Biblica® Open Lao Contemporary Version
ເພງສັນລະເສີນ 109
(ເຖິງຫົວໜ້ານັກຮ້ອງ, ບົດເພງສັນລະເສີນຂອງດາວິດ)
ຂ້າແດ່ພຣະເຈົ້າຜູ້ທີ່ຂ້ານ້ອຍສັນລະເສີນ
ຂໍຢ່າໄດ້ມິດງຽບເລີຍ,
ເພາະຄົນຊົ່ວ ແລະ ຫລອກລວງທັງຫລາຍ
ໄດ້ອ້າປາກຂອງພວກເຂົາຕໍ່ຕ້ານຂ້ານ້ອຍ;
ພວກເຂົາໄດ້ໃສ່ຮ້າຍຂ້ານ້ອຍດ້ວຍລີ້ນທີ່ຕົວະ.
ພວກເຂົາຫຸ້ມດ່າຂ້ານ້ອຍດ້ວຍຖ້ອຍຄຳທີ່ກຽດຊັງ;
ພວກເຂົາໂຈມຕີຂ້ານ້ອຍໂດຍບໍ່ມີສາເຫດ.
ຂ້ານ້ອຍເປັນມິດກັບພວກເຂົາ ແຕ່ພວກເຂົາກັບກ່າວຫາຂ້ານ້ອຍ,
ແຕ່ຂ້ານ້ອຍກໍອະທິຖານເພື່ອພວກເຂົາ.
ພວກເຂົາໄດ້ຕອບແທນຄວາມດີຂອງຂ້ານ້ອຍດ້ວຍຄວາມຊົ່ວ,
ແລະ ຕອບແທນມິດຕະພາບດ້ວຍຄວາມກຽດຊັງ.
ຂໍໂຜດຕັ້ງຄົນຊົ່ວໃຫ້ມາຕໍ່ຕ້ານສັດຕູຂອງຂ້ານ້ອຍ;
ຂໍໃຫ້ຜູ້ກ່າວໂທດ ຢືນຢູ່ທີ່ຂ້າງຂວາຂອງລາວ.
ເມື່ອລາວຖືກສອບສວນ ກໍຂໍໃຫ້ລາວຖືກຕັດສິນວ່າຜິດແທ້,
ຂໍໃຫ້ຄຳອະທິຖານຂອງລາວມັດໂຕລາວ.
ຂໍໃຫ້ລາວອາຍຸສັ້ນ;
ໃຫ້ຄົນອື່ນຂຶ້ນມາເປັນຜູ້ນຳແທນຕຳແໜ່ງຂອງລາວ.
ຂໍໃຫ້ລູກຂອງລາວເປັນລູກກຳພ້າພໍ່
ແລະ ເມຍຂອງລາວເປັນແມ່ໝ້າຍ.
ຂໍໃຫ້ລູກຫລານຂອງລາວພະເນຈອນຂໍທານ;
ຂໍໃຫ້ພວກເຂົາຖືກຂັບໄລ່ອອກຈາກ1ເຮືອນອັນຫັກພັງຂອງພວກເຂົາ.
ຂໍໃຫ້ເຈົ້າໜີ້ຢຶດເອົາເຄື່ອງຂອງທຸກຢ່າງທີ່ລາວມີ;
ຂໍໃຫ້ຄົນຕ່າງຖິ່ນມາປຸ້ນເອົາສິ່ງທີ່ລາວໄດ້ລົງແຮງຫາມາ.
ຂໍຢ່າໃຫ້ຜູ້ໃດເມດຕາກະລຸນາລາວ
ຫລື ສົງສານລູກທີ່ກຳພ້າພໍ່ຂອງລາວ.
ຂໍໃຫ້ເຊື້ອສາຍຂອງລາວຖືກຕັດຂາດ,
ໃຫ້ຊື່ສຽງຂອງລາວສູນໄປພາຍໃນຊົ່ວອາຍຸຕໍ່ໄປ.
ຂໍໃຫ້ຄວາມຊົ່ວຊ້າຂອງບັນພະບຸລຸດຂອງລາວເປັນທີ່ລະນຶກຢູ່ຕໍ່ໜ້າພຣະເຈົ້າຢາເວ;
ຂໍໃຫ້ຄວາມບາບຂອງແມ່ຂອງລາວບໍ່ມີວັນຫາຍໄປ.
ຂໍໃຫ້ຄວາມບາບເຫລົ່ານັ້ນຢູ່ຕໍ່ໜ້າພຣະເຈົ້າຢາເວຢູ່ສະເໝີ,
ເພື່ອພຣະອົງຈະໄດ້ເຮັດໃຫ້ລາວຖືກລືມໄປຈາກໂລກນີ້.
ເພາະລາວບໍ່ເຄີຍຄິດທີ່ຈະເມດຕາກະລຸນາຕໍ່ຜູ້ໃດ,
ແຕ່ໄດ້ຂ້າຄົນທຸກຍາກ
ແລະ ຄົນຂັດສົນ ແລະ ຄົນທີ່ຫົວໃຈແຕກສະຫລາຍ.
ລາວຮັກທີ່ຈະສາບແຊ່ງ
ຂໍໃຫ້ຄຳສາບແຊ່ງນັ້ນຕົກຢູ່ກັບລາວ.
ລາວບໍ່ພໍໃຈກັບການໃຫ້ພອນ
ຂໍໃຫ້ພອນນັ້ນຫ່າງໄກຈາກລາວ.
ລາວສວມຄຳສາບແຊ່ງເປັນເສື້ອຜ້າຂອງລາວ;
ຄຳສາບແຊ່ງນັ້ນໄດ້ເຂົ້າໄປໃນຮ່າງກາຍຂອງລາວເໝືອນກັບນ້ຳ,
ເຂົ້າໄປໃນກະດູກຂອງລາວເໝືອນກັບນ້ຳມັນ.
ຂໍໃຫ້ການສາບແຊ່ງນັ້ນເປັນດັ່ງເສື້ອຄຸມຫໍ່ຕົວຂອງລາວ,
ເປັນດັ່ງສາຍແອວຮັດອ້ອມລາວໄວ້ຕະຫລອດໄປ.
ຂໍໃຫ້ທັງໝົດນີ້ເປັນການຕອບແທນຈາກພຣະເຈົ້າຢາເວທີ່ມີຕໍ່ບັນດາຜູ້ກ່າວຫາຂອງຂ້ານ້ອຍ,
ທີ່ມີຕໍ່ບັນດາຜູ້ທີ່ໃສ່ຮ້າຍຂ້ານ້ອຍ.
ຂ້າແດ່ພຣະເຈົ້າຢາເວ ອົງເຈົ້ານາຍ
ຂໍໂຜດຊ່ວຍຂ້ານ້ອຍເພື່ອເຫັນແກ່ນາມຂອງພຣະອົງ;
ຂໍຊ່ວຍກອບກູ້ຂ້ານ້ອຍດ້ວຍຄວາມຮັກອັນປະເສີດຂອງພຣະອົງ.
ເພາະຂ້ານ້ອຍທຸກຍາກ ແລະ ຂັດສົນ,
ແລະ ຈິດໃຈຂອງຂ້ານ້ອຍກໍເຈັບປວດຢູ່ພາຍໃນຂ້ານ້ອຍ.
ຂ້ານ້ອຍຈາງຫາຍໄປເໝືອນດັ່ງເງົາໃນເວລາຄ່ຳ;
ຂ້ານ້ອຍຖືກຊັດຖິ້ມເໝືອນກັບຕັກແຕນ.
ຫົວເຂົ່າຂອງຂ້ານ້ອຍອ່ອນລ້າເພາະອົດອາຫານ;
ຮ່າງກາຍຂອງຂ້ານ້ອຍກໍຈ່ອຍຜອມ ແລະ ແຫ້ງ.
ຂ້ານ້ອຍຕົກເປັນຂີ້ປາກຂອງຄົນທີ່ກ່າວຫາຂ້ານ້ອຍ
ເມື່ອພວກເຂົາເຫັນຂ້ານ້ອຍ ພວກເຂົາກໍພາກັນແກ່ວງຫົວຂອງຕົນ.
ຂ້າແດ່ພຣະເຈົ້າຢາເວ ພຣະເຈົ້າຂອງຂ້ານ້ອຍ
ຂໍຊ່ວຍຂ້ານ້ອຍໃຫ້ລອດພົ້ນຕາມຄວາມຮັກໝັ້ນຄົງຂອງພຣະອົງດ້ວຍ.
ຂ້າແດ່ພຣະເຈົ້າຢາເວ ໂຜດໃຫ້ພວກເຂົາຮູ້ວ່າ ນີ້ເປັນຝີມືຂອງພຣະອົງ,
ໃຫ້ຮູ້ວ່າພຣະອົງເອງເປັນຜູ້ເຮັດການນີ້.
ພວກເຂົາອາດຈະປ້ອຍດ່າ ແຕ່ພຣະອົງຈະອວຍພອນ;
ຂໍໃຫ້ບັນດາຄົນທີ່ໂຈມຕີຂ້ານ້ອຍຖືກເຮັດໃຫ້ອັບອາຍ,
ແຕ່ຜູ້ຮັບໃຊ້ຂອງພຣະອົງຈະຊື່ນຊົມຍິນດີ.
ຂໍໃຫ້ບັນດາຜູ້ກ່າວຫາຂ້ານ້ອຍສວມດ້ວຍຄວາມອັບອາຍ
ແລະ ຄຸມດ້ວຍຄວາມອັບອາຍຂາຍໜ້າດັ່ງເສື້ອຄຸມ.
ຂ້ານ້ອຍຈະຍົກຍ້ອງພຣະເຈົ້າຢາເວຢ່າງໃຫຍ່ດ້ວຍປາກຂອງຂ້ານ້ອຍ;
ຂ້ານ້ອຍຈະສັນລະເສີນພຣະອົງທ່າມກາງຝູງຊົນຜູ້ນະມັດສະການທັງຫລາຍ.
ເພາະວ່າພຣະອົງຢືນຢູ່ເບື້ອງຂວາມືຂອງຄົນຂັດສົນ,
ເພື່ອຊ່ວຍຊີວິດຂອງພວກເຂົາໃຫ້ຈາກຜູ້ທີ່ຕັດສິນວ່າພວກເຂົາຜິດ.
Source notes (1)
- Footnote ພາສາເຮັບເຣີວ່າ ຖືກຊອກຫາຕາມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.