Biblica® Open Lao Contemporary Version
ເພງສັນລະເສີນ 28
(ບົດປະພັນຂອງດາວິດ)
ຂ້າແດ່ພຣະເຈົ້າຢາເວ ຂ້ານ້ອຍຮ້ອງຫາພຣະອົງ;
ພຣະອົງເປັນສີລາຂອງຂ້ານ້ອຍ
ຂໍຢ່າໄດ້ເຮັດຄືຫູໜວກໃສ່ຂ້ານ້ອຍ.
ເພາະຖ້າພຣະອົງຍັງເສີຍຢູ່
ຂ້ານ້ອຍກໍອາດຈະເປັນເໝືອນຄົນທີ່ລົງໄປຍັງແດນມໍລະນາ.
ຂໍໂຜດຟັງຄຳອ້ອນວອນຂໍຄວາມເມດຕາຂອງຂ້ານ້ອຍ
ຂະນະທີ່ຂ້ານ້ອຍຮ້ອງຂໍຄວາມຊ່ວຍເຫລືອຈາກພຣະອົງ,
ຂະນະທີ່ຂ້ານ້ອຍຍົກມືຂຶ້ນ
ຕໍ່ສະຖານທີ່ສັກສິດທີ່ສຸດຂອງພຣະອົງ.
ຂໍຢ່າລາກຂ້ານ້ອຍໄປພ້ອມກັນກັບບັນດາຄົນຊົ່ວຮ້າຍ,
ກັບບັນດາຄົນທີ່ເຮັດສິ່ງຊົ່ວຮ້າຍ,
ຄົນທີ່ເວົ້າກັບເພື່ອນບ້ານຂອງຕົນຢ່າງສະໜິດສະໜົມ
ແຕ່ພາຍໃນໃຈຂອງພວກເຂົານັ້ນເຕັມໄປດ້ວຍຄວາມຊົ່ວຮ້າຍ.
ຂໍໂຜດຕອບແທນພວກເຂົາຕາມສິ່ງທີ່ພວກເຂົາໄດ້ເຮັດ
ແລະ ຕາມການກະທຳທີ່ຊົ່ວຮ້າຍຂອງພວກເຂົາ;
ຂໍໂຜດຕອບແທນພວກເຂົາຕາມສິ່ງທີ່ມືຂອງພວກເຂົາໄດ້ເຮັດ
ແລະ ສະໜອງຄືນໃຫ້ພວກເຂົາຕາມທີ່ພວກເຂົາໄດ້ເຮັດ.
ເພາະພວກເຂົາບໍ່ຄຳນຶງເຖິງການກະທຳຂອງພຣະເຈົ້າຢາເວ
ແລະ ສິ່ງທີ່ມືຂອງພຣະອົງໄດ້ກະທຳ,
ພຣະອົງຈະຮື້ພວກເຂົາລົງ
ແລະ ບໍ່ສ້າງພວກເຂົາຂຶ້ນອີກເລີຍ.
ຂໍຖວາຍສັນລະເສີນແດ່ພຣະເຈົ້າຢາເວ
ເພາະພຣະອົງໄດ້ຍິນຄຳຮ້ອງຂໍຄວາມເມດຕາຂອງຂ້ານ້ອຍ.
ພຣະເຈົ້າຢາເວເປັນກຳລັງ ແລະ ເປັນໂລ່ຂອງຂ້ານ້ອຍ
ຈິດໃຈຂອງຂ້ານ້ອຍວາງໃຈໃນພຣະອົງ ແລະ ພຣະອົງໄດ້ຊ່ວຍເຫລືອຂ້ານ້ອຍ.
ຈິດໃຈຂອງຂ້ານ້ອຍກະໂດດໂລດເຕັ້ນດ້ວຍຄວາມຊື່ນຊົມຍິນດີ
ແລະ ສັນລະເສີນພຣະອົງດ້ວຍບົດເພງຂອງຂ້ານ້ອຍ.
ພຣະເຈົ້າຢາເວເປັນກຳລັງສຳລັບຄົນຂອງພຣະອົງ
ເປັນປ້ອມປ້ອງກັນແຫ່ງຄວາມພົ້ນສຳລັບຜູ້ທີ່ພຣະອົງໄດ້ເຈີມໄວ້.
ຂໍໂຜດຊ່ວຍຄົນຂອງພຣະອົງ ແລະ ອວຍພອນຜູ້ທີ່ເປັນມໍລະດົກຂອງພຣະອົງ
ຂໍລ້ຽງດູພວກເຂົາເໝືອນດັ່ງຄົນລ້ຽງແກະ ແລະ ອຸ້ມພວກເຂົາໄວ້ຕະຫລອດໄປ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.