Biblica® Open Lao Contemporary Version
ເພງສັນລະເສີນ 146
ຈົ່ງສັນລະເສີນພຣະເຈົ້າຢາເວ.1
ຈິດວິນຍານຂອງຂ້ານ້ອຍ ຈົ່ງສັນລະເສີນພຣະເຈົ້າຢາເວ.
ຂ້ານ້ອຍຈະສັນລະເສີນພຣະເຈົ້າຕະຫລອດຊີວິດຂອງຂ້ານ້ອຍ.
ຂ້ານ້ອຍຈະຮ້ອງເພງສັນລະເສີນພຣະເຈົ້າຂອງຂ້ານ້ອຍຕາບເທົ່າທີ່ຂ້ານ້ອຍຍັງມີຊີວິດຢູ່.
ຢ່າມອບຄວາມໄວ້ວາງໃຈຂອງເຈົ້າໄວ້ໃນບັນດາເຈົ້ານາຍທັງຫລາຍ,
ໃນມະນຸດ ຜູ້ທີ່ບໍ່ສາມາດຊ່ວຍໄດ້.
ເມື່ອວິນຍານຂອງພວກເຂົາອອກຈາກຮ່າງກາຍ, ພວກເຂົາກໍຄືນສູ່ດິນ;
ໃນວັນນັ້ນເອງ ແຜນການທັງຫລາຍຂອງພວກເຂົາກໍຈົບສິ້ນ.
ຄວາມສຸກມີແກ່ບັນດາຜູ້ທີ່ມີພຣະເຈົ້າຂອງຢາໂຄບເປັນຜູ້ຊ່ວຍເຫລືອຂອງພວກເຂົາ,
ຜູ້ທີ່ຝາກຄວາມຫວັງໄວ້ກັບພຣະເຈົ້າຢາເວ ພຣະເຈົ້າຂອງພວກເຂົາ.
ພຣະອົງເປັນຜູ້ສ້າງສະຫວັນ ແລະ ແຜ່ນດິນໂລກ,
ທະເລ ແລະ ທຸກໆສິ່ງທີ່ຢູ່ໃນນັ້ນ
ພຣະອົງຍັງຄົງສັດຊື່ຕະຫລອດໄປ.
ພຣະອົງໃຫ້ຄວາມເປັນທຳແກ່ຜູ້ທີ່ຖືກຂົ່ມເຫັງ
ແລະ ໃຫ້ອາຫານແກ່ຜູ້ທີ່ຫິວ.
ພຣະເຈົ້າຢາເວໄດ້ປົດປ່ອຍຜູ້ທີ່ຖືກຄຸມຂັງໃຫ້ເປັນອິດສະຫລະ,
ພຣະເຈົ້າຢາເວໃຫ້ຄົນຕາບອດເບິ່ງເຫັນໄດ້,
ພຣະເຈົ້າຢາເວຍົກຊູບັນດາຜູ້ທີ່ແບກພາລະໜັກ,
ພຣະເຈົ້າຢາເວຮັກຜູ້ຊອບທຳ.
ພຣະເຈົ້າຢາເວເຝົ້າຮັກສາຄົນຕ່າງດ້າວ
ແລະ ຄ້ຳຊູລູກກຳພ້າພໍ່ ແລະ ແມ່ໝ້າຍ,
ແຕ່ພຣະອົງຂັດຂວາງວິຖີທາງຂອງຄົນຊົ່ວຮ້າຍ.
ພຣະເຈົ້າຢາເວຄອບຄອງຢູ່ນິລັນດອນ
ຊີໂອນ, ພຣະເຈົ້າຂອງເຈົ້າຄອບຄອງຕະຫລອດທຸກຊົ່ວອາຍຸ.
ຈົ່ງສັນລະເສີນພຣະເຈົ້າຢາເວ.
Source notes (1)
- Footnote ພາສາເຮັບເຣີວ່າ ຮາເລລູຢາ ເຊັ່ນດຽວກັບຂໍ້ 10
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.