Biblica® Open Lao Contemporary Version
ເພງສັນລະເສີນ 19
ເຖິງຫົວໜ້ານັກຮ້ອງ ບົດເພງສັນລະເສີນຂອງດາວິດ.
ຟ້າສະຫວັນປະກາດສະຫງ່າລາສີຂອງພຣະເຈົ້າ;
ທ້ອງຟ້າປະກາດຜົນງານຂອງມືຂອງພຣະອົງ.
ມື້ໃດກໍຕາມຟ້າສະຫວັນກັບທ້ອງຟ້າຕ່າງກໍກ່າວເຖິງພຣະເຈົ້າ;
ຄືນໃດກໍຕາມພວກມັນກໍເປີດເຜີຍຄວາມຮູ້.
ພວກມັນບໍ່ມີຄຳກ່າວ, ພວກມັນບໍ່ມີຖ້ອຍຄຳ;
ບໍ່ໄດ້ຍິນສຽງໃດຈາກພວກມັນ.
ແຕ່ເຖິງປານນັ້ນສຽງຂອງພວກມັນກໍຍັງອອກໄປທົ່ວໂລກ,
ຖ້ອຍຄຳຂອງພວກມັນໄປເຖິງສຸດປາຍແຜ່ນດິນໂລກ.
ພຣະອົງໄດ້ກຳນົດຕຳແໜ່ງຂອງຕາເວັນໄວ້ເທິງຟ້າສະຫວັນ.
ເຊິ່ງເປັນເໝືອນເຈົ້າບ່າວທີ່ກຳລັງອອກມາຈາກຫ້ອງຂອງຕົນ,
ເໝືອນນັກກິລາຜູ້ຍິ່ງໃຫຍ່ທີ່ກຳລັງຊື່ນຊົມຍິນດີແລ່ນເຂົ້າສູ່ການແຂ່ງຂັນຂອງຕົນ.
ຕາເວັນຂຶ້ນຈາກຟາກໜຶ່ງຂອງຟ້າສະຫວັນ
ແລະ ໂຄຈອນໄປຍັງອີກຟາກໜຶ່ງ;
ບໍ່ມີສິ່ງໃດຫລົບລີ້ຈາກຄວາມຮ້ອນຂອງມັນໄດ້.
ກົດບັນຍັດຂອງພຣະເຈົ້າຢາເວແມ່ນສົມບູນ,
ຟື້ນຟູຈິດວິນຍານ.
ກົດເກນຂອງພຣະເຈົ້າຢາເວເປັນທີ່ເຊື່ອຖືໄດ້,
ເຮັດໃຫ້ຄົນທີ່ຮູ້ໜ້ອຍມີປັນຍາ.
ຂໍ້ບັງຄັບຂອງພຣະເຈົ້າຢາເວນັ້ນຖືກຕ້ອງ,
ໃຫ້ຄວາມຊື່ນຊົມຍິນດີແກ່ຈິດໃຈ.
ຂໍ້ຄຳສັ່ງຂອງພຣະເຈົ້າຢາເວແມ່ນຊັດເຈນ,
ໃຫ້ຄວາມສະຫວ່າງແກ່ຕາ.
ຄວາມຢຳເກງພຣະເຈົ້າຢາເວນັ້ນບໍລິສຸດ
ຍືນຍົງຕະຫລອດໄປ.
ດຳລັດຂອງພຣະເຈົ້າຢາເວນັ້ນແນ່ນອນ,
ແລະ ທັງໝົດນັ້ນຊອບທຳ.
ຂໍ້ປະຕິບັດນັ້ນລ້ຳຄ່າຍິ່ງກວ່າຄຳ,
ລ້ຳຄ່າຍິ່ງກວ່າຄຳບໍລິສຸດ;
ຂໍ້ປະຕິບັດນັ້ນຫວານກວ່ານ້ຳເຜິ້ງ,
ຫວານກວ່ານ້ຳເຜິ້ງທີ່ຍ້ອຍລົງຈາກຮັງເຜິ້ງ.
ສິ່ງເຫລົ່ານີ້ໄດ້ຕັກເຕືອນຜູ້ຮັບໃຊ້ຂອງພຣະອົງ;
ຄົນໃດທີ່ປະຕິບັດຕາມສິ່ງເຫລົ່ານີ້ຈະໄດ້ຮັບລາງວັນຍິ່ງໃຫຍ່.
ແຕ່ຜູ້ໃດສາມາດສັງເກດເຫັນຄວາມຜິດພາດຂອງຕົນ?
ຂໍໂຜດອະໄພຄວາມຜິດທີ່ປິດບັງໄວ້ຂອງຂ້ານ້ອຍ.
ຂໍໂຜດຢັບຢັ້ງຜູ້ຮັບໃຊ້ຂອງພຣະອົງບໍ່ໃຫ້ເຮັດບາບໂດຍຕັ້ງໃຈ;
ຂໍຢ່າໃຫ້ຄວາມບາບເຫລົ່ານັ້ນປົກຄອງຂ້ານ້ອຍ.
ແລ້ວຂ້ານ້ອຍກໍຈະບໍ່ມີຕຳໜິ,
ບໍລິສຸດຈາກການລ່ວງລະເມີດອັນໃຫຍ່ຫລວງ.
ຂໍໃຫ້ວາຈາທີ່ອອກມາຈາກປາກຂອງຂ້ານ້ອຍ ແລະ ການສຳນຶກໃນໃຈຂອງຂ້ານ້ອຍນັ້ນ
ເປັນທີ່ພໍໃຈໃນສາຍຕາຂອງພຣະອົງ,
ຂ້າແດ່ພຣະເຈົ້າຢາເວ, ຜູ້ເປັນສີລາຂອງຂ້ານ້ອຍ ແລະ ເປັນພຣະຜູ້ໄຖ່ຂອງຂ້ານ້ອຍ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.