Biblica® Open Lao Contemporary Version

ເພງສັນລະເສີນ 125

(ບົດເພງໃຊ້ແຫ່ຂຶ້ນໄປຍັງເຢຣູຊາເລັມ)

ບັນດາຜູ້ທີ່ໄວ້ວາງໃຈໃນພຣະເຈົ້າຢາເວ ກໍເໝືອນດັ່ງພູເຂົາຊີໂອນ,

ເຊິ່ງບໍ່ຫວັ່ນໄຫວ ແຕ່ຕັ້ງໝັ້ນຕະຫລອດໄປ.

ເໝືອນດັ່ງພູເຂົາທັງຫລາຍທີ່ຢູ່ອ້ອມເຢຣູຊາເລັມ,

ດັ່ງນັ້ນພຣະເຈົ້າຢາເວ ຈຶ່ງອ້ອມຮອບປະຊາຊົນຂອງພຣະອົງໄວ້

ທັງບັດນີ້ ແລະ ຕະຫລອດໄປເປັນນິດ.

ໄມ້ຄາທາຂອງຄົນຊົ່ວຮ້າຍຈະບໍ່ຍັງຢູ່

ເໜືອແຜ່ນດິນທີ່ເປັນສ່ວນຂອງຄົນຊອບທຳ,

ບໍ່ດັ່ງນັ້ນຄົນຊອບທຳອາດຈະໃຊ້

ມືຂອງຕົນເຮັດຊົ່ວ.

ຂ້າແດ່ພຣະເຈົ້າຢາເວ, ຂໍໂຜດເຮັດດີຕໍ່ບັນດາຜູ້ທີ່ເຮັດດີ,

ຕໍ່ບັນດາຜູ້ທີ່ມີຈິດໃຈທ່ຽງທຳ.

ແຕ່ຜູ້ທີ່ຫັນໄປສູ່ທາງຄົດລ້ຽວ

ພຣະເຈົ້າຢາເວຈະໄລ່ພວກເຂົາໄປພ້ອມກັບຄົນເຮັດຊົ່ວ.

ສັນຕິສຸກຈົ່ງມີແກ່ອິດສະຣາເອນ.

Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.