້າຍ ແລະ ຊ່ວຍພວກເຂົາໃຫ້ປອດໄພ,

ເພາະພວກເຂົາລີ້ໄພຢູ່ໃນພຣະອົງ.

Source notes (1)

Footnote ຫລື ລູກຫລານ ເຊັ່ນດຽວກັບຂໍ້ 38

Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.