Biblica® Open Lao Contemporary Version
ເພງສັນລະເສີນ 32
(ມັດຄິນບົດໜຶ່ງຂອງດາວິດ)
ຄວາມສຸກມີແກ່ຜູ້ທີ່
ການລ່ວງລະເມີດຂອງລາວໄດ້ຮັບການອະໄພ
ບາບຂອງລາວກໍໄດ້ຮັບການປົກປິດ.
ຄວາມສຸກມີແກ່ຜູ້ທີ່
ພຣະເຈົ້າຢາເວບໍ່ຖືໂທດບາບຂອງພວກເຂົາ
ແລະ ຜູ້ທີ່ຈິດວິນຍານບໍ່ມີການຫລອກລວງ
ເມື່ອຂ້ານ້ອຍມິດງຽບຢູ່
ກະດູກຂອງຂ້ານ້ອຍກໍຊຸດໂຊມໄປ
ໂດຍການຄ່ຳຄວນຂອງຂ້ານ້ອຍຕະຫລອດທັງວັນ.
ເພາະທັງກາງເວັນ ແລະ ກາງຄືນ
ມືຂອງພຣະອົງໜັກຢູ່ເທິງຂ້ານ້ອຍ;
ກຳລັງຂອງຂ້ານ້ອຍກໍອ່ອນແຮງລົງ
ເໝືອນຢູ່ໃນກາງແດດລະດູຮ້ອນ.
ແລ້ວຂ້ານ້ອຍກໍສາລະພາບຄວາມບາບຕໍ່ພຣະອົງ
ແລະ ບໍ່ປິດບັງຄວາມຊົ່ວຊ້າຂອງຕົນໄວ້
ຂ້ານ້ອຍກ່າວວ່າ: “ຂ້ານ້ອຍຈະສາລະພາບ
ການລ່ວງລະເມີດທັງຫລາຍຂອງຂ້ານ້ອຍຕໍ່ພຣະເຈົ້າຢາເວ”
ແລະ ພຣະອົງກໍໄດ້ໃຫ້ອະໄພ
ຄວາມຜິດບາບຂອງຂ້ານ້ອຍ.
ເຫດສະນັ້ນ ໃຫ້ຜູ້ທີ່ສັດຊື່ທຸກຄົນອະທິຖານຕໍ່ພຣະອົງ
ໃນຂະນະທີ່ຍັງມີໂອກາດພົບພຣະອົງໄດ້;
ເມື່ອກະແສນ້ຳມາກພັດຊັດເຂົ້າມາ
ນ້ຳນັ້ນກໍຈະບໍ່ຖ້ວມເຖິງພວກເຂົາຢ່າງແນ່ນອນ.
ພຣະອົງເປັນທີ່ລີ້ໄພຂອງຂ້ານ້ອຍ;
ພຣະອົງປົກປ້ອງຂ້ານ້ອຍໃຫ້ພົ້ນຈາກຄວາມເດືອດຮ້ອນ
ແລະ ໂອບອ້ອມຂ້ານ້ອຍດ້ວຍບົດເພງແຫ່ງການກອບກູ້.
ເຮົາຈະໃຫ້ຄຳແນະນຳເຈົ້າ ແລະ ສອນເຈົ້າໃນທາງທີ່ເຈົ້າຄວນໄປ;
ເຮົາຈະໃຫ້ຄຳປຶກສາແກ່ເຈົ້າດ້ວຍສາຍຕາແຫ່ງຄວາມຮັກຂອງເຮົາ.
ຢ່າເປັນເໝືອນມ້າ ຫລື ລໍ
ທີ່ບໍເຂົ້າໃຈຫຍັງ
ແຕ່ຈະຕ້ອງໃຊ້ບັງຫຽນບັງຄັບຄວບຄຸມ
ບໍ່ດັ່ງນັ້ນພວກມັນກໍຈະບໍ່ຍອມມານຳເຈົ້າ.
ຄົນຊົ່ວຮ້າຍນັ້ນພະເຊີນກັບວິບັດຫລວງຫລາຍ
ແຕ່ຄວາມຮັກໝັ້ນຄົງຂອງພຣະເຈົ້າຢາເວ
ໂອບອ້ອມບັນດາຜູ້ທີ່ໄວ້ໃຈໃນພຣະອົງ.
ພວກທ່ານຜູ້ຊອບທຳ ຈົ່ງຊື່ນຊົມຍິນດີ ແລະ ຍິນດີໃນພຣະເຈົ້າຢາເວ
ພວກທ່ານທຸກຄົນຜູ້ມີຈິດໃຈທ່ຽງທຳ ຈົ່ງຮ້ອງເພງ!
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.