Biblica® Open Lao Contemporary Version
ເພງສັນລະເສີນ 140
(ເຖິງຫົວໜ້ານັກຮ້ອງ, ບົດເພງສັນລະເສີນຂອງດາວິດ)
ຂ້າແດ່ພຣະເຈົ້າຢາເວ ຂໍໂຜດຊ່ວຍຂ້ານ້ອຍຈາກຄົນຊົ່ວຮ້າຍ
ຂໍປົກປ້ອງຂ້ານ້ອຍໃຫ້ພົ້ນຈາກຄົນທາລຸນ,
ຜູ້ທີ່ວາງແຜນຊົ່ວຢູ່ໃນໃຈ
ແລະ ຍຸແຍ່ໃຫ້ເກີດສົງຄາມຢູ່ທຸກວັນ.
ພວກເຂົາລັບລີ້ນຂອງຕົນ
ໃຫ້ຄົມເໝືອນກັບລີ້ນງູ
ຂ້າແດ່ພຣະເຈົ້າຢາເວ ຂໍປົກປ້ອງຂ້ານ້ອຍໃຫ້ພົ້ນຈາກມືຂອງຄົນຊົ່ວ;
ຂໍໂຜດປົກປ້ອງຂ້ານ້ອຍໃຫ້ພົ້ນຈາກຄົນທາລຸນ,
ຜູ້ວາງແຜນໃຫ້ຕີນຂ້ານ້ອຍສະດຸດລົ້ມ.
ຄົນຈອງຫອງໄດ້ເຊື່ອງບ້ວງແຮ້ວດັກຂ້ານ້ອຍ;
ພວກເຂົາກາງຕາໜ່າງຂອງຕົນລໍຖ້າຢູ່
ແລະ ວາງກັບດັກຕາມເສັ້ນທາງຂອງຂ້ານ້ອຍ.
ຂ້າແດ່ພຣະເຈົ້າຢາເວ ຂ້ານ້ອຍໄດ້ເວົ້າກັບພຣະອົງວ່າ: “ພຣະອົງເປັນພຣະເຈົ້າຂອງຂ້ານ້ອຍ”.
ຂ້າແດ່ພຣະເຈົ້າຢາເວ ຂໍຟັງຄຳຮ້ອງຂໍຄວາມເມດຕາຂອງຂ້ານ້ອຍດ້ວຍ.
ຂ້າແດ່ພຣະເຈົ້າຢາເວ ອົງເຈົ້ານາຍ, ຜູ້ຊ່ວຍກອບກູ້ທີ່ເຂັ້ມແຂງຂອງຂ້ານ້ອຍ,
ຜູ້ເປັນໂລ່ປົກປ້ອງຫົວຂອງຂ້ານ້ອຍໃນຍາມສູ້ຮົບ.
ຂ້າແດ່ພຣະເຈົ້າຢາເວ ຂໍຢ່າໃຫ້ຄົນຊົ່ວສົມຄວາມປາຖະໜາຂອງພວກເຂົາ;
ຂໍຢ່າໃຫ້ແຜນຊົ່ວຂອງພວກເຂົາສຳເລັດ.
ບັນດາຄົນທີ່ອ້ອມຮອບຂ້ານ້ອຍກໍເງີຍໜ້າຂອງຕົນຂຶ້ນຢ່າງພາກພູມໃຈ
ຂໍໃຫ້ຄວາມຊົ່ວຮ້າຍແຫ່ງຮີບສົບຂອງພວກເຂົານັ້ນກືນກິນພວກເຂົາ.
ຂໍໃຫ້ຖ່ານທີ່ລຸກໄໝ້ຢູ່ນັ້ນຕົກໃສ່ຫົວຂອງພວກເຂົາ;
ຂໍໃຫ້ພວກເຂົາຖືກຖິ້ມເຂົ້າໄປໃນໄຟ,
ເຂົ້າໄປໃນເຫວເລິກ ເຊິ່ງພວກເຂົາບໍ່ມີວັນຈະຂຶ້ນມາໄດ້.
ຂໍຢ່າໃຫ້ຄົນທີ່ໃສ່ຮ້າຍປ້າຍສີໄດ້ຕັ້ງໝັ້ນໃນແຜ່ນດິນ;
ຂໍໃຫ້ຄວາມວິບັດຕາມລ່າຄົນທາລຸນ.
ຂ້ານ້ອຍຮູ້ຢູ່ວ່າພຣະເຈົ້າຢາເວຮັກສາຄວາມຍຸຕິທຳໄວ້ສຳລັບຄົນທຸກຍາກ
ແລະ ປົກປ້ອງສິດທິຂອງຄົນຂັດສົນ.
ແນ່ນອນ ຄົນຊອບທຳຈະສັນລະເສີນນາມຂອງພຣະອົງ
ແລະ ຄົນທ່ຽງທຳຈະມີຊີວິດຢູ່ຕໍ່ໜ້າພຣະອົງ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.