Biblica® Open Lao Contemporary Version
ເພງສັນລະເສີນ 142
(ມັດຄິນຂອງດາວິດ, ຂະນະທີ່ເພິ່ນຢູ່ໃນຖ້ຳ, ຄຳອະທິຖານ)
ຂ້ານ້ອຍຮ້ອງຫາພຣະເຈົ້າຢາເວດ້ວຍສຽງດັງ;
ຂ້ານ້ອຍຍົກສຽງຂອງຂ້ານ້ອຍຂຶ້ນອ້ອນວອນຂໍຄວາມເມດຕາຈາກພຣະເຈົ້າຢາເວ.
ຂ້ານ້ອຍລະບາຍຄຳຈົ່ມຂອງຂ້ານ້ອຍຕໍ່ໜ້າພຣະອົງ;
ຕໍ່ໜ້າພຣະອົງ ຂ້ານ້ອຍໄດ້ບອກເຖິງຄວາມເດືອດຮ້ອນຂອງຂ້ານ້ອຍ.
ເມື່ອຈິດວິນຍານຂອງຂ້ານ້ອຍອ່ອນແຮງຢູ່ພາຍໃນຂ້ານ້ອຍ,
ພຣະອົງເປັນຜູ້ທີ່ເຝົ້າເບິ່ງແຍງທາງຂອງຂ້ານ້ອຍ.
ເທິງເສັ້ນທາງທີ່ຂ້ານ້ອຍເດີນໄປ
ຄົນທັງຫລາຍໄດ້ເຊື່ອງບ້ວງແຮ້ວດັກຂ້ານ້ອຍ.
ເບິ່ງແມ ຢູ່ທາງຂວາມືຂອງຂ້ານ້ອຍບໍ່ມີຜູ້ໃດເລີຍ;
ບໍ່ມີຜູ້ໃດເປັນຫວ່ງຂ້ານ້ອຍ.
ຂ້ານ້ອຍບໍ່ມີທີ່ລີ້ໄພ;
ບໍ່ມີຜູ້ໃດສົນໃຈຊີວິດຂອງຂ້ານ້ອຍ.
ຂ້າແດ່ພຣະເຈົ້າຢາເວ ຂ້ານ້ອຍໄດ້ຮ້ອງຫາພຣະອົງ;
ຂ້ານ້ອຍເວົ້າວ່າ: “ພຣະອົງເປັນທີ່ລີ້ໄພຂອງຂ້ານ້ອຍ,
ເປັນສ່ວນມໍລະດົກຂອງຂ້ານ້ອຍໃນດິນແດນຂອງຄົນເປັນ”.
ຂໍໂຜດຮັບຟັງສຽງຮ້ອງໄຫ້ຂອງຂ້ານ້ອຍ,
ເພາະຂ້ານ້ອຍຂັດສົນເຫລືອເກີນ;
ຂໍຊ່ວຍກອບກູ້ຂ້ານ້ອຍໃຫ້ພົ້ນຈາກຜູ້ທີ່ໄລ່ຕາມຂ້ານ້ອຍ,
ເພາະພວກເຂົາແຂງແຮງເກີນກຳລັງຂອງຂ້ານ້ອຍ.
ຂໍປົດປ່ອຍຂ້ານ້ອຍອອກຈາກການຈຳຈອງຂອງຂ້ານ້ອຍ,
ເພື່ອຂ້ານ້ອຍຈະສັນລະເສີນນາມຂອງພຣະອົງ.
ແລ້ວຄົນຊອບທຳຈະເຕົ້າໂຮມກັນຢູ່ອ້ອມຂ້ານ້ອຍ
ເພາະຄວາມດີຂອງພຣະອົງທີ່ມີຕໍ່ຂ້ານ້ອຍ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.