Biblica® Open Lao Contemporary Version
ເພງສັນລະເສີນ 119
ອາເລບ
ຄວາມສຸກມີແກ່ບັນດາຜູ້ທີ່ດຳເນີນຊີວິດຢ່າງບໍ່ມີຕຳໜິ,
ຜູ້ທີ່ປະພຶດຕາມກົດບັນຍັດຂອງພຣະເຈົ້າຢາເວ.
ຄວາມສຸກມີແກ່ບັນດາຜູ້ທີ່ຮັກສາກົດເກນຂອງພຣະອົງ
ແລະ ສະແຫວງຫາພຣະອົງໝົດທັງຫົວໃຈຂອງຕົນ
ພວກເຂົາບໍ່ເຮັດສິ່ງທີ່ຜິດ
ແຕ່ດຳເນີນຢູ່ໃນທາງຂອງພຣະອົງ.
ພຣະອົງໃຫ້ຂໍ້ບັງຄັບ
ເຊິ່ງຕ້ອງເຊື່ອຟັງຢ່າງເຕັມທີ່.
ຂໍໃຫ້ວິຖີທາງຂອງຂ້ານ້ອຍນັ້ນໝັ້ນຄົງ
ໃນການປະຕິບັດຕາມດຳລັດຂອງພຣະອົງ!
ແລ້ວຂ້ານ້ອຍຈະບໍ່ຕ້ອງຖືກອັບອາຍ
ເມື່ອຂ້ານ້ອຍວິເຄາະສັ່ງທັງໝົດຂອງພຣະອົງ.
ຂ້ານ້ອຍຈະສັນລະເສີນພຣະອົງດ້ວຍຫົວໃຈທີ່ທ່ຽງທຳ
ເມື່ອຮຽນຮູ້ກົດບັນຍັດອັນຊອບທຳຂອງພຣະອົງ.
ຂ້ານ້ອຍຈະເຊື່ອຟັງດຳລັດຂອງພຣະອົງ
ຂໍຢ່າປະຖິ້ມຂ້ານ້ອຍໄປ.
ເບດ
ຄົນໜຸ່ມສາວຈະຮັກສາທາງຂອງຕົນໃຫ້ບໍລິສຸດໄດ້ຢ່າງໃດ?
ກໍໂດຍການດຳເນີນຊີວິດຕາມພຣະຄຳຂອງພຣະອົງ.
ຂ້ານ້ອຍສະແຫວງຫາພຣະອົງດ້ວຍສຸດໃຈຂອງຂ້ານ້ອຍ
ຂໍຢ່າໃຫ້ຂ້ານ້ອຍຕະເຫລີດໜີຈາກຂໍ້ຄຳສັ່ງຂອງພຣະອົງ.
ຂ້ານ້ອຍຈົດຈຳພຣະຄຳຂອງພຣະອົງໄວ້ໃນໃຈຂອງຂ້ານ້ອຍ
ເພື່ອວ່າຂ້ານ້ອຍຈະໄດ້ບໍ່ເຮັດບາບຕໍ່ພຣະອົງ.
ຂ້າແດ່ພຣະເຈົ້າຢາເວ, ສັນລະເສີນພຣະອົງ,
ຂໍໂຜດສອນດຳລັດຂອງພຣະອົງແກ່ຂ້ານ້ອຍ.
ດ້ວຍຮິມສົບຂອງຂ້ານ້ອຍ
ຂ້ານ້ອຍທ່ອງຈຳກົດບັນຍັດທັງໝົດທີ່ອອກມາຈາກປາກຂອງພຣະອົງ.
ຂ້ານ້ອຍຊື່ນຊົມຍິນດີໃນການປະຕິບັດຕາມກົດເກນຂອງພຣະອົງ
ເໝືອນດັ່ງຜູ້ທີ່ຊື່ນຊົມຍິນດີໃນຊັບສົມບັດອັນຫລວງຫລາຍ.
ຂ້ານ້ອຍສຳນຶກເຖິງຂໍ້ຄຳສັ່ງຂອງພຣະອົງ
ແລະ ວິເຄາະເຖິງວິຖີທາງຂອງພຣະອົງ.
ຂ້ານ້ອຍປິຕິຍິນດີໃນດຳລັດຂອງພຣະອົງ;
ຂ້ານ້ອຍຈະບໍ່ລະເລີຍຕໍ່ຖ້ອຍຄຳຂອງພຣະອົງ.
ກີເມນ
ຂໍໂຜດດີຕໍ່ຜູ້ຮັບໃຊ້ຂອງພຣະອົງ ແລ້ວຂ້ານ້ອຍຈະມີຊີວິດຢູ່
ແລະ ຈະເຊື່ອຟັງພຣະຄຳຂອງພຣະອົງ.
ຂໍໂຜດເປີດຕາຂອງຂ້ານ້ອຍ ເພື່ອຂ້ານ້ອຍຈະເຫັນ
ສິ່ງອັດສະຈັນທັງຫລາຍໃນກົດບັນຍັດຂອງພຣະອົງ.
ຂ້ານ້ອຍເປັນຄົນແປກໜ້າໃນໂລກນີ້;
ຂໍຢ່າເຊື່ອງພຣະບັນຍັດຂອງພຣະອົງໄວ້ຈາກຂ້ານ້ອຍ.
ຈິດວິນຍານຂອງຂ້ານ້ອຍຖືກເຜົາໄໝ້ດ້ວຍຄວາມກະຫາຍຫາ
ກົດບັນຍັດຂອງພຣະອົງຢູ່ຕະຫລອດເວລາ.
ພຣະອົງຕຳໜິຄົນຈອງຫອງ, ຜູ້ທີ່ຖືກສາບແຊ່ງ,
ບັນດາຜູ້ທີ່ຕະເຫລີດໜີຈາກຂໍ້ຄຳສັ່ງຂອງພຣະອົງ.
ຂໍໂຜດເອົາຄຳໝິ່ນປະໝາດ ແລະ ການດູຖູກຂອງພວກເຂົາອອກໄປຈາກຂ້ານ້ອຍ.
ເພາະຂ້ານ້ອຍຮັກສາກົດເກນຂອງພຣະອົງ.
ເຖິງແມ່ນວ່າບັນດາຜູ້ປົກຄອງຈະນັ່ງລົງຮ່ວມກັນ ແລະ ໃສ່ຮ້າຍຂ້ານ້ອຍ,
ຜູ້ຮັບໃຊ້ຂອງພຣະອົງຈະຍັງສຳນຶກເຖິງດຳລັດຂອງພຣະອົງ.
ກົດເກນຂອງພຣະອົງເປັນຄວາມປິຕິຍິນດີຂອງຂ້ານ້ອຍ;
ກົດເກນເຫລົ່ານັ້ນເປັນທີ່ປຶກສາຂອງຂ້ານ້ອຍ.
ດາເລດ
ຂ້ານ້ອຍຕົກຕ່ຳລົງຈົນເກືອກຝຸ່ນ
ຂໍສະຫງວນຊີວິດຂອງຂ້ານ້ອຍຕາມພຣະຄຳຂອງພຣະອົງ
ຂ້ານ້ອຍເລົ່າເຖິງວິຖີທາງຂອງຂ້ານ້ອຍ ແລະ ພຣະອົງກໍໄດ້ຕອບຂ້ານ້ອຍ;
ຂໍໂຜດສອນດຳລັດຂອງພຣະອົງແກ່ຂ້ານ້ອຍ.
ຂໍໃຫ້ຂ້ານ້ອຍໄດ້ເຂົ້າໃຈວິຖີທາງແຫ່ງຄຳສອນຈາກຂໍ້ບັງຄັບຂອງພຣະອົງ,
ແລ້ວຂ້ານ້ອຍຈະຄິດຕຶກຕອງເຖິງພາລະກິດອັນອັດສະຈັນຂອງພຣະອົງ.
ຈິດວິນຍານຂອງຂ້ານ້ອຍອ່ອນແຮງເພາະຄວາມໂສກເສົ້າ
ຂໍເຮັດໃຫ້ຂ້ານ້ອຍເຂັ້ມແຂງຂຶ້ນຕາມພຣະຄຳຂອງພຣະອົງດ້ວຍ.
ຂໍປົກປ້ອງຂ້ານ້ອຍໃຫ້ພົ້ນຈາກວິຖີທາງອັນຫລອກລວງທັງຫລາຍ;
ຂໍໂຜດເມດຕາແກ່ຂ້ານ້ອຍ ແລະ ສອນກົດບັນຍັດຂອງພຣະອົງແກ່ຂ້ານ້ອຍ.
ຂ້ານ້ອຍໄດ້ເລືອກຫົນທາງແຫ່ງຄວາມສັດຊື່;
ຂ້ານ້ອຍປັກໃຈໃນກົດບັນຍັດຂອງພຣະອົງ.
ຂ້າແດ່ພຣະເຈົ້າຢາເວ ຂ້ານ້ອຍຢຶດໝັ້ນໃນກົດເກນຂອງພຣະອົງ
ຂໍຢ່າໃຫ້ຂ້ານ້ອຍຕ້ອງຖືກອັບອາຍ.
ຂ້ານ້ອຍກະຕືລືລົ້ນທີ່ຈະເຮັດຕາມຄຳສັ່ງຂອງພຣະອົງ
ເພາະພຣະອົງໄດ້ເຮັດໃຫ້ຂະຫຍາຍຄວາມເຂົ້າໃຈຂອງຂ້ານ້ອຍ.
ເຮ
ຂ້າແດ່ພຣະເຈົ້າຢາເວ ຂໍສອນຂ້ານ້ອຍໃຫ້ປະຕິບັດຕາມດຳລັດຂອງພຣະອົງ,
ແລ້ວຂ້ານ້ອຍຈະຮັກສາດຳລັດໄວ້ຈົນເຖິງທີ່ສຸດ.
ໂຜດໃຫ້ຄວາມເຂົ້າໃຈ ແລ້ວຂ້ານ້ອຍຈະຮັກສາກົດບັນຍັດຂອງພຣະອົງ
ແລະ ປະຕິບັດຕາມດ້ວຍສຸດໃຈຂອງຂ້ານ້ອຍ.
ຂໍນຳຂ້ານ້ອຍໄປຕາມທາງທີ່ພຣະອົງສັ່ງ,
ເພາະຂ້ານ້ອຍປິຕິຍິນດີໃນທາງນັ້ນ.
ຂໍໂຜດຫັນຫົວໃຈຂອງຂ້ານ້ອຍສູ່ກົດເກນຂອງພຣະອົງ
ແລະ ບໍ່ໄຝ່ຫາຜົນປະໂຫຍດຢ່າງເຫັນແກ່ຕົວ.
ຂໍໂຜດຫັນສາຍຕາຂອງຂ້ານ້ອຍໄປຈາກສິ່ງທີ່ໄຮ້ຄ່າ;
ຂໍສະຫງວນຊີວິດຂອງຂ້ານ້ອຍຕາມຖ້ອຍຄຳຂອງພຣະອົງ1
ຂໍເຮັດຕາມຄຳສັນຍາຂອງພຣະອົງທີ່ໃຫ້ໄວ້ກັບຜູ້ຮັບໃຊ້ຂອງພຣະອົງ,
ເພື່ອພຣະອົງຈະເປັນທີ່ຢຳເກງ.
ຂໍໂຜດເອົາຄວາມອັບອາຍທີ່ຂ້ານ້ອຍຢ້ານກົວນັ້ນອອກໄປ,
ເພາະກົດບັນຍັດຂອງພຣະອົງນັ້ນດີ.
ຂ້ານ້ອຍໄຝ່ຫາໃນຂໍ້ບັງຄັບຂອງພຣະອົງຫລາຍ!
ຂໍໂຜດສະຫງວນຊີວິດຂອງຂ້ານ້ອຍໄວ້ດ້ວຍຄວາມຊອບທຳຂອງພຣະອົງ.
ວາວ
ຂ້າແດ່ພຣະເຈົ້າຢາເວ ຂໍໃຫ້ຄວາມຮັກໝັ້ນຄົງຂອງພຣະອົງມາເຖິງຂ້ານ້ອຍ,
ຂໍໃຫ້ຄວາມພົ້ນຂອງພຣະອົງມາເຖິງຕາມຄຳສັນຍາຂອງພຣະອົງ;
ແລ້ວຂ້ານ້ອຍຈະສາມາດຕອບທຸກຄົນທີ່ເຢາະເຢີ້ຍຂ້ານ້ອຍ,
ເພາະຂ້ານ້ອຍໄດ້ໄວ້ວາງໃຈໃນພຣະຄຳຂອງພຣະອົງ.
ຂໍຢ່າເອົາຖ້ອຍຄຳແຫ່ງຄວາມຈິງຂອງພຣະອົງໄປຈາກປາກຂອງຂ້ານ້ອຍ,
ເພາະຂ້ານ້ອຍໄດ້ມອບຄວາມຫວັງຂອງຂ້ານ້ອຍໄວ້ກັບກົດບັນຍັດທັງຫລາຍຂອງພຣະອົງ.
ຂ້ານ້ອຍຈະເຊື່ອຟັງກົດບັນຍັດຂອງພຣະອົງຢູ່ສະເໝີ,
ຕະຫລອດໄປເປັນນິດ.
ຂ້ານ້ອຍຈະດຳເນີນຊີວິດໄປຢ່າງເສລີພາບ
ເພາະຂ້ານ້ອຍໄດ້ສະແຫວງຫາຂໍ້ບັງຄັບຂອງພຣະອົງ.
ຂ້ານ້ອຍຈະເວົ້າເຖິງກົດເກນຂອງພຣະອົງຕໍ່ໜ້າບັນດາກະສັດ
ແລະ ຈະບໍ່ຖືກອັບອາຍຂາຍໜ້າ,
ເພາະຂ້ານ້ອຍປິຕິຍິນດີໃນຄຳສັ່ງຂອງພຣະອົງ
ເພາະວ່າຂ້ານ້ອຍຮັກຄຳສັ່ງເຫລົ່ານັ້ນ.
ຂ້ານ້ອຍເທີດທູນ2ຄຳສັ່ງຂອງພຣະອົງ ເຊິ່ງຂ້ານ້ອຍຮັກ,
ແລະ ຂ້ານ້ອຍຄິດຕຶກຕອງເຖິງດຳລັດຂອງພຣະອົງ.
ຊາຍິນ
ຂໍລະນຶກເຖິງຖ້ອຍທີ່ໃຫ້ໄວ້ແກ່ຜູ້ຮັບໃຊ້ຂອງພຣະອົງ,
ເພາະພຣະອົງໄດ້ໃຫ້ຄວາມຫວັງແກ່ຂ້ານ້ອຍ.
ສິ່ງທີ່ປອບໃຈຂ້ານ້ອຍໃນເວລາທຸກຍາກລຳບາກນັ້ນກໍຄື:
ຄຳສັນຍາຂອງພຣະອົງຮັກສາຊີວິດຂ້ານ້ອຍໄວ້.
ຄົນຈອງຫອງເຢາະເຢີ້ຍຂ້ານ້ອຍຢ່າງບໍ່ມີຄວາມເມດຕາປານີ,
ແຕ່ຂ້ານ້ອຍບໍ່ຫັນໄປຈາກກົດບັນຍັດຂອງພຣະອົງ.
ຂ້າແດ່ພຣະເຈົ້າຢາເວ ຂ້ານ້ອຍລະນຶກເຖິງກົດບັນຍັດແຕ່ເກົ່າກ່ອນຂອງພຣະອົງ
ແລະ ຂ້ານ້ອຍກໍໄດ້ຮັບການເລົ້າໂລມໃຈຈາກກົດບັນຍັດເຫລົ່ານັ້ນ.
ຄວາມຂຸ່ນເຄືອງໃຈໄດ້ຄອບງຳຂ້ານ້ອຍເພາະຄົນຊົ່ວ,
ຜູ້ທີ່ໄດ້ປະຖິ້ມກົດບັນຍັດຂອງພຣະອົງ.
ດຳລັດຂອງພຣະອົງເປັນຫົວຂໍ້ຂອງບົດເພງຂອງຂ້ານ້ອຍ
ໃນທຸກບ່ອນທີ່ຂ້ານ້ອຍຈະອາໄສຢູ່.
ຂ້າແດ່ພຣະເຈົ້າຢາເວ ໃນເວລາກາງຄືນ ຂ້ານ້ອຍໄດ້ລະນຶກເຖິງນາມຂອງພຣະອົງ,
ແລະ ຂ້ານ້ອຍຈະປະຕິບັດຕາມກົດບັນຍັດຂອງພຣະອົງ.
ທີ່ຂ້ານ້ອຍໄດ້ປະຕິບັດຕະຫລອດມາ
ກໍຄືຂ້ານ້ອຍເຊື່ອຟັງຂໍ້ບັງຄັບທັງຫລາຍຂອງພຣະອົງ.
ເຮດ
ຂ້າແດ່ພຣະເຈົ້າຢາເວ ພຣະອົງເປັນສ່ວນມໍລະດົກຂອງຂ້ານ້ອຍ;
ຂ້ານ້ອຍໄດ້ສັນຍາວ່າຈະເຊື່ອຟັງຖ້ອຍຄຳຂອງພຣະອົງ.
ຂ້ານ້ອຍສະແຫວງຫາໃບໜ້າຂອງພຣະອົງໝົດທັງຫົວໃຈຂອງຂ້ານ້ອຍ;
ຂໍໂຜດເມດຕາຂ້ານ້ອຍຕາມຄຳສັນຍາຂອງພຣະອົງ.
ຂ້ານ້ອຍພິຈາລະນາວິຖີທາງຂອງຕົນ
ແລະ ໄດ້ຫັນບາດກ້າວຂອງຕົນມາສູ່ກົດເກນຂອງພຣະອົງ.
ຂ້ານ້ອຍຈະຟ້າວ ແລະ ຈະບໍ່ຊັກຊ້າ
ທີ່ຈະເຊື່ອຟັງຄຳສັ່ງຂອງພຣະອົງ.
ເຖິງແມ່ນຄົນຊົ່ວຜູກຂ້ານ້ອຍໄວ້ດ້ວຍເຊືອກກໍຕາມ,
ຂ້ານ້ອຍກໍຈະບໍ່ລືມກົດບັນຍັດຂອງພຣະອົງ.
ເວລາທ່ຽງຄືນຂ້ານ້ອຍລຸກຂຶ້ນມາຂອບພຣະຄຸນພຣະອົງ
ສຳລັບກົດບັນຍັດອັນຊອບທຳຂອງພຣະອົງ.
ຂ້ານ້ອຍເປັນມິດກັບທຸກຄົນທີ່ຢຳເກງພຣະອົງ,
ກັບຜູ້ທີ່ເຮັດຕາມຂໍ້ບັງຄັບຂອງພຣະອົງ.
ຂ້າແດ່ພຣະເຈົ້າຢາເວ ໂລກນີ້ເຕັມດ້ວຍຄວາມຮັກຂອງພຣະອົງ;
ຂໍໂຜດສອນດຳລັດຂອງພຣະອົງໃຫ້ແກ່ຂ້ານ້ອຍດ້ວຍ.
ເທດ
ພຣະເຈົ້າຢາເວຂໍໂຜດດີຕໍ່ຜູ້ຮັບໃຊ້ຂອງພຣະອົງ
ຕາມຖ້ອຍຄຳຂອງພຣະອົງ.
ຂໍສອນຂ້ານ້ອຍໃຫ້ມີຄວາມຮູ້ ແລະ ມີການຕັດສິນທີ່ດີ,
ເພາະຂ້ານ້ອຍວາງໃຈຄຳສັ່ງຂອງພຣະອົງ.
ກ່ອນທີ່ຂ້ານ້ອຍຈະຕົກທຸກ ຂ້ານ້ອຍໄດ້ຕະເຫລີດໄປ,
ແຕ່ບັດນີ້ ຂ້ານ້ອຍເຊື່ອຟັງຖ້ອຍຄຳຂອງພຣະອົງ.
ພຣະອົງແສນດີ ແລະ ສິ່ງທີ່ພຣະອົງເຮັດນັ້ນກໍດີເລີດ;
ຂໍໂຜດສອນດຳລັດຂອງພຣະອົງໃຫ້ແກ່ຂ້ານ້ອຍດ້ວຍ.
ເຖິງແມ່ນວ່າຄົນຈອງຫອງໃສ່ຮ້າຍປ້າຍສີຂ້ານ້ອຍ
ຂ້ານ້ອຍກໍຮັກສາຂໍ້ບັງຄັບຂອງພຣະອົງດ້ວຍສຸດຫົວໃຈຂອງຂ້ານ້ອຍ.
ຈິດໃຈຂອງພວກເຂົາດື້ດ້ານ ແລະ ບໍ່ຮູ້ຈັກສຳນຶກ,
ສ່ວນຂ້ານ້ອຍປິຕິຍິນດີໃນກົດບັນຍັດຂອງພຣະອົງ.
ດີແລ້ວທີ່ຂ້ານ້ອຍທຸກຍາກ
ຂ້ານ້ອຍຈະໄດ້ຮຽນຮູ້ດຳລັດຂອງພຣະອົງ.
ກົດບັນຍັດຈາກປາກຂອງພຣະອົງນັ້ນລ້ຳຄ່າສຳລັບຂ້ານ້ອຍ
ຫລາຍກວ່າເງິນ ແລະ ຄຳຈຳນວນເປັນພັນແທ່ງ.
ໂຍດ
ມືຂອງພຣະອົງໄດ້ສ້າງ ແລະ ປັ້ນຂ້ານ້ອຍຂຶ້ນ;
ໂຜດໃຫ້ຂ້ານ້ອຍມີຄວາມເຂົ້າໃຈ ເພື່ອຈະຮຽນຮູ້ຂໍ້ຄຳສັ່ງຂອງພຣະອົງ.
ຂໍໃຫ້ຜູ້ທີ່ຢຳເກງພຣະອົງຊື່ນຊົມຍິນດີເມື່ອພວກເຂົາເຫັນຂ້ານ້ອຍ,
ເພາະຂ້ານ້ອຍມອບຄວາມຫວັງຂອງຂ້ານ້ອຍໄວ້ທີ່ພຣະຄຳຂອງພຣະອົງ.
ຂ້າແດ່ພຣະເຈົ້າຢາເວ ຂ້ານ້ອຍຮູ້ວ່າກົດບັນຍັດຂອງພຣະອົງນັ້ນຊອບທຳ,
ແລະ ຮູ້ວ່າທີ່ພຣະອົງໄດ້ເຮັດໃຫ້ຂ້ານ້ອຍທຸກຍາກນັ້ນກໍເພາະພຣະອົງຢູ່ໃນຄວາມສັດຊື່.
ຂໍໃຫ້ຄວາມຮັກໝັ້ນຄົງຂອງພຣະອົງເລົ້າໂລມຂ້ານ້ອຍ,
ຕາມຄຳສັນຍາຂອງພຣະອົງທີ່ໄດ້ໃຫ້ໄວ້ກັບຜູ້ຮັບໃຊ້ຂອງພຣະອົງ.
ຂໍໃຫ້ຄວາມເມດຕາສົງສານຂອງພຣະອົງມາເຖິງຂ້ານ້ອຍ ເພື່ອຂ້ານ້ອຍຈະມີຊີວິດຢູ່,
ເພາະກົດບັນຍັດຂອງພຣະອົງເປັນຄວາມປິຕິຍິນດີຂອງຂ້ານ້ອຍ.
ຂໍໃຫ້ຄົນຈອງຫອງຖືກອັບອາຍ ເພາະພວກເຂົາເຮັດຜິດຕໍ່ຂ້ານ້ອຍໂດຍບໍ່ມີສາເຫດ;
ສ່ວນຂ້ານ້ອຍຈະຄິດຕຶກຕອງເຖິງຂໍ້ບັງຄັບຂອງພຣະອົງ.
ຂໍໃຫ້ບັນດາຜູ້ທີ່ຢຳເກງພຣະອົງ
ຜູ້ທີ່ເຂົ້າໃຈກົດເກນຂອງພຣະອົງ ຫັນມາຫາຂ້ານ້ອຍ.
ຂໍໃຫ້ຂ້ານ້ອຍປະຕິບັດຕາມດຳລັດຂອງພຣະອົງດ້ວຍສຸດໃຈ,
ເພື່ອວ່າຂ້ານ້ອຍຈະບໍ່ຕ້ອງຖືກອັບອາຍ.
ຄາບ
ຈິດວິນຍານຂອງຂ້ານ້ອຍອ່ອນແຮງເພາະໂຫຍຫາຄວາມພົ້ນຂອງພຣະອົງ,
ແຕ່ຂ້ານ້ອຍໄດ້ມອບຄວາມຫວັງຂອງຂ້ານ້ອຍໄວ້ທີ່ພຣະຄຳຂອງພຣະອົງ.
ດວງຕາຂອງຂ້ານ້ອຍອ່ອນແຮງ ເພາະລໍຄອຍຖ້າຄຳສັນຍາຂອງພຣະອົງ;
ຂ້ານ້ອຍເວົ້າວ່າ “ເມື່ອໃດພຣະອົງຈຶ່ງຈະເລົ້າໂລມຂ້ານ້ອຍ?”
ເຖິງແມ່ນວ່າຂ້ານ້ອຍຈະເໝືອນຖົງໜັງເຫລົ້າອະງຸ່ນທີ່ຖືກຮົມຄວັນ,
ຂ້ານ້ອຍກໍບໍ່ລືມດຳລັດຂອງພຣະອົງ.
ຜູ້ຮັບໃຊ້ຂອງພຣະອົງຈະຕ້ອງລໍຄອຍຖ້າອີກດົນເທົ່າໃດ?
ເມື່ອໃດພຣະອົງຈຶ່ງຈະລົງໂທດບັນດາຜູ້ທີ່ຂົ່ມເຫັງຂ້ານ້ອຍ?
ຄົນຈອງຫອງຂຸດຂຸມດັກຂ້ານ້ອຍ,
ເຊິ່ງຂັດກັບກົດບັນຍັດຂອງພຣະອົງ.
ຂໍ້ຄຳສັ່ງທັງໝົດຂອງພຣະອົງລ້ວນແຕ່ເຊື່ອຖືໄດ້;
ຂໍໂຜດຊ່ວຍຂ້ານ້ອຍ ເພາະຄົນກົດຂີ່ຂົ່ມເຫັງຂ້ານ້ອຍໂດຍບໍ່ມີສາເຫດ.
ພວກເຂົາເກືອບຈະກຳຈັດຂ້ານ້ອຍໄປຈາກແຜ່ນດິນໂລກນີ້ແລ້ວ,
ແຕ່ຂ້ານ້ອຍບໍ່ຍອມປະຖິ້ມຂໍ້ບັງຄັບຂອງພຣະອົງ.
ຂໍຮັກສາຊີວິດຂອງຂ້ານ້ອຍຕາມຄວາມຮັກໝັ້ນຄົງຂອງພຣະອົງ,
ແລ້ວຂ້ານ້ອຍຈະປະຕິບັດຕາມກົດເກນຈາກປາກຂອງພຣະອົງ.
ລາເມດ
ຂ້າແດ່ພຣະເຈົ້າຢາເວ ພຣະຄຳຂອງພຣະອົງນັ້ນຄົງຢູ່ຕະຫລອດໄປ;
ພຣະຄຳໝັ້ນຄົງນິລັນດອນໃນຟ້າສະຫວັນ.
ຄວາມສັດຊື່ຂອງພຣະອົງດຳລົງຢູ່ທຸກຊົ່ວອາຍຸ;
ພຣະອົງໄດ້ສະຖາປະນາໂລກ ແລະ ໂລກນີ້ກໍດຳລົງຢູ່.
ກົດບັນຍັດຂອງພຣະອົງດຳລົງຢູ່ຈົນເຖິງທຸກວັນນີ້,
ເພາະທຸກສິ່ງຮັບໃຊ້ພຣະອົງ.
ຖ້າກົດບັນຍັດຂອງພຣະອົງບໍ່ໄດ້ເປັນຄວາມປິຕິຍິນດີຂອງຂ້ານ້ອຍ,
ຂ້ານ້ອຍກໍຄົງພິນາດໃນຄວາມທຸກຍາກໄປແລ້ວ,
ຂ້ານ້ອຍຈະບໍ່ລືມຂໍ້ບັງຄັບຂອງພຣະອົງ.
ເພາະພຣະອົງຮັກສາຊີວິດຂອງຂ້ານ້ອຍໄວ້ດ້ວຍຂໍ້ບັງຄັບເຫລົ່ານັ້ນ.
ຂໍໂຜດຊ່ວຍກອບກູ້ຂ້ານ້ອຍ ເພາະຂ້ານ້ອຍເປັນຂອງພຣະອົງ;
ຂ້ານ້ອຍສະແຫວງຫາຂໍ້ບັງຄັບຂອງພຣະອົງ.
ຄົນຊົ່ວລໍຖ້າທຳລາຍຂ້ານ້ອຍ,
ແຕ່ຂ້ານ້ອຍຈະຄິດຕຶກຕອງກົດເກນຂອງພຣະອົງ.
ຂ້ານ້ອຍເຫັນວ່າທຸກສິ່ງທີ່ດີພ້ອມກໍຍັງມີຂີດຈຳກັດ,
ແຕ່ຄຳສັ່ງຂອງພຣະອົງນັ້ນບໍ່ມີຂອບເຂດ.
ເມມ
ຂ້ານ້ອຍຮັກກົດບັນຍັດຂອງພຣະອົງຫລາຍ!
ຂ້ານ້ອຍຄິດຕຶກຕອງກົດບັນຍັດນັ້ນຕະຫລອດວັນ.
ຂໍ້ຄຳສັ່ງຂອງພຣະອົງຢູ່ກັບຂ້ານ້ອຍສະເໝີ
ແລະ ເຮັດໃຫ້ຂ້ານ້ອຍສະຫລາດກວ່າສັດຕູທັງຫລາຍຂອງຂ້ານ້ອຍ.
ຂ້ານ້ອຍມີຄວາມເຂົ້າໃຈກວ່າບັນດາຄູທັງຫລາຍຂອງຂ້ານ້ອຍ,
ເພາະຂ້ານ້ອຍສຳນຶກກົດເກນຂອງພຣະອົງ.
ຂ້ານ້ອຍເຂົ້າໃຈຫລາຍກວ່າຜູ້ອາວຸໂສ,
ເພາະຂ້ານ້ອຍເຊື່ອຟັງຂໍ້ບັງຄັບຂອງພຣະອົງ.
ຂ້ານ້ອຍຮັກສາທຸກບາດກ້າວຂອງຂ້ານ້ອຍໃຫ້ພົ້ນຈາກວິຖີທາງອັນຊົ່ວຮ້າຍ.
ເພື່ອຂ້ານ້ອຍຈະເຊື່ອຟັງພຣະຄຳຂອງພຣະອົງ.
ຂ້ານ້ອຍບໍ່ໄດ້ຫ່າງຈາກກົດບັນຍັດຂອງພຣະອົງ,
ເພາະພຣະອົງເອງໄດ້ສອນຂ້ານ້ອຍ.
ພຣະຄຳຂອງພຣະອົງນັ້ນ ຂ້ານ້ອຍລອງແລ້ວຫວານຫລາຍ,
ຫວານຍິ່ງກວ່ານ້ຳເຜິ້ງເມື່ອເຖິງປາກຂອງຂ້ານ້ອຍ!
ຂ້ານ້ອຍໄດ້ຄວາມເຂົ້າໃຈຈາກຂໍ້ບັງຄັບຂອງພຣະອົງ;
ເຫດສະນັ້ນ ຂ້ານ້ອຍຈຶ່ງກຽດຊັງທຸກວິຖີທາງທີ່ຜິດ.
ນູນ
ພຣະຄຳຂອງພຣະອົງເປັນຕະກຽງສຳລັບບາດກ້າວຂອງຂ້ານ້ອຍ,
ເປັນແສງສະຫວ່າງສ່ອງທາງຂອງຂ້ານ້ອຍ.
ຂ້ານ້ອຍໄດ້ປະຕິຍານ ແລະ ຢືນຢັນໄວ້
ວ່າຂ້ານ້ອຍຈະປະຕິບັດຕາມກົດບັນຍັດອັນຊອບທຳຂອງພຣະອົງ.
ຂ້າແດ່ພຣະເຈົ້າຢາເວ ຂ້ານ້ອຍທຸກທໍລະມານຍິ່ງນັກ
ຂໍໂຜດຮັກສາຊີວິດຂອງຂ້ານ້ອຍຕາມພຣະຄຳຂອງພຣະອົງ.
ຂ້າແດ່ພຣະເຈົ້າຢາເວ ຂໍຮັບຄຳສັນລະເສີນດ້ວຍໃຈຈາກປາກຂອງຂ້ານ້ອຍ,
ແລະ ສອນກົດບັນຍັດຂອງພຣະອົງໃຫ້ແກ່ຂ້ານ້ອຍ.
ເຖິງແມ່ນຂ້ານ້ອຍຕ້ອງເອົາຊີວິດເຂົ້າສ່ຽງໄພຢູ່ສະເໝີ,
ຂ້ານ້ອຍກໍຈະບໍ່ລືມກົດບັນຍັດຂອງພຣະອົງ.
ຄົນຊົ່ວຮ້າຍວາງກັບດັກລໍ້ຂ້ານ້ອຍ,
ແຕ່ຂ້ານ້ອຍບໍ່ໄດ້ຫລົງໜີຈາກຂໍ້ບັງຄັບຂອງພຣະອົງ.
ກົດເກນຂອງພຣະອົງເປັນມໍລະດົກນິລັນດອນຂອງຂ້ານ້ອຍ;
ແລະ ເປັນຄວາມຊື່ນຊົມຍິນດີໃນໃຈຂອງຂ້ານ້ອຍ.
ຂ້ານ້ອຍຕັ້ງໃຈວ່າຈະເຮັດຕາມດຳລັດຂອງພຣະອົງ
ຈົນເຖິງທີ່ສຸດ.3
ຊາເມກ
ຂ້ານ້ອຍກຽດຊັງຄົນສອງຈິດສອງໃຈ,
ແຕ່ຂ້ານ້ອຍຮັກກົດບັນຍັດຂອງພຣະອົງ.
ພຣະອົງເປັນທີ່ລີ້ໄພ ແລະ ເປັນໂລ່ຂອງຂ້ານ້ອຍ
ຂ້ານ້ອຍມອບຄວາມຫວັງຂອງຂ້ານ້ອຍໄວ້ທີ່ພຣະຄຳຂອງພຣະອົງ.
ເຈົ້າຜູ້ເຮັດການຊົ່ວທັງຫລາຍ ຈົ່ງໄປໃຫ້ພົ້ນຈາກຂ້ອຍ,
ເພື່ອຂ້ອຍຈະໄດ້ເຮັດຕາມຄຳສັ່ງຂອງພຣະເຈົ້າຂອງຂ້ອຍ!
ຂໍໂຜດຄ້ຳຊູຂ້ານ້ອຍຕາມຄຳສັນຍາຂອງພຣະອົງ ແລະ ຂ້ານ້ອຍຈະມີຊີວິດຢູ່;
ຂໍຢ່າໃຫ້ຄວາມຫວັງຂອງຂ້ານ້ອຍສະຫລາຍໄປ.
ຂໍໂຜດອູ້ມຊູຂ້ານ້ອຍໄວ້ ແລະ ຂ້ານ້ອຍຈະໄດ້ຮັບການປົດປ່ອຍ;
ຂ້ານ້ອຍຈະເຄົາລົບດຳລັດຂອງພຣະອົງຢູ່ສະເໝີ.
ພຣະອົງປະຕິເສດທຸກຄົນທີ່ຫລົງໜີຈາກດຳລັດຂອງພຣະອົງ,
ເພາະການຫລອກລວງຂອງພວກເຂົາກໍສູນເປົ່າ.
ພຣະອົງປະຖິ້ມບັນດາຄົນຊົ່ວຂອງໂລກນີ້ເໝືອນກັບຂີ້ແຮ່;
ເຫດສະນັ້ນຂ້ານ້ອຍຈຶ່ງຮັກກົດເກນຂອງພຣະອົງ.
ເນື້ອໜັງຂອງຂ້ານ້ອຍກໍສັ່ນສະທ້ານດ້ວຍຄວາມຢ້ານພຣະອົງ;
ຂ້ານ້ອຍຢຳເກງກົດບັນຍັດຂອງພຣະອົງ.
ອາຍິນ
ຂ້ານ້ອຍໄດ້ເຮັດສິ່ງທີ່ຖືກຕ້ອງ ແລະ ຍຸຕິທຳ
ຂໍຢ່າປະຖິ້ມຂ້ານ້ອຍໄວ້ກັບຜູ້ທີ່ກົດຂີ່ຂົ່ມເຫັງຂ້ານ້ອຍ.
ຂໍຄ້ຳປະກັນຄວາມສະຫວັດດີພາບໃຫ້ແກ່ຜູ້ຮັບໃຊ້ຂອງພຣະອົງດ້ວຍ;
ຢ່າໃຫ້ຄົນຈອງຫອງຂົ່ມເຫັງຂ້ານ້ອຍໄດ້.
ດວງຕາຂອງຂ້ານ້ອຍອ່ອນແຮງເພາະລໍຄອຍຖ້າຄວາມພົ້ນຈາກພຣະອົງ.
ຊອກຫາຄຳສັນຍາອັນຊອບທຳຂອງພຣະອົງ.
ຂໍປະຕິບັດຕໍ່ຜູ້ຮັບໃຊ້ຂອງພຣະອົງຕາມຄວາມຮັກໝັ້ນຄົງຂອງພຣະອົງ
ແລະ ສອນດຳລັດຂອງພຣະອົງໃຫ້ແກ່ຂ້ານ້ອຍ.
ຂ້ານ້ອຍເປັນຜູ້ຮັບໃຊ້ຂອງພຣະອົງ ຂໍໃຫ້ຄວາມສະຫລາດຫລັກແຫລມແກ່ຂ້ານ້ອຍ
ເພື່ອຂ້ານ້ອຍຈະໄດ້ເຂົ້າໃຈກົດເກນຂອງພຣະອົງ.
ຂ້າແດ່ພຣະເຈົ້າຢາເວ ເຖິງເວລາແລ້ວທີ່ພຣະອົງຈະຈັດການ;
ເພາະກົດບັນຍັດຂອງພຣະອົງຖືກລະເມີດ.
ເພາະວ່າຂ້ານ້ອຍຮັກຂໍ້ຄຳສັ່ງຂອງພຣະອົງ
ຫລາຍກວ່າຄຳ, ຫລາຍກວ່າ, ຄຳບໍລິສຸດ
ແລະ ເພາະຂ້ານ້ອຍເຫັນວ່າຂໍ້ບັງຄັບຂອງພຣະອົງລ້ວນແຕ່ຖືກຕ້ອງ,
ຂ້ານ້ອຍຈຶ່ງກຽດຊັງທາງທີ່ຜິດທຸກທາງ.
ເພ
ກົດເກນຂອງພຣະອົງນັ້ນລ້ຳເລີດ;
ເຫດສະນັ້ນ ຂ້ານ້ອຍຈຶ່ງເຊື່ອຟັງກົດເກນເຫລົ່ານັ້ນ.
ການເປີດເຜີຍພຣະຄຳຂອງພຣະອົງນັ້ນໃຫ້ຄວາມສະຫວ່າງ
ເຮັດໃຫ້ຄົນຮູ້ໜ້ອຍມີຄວາມເຂົ້າໃຈ.
ຂ້ານ້ອຍອ້າປາກຂອງຂ້ານ້ອຍ ແລະ ກໍຫອບ,
ໂຫຍຫາຂໍ້ຄຳສັ່ງຂອງພຣະອົງ.
ຂໍໂຜດຫັນມາຫາຂ້ານ້ອຍ ແລະ ເມດຕາຂ້ານ້ອຍ,
ເໝືອນດັ່ງທີ່ເຮັດຕໍ່ບັນດາຜູ້ທີ່ຮັກນາມຂອງພຣະອົງຢູ່ສະເໝີ.
ຂໍໂຜດນຳບາດກ້າວຂອງຂ້ານ້ອຍໄປຕາມພຣະຄຳຂອງພຣະອົງ;
ຂໍຢ່າໃຫ້ຄວາມບາບໄດ້ຄອບຄອງຂ້ານ້ອຍ.
ຂໍໂຜດໄຖ່ຂ້ານ້ອຍຈາກການກົດຂີ່ຂົ່ມເຫັງຂອງມະນຸດ,
ເພື່ອຂ້ານ້ອຍຈະໄດ້ເຊື່ອຟັງຂໍ້ບັງຄັບຂອງພຣະອົງ.
ຂໍໃຫ້ໃບໜ້າຂອງພຣະອົງສ່ອງແສງໃສ່ຜູ້ຮັບໃຊ້ຂອງພຣະອົງ
ແລະ ສອນດຳລັດຂອງພຣະອົງໃຫ້ແກ່ຂ້ານ້ອຍ.
ນ້ຳຕາຂອງຂ້ານ້ອຍໄຫລເປັນສາຍ,
ເພາະຄົນທັງຫລາຍບໍ່ເຊື່ອຟັງກົດບັນຍັດຂອງພຣະອົງ.
ສາເດ
ຂ້າແດ່ພຣະເຈົ້າຢາເວ ພຣະອົງນັ້ນຊອບທຳ;
ແລະ ກົດບັນຍັດຂອງພຣະອົງກໍຖືກຕ້ອງ.
ກົດເກນທີ່ພຣະອົງໄດ້ວາງໄວ້ແມ່ນຊອບທຳ;
ໜ້າເຊື່ອຖືໄດ້.
ຄວາມຮ້ອນຮົນຂອງຂ້ານ້ອຍເຮັດໃຫ້ຂ້ານ້ອຍໝົດແຮງ,
ເພາະສັດຕູຂອງຂ້ານ້ອຍໄດ້ລະເລີຍຕໍ່ພຣະຄຳຂອງພຣະອົງ.
ສັນຍາຂອງພຣະອົງຜ່ານການພິສູດມາຢ່າງຖີ່ຖ້ວນ
ແລະ ຜູ້ຮັບໃຊ້ຂອງພຣະອົງຮັກສັນຍານັ້ນ.
ເຖິງແມ່ນຂ້ານ້ອຍຕ່ຳຕ້ອຍ ແລະ ຖືກໝິ່ນປະໝາດກໍຕາມ
ຂ້ານ້ອຍກໍບໍ່ລືມຂໍ້ບັງຄັບຂອງພຣະອົງ.
ຄວາມຊອບທຳຂອງພຣະອົງດຳລົງນິລັນດອນ
ແລະ ກົດບັນຍັດຂອງພຣະອົງກໍເປັນຄວາມຈິງ.
ເຖິງແມ່ນຄວາມເດືອດຮ້ອນ ແລະ ຄວາມທຸກໃຈໄດ້ເຂົ້າມາຫາຂ້ານ້ອຍ
ແຕ່ຄຳສັ່ງຂອງພຣະອົງກໍເຮັດໃຫ້ຂ້ານ້ອຍປິຕິຍິນດີ.
ກົດເກນຂອງພຣະອົງຖືກຕ້ອງຢູ່ສະເໝີ;
ຂໍໂຜດຊ່ວຍໃຫ້ຂ້ານ້ອຍເຂົ້າໃຈເພື່ອຂ້ານ້ອຍຈະມີຊີວິດຢູ່.
ໂຄບ
ຂ້າແດ່ພຣະເຈົ້າຢາເວ ຂ້ານ້ອຍຮ້ອງຫາໝົດທັງຫົວໃຈຂອງຂ້ານ້ອຍ, ຂໍໂຜດຕອບຂ້ານ້ອຍດ້ວຍ
ແລະ ຂ້ານ້ອຍຈະເຊື່ອຟັງດຳລັດຂອງພຣະອົງ.
ຂ້ານ້ອຍຮ້ອງຫາພຣະອົງ ຂໍຊ່ວຍຂ້ານ້ອຍໃຫ້ພົ້ນ
ເພື່ອຂ້ານ້ອຍຈະປະຕິບັດຕາມກົດເກນຂອງພຣະອົງ.
ຂ້ານ້ອຍຕື່ນຂຶ້ນກ່ອນຮຸ່ງເຊົ້າ ແລະ ຮ້ອງຂໍຄວາມຊ່ວຍເຫລືອ;
ຂ້ານ້ອຍມອບຄວາມຫວັງຂອງຂ້ານ້ອຍໄວ້ທີ່ພຣະຄຳຂອງພຣະອົງ.
ຕາຂອງຂ້ານ້ອຍມືນຢູ່ຕະຫລອດທັງຄືນ
ເພື່ອຂ້ານ້ອຍຈະໄດ້ຄິດຕຶກຕອງເຖິງສັນຍາຂອງພຣະອົງ.
ຂໍຟັງຄຳຮ້ອງຂໍຂອງຂ້ານ້ອຍຕາມຄວາມຮັກໝັ້ນຄົງຂອງພຣະອົງ;
ຂ້າແດ່ພຣະເຈົ້າຢາເວ ຂໍຮັກສາຊີວິດຂອງຂ້ານ້ອຍຕາມກົດບັນຍັດຂອງພຣະອົງ.
ບັນດາຜູ້ທີ່ວາງແຜນຊົ່ວກໍໃກ້ເຂົ້າມາແລ້ວ
ແຕ່ພວກເຂົາກໍຫ່າງໄກຈາກກົດບັນຍັດຂອງພຣະອົງ.
ຂ້າແດ່ພຣະເຈົ້າຢາເວ ແຕ່ພຣະອົງກໍຢູ່ໃກ້,
ແລະ ຂໍ້ຄຳສັ່ງທັງໝົດຂອງພຣະອົງລ້ວນເປັນຄວາມຈິງ.
ຂ້ານ້ອຍຮຽນຈາກກົດເກນຂອງພຣະອົງມາດົນ
ພຣະອົງໄດ້ຕັ້ງກົດເກນເຫລົ່ານັ້ນໄວ້ເປັນນິດ.
ເລດ
ຂໍໂຜດຫລຽວເບິ່ງຄວາມທຸກທໍລະມານຂອງຂ້ານ້ອຍ ແລະ ກອບກູ້ເອົາຂ້ານ້ອຍດ້ວຍ,
ເພາະຂ້ານ້ອຍບໍ່ໄດ້ລືມກົດບັນຍັດຂອງພຣະອົງ.
ຂໍສູ້ຄະດີໃຫ້ຂ້ານ້ອຍ ແລະ ໄຖ່ຂ້ານ້ອຍ;
ຂໍຮັກສາຊີວິດຂອງຂ້ານ້ອຍຕາມຄຳສັນຍາຂອງພຣະອົງ.
ຄວາມພົ້ນແມ່ນຢູ່ຫ່າງໄກຈາກຄົນຊົ່ວຮ້າຍ,
ເພາະພວກເຂົາບໍ່ສະແຫວງຫາດຳລັດຂອງພຣະອົງ.
ຂ້າແດ່ພຣະເຈົ້າຢາເວ ຄວາມເມດຕາກະລຸນາຂອງພຣະອົງນັ້ນຍິ່ງໃຫຍ່ຫລາຍ;
ຂໍຮັກສາຊີວິດຂອງຂ້ານ້ອຍຕາມກົດບັນຍັດຂອງພຣະອົງ.
ສັດຕູຜູ້ກົດຂີ່ຂົ່ມເຫັງຂ້ານ້ອຍມີຫລວງຫລາຍ
ແຕ່ຂ້ານ້ອຍບໍ່ໄດ້ຫັນໄປຈາກກົດເກນຂອງພຣະອົງ.
ຂ້ານ້ອຍເບິ່ງຜູ້ທໍລະຍົດດ້ວຍຄວາມກຽດຊັງ
ເພາະພວກເຂົາບໍ່ເຊື່ອຟັງຖ້ອຍຄຳຂອງພຣະອົງ.
ຂ້າແດ່ພຣະເຈົ້າຢາເວ ຂໍໃຫ້ເບິ່ງວ່າ ຂ້ານ້ອຍຮັກຂໍ້ບັງຄັບຂອງພຣະອົງຫລາຍເທົ່າໃດ;
ຂໍຮັກສາຊີວິດຂອງຂ້ານ້ອຍໄວ້ຕາມຄວາມຮັກໝັ້ນຄົງຂອງພຣະອົງ.
ຖ້ອຍຄຳທັງໝົດຂອງພຣະອົງນັ້ນເປັນຄວາມຈິງ;
ກົດບັນຍັດອັນຊອບທຳທັງໝົດຂອງພຣະອົງດຳລົງຢູ່ນິລັນດອນ.
ສິນ ແລະ ຊິນ
ບັນດາຜູ້ຄອບຄອງຂົ່ມເຫັງຂ້ານ້ອຍໂດຍບໍ່ມີສາເຫດ,
ແຕ່ຫົວໃຈຂ້ານ້ອຍກໍຢຳເກງພຣະຄຳຂອງພຣະອົງ.
ຂ້ານ້ອຍຊື່ນຊົມຍິນດີໃນສັນຍາຂອງພຣະອົງ
ເໝືອນຄົນທີ່ພົບຂຸມຊັບອັນມະຫາສານ.
ຂ້ານ້ອຍຊັງ ແລະ ລັງກຽດຄວາມຕົວະ
ແຕ່ຂ້ານ້ອຍຮັກກົດບັນຍັດຂອງພຣະອົງ.
ຂ້ານ້ອຍສັນລະເສີນພຣະອົງວັນລະເຈັດເທື່ອ
ເພາະກົດບັນຍັດອັນຊອບທຳຂອງພຣະອົງ.
ບັນດາຜູ້ທີ່ຮັກກົດບັນຍັດຂອງພຣະອົງກໍມີສັນຕິສຸກຍິ່ງໃຫຍ່,
ບໍ່ມີສິ່ງໃດເຮັດໃຫ້ພວກເຂົາສະດຸດລົ້ມໄດ້.
ຂ້າແດ່ພຣະເຈົ້າຢາເວ ຂ້ານ້ອຍຄອຍຖ້າຄວາມພົ້ນຂອງພຣະອົງ
ແລະ ຂ້ານ້ອຍໄດ້ປະຕິບັດຕາມຄຳສັ່ງຂອງພຣະອົງ.
ຂ້ານ້ອຍເຊື່ອຟັງກົດເກນຂອງພຣະອົງ
ເພາະຂ້ານ້ອຍຮັກກົດເກນເຫລົ່ານັ້ນຫລາຍ.
ຂ້ານ້ອຍເຊື່ອຟັງຂໍ້ບັງຄັບ ແລະ ກົດເກນຂອງພຣະອົງ
ເພາະວິຖີທາງທັງໝົດຂອງຂ້ານ້ອຍກໍປາກົດແຈ້ງແກ່ພຣະອົງ.
ເທົາ
ຂ້າແດ່ພຣະເຈົ້າຢາເວ ຂໍໃຫ້ສຽງຮ້ອງໄຫ້ຂອງຂ້ານ້ອຍຂຶ້ນໄປເຖິງຕໍ່ໜ້າພຣະອົງ;
ໂຜດໃຫ້ຄວາມເຂົ້າໃຈແກ່ຂ້ານ້ອຍຕາມພຣະຄຳຂອງພຣະອົງ.
ຂໍໃຫ້ຄຳອ້ອນວອນຂອງຂ້ານ້ອຍຂຶ້ນໄປເຖິງຕໍ່ໜ້າພຣະອົງ
ຂໍຊ່ວຍກອບກູ້ຂ້ານ້ອຍຕາມສັນຍາຂອງພຣະອົງ.
ຂໍໃຫ້ປາກຂອງຂ້ານ້ອຍລົ້ນດ້ວຍຄຳສັນລະເສີນພຣະອົງ
ເພາະພຣະອົງສອນດຳລັດຂອງພຣະອົງໃຫ້ແກ່ຂ້ານ້ອຍ.
ຂໍໃຫ້ລີ້ນຂອງຂ້ານ້ອຍຮ້ອງເພງເຖິງພຣະຄຳຂອງພຣະອົງ
ເພາະຂໍ້ຄຳສັ່ງທັງໝົດຂອງພຣະອົງນັ້ນຊອບທຳ.
ຂໍໃຫ້ມືຂອງພຣະອົງພ້ອມທີ່ຈະຊ່ວຍເຫລືອຂ້ານ້ອຍ
ເພາະຂ້ານ້ອຍໄດ້ເລືອກຂໍ້ບັງຄັບຂອງພຣະອົງ.
ຂ້າແດ່ພຣະເຈົ້າຢາເວ ຂ້ານ້ອຍໂຫຍຫາຄວາມພົ້ນຂອງພຣະອົງ
ແລະ ກົດບັນຍັດຂອງພຣະອົງນັ້ນກໍເປັນຄວາມປິຕິຍິນດີຂອງຂ້ານ້ອຍ.
ຂໍໃຫ້ຂ້ານ້ອຍມີຊີວິດຢູ່ເພື່ອທີ່ຈະສັນລະເສີນພຣະອົງ,
ຂໍໃຫ້ກົດບັນຍັດຂອງພຣະອົງຄ້ຳຊູຂ້ານ້ອຍໄວ້.
ຂ້ານ້ອຍໄດ້ຫລົງໄປເໝືອນລູກແກະທີ່ຫລົງທາງ.
ຂໍໂຜດຕາມຫາຜູ້ຮັບໃຊ້ຂອງພຣະອົງ,
ເພາະຂ້ານ້ອຍບໍ່ລືມຂໍ້ຄຳສັ່ງຂອງພຣະອົງ.
Source notes (3)
- Footnote ຫລື ຂໍສະຫງວນຊີວິດຂ້ານ້ອຍໃນທາງຂອງພຣະອົງ
- Footnote ຫລື ຂ້ານ້ອຍຊູມືຂຶ້ນແດ່
- Footnote ຫລື ດຳລັດ ເພື່ອລາງວັນອັນຍຶນຍົງຂອງພວກເຂົາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.