Biblica® Open Lao Contemporary Version
ເພງສັນລະເສີນ 25
ບົດປະພັນຂອງດາວິດ.
ຂ້າແດ່ພຣະເຈົ້າຢາເວ ພຣະເຈົ້າຂອງຂ້ານ້ອຍ,
ຂ້ານ້ອຍຂໍມອບຄວາມໄວ້ວາງໃຈຂອງຂ້ານ້ອຍໄວ້ໃນພຣະອົງ.
ຂ້ານ້ອຍໄວ້ວາງໃຈໃນພຣະອົງ;
ຂໍຢ່າໃຫ້ຂ້ານ້ອຍອັບອາຍ
ທັງຢ່າໃຫ້ບັນດາສັດຕູຂອງຂ້ານ້ອຍມີໄຊຊະນະເໜືອຂ້ານ້ອຍ.
ບໍ່ມີຜູ້ໃດທີ່ຫວັງໃນພຣະອົງ
ແລ້ວຈະຕ້ອງອັບອາຍ,
ແຕ່ຄວາມອັບອາຍນັ້ນຈະເກີດກັບ
ຄົນທີ່ທໍລະຍົດໂດຍບໍ່ມີສາເຫດນັ້ນ.
ຂ້າແດ່ພຣະເຈົ້າຢາເວ ຂໍໂຜດສະແດງຫົນທາງຂອງພຣະອົງແກ່ຂ້ານ້ອຍ,
ຂໍໂຜດສອນວິຖີຂອງພຣະອົງແກ່ຂ້ານ້ອຍ.
ຂໍນຳຂ້ານ້ອຍໄປໃນຄວາມຈິງຂອງພຣະອົງ ແລະ ສອນຂ້ານ້ອຍ,
ເພາະພຣະອົງເປັນພຣະເຈົ້າ ອົງພຣະຜູ້ຊ່ວຍໃຫ້ພົ້ນຂອງຂ້ານ້ອຍ,
ແລະ ຄວາມຫວັງຂອງຂ້ານ້ອຍແມ່ນຢູ່ໃນພຣະອົງຕະຫລອດມື້.
ຂ້າແດ່ພຣະເຈົ້າຢາເວ ໂຜດລະນຶກເຖິງຄວາມເມດຕາ ແລະ ຄວາມຮັກອັນຍິ່ງໃຫຍ່ຂອງພຣະອົງ,
ເຊິ່ງມີມາຕັ້ງແຕ່ອະດີດ.
ຂໍຢ່າລະນຶກເຖິງຄວາມບາບທັງຫລາຍ
ແລະ ວິຖີອັນດື້ດ້ານໃນໄວໜຸ່ມຂອງຂ້ານ້ອຍ,
ຂໍໂຜດລະນຶກເຖິງຂ້ານ້ອຍຕາມຄວາມຮັກອັນໝັ້ນຄົງຂອງພຣະອົງ,
ຂ້າແດ່ພຣະເຈົ້າຢາເວ ເພາະພຣະອົງນັ້ນແສນດີ.
ພຣະເຈົ້າຢາເວແສນດີ ແລະ ທ່ຽງທຳ;
ເຫດສະນັ້ນ ພຣະອົງຈຶ່ງໄດ້ສອນທາງຂອງພຣະອົງໃຫ້ແກ່ຄົນບາບ.
ພຣະອົງນຳຄົນຖ່ອມໃຈໃນສິ່ງທີ່ຖືກຕ້ອງ
ແລະ ສອນທາງຂອງພຣະອົງແກ່ພວກເຂົາ.
ທຸກທາງຂອງພຣະເຈົ້າຢາເວນັ້ນມີຄວາມຮັກ ແລະ ຄວາມສັດຊື່
ແກ່ບັນດາຜູ້ທີ່ຮັກສາກົດເກນແຫ່ງພັນທະສັນຍາຂອງພຣະອົງ.
ຂ້າແດ່ພຣະເຈົ້າຢາເວ ໂດຍເຫັນແກ່ນາມຂອງພຣະອົງ,
ຂໍອະໄພຄວາມຊົ່ວຂອງຂ້ານ້ອຍ ເຖິງວ່າມັນຈະໃຫຍ່ຫລວງ.
ແລ້ວຜູ້ໃດຄືຄົນທີ່ຢຳເກງພຣະເຈົ້າຢາເວ?
ພຣະອົງຈະສອນພວກເຂົາເຖິງທາງທີ່ພວກເຂົາຄວນຈະເລືອກ.1
ພວກເຂົາຈະມີຊີວິດທີ່ຈະເລີນຮຸ່ງເຮືອງ,
ແລະ ລູກຫລານຂອງພວກເຂົາຈະໄດ້ຮັບແຜ່ນດິນນັ້ນເປັນມໍລະດົກ.
ພຣະເຈົ້າຢາເວວາງໃຈໃນບັນດາຜູ້ທີ່ຢຳເກງພຣະອົງ;
ພຣະອົງຢືນຢັນພັນທະສັນຍາຂອງພຣະອົງແກ່ພວກເຂົາ.
ຕາຂອງຂ້ານ້ອຍເບິ່ງທີ່ພຣະເຈົ້າຢາເວສະເໝີ,
ເພາະພຣະອົງເທົ່ານັ້ນທີ່ຈະປົດບ້ວງແຮ້ວອອກຈາກຕີນຂອງຂ້ານ້ອຍ.
ຂໍໂຜດຫັນມາຫາຂ້ານ້ອຍ ແລະ ເມດຕາຂ້ານ້ອຍດ້ວຍ,
ເພາະຂ້ານ້ອຍໂດດດ່ຽວ ແລະ ທຸກທໍລະມານ.
ຂໍບັນເທົາຄວາມທຸກຮ້ອນໃນໃຈຂອງຂ້ານ້ອຍ
ແລະ ຂໍໃຫ້ຂ້ານ້ອຍຫລຸດພົ້ນຈາກຄວາມທຸກທໍລະມານຂອງຂ້ານ້ອຍ.
ຂໍໂຜດຫລຽວເບິ່ງຄວາມທຸກທໍລະມານຂອງຂ້ານ້ອຍ ແລະ ຄວາມທຸກໃຈຂອງຂ້ານ້ອຍ
ແລະ ນຳເອົາຄວາມບາບທັງໝົດຂອງຂ້ານ້ອຍອອກໄປ.
ຂໍໂຜດເບິ່ງວ່າສັດຕູຂອງຂ້ານ້ອຍຈຳນວນຫລວງຫລາຍເທົ່າໃດ
ແລະ ພວກເຂົາກຽດຊັງຂ້ານ້ອຍຮຸນແຮງປານໃດ!
ຂໍຄຸ້ມຄອງ ແລະ ຊ່ວຍຊີວິດຂ້ານ້ອຍ;
ຢ່າໃຫ້ຂ້ານ້ອຍຕ້ອງອັບອາຍ,
ເພາະຂ້ານ້ອຍລີ້ໄພຢູ່ໃນພຣະອົງ.
ຂໍໃຫ້ຄວາມສັດຊື່ ແລະ ຄວາມທ່ຽງທຳປົກປ້ອງຂ້ານ້ອຍໄວ້,
ຂ້າແດ່ພຣະເຈົ້າຢາເວ,2 ເພາະຄວາມຫວັງຂອງຂ້ານ້ອຍຢູ່ໃນພຣະອົງ.
ຂ້າແດ່ພຣະເຈົ້າ ຂໍໂຜດໄຖ່ອິດສະຣາເອນ,
ໃຫ້ພົ້ນຈາກຄວາມເດືອດຮ້ອນທັງໝົດຂອງພວກເຂົາ!
Source notes (2)
- Footnote ຫລື ທາງພຣະອົງເລືອກ
- Footnote ພາສາເຮັບເຣີບໍ່ມີຄຳວ່າ ພຣະເຈົ້າຢາເວ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.