Biblica® Open Lao Contemporary Version
ເພງສັນລະເສີນ 143
(ບົດເພງສັນລະເສີນຂອງດາວິດ)
ຂ້າແດ່ພຣະເຈົ້າຢາເວ ຂໍຮັບຟັງຄຳອະທິຖານຂອງຂ້ານ້ອຍ,
ຂໍຮັບຟັງຄຳຮ້ອງຂໍຄວາມເມດຕາຂອງຂ້ານ້ອຍ;
ໂດຍຄວາມສັດຊື່ ແລະ ຄວາມຊອບທຳຂອງພຣະອົງ
ຂໍໂຜດມາຊ່ວຍຂ້ານ້ອຍດ້ວຍ.
ຂໍຢ່ານຳຜູ້ຮັບໃຊ້ຂອງພຣະອົງເຂົ້າສູ່ການພິພາກສາ
ເພາະບໍ່ມີຈັກຄົນທີ່ຊອບທຳຕໍ່ໜ້າພຣະອົງ.
ສັດຕູໄລ່ຕາມຂ້ານ້ອຍ,
ລາວຍ່ອງຂ້ານ້ອຍຈົນຈົມດິນ;
ລາວເຮັດໃຫ້ຂ້ານ້ອຍອາໄສຢູ່ໃນຄວາມມືດ
ເໝືອນຄົນທີ່ຕາຍໄປດົນແລ້ວ.
ດັ່ງນັ້ນ ຈິດວິນຍານຂອງຂ້ານ້ອຍຈຶ່ງອ່ອນແຮງຢູ່ພາຍໃນ;
ຈິດໃຈຂອງຂ້ານ້ອຍກໍທໍ້ຖອຍຢູ່ພາຍໃນ.
ຂ້ານ້ອຍລະນຶກເຖິງວັນເວລາທີ່ດົນນານມາ;
ຂ້ານ້ອຍຄິດຕຶກຕອງເຖິງພາລະກິດທັງໝົດຂອງພຣະອົງ
ແລະ ພິຈາລະນາສິ່ງທີ່ມືຂອງພຣະອົງໄດ້ກະທຳ.
ຂ້ານ້ອຍໄຂວ່ຄວ້າຫາພຣະອົງ;
ຂ້ານ້ອຍກະຫາຍຫາພຣະອົງເໝືອນກັບດິນທີ່ແຕກແຫງ.
ຂ້າແດ່ພຣະເຈົ້າຢາເວ ຂໍໂຜດຕອບຂ້ານ້ອຍໂດຍໄວ;
ຈິດວິນຍານຂອງຂ້ານ້ອຍຈະໝົດແຮງແລ້ວ.
ຂໍຢ່າໄດ້ເຊື່ອງໜ້າຂອງພຣະອົງຈາກຂ້ານ້ອຍ
ບໍ່ດັ່ງນັ້ນ ຂ້ານ້ອຍຈະເປັນເໝືອນຄົນເຫລົ່ານັ້ນທີ່ລົງໄປຍັງຂຸມ.
ຂໍໃຫ້ຂ້ານ້ອຍເຫັນຄວາມຮັກໝັ້ນຄົງຂອງພຣະອົງໃນເວລາ, ເຊົ້າ
ເພາະຂ້ານ້ອຍໄດ້ໄວ້ວາງໃຈໃນພຣະອົງ.
ຂໍສະແດງທາງທີ່ຂ້ານ້ອຍຄວນຈະໄປໃຫ້ແກ່ຂ້ານ້ອຍ,
ເພາະຂ້ານ້ອຍໄດມອບຊີວິດຂອງຂ້ານ້ອຍໃຫ້ກັບພຣະອົງ.
ຂ້າແດ່ພຣະເຈົ້າຢາເວ ຂໍຊ່ວຍກອບກູ້ຂ້ານ້ອຍໃຫ້ພົ້ນຈາກບັນດາສັດຕູທັງຫລາຍຂອງຂ້ານ້ອຍ,
ເພາະຂ້ານ້ອຍລີ້ຢູ່ໃນພຣະອົງ.
ຂໍສອນຂ້ານ້ອຍໃຫ້ເຮັດຕາມຄວາມປະສົງຂອງພຣະອົງ,
ເພາະພຣະອົງເປັນພຣະເຈົ້າຂອງຂ້ານ້ອຍ;
ຂໍພຣະວິນຍານປະເສີດຂອງພຣະອົງ
ນຳຂ້ານ້ອຍໄປຕາມວິຖີທາງອັນຮາບພຽງ.
ຂ້າແດ່ພຣະເຈົ້າຢາເວ ເພາະເຫັນແກ່ນາມຂອງພຣະອົງ ຂໍຮັກສາຊີວິດຂອງຂ້ານ້ອຍໄວ້;
ດ້ວຍຄວາມຊອບທຳຂອງພຣະອົງ ຂໍນຳຂ້ານ້ອຍອອກຈາກຄວາມເດືອດຮ້ອນດ້ວຍ.
ດ້ວຍຄວາມຮັກໝັ້ນຄົງທີ່ມີຕໍ່ຂ້ານ້ອຍ ຂໍໂຜດເຮັດໃຫ້ສັດຕູທັງຫລາຍຂອງຂ້ານ້ອຍມິດງຽບ;
ຂໍໂຜດທຳລາຍສັດຕູທັງໝົດຂອງຂ້ານ້ອຍ,
ເພາະຂ້ານ້ອຍເປັນຜູ້ຮັບໃຊ້ຂອງພຣະອົງ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.