Biblica® Open Lao Contemporary Version
ເພງສັນລະເສີນ 31
(ພສສ 71:1-3)
ເຖິງຫົວໜ້ານັກຮ້ອງ ບົດເພງສັນລະເສີນຂອງດາວິດ
ຂ້າແດ່ພຣະເຈົ້າຢາເວ ຂ້ານ້ອຍໄດ້ລີ້ໄພຢູ່ໃນພຣະອົງ
ຂໍຢ່າໃຫ້ຂ້ານ້ອຍອັບອາຍເລີຍ;
ຂໍກອບກູ້ຂ້ານ້ອຍໃນຄວາມຊອບທຳຂອງພຣະອົງ.
ຂໍພຣະອົງໄດ້ງ່ຽງຫູຟັງຂ້ານ້ອຍ,
ມາຊ່ວຍຂ້ານ້ອຍໂດຍໄວ;
ຂໍເປັນສີລາລີ້ໄພໃຫ້ຂ້ານ້ອຍ,
ເປັນປ້ອມປ້ອງກັນອັນໝັ້ນຄົງເພື່ອຊ່ວຍຂ້ານ້ອຍໃຫ້ປອດໄພ.
ເພາະພຣະອົງເປັນສີລາ ແລະ ເປັນປ້ອມປ້ອງກັນຂອງຂ້ານ້ອຍ,
ຂໍໂຜດນຳພາ ແລະ ຊີ້ທາງໃຫ້ແກ່ຂ້ານ້ອຍ ໂດຍເຫັນແກ່ນາມຂອງພຣະອົງ.
ຂໍຊ່ວຍຂ້ານ້ອຍໃຫ້ພົ້ນຈາກບ້ວງແຮ້ວທີ່ດັກຈັບຂ້ານ້ອຍໄວ້,
ເພາະພຣະອົງເປັນທີ່ລີ້ໄພຂອງຂ້ານ້ອຍ.
ຂ້ານ້ອຍມອບຈິດວິນຍານຂອງຂ້ານ້ອຍໄວ້ໃນມືຂອງພຣະອົງ;
ຂ້າແດ່ພຣະເຈົ້າຢາເວ ພຣະເຈົ້າຜູ້ສັດຊື່ຂອງຂ້ານ້ອຍ ຂໍໂຜດໄຖ່ຂ້ານ້ອຍດ້ວຍ.
ຂ້ານ້ອຍກຽດຊັງຜູ້ທີ່ຢຶດຕິດໃນຮູບເຄົາລົບທີ່ໄຮ້ຄ່າ;
ຂ້ານ້ອຍໄວ້ວາງໃຈໃນພຣະເຈົ້າຢາເວ.
ຂ້ານ້ອຍຈະຍິນດີ ແລະ ຊື່ນຊົມຍິນດີໃນຄວາມຮັກອັນໝັ້ນຄົງຂອງພຣະອົງ.
ເພາະພຣະອົງເຫັນຄວາມທຸກຍາກລຳບາກຂອງຂ້ານ້ອຍ
ແລະ ໄດ້ຮູ້ຄວາມເຈັບປວດໃນຈິດໃຈຂອງຂ້ານ້ອຍ.
ພຣະອົງບໍ່ໄດ້ມອບຂ້ານ້ອຍໄວ້ໃນມືຂອງສັດຕູ
ແຕ່ໄດ້ວາງຕີນຂອງຂ້ານ້ອຍໄວ້ໃນທີ່ກວ້າງຂວາງ.
ຂ້າແດ່ພຣະເຈົ້າຢາເວ ຂໍເມດຕາຂ້ານ້ອຍ ເພາະຂ້ານ້ອຍກຳລັງທຸກໃຈ;
ຕາຂອງຂ້ານ້ອຍອິດເມື່ອຍເພາະຄວາມໂສກເສົ້າ,
ທັງຈິດວິນຍານ ແລະ ຮ່າງກາຍຂອງຂ້ານ້ອຍກໍໂສກເສົ້າ.
ຊີວິດຂອງຂ້ານ້ອຍສູນໄປກັບຄວາມເຈັບປວດ
ແລະ ປີເດືອນຂອງຂ້ານ້ອຍກໍສູນໄປກັບການຄ່ຳຄວນ;
ກຳລັງຂອງຂ້ານ້ອຍກໍອ່ອນລົງເພາະຄວາມທຸກຍາກ1ຂອງຂ້ານ້ອຍ
ກະດູກຂອງຂ້ານ້ອຍກໍເສື່ອມໄປ.
ເນື່ອງຈາກສັດຕູທັງໝົດຂອງຂ້ານ້ອຍ
ຂ້ານ້ອຍຕົກເປັນຂີ້ປາກໃຫ້ເພື່ອນບ້ານເຢາະເຢີ້ຍ
ແລະ ເປັນທີ່ໜ້າລັງກຽດຂອງເພື່ອນສະໜິດ
ບັນດາຄົນທີ່ພົບເຫັນຂ້ານ້ອຍເທິງຖະໜົນກໍຟ້າວໜີໄປຈາກຂ້ານ້ອຍ.
ຂ້ານ້ອຍຖືກລືມເໝືອນກັບວ່າຂ້ານ້ອຍເປັນຄົນທີ່ຕາຍແລ້ວ
ຂ້ານ້ອຍກາຍເປັນເໝືອນພາຊະນະທີ່ແຕກແລ້ວ.
ຂ້ານ້ອຍໄດ້ຍິນຄຳນິນທາຢ່າງຫລວງຫລາຍ,
ມີຄວາມຢ້ານຢູ່ຮອບດ້ານ
ພວກເຂົາຄົບຄິດກັນຕໍ່ສູ້ຂ້ານ້ອຍ
ແລະ ໝາຍເອົາຊີວິດຂອງຂ້ານ້ອຍ.
ຂ້າແດ່ພຣະເຈົ້າຢາເວ ແຕ່ຂ້ານ້ອຍໄດ້ວາງໃຈໃນພຣະອົງ;
ຂ້ານ້ອຍກ່າວວ່າ: “ພຣະອົງເປັນພຣະເຈົ້າຂອງຂ້ານ້ອຍ”.
ວັນເວລາຂອງຂ້ານ້ອຍກໍຢູ່ໃນມືຂອງພຣະອົງ
ຂໍປົດປ່ອຍຂ້ານ້ອຍອອກຈາກມືຂອງບັນດາສັດຕູຂອງຂ້ານ້ອຍ,
ອອກຈາກບັນດາຜູ້ທີ່ໄລ່ຕາມເອົາຊີວິດຂອງຂ້ານ້ອຍ.
ຂໍໃຫ້ໃບໜ້າຂອງພຣະອົງສ່ອງແສງລົງເທິງຜູ້ຮັບໃຊ້ຂອງພຣະອົງ;
ໂຜດຊ່ວຍຂ້ານ້ອຍໃຫ້ພົ້ນໂດຍຄວາມຮັກອັນໝັ້ນຄົງຂອງພຣະອົງ.
ຂ້າແດ່ພຣະເຈົ້າຢາເວ ຂໍຢ່າໃຫ້ຂ້ານ້ອຍໄດ້ອັບອາຍ
ເພາະຂ້ານ້ອຍຮ້ອງຫາພຣະອົງ
ແຕ່ຂໍໃຫ້ຄົນຊົ່ວຮ້າຍໄດ້ຮັບຄວາມອັບອາຍ
ແລະ ຂໍໃຫ້ຄົນຊົ່ວຮ້າຍນັ້ນນອນຢູ່ຢ່າງມິດງຽບໃນແດນມໍລະນາ.
ຂໍໃຫ້ຮີມສົບທີ່ຂີ້ຕົວະຂອງພວກເຂົາມິດງຽບຢູ່
ເພາະພວກເຂົາເວົ້າອວດດີຕໍ່ສູ້ຄົນຊອບທຳ
ດ້ວຍຄວາມຈອງຫອງ ແລະ ດູຖູກ.
ຄວາມດີຂອງພຣະອົງນັ້ນຫລວງຫລາຍຈັກເທົ່າໃດ
ທີ່ພຣະອົງໄດ້ສະສົມໄວ້ເພື່ອບັນດາຄົນທີ່ຢຳເກງພຣະອົງ
ທີ່ພຣະອົງໄດ້ຈັດຕຽມໄວ້ໃຫ້ບັນດາຄົນທີ່ລີ້ໄພຢູ່ໃນພຣະອົງ
ຕໍ່ໜ້າທຸກຄົນ.
ໃນຮົ່ມເງົາທີ່ພຣະອົງຢູ່ ພຣະອົງໄດ້ເຊື່ອງພວກເຂົາໄວ້
ໃຫ້ພົ້ນຈາກການປອງຮ້າຍຂອງມະນຸດ;
ໃນທີ່ຢູ່ຂອງພຣະອົງ ພຣະອົງໄດ້ຮັກສາພວກເຂົາໄວ້
ໃຫ້ພົ້ນຈາກລີ້ນທີ່ກ່າວຫາທັງຫລາຍ.
ຂໍສັນລະເສີນພຣະເຈົ້າຢາເວ
ເພາະພຣະອົງໄດ້ສະແດງຄວາມຮັກອັນອັດສະຈັນຂອງພຣະອົງຕໍ່ຂ້ານ້ອຍ
ເມື່ອຂ້ານ້ອຍຢູ່ໃນເມືອງທີ່ຖືກລ້ອມໄວ້.
ໃນຍາມທີ່ຂ້ານ້ອຍຕົກໃຈ ຂ້ານ້ອຍກ່າວວ່າ:
“ຂ້ານ້ອຍຖືກຕັດອອກຈາກສາຍຕາຍຂອງພຣະອົງ!”
ແຕ່ພຣະອົງໄດ້ຍິນສຽງຮ້ອງຂໍຄວາມເມດຕາຂອງຂ້ານ້ອຍ
ເມື່ອຂ້ານ້ອຍຮ້ອງຫາພຣະອົງໃຫ້ຊ່ວຍ.
ປະຊາຊົນຂອງພຣະເຈົ້າຜູ້ສັດຊື່ ຈົ່ງຮັກພຣະເຈົ້າຢາເວ!
ພຣະເຈົ້າຢາເວປົກປ້ອງບັນດາຜູ້ທີ່ສັດຊື່
ແຕ່ຜູ້ທີ່ຈອງຫອງນັ້ນພຣະອົງລົງໂທດຢ່າງເຕັມທີ່.
ຈົ່ງເຂັ້ມແຂງ ແລະ ກ້າຫານ
ທ່ານທັງຫລາຍທີ່ຝາກຄວາມຫວັງໃນພຣະເຈົ້າຢາເວ.
Source notes (1)
- Footnote ຫລື ຄວາມຜິດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.