Biblica® Open Lao Contemporary Version
ເພງສັນລະເສີນ 118
ຈົ່ງຂອບພຣະຄຸນພຣະເຈົ້າຢາເວເພາະພຣະອົງແສນດີ;
ຄວາມຮັກໝັ້ນຄົງຂອງພຣະອົງດຳລົງຢູ່ຕະຫລອດໄປ.
ໃຫ້ອິດສະຣາເອນກ່າວວ່າ:
“ຄວາມຮັກໝັ້ນຄົງຂອງພຣະອົງດຳລົງຢູ່ຕະຫລອດໄປ”.
ໃຫ້ພົງພັນຂອງອາໂຣນກ່າວວ່າ:
“ຄວາມຮັກໝັ້ນຄົງຂອງພຣະອົງດຳລົງຢູ່ຕະຫລອດໄປ”.
ໃຫ້ບັນດາຜູ້ທີ່ຢຳເກງພຣະເຈົ້າຢາເວກ່າວວ່າ:
“ຄວາມຮັກໝັ້ນຄົງຂອງພຣະອົງດຳລົງຢູ່ຕະຫລອດໄປ”.
ໃນຍາມທຸກຍາກຂ້ານ້ອຍໄດ້ຮ້ອງຫາພຣະເຈົ້າຢາເວ
ແລະ ພຣະອົງໄດ້ນຳຂ້ານ້ອຍເຂົ້າໄປໃນທີ່ກວ້າງ.
ພຣະເຈົ້າຢາເວຢູ່ກັບຂ້ານ້ອຍ ຂ້ານ້ອຍຈະບໍ່ຢ້ານກົວ.
ມະນຸດຈະເຮັດຫຍັງຂ້ານ້ອຍໄດ້?
ພຣະເຈົ້າຢາເວຢູ່ກັບຂ້ານ້ອຍ ພຣະອົງເປັນຜູ້ຊ່ວຍເຫລືອຂອງຂ້ານ້ອຍ.
ຂ້ານ້ອຍຈະເບິ່ງສັດຕູຢ່າງຜູ້ຊະນະ.
ການລີ້ໄພໃນພຣະເຈົ້າຢາເວ
ກໍດີກວ່າການໄວ້ວາງໃຈໃນມະນຸດ.
ການລີ້ໄພໃນພຣະເຈົ້າຢາເວ
ກໍດີກວ່າການໄວ້ວາງໃຈໃນເຈົ້ານາຍທັງຫລາຍ.
ປະຊາຊາດທັງໝົດໄດ້ຫຸ້ມອ້ອມຂ້ານ້ອຍ,
ແຕ່ໃນນາມຂອງພຣະເຈົ້າຢາເວ ຂ້ານ້ອຍຈະທຳລາຍພວກເຂົາໃຫ້ໝົດ.
ພວກເຂົາໄດ້ລ້ອມຂ້ານ້ອຍໄວ້ທຸກດ້ານ,
ແຕ່ໃນນາມຂອງພຣະເຈົ້າຢາເວ ຂ້ານ້ອຍຈະທຳລາຍພວກເຂົາໃຫ້ໝົດ.
ພວກເຂົາໄດ້ມາອ້ອມຕົວຂອງຂ້ານ້ອຍຄືກັບເຜິ້ງ,
ແຕ່ພວກເຂົາມອດລົງຢ່າງວ່ອງໄວເໝືອນກັບໄຟໄໝ້ໜາມ;
ໃນນາມຂອງພຣະເຈົ້າຢາເວ ຂ້ານ້ອຍຈະທຳລາຍພວກເຂົາໃຫ້ໝົດ.
ຂ້ານ້ອຍຖືກລຸມກະໜ່ຳ ແລະ ເກືອບລົ້ມລົງ,
ແຕ່ພຣະເຈົ້າຢາເວໄດ້ຊ່ວຍຂ້ານ້ອຍໄວ້.
ພຣະເຈົ້າຢາເວເປັນກຳລັງ ແລະ ເປັນປ້ອມປ້ອງກັນ1ຂອງຂ້ານ້ອຍ
ພຣະອົງເປັນຄວາມພົ້ນຂອງຂ້ານ້ອຍ.
ສຽງໂຫ່ຮ້ອງຊື່ນຊົມຍິນດີ ແລະ ສຽງໄຊໂຍ
ດັ່ງກ້ອງໃນເຕັນຂອງຄົນຊອບທຳວ່າ:
“ມືຂວາຂອງພຣະເຈົ້າຢາເວໄດ້ເຮັດສິ່ງທີ່ຍິ່ງໃຫຍ່!
ມືຂວາຂອງພຣະເຈົ້າຢາເວໄດ້ຊູຂຶ້ນສູງ;
ມືຂວາຂອງພຣະເຈົ້າຢາເວໄດ້ເຮັດສິ່ງທີ່ຍິ່ງໃຫຍ່!”
ຂ້ານ້ອຍຈະບໍ່ຕາຍ ແຕ່ມີຊີວິດຢູ່,
ແລະ ຈະປະກາດສິ່ງທີ່ພຣະເຈົ້າຢາເວໄດ້ກະທຳ.
ພຣະເຈົ້າຢາເວໄດ້ຕີສອນຂ້ານ້ອຍຢ່າງໜັກ,
ແຕ່ບໍ່ໄດ້ມອບຂ້ານ້ອຍໃຫ້ແກ່ຄວາມຕາຍ.
ຈົ່ງເປີດປະຕູແຫ່ງຄວາມຊອບທຳໃຫ້ຂ້ານ້ອຍ;
ຂ້ານ້ອຍຈະເຂົ້າໄປ ແລະ ຖວາຍຄຳຂອບພຣະຄຸນພຣະເຈົ້າຢາເວ.
ນີ້ຄືປະຕູຂອງພຣະເຈົ້າຢາເວ
ຜູ້ຊອບທຳຈະເຂົ້າໄປທາງປະຕູນີ້.
ຂ້ານ້ອຍຂອບພຣະຄຸນພຣະອົງເພາະພຣະອົງໄດ້ຕອບຂ້ານ້ອຍ;
ພຣະອົງມາເປັນຄວາມພົ້ນຂອງຂ້ານ້ອຍ.
ສີລາທີ່ນາຍຊ່າງກໍ່ໄດ້ຖິ້ມແລ້ວ
ບັດນີ້ກັບກາຍເປັນຫີນເສົາເອກ;
ພຣະເຈົ້າຢາເວໄດ້ກະທຳການນີ້,
ແລະ ເປັນສິ່ງມະຫັດສະຈັນໃນສາຍຕາຂອງພວກເຮົາ.
ນີ້ຄືວັນທີ່ພຣະເຈົ້າຢາເວໄດ້ສ້າງ
ໃຫ້ພວກເຮົາຊື່ນຊົມຍິນດີ ແລະ ຍິນດີໃນວັນນີ້.
ຂ້າແດ່ພຣະເຈົ້າຢາເວ ຂໍຊ່ວຍພວກຂ້ານ້ອຍໃຫ້ພົ້ນດ້ວຍ!
ຂ້າແດ່ພຣະເຈົ້າຢາເວ ຂໍໃຫ້ຄວາມສຳເລັດແກ່ພວກຂ້ານ້ອຍດ້ວຍ!
ສັນລະເສີນພຣະອົງຜູ້ມາໃນນາມຂອງພຣະເຈົ້າຢາເວ.
ພວກຂ້ານ້ອຍຂໍສັນລະເສີນພຣະອົງ2ຈາກວິຫານຂອງພຣະເຈົ້າຢາເວ.
ພຣະເຈົ້າຢາເວເປັນພຣະເຈົ້າ,
ແລະ ພຣະອົງໄດ້ໃຫ້ຄວາມສະຫວ່າງຂອງພຣະອົງສ່ອງໃສ່ພວກເຮົາ.
ໃຫ້ພວກເຮົາຖືກິ່ງໄມ້ແລ້ວເຂົ້າຮ່ວມຂະບວນສະເຫລີມສະຫລອງ
ໄປເຖິງ3ເຊີງງອນຂອງແທ່ນບູຊາ.
ພຣະອົງເປັນພຣະເຈົ້າຂອງຂ້ານ້ອຍ ແລະ ຂ້ານ້ອຍຈະສັນລະເສີນພຣະອົງ;
ພຣະອົງເປັນພຣະເຈົ້າຂອງຂ້ານ້ອຍ ແລະ ຂ້ານ້ອຍຈະຍົກຍ້ອງພຣະອົງ.
ຈົ່ງຂອບພຣະຄຸນພຣະເຈົ້າຢາເວ ເພາະພຣະອົງແສນດີ
ຄວາມຮັກໝັ້ນຄົງຂອງພຣະອົງດຳລົງຢູ່ຕະຫລອດໄປ.
Source notes (3)
- Footnote ຫລື ເປັນບົດເພງ
- Footnote ໃນພາສາເຮັບເຣີຄຳນີ້ເປັນພະຫູພົດ
- Footnote ຫລື ມັດເຄື່ອງບູຊາສະເຫລີມສະຫລອງດ້ວຍເຊືອກ ແລະ ນຳໄປເຖິງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.