Biblica® Open Lao Contemporary Version
ເພງສັນລະເສີນ 108
(ພສສ 57:7-11; 60:5-12)
(ບົດເພງ, ບົດເພງສັນລະເສີນຂອງດາວິດ)
ຂ້າແດ່ພຣະເຈົ້າ ຈິດໃຈຂອງຂ້ານ້ອຍນັ້ນໝັ້ນຄົງ;
ຂ້ານ້ອຍຈະຮ້ອງເພງ ແລະ ຫລິ້ນດົນຕີດ້ວຍສຸດຈິດສຸດໃຈຂອງຂ້ານ້ອຍ.
ພິນໃຫຍ່ ແລະ ພິນເຂົາຄູ່ ຈົ່ງບັນເລງ!
ຂ້ານ້ອຍຈະປຸກອາລຸນວັນໃໝ່.
ຂ້າແດ່ພຣະເຈົ້າຢາເວ ຂ້ານ້ອຍຈະສັນລະເສີນພຣະອົງທ່າມກາງປະຊາຊາດທັງຫລາຍ;
ຂ້ານ້ອຍຈະຮ້ອງເພງສັນລະເສີນພຣະອົງທ່າມກາງປະຊາຊົນທັງຫລາຍ.
ເພາະຄວາມຮັກຍິ່ງໃຫຍ່ຂອງພຣະອົງສູງກວ່າຟ້າສະຫວັນ;
ຄວາມສັດຊື່ຂອງພຣະອົງຈຸເຖິງທ້ອງຟ້າ.
ຂ້າແດ່ພຣະເຈົ້າ ຂໍໃຫ້ເປັນທີ່ຍົກຍ້ອງເໜືອຟ້າສະຫວັນ;
ຂໍໃຫ້ສະຫງ່າລາສີຂອງພຣະອົງປົກຄຸມໄປທົ່ວໂລກ.
ຂໍຊ່ວຍກອບກູ້ພວກຂ້ານ້ອຍດ້ວຍມືຂວາຂອງພຣະອົງ,
ເພື່ອບັນດາຜູ້ທີ່ພຣະອົງຮັກຈະຫລຸດພົ້ນ.
ພຣະເຈົ້າໄດ້ກ່າວຈາກບ່ອນນະມັດສະການຂອງພຣະອົງວ່າ:
“ໃນໄຊຊະນະ ເຮົາຈະແບ່ງຊີເຄມ
ແລະ ກຳນົດເຂດຮ່ອມພູຊຸກໂກດ.
ກີເລອາດເປັນຂອງເຮົາ, ມານາເຊເປັນຂອງເຮົາ;
ເອຟຣາອິມຄືໝວກເກາະຂອງເຮົາ,
ຢູດາຄືໄມ້ຄາທາຂອງເຮົາ.
ໂມອາບເປັນອ່າງຊຳລະຂອງເຮົາ,
ເຮົາໂຍນເກີບຂອງເຮົາລົງເທິງເອໂດມ;
ແລະ ເຮົາຈະໂຫ່ຮ້ອງດ້ວຍຄວາມມີໄຊເໜືອຟີລິດສະຕິນ”.
ຜູ້ໃດຈະພາຂ້ານ້ອຍໄປຍັງເມືອງປ້ອມປ້ອງກັນ?
ຜູ້ໃດຈະນຳຂ້ານ້ອຍໄປຍັງເອໂດມ?
ພຣະອົງບໍ່ແມ່ນບໍ, ຂ້າແດ່ພຣະເຈົ້າ ພຣະອົງຜູ້ໄດ້ປະຕິເສດພວກຂ້ານ້ອຍ
ແລະ ບໍ່ຮ່ວມທັບກັບພວກຂ້ານ້ອຍອີກຕໍ່ໄປ?
ຂໍຊ່ວຍພວກຂ້ານ້ອຍຕໍ່ສູ້ສັດຕູ
ເພາະຄວາມຊ່ວຍເຫລືອຂອງມະນຸດນັ້ນໄຮ້ຄ່າ.
ໂດຍພຣະເຈົ້າພວກເຮົາຈະໄດ້ຮັບໄຊຊະນະ
ພຣະອົງຈະຢຽບສັດຕູທັງຫລາຍຂອງພວກເຮົາ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.