Biblica® Open Lao Contemporary Version
ເພງສັນລະເສີນ 33
ບັນດາຜູ້ຊອບທຳ ຈົ່ງຮ້ອງເພງຊື່ນຊົມຍິນດີແດ່ພຣະເຈົ້າຢາເວ;
ເປັນການສົມຄວນແລ້ວທີ່ຜູ້ຊອບທຳຈະສັນລະເສີນພຣະອົງ.
ຈົ່ງສັນລະເສີນພຣະເຈົ້າຢາເວດ້ວຍສຽງພິນ;
ຈົ່ງບັນເລງເພງແດ່ພຣະອົງດ້ວຍພິນສິບສາຍ.
ຈົ່ງຂັບຮ້ອງເພງບົດໃໝ່ຖວາຍພຣະອົງ
ຫລິ້ນດົນຕີຢ່າງຊຳນານ ແລະ ໂຫ່ຮ້ອງຊື່ນຊົມຍິນດີ.
ເພາະຖ້ອຍຄຳຂອງພຣະເຈົ້າຢາເວນັ້ນຖືກຕ້ອງ ແລະ ເປັນຈິງ;
ພຣະອົງສັດຊື່ໃນທຸກສິ່ງທີ່ເຮັດ.
ພຣະເຈົ້າຢາເວຮັກຄວາມຊອບທຳ ແລະ ຄວາມຍຸຕິທຳ;
ແຜ່ນດິນໂລກເຕັມໄປດ້ວຍຄວາມຮັກໝັ້ນຄົງຂອງພຣະອົງ.
ໂດຍຖ້ອຍຄຳຂອງພຣະເຈົ້າຢາເວ ຟ້າສະຫວັນກໍຖືກສ້າງຂຶ້ນ,
ດວງດາວທັງຫລາຍມີຂຶ້ນໂດຍລົມປາກຂອງພຣະອົງ.
ພຣະອົງຮວບຮວມຫ້ວງນ້ຳທະເລໄວ້ໃນໄຫ1
ພຣະອົງເກັບຫ້ວງນ້ຳເລິກໄວ້ໃນຄັງ.
ໃຫ້ທົ່ວທັງໂລກຢຳເກງພຣະເຈົ້າຢາເວ
ໃຫ້ຄົນທົ່ວໂລກເຄົາລົບນັບຖືພຣະອົງ.
ເພາະພຣະອົງກ່າວ ໂລກກໍຖືກສ້າງຂຶ້ນ
ພຣະອົງສັ່ງ ມັນກໍຄົງຢູ່.
ພຣະເຈົ້າຢາເວໄດ້ທຳລາຍແຜນການຂອງຊົນຊາດທັງຫລາຍ,
ພຣະອົງຂັດຂວາງເປົ້າໝາຍຂອງຄົນທັງຫລາຍ.
ແຕ່ແຜນການຂອງພຣະເຈົ້າຢາເວໝັ້ນຄົງຕະຫລອດໄປ,
ຄວາມປະສົງໃນໃຈຂອງພຣະອົງດຳລົງຢູ່ທຸກຊົ່ວອາຍຸ.
ຄວາມສຸກມີແກ່ຊົນຊາດທີ່ມີພຣະເຈົ້າຢາເວເປັນພຣະເຈົ້າ
ຄືປະຊາຊົນທີ່ພຣະອົງໄດ້ເລືອກເປັນມໍລະດົກຂອງພຣະອົງ.
ພຣະເຈົ້າຢາເວໄດ້ເບິ່ງລົງມາຈາກຟ້າສະຫວັນ
ແລະ ເຫັນມວນມະນຸດທຸກຄົນ;
ຈາກທີ່ຢູ່ຂອງພຣະອົງ ພຣະອົງໄດ້ຈັບຕາເບິ່ງ
ທຸກຄົນທີ່ອາໄສຢູ່ໃນໂລກ
ພຣະອົງຜູ້ສ້າງຈິດໃຈຂອງທຸກຄົນ
ຜູ້ພິຈາລະນາທຸກສິ່ງທີ່ພວກເຂົາເຮັດ.
ກະສັດລອດຊີວິດໄດ້ບໍ່ແມ່ນເພາະຂະໜາດຂອງກອງທັບ;
ນັກຮົບລອດຊີວິດໄດ້ບໍ່ແມ່ນເພາະກຳລັງອັນຫລວງຫລາຍຂອງຕົນ.
ຫວັງໃຫ້ມ້າຮົບຊ່ວຍກອບກູ້ກໍບໍ່ມີປະໂຫຍດ
ເຖິງວ່າມັນແຂງແຮງ ມັນກໍບໍ່ສາມາດຊ່ວຍໃຫ້ປອດໄພ,
ແຕ່ຕາຂອງພຣະເຈົ້າຢາເວນັ້ນເຝົ້າເບິ່ງບັນດາຜູ້ທີ່ຢຳເກງພຣະອົງ,
ເບິ່ງບັນດາຜູ້ທີ່ຫວັງໃນຄວາມຮັກໝັ້ນຄົງຂອງພຣະອົງ,
ເພື່ອຈະກອບກູ້ພວກເຂົາໃຫ້ພົ້ນຈາກຄວາມຕາຍ
ແລະ ຮັກສາພວກເຂົາໃຫ້ມີຊີວິດຢູ່ໃນຍາມອຶດຢາກອາຫານ.
ພວກເຮົາຄອຍຖ້າພຣະເຈົ້າຢາເວດ້ວຍຄວາມຫວັງ
ພຣະອົງເປັນຄວາມຊ່ວຍເຫລືອຂອງພວກເຮົາ ແລະ ເປັນໂລ່ຂອງພວກເຮົາ.
ຈິດໃຈຂອງພວກເຮົາຊື່ນຊົມຍິນດີໃນພຣະອົງ
ເພາະເຮົາໄວ້ໃຈໃນນາມບໍລິສຸດຂອງພຣະອົງ.
ຂ້າແດ່ພຣະເຈົ້າຢາເວ ຂໍຄວາມຮັກໝັ້ນຄົງຂອງພຣະອົງດຳລົງຢູ່ກັບພວກຂ້ານ້ອຍທັງຫລາຍ,
ແມ່ນແຕ່ໃນຂະນະທີ່ພວກຂ້ານ້ອຍທັງຫລາຍຝາກຄວາມຫວັງໄວ້ໃນພຣະອົງ.
Source notes (1)
- Footnote ຫລື ຮວບຮວມນ້ຳທະເລທັງຫລາຍໄວ້ດ້ວຍກັນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.