Biblica® Open Lao Contemporary Version
ເພງສັນລະເສີນ 16
ມິກທາມ ບົດໜຶ່ງຂອງດາວິດ.
ຂ້າແດ່ພຣະເຈົ້າ ຂໍໂຜດປົກປ້ອງຂ້ານ້ອຍໃຫ້ປອດໄພ,
ເພາະຂ້ານ້ອຍໄດ້ລີ້ໄພໃນພຣະອົງ.
ຂ້ານ້ອຍເວົ້າກັບພຣະເຈົ້າຢາເວວ່າ, “ພຣະອົງເປັນອົງພຣະຜູ້ເປັນເຈົ້າຂອງຂ້ານ້ອຍ;
ນອກຈາກພຣະອົງແລ້ວ ຂ້ານ້ອຍບໍ່ມີສິ່ງໃດດີເລີຍ”.
ຂ້ານ້ອຍເວົ້າເຖິງຜູ້ບໍລິສຸດທີ່ຢູ່ໃນແຜ່ນດິນນີ້ວ່າ,
“ພວກເຂົາເປັນຜູ້ສູງສົ່ງ ເຊິ່ງເປັນຄວາມຍິນດີທັງໝົດຂອງຂ້ານ້ອຍ”.
ບັນດາຜູ້ທີ່ຕິດຕາມບັນດາພະອື່ນ ກໍຈະທໍລະມານຫລາຍຂຶ້ນອີກ.
ຂ້ານ້ອຍຈະບໍ່ຖອກເລືອດຖວາຍເປັນເຄື່ອງບູຊາແກ່ພະເຫລົ່ານັ້ນ
ຫລື ໃຊ້ປາກເວົ້າອອກຊື່ຂອງພະເຫລົ່ານັ້ນ.
ຂ້າແດ່ພຣະເຈົ້າຢາເວ, ພຣະອົງຜູ້ດຽວທີ່ເປັນມໍລະດົກສ່ວນຂອງຂ້ານ້ອຍ ແລະ ເປັນຈອກແຫ່ງພຣະພອນຂອງຂ້ານ້ອຍ.
ພຣະອົງຮັກສາມໍລະດົກຂອງຂ້ານ້ອຍໃຫ້ປອດໄພ.
ເຂດແດນທີ່ຂ້ານ້ອຍໄດ້ຮັບນັ້ນເປັນບ່ອນທີ່ໜ້າສະໜຸກສະໜານ;
ແນ່ນອນ ຂ້ານ້ອຍມີມໍລະດົກທີ່ໜ້າຍິນດີ.
ຂ້ານ້ອຍຈະສັນລະເສີນພຣະເຈົ້າ, ຜູ້ໃຫ້ຄຳປຶກສາແກ່ຂ້ານ້ອຍ;
ແມ່ນແຕ່ໃນຍາມກາງຄືນຈິດໃຈຂອງຂ້ານ້ອຍກໍສອນຕົນເອງ.
ຂ້ານ້ອຍເຝົ້າເບິ່ງພຣະເຈົ້າຢາເວຢູ່ສະເໝີ.
ເພາະພຣະອົງຢູ່ທີ່ດ້ານຂວາມືຂອງຂ້ານ້ອຍ, ຂ້ານ້ອຍຈະບໍ່ຫວັ່ນໄຫວ.
ເຫດສະນັ້ນ ຈິດໃຈຂອງຂ້ານ້ອຍຈຶ່ງມີຄວາມຍິນດີ ແລະ ລີ້ນຂອງຂ້ານ້ອຍກໍຊື່ນຊົມຍິນດີ;
ຮ່າງກາຍຂອງຂ້ານ້ອຍກໍຈະພັກຢູ່ຢ່າງປອດໄພເໝືອນກັນ,
ເພາະພຣະອົງຈະບໍ່ປະຖິ້ມຂ້ານ້ອຍໄວ້ໃນແດນຄົນຕາຍ,
ທັງຈະບໍ່ປ່ອຍໃຫ້ຜູ້ສັດຊື່1ຂອງພຣະອົງເນົ່າເປື່ອຍ.
ພຣະອົງໄດ້ສະແດງ2ຫົນທາງແຫ່ງຊີວິດແກ່ຂ້ານ້ອຍ;
ພຣະອົງຈະໃຫ້ຂ້ານ້ອຍເຕັມດ້ວຍຄວາມຊື່ນຊົມຍິນດີຕໍ່ໜ້າພຣະອົງ,
ພ້ອມດ້ວຍຄວາມສຸກຕະຫລອດໄປເປັນນິດຢູ່ທີ່ເບື້ອງຂວາມືຂອງພຣະອົງ.
Source notes (2)
- Footnote ຫລື ອົງບໍລິສຸດຂອງພຣະອົງ
- Footnote ຫລື ພຣະອົງຈະສະແດງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.