Biblica® Open Lao Contemporary Version

ເພງສັນລະເສີນ 18

(2ຊມອ 22:1-51)

ເຖິງຫົວໜ້ານັກຮ້ອງ ບົດເພງສັນລະເສີນຂອງດາວິດຜູ້ຮັບໃຊ້ຂອງພຣະເຈົ້າຢາເວ. ເພິ່ນໄດ້ຮ້ອງຖວາຍແດ່ພຣະເຈົ້າຢາເວ ເມື່ອເວລາທີ່ພຣະເຈົ້າຢາເວຊ່ວຍກູ້ເພິ່ນອອກມາຈາກມືຂອງສັດຕູທັງໝົດຂອງເພິ່ນ ແລະ ອອກຈາກມືຂອງໂຊໂລໂມນດ້ວຍ. ເພິ່ນກ່າວວ່າ:

ຂ້າແດ່ພຣະເຈົ້າຢາເວ, ຜູ້ເປັນກຳລັງຂອງຂ້ານ້ອຍ ຂ້ານ້ອຍຮັກພຣະອົງ.

ພຣະເຈົ້າຢາເວເປັນສີລາ ເປັນປ້ອມປ້ອງກັນ ແລະ ຜູ້ຊ່ວຍກູ້ຂອງຂ້ານ້ອຍ;

ພຣະເຈົ້າຂອງຂ້ານ້ອຍນັ້ນເປັນສີລາທີ່ຂ້ານ້ອຍເຂົ້າໄປລີ້ໄພ,

ເປັນໂລ່1 ແລະ ເປັນເຂົາສັດ2ແຫ່ງຄວາມພົ້ນ, ເປັນທີ່ໝັ້ນຂອງຂ້ານ້ອຍ.

ຂ້ານ້ອຍຮ້ອງຕໍ່ພຣະເຈົ້າຢາເວ ຜູ້ທີ່ສົມຄວນແກ່ການສັນລະເສີນ,

ແລ້ວຂ້ານ້ອຍກໍໄດ້ຮັບການຊ່ວຍໃຫ້ຫລຸດພົ້ນຈາກບັນດາສັດຕູຂອງຂ້ານ້ອຍ.

ເຊືອກແຫ່ງຄວາມຕາຍໄດ້ພັນຂ້ານ້ອຍໄວ້

ກະແສແຫ່ງຄວາມຈິບຫາຍກໍໄດ້ຄອບງຳຂ້ານ້ອຍ.

ເຊືອກຂອງຂຸມຝັງສົບກໍພັນອ້ອມໂຕຂ້ານ້ອຍໄວ້;

ບ້ວງແຮ້ວແຫ່ງຄວາມຕາຍຢູ່ຕໍ່ໜ້າຂ້ານ້ອຍ.

ໃນຍາມທຸກໃຈ ຂ້ານ້ອຍໄດ້ຮ້ອງຫາພຣະເຈົ້າຢາເວ;

ຂ້ານ້ອຍຮ້ອງຂໍຄວາມຊ່ວຍເຫລືອຈາກພຣະເຈົ້າຂອງຂ້ານ້ອຍ.

ພຣະອົງຟັງສຽງຂອງຂ້ານ້ອຍຈາກວິຫານຂອງພຣະອົງ;

ສຽງຮ້ອງຂອງຂ້ານ້ອຍໄປເຖິງພຣະອົງ, ເຂົ້າໄປໃນຫູຂອງພຣະອົງ.

ແຜ່ນດິນໂລກສັ່ນສະເທືອນ ແລະ ໄຫວ,

ແລະ ຮາກຖານຂອງພູເຂົາທັງຫລາຍກໍສັ່ນຄອນ;

ພູເຂົາເຫລົ່ານັ້ນສັ່ນສະເທືອນເພາະພຣະອົງໃຈຮ້າຍ.

ຄວັນພຸ່ງອອກມາຈາກຮູດັງຂອງພຣະອົງ;

ແປວໄຟທີ່ເຜົາໄໝ້ຢູ່ກໍອອກມາຈາກປາກຂອງພຣະອົງ,

ຖ່ານຫີນທີ່ເຜົາໄໝ້ຢູ່ກໍອອກມາຈາກປາກຂອງພຣະອົງ.

ພຣະອົງໄດ້ເປີດຟ້າສະຫວັນ ແລະ ໄດ້ລົງມາ;

ເມກມືດໜານັ້ນກໍຢູ່ໃຕ້ຕີນຂອງພຣະອົງ.

ພຣະອົງຂຶ້ນຂີ່ເຄຣຸບ ແລະ ບິນລົງມາ;

ພຣະອົງບິນດ້ວຍປີກແຫ່ງກະແສລົມ.

ພຣະອົງໃຫ້ຄວາມມືດປົກຄຸມເປັນຮົ່ມເງົາອ້ອມຮອບພຣະອົງ

ໃຫ້ເມກຝົນອັນມືດຄື້ມໃນທ້ອງຟ້າຢູ່ອ້ອມພຣະອົງ

ແສງສະຫວ່າງກ້າແຫ່ງການມາປາກົດຂອງພຣະອົງທະລຸຜ່ານໝູ່ເມກອອກມາ,

ພ້ອມດ້ວຍພະຍຸໝາກເຫັບ ແລະ ສາຍຟ້າຜ່າ.

ພຣະເຈົ້າຢາເວເປັ່ງສຽງຟ້າຮ້ອງຈາກຟ້າສະຫວັນ;

ສຽງຂອງອົງຜູ້ສູງສຸດດັງກ້ອງ.3

ພຣະອົງຍິງລູກທະນູຂອງພຣະອົງ ແລ້ວເຮັດໃຫ້ບັນດາສັດຕູກະຈັດກະຈາຍໄປ,

ພຣະອົງສົ່ງຟ້າແມບ ເຮັດໃຫ້ພວກເຂົາແຕກໜີໄປ.

ເມື່ອພຣະເຈົ້າຢາເວກ່າວເຕືອນ,

ເມື່ອລົມພຸ່ງອອກຈາກດັງຂອງພຣະອົງ,

ຮ່ອມພູໃນທະເລກໍເຜີຍອອກ

ຮາກຖານຂອງໂລກກໍປາກົດ.

ພຣະອົງໄດ້ຍື່ນມືຈາກເບື້ອງເທິງລົງມາ ແລະ ຈັບຂ້ານ້ອຍໄວ້;

ພຣະອົງດຶງຂ້ານ້ອຍອອກມາຈາກນ້ຳເລິກ.

ພຣະອົງຊ່ວຍຂ້ານ້ອຍໃຫ້ພົ້ນຈາກສັດຕູຜູ້ມີອຳນາດ,

ຈາກສັດຕູຂອງຂ້ານ້ອຍ ເຊິ່ງແຂງແຮງກວ່າຂ້ານ້ອຍ.

ພວກເຂົາບຸກໂຈມຕີຂ້ານ້ອຍໃນຍາມທີ່ຂ້ານ້ອຍປະສົບໄພພິບັດ

ແຕ່ພຣະເຈົ້າຢາເວໄດ້ຄ້ຳຊູຂ້ານ້ອຍໄວ້.

ພຣະອົງນຳຂ້ານ້ອຍອອກມາຍັງບ່ອນກວ້າງຂວາງ;

ພຣະອົງກອບກູ້ຂ້ານ້ອຍໄວ້ເພາະພຣະອົງຍິນດີໃນຕົວຂອງຂ້ານ້ອຍ.

ພຣະເຈົ້າຢາເວໄດ້ຕອບແທນຂ້ານ້ອຍຕາມຄວາມຊອບທຳຂອງຂ້ານ້ອຍ.

ມອບບຳເໜັດໃຫ້ຂ້ານ້ອຍເພາະຂ້ານ້ອຍນັ້ນເປັນຄົນມືສະອາດ.

ເພາະຂ້ານ້ອຍໄດ້ຮັກສາທາງຂອງພຣະເຈົ້າຢາເວ;

ຂ້ານ້ອຍບໍ່ໄດ້ເຮັດຊົ່ວໂດຍຫັນໄປຈາກພຣະເຈົ້າຂອງຂ້ານ້ອຍ.

ກົດບັນຍັດທຸກຂໍ້ຂອງພຣະອົງກໍຢູ່ຕໍ່ໜ້າຂ້ານ້ອຍ;

ຂ້ານ້ອຍບໍ່ໄດ້ຫັນໄປຈາກດຳລັດຂອງພຣະອົງ.

ຂ້ານ້ອຍບໍ່ໄດ້ມີຕຳໜິເມື່ອຢູ່ຕໍ່ໜ້າພຣະອົງ

ແລະ ໄດ້ຮັກສາຕົນເອງໃຫ້ພົ້ນຈາກຄວາມບາບ.

ພຣະເຈົ້າຢາເວໄດ້ມອບບຳເໜັດໃຫ້ແກ່ຂ້ານ້ອຍຕາມຄວາມຊອບທຳຂອງຂ້ານ້ອຍ,

ຕາມທີ່ເຫັນວ່າຂ້ານ້ອຍເປັນຄົນມືສະອາດ

ພຣະອົງໄດ້ສະແດງພຣະອົງເອງວ່າສັດຊື່ຕໍ່ຄົນທີ່ສັດຊື່,

ພຣະອົງໄດ້ສະແດງພຣະອົງເອງວ່າບໍ່ມີຕຳໜິຕໍ່ຄົນທີ່ບໍ່ມີຕຳໜິ,

ພຣະອົງໄດ້ສະແດງພຣະອົງເອງວ່າບໍລິສຸດຕໍ່ຄົນທີ່ບໍລິສຸດ,

ແຕ່ພຣະອົງໄດ້ສະແດງພຣະອົງເອງວ່າສະຫລາດຫລັກແຫລມຕໍ່ຄົນທີ່ຫລອກລວງ.

ພຣະອົງໄດ້ຊ່ວຍຜູ້ທີ່ຖ່ອມໃຈລົງໃຫ້ຫລຸດພົ້ນ

ແຕ່ພຣະອົງໄດ້ດຶງບັນດາຄົນທີ່ຜູ້ທີ່ມີຕາຈອງຫອງລົງມາ.

ຂ້າແດ່ພຣະເຈົ້າຢາເວ ພຣະອົງໄດ້ຮັກສາຕະກຽງຂອງຂ້ານ້ອຍໃຫ້ລຸກຢູ່;

ພຣະເຈົ້າຂອງຂ້ານ້ອຍໄດ້ປ່ຽນຄວາມມືດຂອງຂ້ານ້ອຍໃຫ້ກາຍເປັນຄວາມສະຫວ່າງ.

ຂ້ານ້ອຍສາມາດບຸກໂຈມຕີກອງທັບໄດ້4 ດ້ວຍຄວາມຊ່ວຍເຫລືອຈາກພຣະອົງ;

ແລະ ຂ້ານ້ອຍປີນຂ້າມກຳແພງເມືອງໄດ້ໂດຍພຣະເຈົ້າຂອງຂ້ານ້ອຍ.

ສຳລັບພຣະເຈົ້າ ວິຖີທາງຂອງພຣະອົງນັ້ນແມ່ນດີເລີດ,

ຖ້ອຍຄຳຂອງພຣະເຈົ້າຢາເວບໍ່ມີທີ່ຕິ;

ພຣະອົງເປັນໂລ່ສຳລັບທຸກຄົນທີ່ເຂົ້າມາລີ້ໄພໃນພຣະອົງ.

ເພາະນອກຈາກພຣະເຈົ້າຢາເວແລ້ວຜູ້ໃດທີ່ເປັນພຣະເຈົ້າ?

ແລະ ຜູ້ໃດທີ່ເປັນພຣະສີລາ ນອກຈາກພຣະເຈົ້າຂອງພວກເຮົາ?

ຄືພຣະເຈົ້ານີ້ແຫລະ ທີ່ເປັນຜູ້ໃຫ້ກຳລັງແກ່ຂ້ານ້ອຍ

ແລະ ຮັກສາຫົນທາງຂອງຂ້ານ້ອຍໃຫ້ປອດໄພ.

ພຣະອົງໄດ້ເຮັດໃຫ້ຕີນຂອງຂ້ານ້ອຍເປັນເໝືອນດັ່ງຕີນກວາງ;

ພຣະອົງເຮັດໃຫ້ຂ້ານ້ອຍຢືນຢູ່ເທິງທີ່ສູງໄດ້.

ພຣະອົງໄດ້ຝຶກມືຂອງຂ້ານ້ອຍໃຫ້ພ້ອມສູ້ຮົບ;

ແຂນຂອງຂ້ານ້ອຍຈຶ່ງສາມາດກົ່ງຄັນທະນູທອງສຳລິດໄດ້.

ພຣະອົງໄດ້ມອບໂລ່ແຫ່ງໄຊຊະນະຂອງພຣະອົງໃຫ້ແກ່ຂ້ານ້ອຍ;

ແລະ ຊ່ວຍຊູຂ້ານ້ອຍໄວ້ດ້ວຍມືຂວາຂອງພຣະອົງ;

ພຣະອົງໄດ້ຖ່ອມພຣະອົງເອງລົງເພື່ອເຮັດໃຫ້ຂ້ານ້ອຍຍິ່ງໃຫຍ່.

ພຣະອົງໄດ້ເຮັດໃຫ້ຫົນທາງທີ່ຂ້ານ້ອຍເດີນໄປນັ້ນກວ້າງຂວາງ,

ເພື່ອບໍ່ໃຫ້ຂໍ່ຕີນຂອງຂ້ານ້ອຍພິກ.

ຂ້ານ້ອຍໄດ້ໄລ່ຕາມສັດຕູຂອງຂ້ານ້ອຍ ແລະ ຕາມທັນພວກເຂົາ;

ຂ້ານ້ອຍບໍ່ໄດ້ຫັນຫລັງກັບຈົນກວ່າພວກເຂົາຖືກທຳລາຍ.

ຂ້ານ້ອຍບຸກໂຈມຕີເພື່ອບໍ່ໃຫ້ພວກເຂົາສາມາດລຸກຂຶ້ນມາໄດ້ອີກ;

ພວກເຂົາລົ້ມລົງຢູ່ໃຕ້ຕີນຂອງຂ້ານ້ອຍ.

ພຣະອົງໄດ້ໃຫ້ກຳລັງຂ້ານ້ອຍເພື່ອສູ້ຮົບ;

ພຣະອົງເຮັດໃຫ້ບັນດາສັດຕູຂອງຂ້ານ້ອຍຖ່ອມລົງຢູ່ຕໍ່ໜ້າຂ້ານ້ອຍ.

ພຣະອົງໄດ້ເຮັດໃຫ້ສັດຕູຂອງຂ້ານ້ອຍຖອຍໜີໄປ

ແລະ ຂ້ານ້ອຍໄດ້ທຳລາຍລ້າງສັດຕູຂອງຂ້ານ້ອຍ.

ພວກເຂົາຮ້ອງຂໍຄວາມຊ່ວຍເຫລືອ ແຕ່ບໍ່ມີຜູ້ໃດຊ່ວຍພວກເຂົາ

ພວກເຂົາໄດ້ຮ້ອງຂໍຕໍ່ພຣະເຈົ້າຢາເວ ແຕ່ພຣະອົງບໍ່ຕອບ.

ຂ້ານ້ອຍຈຶ່ງຕີພວກເຂົາໃຫ້ໝຸ່ນເໝືອນກັບຂີ້ຝຸ່ນດິນທີ່ຖືກລົມພັດໄປ;

ຂ້ານ້ອຍຢຽບພວກເຂົາເໝືອນກັບຢຽບຂີ້ຕົມຕາມຖະໜົນ.

ພຣະອົງໄດ້ຊ່ວຍຂ້ານ້ອຍໃຫ້ພົ້ນຈາກການໂຈມຕີຂອງຄົນທັງຫລາຍ;

ພຣະອົງໄດ້ເຮັດໃຫ້ຂ້ານ້ອຍເປັນປະມຸກຂອງປະຊາຊາດທັງຫລາຍ.

ຄົນທັງຫລາຍທີ່ຂ້ານ້ອຍບໍ່ຮູ້ຈັກກໍມາຮັບໃຊ້ຂ້ານ້ອຍ,

ຄົນຕ່າງຊາດທັງຫລາຍຕ່າງກໍກົ້ມກາບຕໍ່ໜ້າຂ້ານ້ອຍ;

ທັນທີທີ່ໄດ້ຍິນກ່ຽວກັບຂ້ານ້ອຍ, ພວກເຂົາກໍເຊື່ອຟັງຂ້ານ້ອຍ.

ພວກເຂົາລ້ວນແຕ່ເສຍກຳລັງໃຈ;

ພວກເຂົາຕ່າງກໍຕົວສັ່ນອອກມາຈາກຖານທີ່ໝັ້ນຂອງຕົນ.

ພຣະເຈົ້າຢາເວນັ້ນມີຊີວິດຢູ່! ຂໍຖວາຍສັນລະເສີນແດ່ອົງສີລາຂອງຂ້ານ້ອຍ!

ຂໍພຣະເຈົ້າ ພຣະຜູ້ຊ່ວຍໃຫ້ພົ້ນຂອງຂ້ານ້ອຍເປັນທີ່ຍົກຍ້ອງສັນລະເສີນ!

ພຣະອົງເປັນພຣະເຈົ້າຜູ້ແກ້ແຄ້ນໃຫ້ຂ້ານ້ອຍ,

ຜູ້ເຮັດໃຫ້ຊົນຊາດທັງຫລາຍຍອມຢູ່ໃຕ້ຂ້ານ້ອຍ,

ຜູ້ຊ່ວຍຂ້ານ້ອຍໃຫ້ຫລຸດພົ້ນຈາກບັນດາສັດຕູຂອງຂ້ານ້ອຍ.

ພຣະອົງຍົກຊູຂ້ານ້ອຍຂຶ້ນເໜືອສັດຕູທັງຫລາຍຂອງຂ້ານ້ອຍ;

ພຣະອົງໄດ້ກອບກູ້ຂ້ານ້ອຍອອກມາຈາກຄົນທີ່ທາລຸນ.

ຂ້າແດ່ພຣະເຈົ້າຢາເວ, ເຫດສະນັ້ນ ຂ້ານ້ອຍຈຶ່ງສັນລະເສີນພຣະອົງຢູ່ທ່າມກາງຊົນຊາດທັງຫລາຍ;

ຂ້ານ້ອຍຈະຮ້ອງເພງສັນລະເສີນນາມຂອງພຣະອົງ.

ພຣະອົງໄດ້ໃຫ້ໄຊຊະນະອັນຍິ່ງໃຫຍ່ແກ່ກະສັດຂອງພຣະອົງ;

ພຣະອົງໄດ້ສະແດງຄວາມຮັກອັນໝັ້ນຄົງແກ່ຜູ້ທີ່ພຣະອົງໄດ້ເຈີມຕັ້ງໄວ້,

ຄືດາວິດ ແລະ ເຊື້ອສາຍຂອງເພິ່ນຕະຫລອດໄປ.

Source notes (4)

Footnote ຫລືເປັນອົງເຈົ້ານາຍ
Footnote ພາສາເຮັບເຣີວ່າ ເຂົາສັດ ຢູ່ບ່ອນນີ້ແມ່ນໝາຍເຖິງເປັນສັນຍາລັກຂອງກຳລັງ
Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ດ້ວຍສາຍຟ້າແມບ ແລະ ພະຍຸໝາກເຫັບ
Footnote ຫລື ສາມາດແລ່ນຜ່ານອຸປະສັກໄດ້

Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.