Biblica® Open Lao Contemporary Version
ເພງສັນລະເສີນ 122
(ບົດເພງໃຊ້ແຫ່ຂຶ້ນໄປຍັງເຢຣູຊາເລັມ, ບົດປະພັນຂອງດາວິດ)
ຂ້ານ້ອຍຊື່ນຊົມຍິນດີ ເມື່ອມີຜູ້ກ່າວແກ່ຂ້ານ້ອຍວ່າ:
“ໃຫ້ພວກເຮົາໄປຍັງວິຫານຂອງພຣະເຈົ້າຢາເວ”.
ເຢຣູຊາເລັມ, ຕີນຂອງພວກເຮົາກໍຢືນຢູ່
ພາຍໃນປະຕູຂອງເຈົ້າ.
ເຢຣູຊາເລັມໄດ້ຮັບການສ້າງຂຶ້ນເປັນນະຄອນ
ເຊິ່ງປະສານເຂົ້າໄວ້ດ້ວຍກັນຢ່າງໜາແໜ້ນ.
ເປັນບ່ອນທີ່ຊົນເຜົ່າຕ່າງໆຂຶ້ນມາ
ຄືຄົນເຜົ່າຕ່າງໆຂອງພຣະເຈົ້າຢາເວ
ເພື່ອສັນລະເສີນນາມຂອງພຣະເຈົ້າຢາເວ
ຕາມກົດເກນທີ່ໄດ້ວາງໄວ້ໃຫ້ອິດສະຣາເອນ.
ບັນລັງເພື່ອການພິພາກສາໄດ້ຕັ້ງຢູ່ທີ່ນັ້ນ,
ເປັນບັນລັງແຫ່ງເຊື້ອສາຍຂອງດາວິດ.
ຈົ່ງອະທິຖານຂໍສັນຕິພາບສຳລັບເຢຣູຊາເລັມວ່າ:
“ຂໍໃຫ້ບັນດາຜູ້ທີ່ຮັກເຈົ້ານັ້ນປອດໄພ.
ຂໍໃຫ້ມີສັນຕິພາບພາຍໃນກຳແພງຂອງເຈົ້າ
ແລະ ມີຄວາມປອດໄພໃນວັງຂອງເຈົ້າ”.
ເພື່ອເຫັນແກ່ຄອບຄົວ ແລະ ມິດສະຫາຍຂອງຂ້ານ້ອຍ,
ຂ້ານ້ອຍຈະກ່າວວ່າ “ສັນຕິພາບຈົ່ງມີຢູ່ໃນເຈົ້າ”.
ເພື່ອເຫັນແກ່ວິຫານຂອງພຣະເຈົ້າຢາເວ ພຣະເຈົ້າຂອງພວກເຮົາ,
ຂ້ານ້ອຍຈະຊອກຫາຄວາມຈະເລີນຮຸ່ງເຮືອງໃຫ້ແກ່ເຈົ້າ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.