Biblica® Open Lao Contemporary Version
ເພງສັນລະເສີນ 38
(ບົດເພງສັນລະເສີນຂອງດາວິດ ຄຳອ້ອນວອນຂໍ)
ຂ້າແດ່ພຣະເຈົ້າຢາເວ ຂໍຢ່າລົງໂທດຂ້ານ້ອຍເມື່ອພຣະອົງໃຈຮ້າຍ
ຫລື ຕີສອນຂ້ານ້ອຍເມື່ອພຣະອົງໂກດຮ້າຍ.
ເພາະລູກທະນູຂອງພຣະອົງປັກເລິກໃນຕົວຂ້ານ້ອຍ
ມືຂອງພຣະອົງກໍລົງມາເທິງຂ້ານ້ອຍ.
ຮ່າງກາຍຂອງຂ້ານ້ອຍຊຸດໂຊມເພາະຄວາມໂກດຮ້າຍຂອງພຣະອົງ;
ກະດູກຂອງຂ້ານ້ອຍກໍເສື່ອມໂຊມເພາະບາບຂອງຂ້ານ້ອຍ.
ຄວາມຜິດຂອງຂ້ານ້ອຍຖ້ວມຂ້ານ້ອຍ
ເໝືອນພາລະໜັກເກີນຈະແບກໄວ້.
ບາດແຜຂອງຂ້ານ້ອຍເນົ່າເປື່ອຍ ແລະ ໜ້າລັງກຽດ
ເພາະບາບອັນໂງ່ຂອງຂ້ານ້ອຍ.
ຂ້ານ້ອຍຖືກເຮັດໃຫ້ຊຸດໂຊມລົງ ແລະ ຕົກຕ່ຳຫລາຍ
ຂ້ານ້ອຍຄ່ຳຄວນຢູ່ຕະຫລອດທັງວັນ.
ຫລັງຂອງຂ້ານ້ອຍເຕັມໄປດ້ວຍຄວາມເຈັບປວດ
ຮ່າງກາຍຂອງຂ້ານ້ອຍກໍບໍ່ແຂງແຮງ.
ຂ້ານ້ອຍອ່ອນແອ ແລະ ເຈັບຊ້ຳ
ຂ້ານ້ອຍຄວນຄາງດ້ວຍຄວາມທຸກໃຈ.
ຂ້າແດ່ອົງພຣະຜູ້ເປັນເຈົ້າ ຄວາມປາຖະໜາທັງໝົດຂອງຂ້ານ້ອຍເປີດເຜີຍຢູ່ຕໍ່ໜ້າພຣະອົງ,
ສຽງຖອນໃຈຂອງຂ້ານ້ອຍກໍເຊື່ອງຈາກພຣະອົງບໍ່ໄດ້
ໃຈຂອງຂ້ານ້ອຍເຕັ້ນ ກຳລັງຂອງຂ້ານ້ອຍກໍລົດລົງ
ແມ່ນແຕ່ຕາຂອງຂ້ານ້ອຍກໍມືດມົວໄປ.
ໝູ່ເພື່ອນ ແລະ ສະຫາຍຂອງຂ້ານ້ອຍຕ່າງກໍຕີຕົວອອກຫ່າງຈາກຂ້ານ້ອຍເພາະບາດແຜຂອງຂ້ານ້ອຍ;
ເພື່ອນບ້ານກໍລີ້ໜ້າ.
ບັນດາຜູ້ທີ່ຢາກສັງຫານຂ້ານ້ອຍກໍຫ້າງແຮ້ວຂອງພວກເຂົາ,
ບັນດາຜູ້ທີ່ຈະເຮັດຮ້າຍຂ້ານ້ອຍກໍເວົ້າເຖິງແຕ່ຄວາມຈິບຫາຍຂອງຂ້ານ້ອຍ.
ພວກເຂົາວາງອຸບາຍ ແລະ ຕົວະຕະຫລອດທັງວັນ.
ແຕ່ຂ້ານ້ອຍເປັນເໝືອນຄົນຫູໜວກທີ່ບໍ່ສາມາດໄດ້ຍິນ,
ແລະ ເປັນເໝືອນຄົນໃບ້ທີ່ເວົ້າບໍ່ໄດ້;
ຂ້ານ້ອຍກາຍເປັນເໝືອນຄົນທີ່ບໍ່ໄດ້ຍິນສິ່ງໃດ
ຜູ້ທີ່ບໍ່ສາມາດອ້າປາກໂຕ້ຕອບໄດ້.
ຂ້າແດ່ພຣະເຈົ້າຢາເວ ຂ້ານ້ອຍຄອຍຖ້າພຣະອົງຢູ່
ຂ້າແດ່ອົງພຣະຜູ້ເປັນເຈົ້າ ພຣະເຈົ້າຂອງຂ້ານ້ອຍ ພຣະອົງຈະຕອບ
ເພາະຂ້ານ້ອຍໄດ້ເວົ້າວ່າ: “ຂໍຢ່າໃຫ້ພວກເຂົາໂອ້ອວດ
ຫລື ຍົກຕົວຂຶ້ນເໜືອຂ້ານ້ອຍເມື່ອຕີນຂອງຂ້ານ້ອຍພາດໄປ”.
ເພາະຂ້ານ້ອຍກຳລັງຈະລົ້ມລົງ
ແລະ ຄວາມເຈັບປວດກໍຢູ່ກັບຂ້ານ້ອຍສະເໝີ.
ຂ້ານ້ອຍສາລະພາບຄວາມຊົ່ວຊ້າຂອງຂ້ານ້ອຍ
ຂ້ານ້ອຍຮ້ອນໃຈໃນຄວາມບາບຂອງຕົນ.
ຫລາຍຄົນກາຍເປັນສັດຕູຂອງຂ້ານ້ອຍໂດຍບໍ່ມີສາເຫດ;
ຄົນທີ່ກຽດຊັງຂ້ານ້ອຍໂດຍບໍ່ມີສາເຫດກໍມີຈຳນວນຫລາຍ.
ຄົນທີ່ຕອບແທນຄວາມດີຂອງຂ້ານ້ອຍດ້ວຍຄວາມຊົ່ວ
ກໍກ່າວຫາຂ້ານ້ອຍ
ເຖິງວ່າຂ້ານ້ອຍພະຍາຍາມຈະເຮັດຄວາມດີເທົ່ານັ້ນ.
ຂ້າແດ່ພຣະເຈົ້າຢາເວ ຂໍຢ່າໄດ້ປະຖິ້ມຂ້ານ້ອຍ;
ຂ້າແດ່ພຣະເຈົ້າຂອງຂ້ານ້ອຍ ຂໍຢ່າຢູ່ຫ່າງໄກຈາກຂ້ານ້ອຍ.
ຂໍໃຫ້ຟ້າວມາຊ່ວຍຂ້ານ້ອຍດ້ວຍ,
ອົງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ພົ້ນຂອງຂ້ານ້ອຍ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.