Biblica® Open Lao Contemporary Version
ເພງສັນລະເສີນ 138
(ບົດປະພັນຂອງດາວິດ)
ຂ້າແດ່ພຣະເຈົ້າຢາເວ ຂ້ານ້ອຍຈະສັນລະເສີນພຣະອົງໝົດທັງຫົວໃຈຂອງຂ້ານ້ອຍ;
ຂ້ານ້ອຍຈະຮ້ອງເພງສັນລະເສີນພຣະອົງຕໍ່ໜ້າ “ພະທັງຫລາຍ”.
ຂ້ານ້ອຍຈະກາບລົງຕໍ່ໜ້າວິຫານສັກສິດຂອງພຣະອົງ
ແລະ ສັນລະເສີນນາມຂອງພຣະອົງ
ເພາະຄວາມຮັກໝັ້ນຄົງ ແລະ ຄວາມສັດຊື່ຂອງພຣະອົງ,
ເພາະພຣະອົງໄດ້ຍົກຍ້ອງດຳລັດອັນສັກສິດຂອງພຣະອົງ
ຈົນເກີນກວ່າຊື່ສຽງຂອງພຣະອົງ.
ເມື່ອຂ້ານ້ອຍໄດ້ຮ້ອງຫາ, ພຣະອົງໄດ້ຕອບຂ້ານ້ອຍ;
ພຣະອົງເຮັດໃຫ້ຂ້ານ້ອຍກ້າຫານຫລາຍ.
ຂ້າແດ່ພຣະເຈົ້າຢາເວ ຂໍໃຫ້ກະສັດທົ່ວໂລກສັນລະເສີນພຣະອົງ,
ເມື່ອພວກເຂົາໄດ້ຍິນສິ່ງທີ່ພຣະອົງໄດ້ມີດຳລັດໄວ້.
ຂໍໃຫ້ພວກເຂົາຮ້ອງເຖິງວິຖີທາງຂອງພຣະເຈົ້າຢາເວ,
ເພາະກຽດຕິຍົດຂອງພຣະເຈົ້າຢາເວນັ້ນຍິ່ງໃຫຍ່.
ເຖິງແມ່ນວ່າພຣະເຈົ້າຢາເວນັ້ນສູງສົ່ງຫລາຍ, ແຕ່ພຣະອົງກໍຫລຽວເບິ່ງຄົນຕ່ຳຕ້ອຍ;
ແຕ່ພຣະອົງສັງເກດເຫັນຄົນຈອງຫອງແຕ່ໄກ.
ເຖິງແມ່ນວ່າຂ້ານ້ອຍຍ່າງຢູ່ທ່າມກາງຄວາມເດືອດຮ້ອນ,
ພຣະອົງກໍຍັງຮັກສາຊີວິດຂອງຂ້ານ້ອຍໄວ້.
ພຣະອົງຢຽດມືຂອງພຣະອົງອອກຕໍ່ສູ້ຄວາມໃຈຮ້າຍຂອງສັດຕູຂອງຂ້ານ້ອຍ;
ພຣະອົງຊ່ວຍຂ້ານ້ອຍໃຫ້ພົ້ນດ້ວຍມືຂວາຂອງພຣະອົງ.
ພຣະເຈົ້າຢາເວຈະເຮັດໃຫ້ສຳເລັດຕາມຄວາມມຸ່ງໝາຍຂອງພຣະອົງທີ່ມີຕໍ່ຂ້ານ້ອຍ.
ຂ້າແດ່ພຣະເຈົ້າຢາເວ ຄວາມຮັກຂອງພຣະອົງດຳລົງຢູ່ຕະຫລອດໄປ
ຂໍຢ່າປະຖິ້ມມືທັງຫລາຍຂອງພຣະອົງ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.