Biblica® Open Lao Contemporary Version
ເພງສັນລະເສີນ 135
(ພສສ 115:4-11)
ຈົ່ງສັນລະເສີນພຣະເຈົ້າຢາເວ.1
ຈົ່ງສັນລະເສີນນາມຂອງພຣະເຈົ້າຢາເວ;
ຈົ່ງສັນລະເສີນພຣະອົງ, ພວກເຈົ້າທັງຫລາຍຜູ້ເປັນຜູ້ຮັບໃຊ້ຂອງພຣະເຈົ້າຢາເວ,
ພວກເຈົ້າທັງຫລາຍຜູ້ເປັນຜູ້ຮັບໃຊ້ໃນວິຫານຂອງພຣະເຈົ້າຢາເວ,
ໃນເດີ່ນວິຫານຂອງພຣະເຈົ້າຂອງພວກເຮົາ.
ຈົ່ງສັນລະເສີນພຣະເຈົ້າຢາເວ ເພາະພຣະເຈົ້າຢາເວນັ້ນແສນດີ
ຈົ່ງຮ້ອງເພງສັນລະເສີນນາມຂອງພຣະອົງ, ເພາະເປັນເລື່ອງທີ່ໜ້າຍິນດີ.
ເພາະພຣະເຈົ້າຢາເວໄດ້ເລືອກຢາໂຄບໃຫ້ເປັນຂອງພຣະອົງເອງ,
ໄດ້ເລືອກອິດສະຣາເອນໄວ້ເປັນກຳມະສິດອັນລ້ຳຄ່າຂອງພຣະອົງ.
ຂ້ານ້ອຍຮູ້ວ່າພຣະເຈົ້າຢາເວນັ້ນຍິ່ງໃຫຍ່,
ຮູ້ວ່າອົງພຣະຜູ້ເປັນເຈົ້າຂອງພວກເຮົານັ້ນຍິ່ງໃຫຍ່ກວ່າພະອື່ນໃດທັງໝົດ.
ພຣະເຈົ້າຢາເວໄດ້ເຮັດທຸກສິ່ງຕາມທີ່ພຣະອົງພໍໃຈ,
ໃນຟ້າສະຫວັນ ແລະ ເທິງແຜ່ນດິນໂລກ,
ໃນທະເລ ແລະ ທີ່ເລິກທັງຫລາຍ.
ພຣະອົງໄດ້ເຮັດໃຫ້ເມກລອຍຂຶ້ນມາຈາກສຸດຂອງແຜ່ນດິນໂລກ;
ພຣະອົງໄດ້ສົ່ງຟ້າແມບມາກັບຝົນ
ແລະ ໄດ້ນຳເອົາສາຍລົມອອກມາຈາກຄັງຂອງພຣະອົງ.
ພຣະອົງໄດ້ທຳລາຍລູກກົກຂອງເອຢິບ,
ລູກຫົວປີຂອງຄົນ ແລະ ຂອງສັດ.
ເອຢິບ, ພຣະອົງໄດ້ສົ່ງໝາຍສຳຄັນ ແລະ ການອັດສະຈັນຕ່າງໆມາທ່າມກາງພວກເຈົ້າ.
ມາຕໍ່ສູ້ຟາໂຣ ແລະ ບັນດາຜູ້ຮັບໃຊ້ທັງໝົດຂອງເພິ່ນ.
ພຣະອົງໄດ້ທຳລາຍຫລາຍຊົນຊາດ
ແລະ ໄດ້ຂ້າກະສັດຜູ້ຍິ່ງໃຫຍ່
ຄືກະສັດສີໂຫນຂອງຊາວອາໂມ,
ກະສັດໂອກແຫ່ງບາຊານ,
ແລະ ກະສັດທັງໝົດໃນການາອານ
ແລະ ພຣະອົງໄດ້ຍົກດິນແດນຂອງພວກເຂົາໃຫ້ເປັນກຳມະສິດ,
ໃຫ້ເປັນກຳມະສິດຂອງອິດສະຣາເອນປະຊາຊົນຂອງພຣະອົງ.
ຂ້າແດ່ພຣະເຈົ້າຢາເວ ນາມຂອງພຣະອົງດຳລົງຢູ່ຕະຫລອດໄປ,
ຂ້າແດ່ພຣະເຈົ້າຢາເວ ຊື່ສຽງຂອງພຣະອົງດຳລົງຢູ່ຕະຫລອດທຸກຊົ່ວອາຍຸ.
ເພາະພຣະເຈົ້າຢາເວຈະໃຫ້ຄວາມເປັນທຳແກ່ປະຊາຊົນຂອງພຣະອົງ
ແລະ ເມດຕາສົງສານຜູ້ຮັບໃຊ້ຂອງພຣະອົງ.
ຮູບເຄົາລົບຂອງຊົນຊາດຕ່າງໆ ແມ່ນເຮັດດ້ວຍເງິນ ແລະ ຄຳ,
ເຮັດດ້ວຍມືມະນຸດ.
ຮູບເຄົາລົບເຫລົ່ານັ້ນມີປາກ ແຕ່ເວົ້າບໍ່ໄດ້,
ມີຕາ ແຕ່ເບິ່ງບໍ່ເຫັນ.
ຮູບເຄົາລົບເຫລົ່ານັ້ນມີຫູ ແຕ່ບໍ່ໄດ້ຍິນ,
ຢູ່ໃນປາກຂອງຮູບເຄົາລົບເຫລົ່ານັ້ນບໍ່ມີແມ່ນແຕ່ລົມຫາຍໃຈ.
ບັນດາຜູ້ທີ່ສ້າງຮູບເຄົາລົບເຫລົ່ານັ້ນກໍຈະເປັນເໝືອນຮູບເຄົາລົບເຫລົ່ານັ້ນ,
ແລະ ຜູ້ທີ່ໄວ້ວາງໃຈໃນຮູບເຄົາລົບເຫລົ່ານັ້ນກໍຈະເປັນເໝືອນກັນ.
ເຊື້ອສາຍຂອງອິດສະຣາເອນ, ຈົ່ງສັນລະເສີນພຣະເຈົ້າຢາເວ;
ເຊື້ອສາຍຂອງອາໂຣນ, ຈົ່ງສັນລະເສີນພຣະເຈົ້າຢາເວ;
ເຊື້ອສາຍຂອງເລວີ, ຈົ່ງສັນລະເສີນພຣະເຈົ້າຢາເວ;
ພວກເຈົ້າທັງຫລາຍຜູ້ຢຳເກງພຣະອົງ ຈົ່ງສັນລະເສີນພຣະເຈົ້າຢາເວ;
ຈົ່ງສັນລະເສີນພຣະເຈົ້າຢາເວຈາກຊີໂອນ,
ຈົ່ງສັນລະເສີນພຣະອົງຜູ້ອາໄສຢູ່ໃນເຢຣູຊາເລັມ.
ຈົ່ງສັນລະເສີນພຣະເຈົ້າຢາເວ.
Source notes (1)
- Footnote ພາສາເຮັບເຣີວ່າ ຮາເລລູຢາ ເຊັ່ນດຽວກັບຂໍ້ 3 ແລະ 3 ແລະ 21
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.