Biblica® Open Lao Contemporary Version

ເພງສັນລະເສີນ 105

(1ຂຄ 16:8-22)

ຈົ່ງສັນລະເສີນພຣະເຈົ້າຢາເວ ແລະ ປະກາດນາມຂອງພຣະອົງ;

ໃຫ້ປະຊາຊາດທັງຫລາຍໄດ້ຮູ້ເຖິງສິ່ງທີ່ພຣະອົງເຮັດ.

ຈົ່ງຮ້ອງເພງຖວາຍພຣະອົງ ຮ້ອງສັນລະເສີນຖວາຍພຣະອົງ

ບອກເຖິງພາລະກິດອັນອັດສະຈັນທັງໝົດຂອງພຣະອົງ.

ຈົ່ງເທີດທູນນາມອັນບໍລິສຸດຂອງພຣະອົງ;

ໃຫ້ຫົວໃຈຂອງຄົນທີ່ສະແຫວງຫາພຣະເຈົ້າຢາເວຊື່ນຊົມຍິນດີ.

ຈົ່ງເບິ່ງໄປທີ່ພຣະເຈົ້າຢາເວ ແລະ ກຳລັງຂອງພຣະອົງ;

ຈົ່ງສະແຫວງຫາໃບໜ້າຂອງພຣະອົງຢູ່ສະເໝີ.

ຈົ່ງລະນຶກເຖິງການອັດສະຈັນທີ່ພຣະອົງໄດ້ເຮັດ,

ເຖິງການອັດສະຈັນ ແລະ ຄຳພິພາກສາທີ່ພຣະອົງປະກາດ,

ພວກເຈົ້າທັງຫລາຍຜູ້ເປັນເຊື້ອສາຍຂອງອັບຣາຮາມຜູ້ຮັບໃຊ້ຂອງພຣະອົງ,

ລູກຫລານຂອງຢາໂຄບທີ່ພຣະອົງໄດ້ເລືອກໄວ້.

ພຣະອົງເປັນພຣະເຈົ້າຢາເວ ພຣະເຈົ້າຂອງພວກເຮົາ;

ຄຳພິພາກສາຂອງພຣະອົງກໍຢູ່ທົ່ວແຜ່ນດິນໂລກ.

ພຣະອົງໄດ້ລະນຶກເຖິງຄຳໝັ້ນສັນຍາຂອງພຣະອົງຕະຫລອດໄປ,

ພຣະອົງລະນຶກເຖິງສັນຍາທີ່ພຣະອົງໄດ້ເຮັດໄວ້ຕະຫລອດພັນຊົ່ວອາຍຸຄົນ.

ຄຳໝັ້ນສັນຍາທີ່ພຣະອົງໄດ້ເຮັດກັບອັບຣາຮາມ,

ຄຳປະຕິຍານທີ່ພຣະອົງໄດ້ສັນຍາກັບອີຊາກ.

ພຣະອົງໄດ້ຢືນຢັນຕໍ່ຢາໂຄບເປັນດຳລັດ,

ຕໍ່ອິດສະຣາເອນເປັນຄຳໝັ້ນສັນຍານິລັນດອນ

“ເຮົາຈະມອບດິນແດນການາອານໃຫ້ພວກເຈົ້າ

ໃຫ້ເປັນມໍລະດົກຂອງພວກເຈົ້າ”.

ເມື່ອເວລາທີ່ອິດສະຣາເອນຍັງມີຈຳນວນໜ້ອຍຫລາຍ

ໜ້ອຍເຫລືອເກີນ ແລະ ເປັນພຽງຄົນແປກໜ້າໃນດິນແດນນັ້ນ,

ພວກເພິ່ນພະເນຈອນຈາກຊົນຊາດໜຶ່ງໄປຫາອີກຊົນຊາດໜຶ່ງ,

ຈາກອານາຈັກໜຶ່ງໄປຫາອີກອານາຈັກໜຶ່ງ.

ພຣະອົງບໍ່ຍອມໃຫ້ຜູ້ໃດຂົ່ມເຫັງພວກເພິ່ນ;

ເພາະເຫັນແກ່ພວກເພິ່ນ ພຣະອົງຈຶ່ງໄດ້ເຕືອນກະສັດທັງຫລາຍວ່າ

“ຢ່າແຕະຕ້ອງບັນດາຜູ້ທີ່ເຮົາໄດ້ເຈີມໄວ້;

ຢ່າເຮັດອັນຕະລາຍອັນໃດໃຫ້ແກ່ບັນດາຜູ້ທຳນວາຍຂອງເຮົາ”.

ພຣະອົງໄດ້ສັ່ງໃຫ້ເກີດການອຶດຢາກອາຫານໃນດິນແດນນັ້ນ

ແລະ ທຳລາຍສະບຽງອາຫານທັງໝົດຂອງພວກເພິ່ນ;

ແລະ ພຣະອົງໄດ້ສົ່ງຊາຍຄົນໜຶ່ງໄປລ່ວງໜ້າພວກເພິ່ນ

ຄືໂຢເຊັບ, ຖືກຂາຍໄປເປັນຂ້າທາດ.

ຕີນຂອງພວກເພິ່ນຊ້ຳເພາະຖືກຕີດ້ວຍໂສ້ຈ່ອງຈຳ.

ຄໍຂອງພວກເພິ່ນຖືກຄ້ຳຄາຢູ່ໃນເຫລັກ,

ຈົນກວ່າສິ່ງທີ່ເພິ່ນບອກໄວ້ເປັນຈິງຂຶ້ນມາ,

ຈົນກວ່າພຣະຄຳຂອງພຣະເຈົ້າຢາເວຈະພິສູດວ່າເພິ່ນເວົ້າຄວາມຈິງ.

ກະສັດໄດ້ສົ່ງຄົນມາ ແລະ ໄດ້ປ່ອຍໂຕເພິ່ນ,

ຜູ້ປົກຄອງຂອງປະຊາຊົນໄດ້ປ່ອຍເພິ່ນໃຫ້ເປັນອິດສະຫລະ.

ກະສັດໄດ້ຕັ້ງເພິ່ນໃຫ້ເປັນນາຍເໜືອວັງຂອງເພິ່ນ,

ເປັນຜູ້ເບິ່ງແຍງທຸກສິ່ງທີ່ກະສັດຄອບຄອງ,

ເພື່ອແນະນຳເຈົ້ານາຍທັງຫລາຍຕາມໃຈຂອງເພິ່ນ

ແລະ ສັ່ງສອນປັນຍາໃຫ້ກັບທີ່ປຶກສາຂອງກະສັດ.

ແລ້ວອິດສະຣາເອນກໍໄດ້ເຂົ້າມາຢູ່ໃນເອຢິບ;

ຢາໂຄບໄດ້ມາເປັນຄົນຕ່າງດ້າວໃນດິນແດນຂອງຮາມ.

ພຣະເຈົ້າຢາເວໄດ້ເຮັດໃຫ້ປະຊາຊົນຂອງພຣະອົງມີລູກຫລານຢ່າງຫລວງຫລາຍ;

ພຣະອົງໄດ້ເຮັດໃຫ້ພວກເຂົາມີຈຳນວນຫລາຍເກີນໄປສຳລັບສັດຕູຂອງພວກເຂົາ.

ຜູ້ທີ່ພຣະເຈົ້າໄດ້ປ່ຽນຫົວໃຈຂອງພວກເຂົາໃຫ້ກຽດຊັງປະຊາຊົນຂອງພຣະອົງ,

ໃຫ້ຄົບຄິດກັນຕໍ່ສູ້ກັບຜູ້ຮັບໃຊ້ຂອງພຣະອົງ.

ພຣະອົງໄດ້ສົ່ງໂມເຊຜູ້ຮັບໃຊ້ຂອງພຣະອົງມາ

ພ້ອມກັບອາໂຣນຜູ້ທີ່ພຣະອົງໄດ້ເລືອກໄວ້.

ພວກເພິ່ນໄດ້ສະແດງໝາຍສຳຄັນຂອງພຣະອົງຢູ່ທ່າມກາງພວກເຂົາ,

ສະແດງການອັດສະຈັນຂອງພຣະອົງໃນດິນແດນຂອງຮາມ.

ພຣະອົງໄດ້ສົ່ງຄວາມມືດ ແລະ ເຮັດໃຫ້ມືດມິດທົ່ວດິນແດນ

ບໍ່ແມ່ນເພາະພວກເຂົາຂັດຂືນຖ້ອຍຄຳຂອງພຣະອົງບໍ?

ພຣະອົງໄດ້ປ່ຽນນ້ຳຂອງພວກເຂົາໃຫ້ກາຍເປັນເລືອດ,

ຈົນເຮັດໃຫ້ປາຕາຍໝົດ.

ດິນແດນຂອງພວກເຂົາເຕັມໄປດ້ວຍກົບ,

ເຊິ່ງເຂົ້າໄປເຖິງຫ້ອງນອນຂອງບັນດາຜູ້ປົກຄອງທັງຫລາຍ.

ພຣະອົງກ່າວ ແລ້ວຝູງເຫລືອກ ແລະ ຮີ້ນ

ກໍມາທົ່ວປະເທດຂອງພວກເຂົາ.

ພຣະອົງໄດ້ປ່ຽນຝົນໃຫ້ກາຍເປັນໝາກເຫັບ,

ແລະ ຟ້າແມບເຫລື້ອມທົ່ວດິນແດນຂອງພວກເຂົາ;

ພຣະອົງໄດ້ລົ້ມເຄືອອະງຸ່ນ ແລະ ຕົ້ນໝາກເດື່ອຂອງພວກເຂົາລົງ

ແລະ ໂຄ່ນຕົ້ນໄມ້ທີ່ຢູ່ໃນດິນແດນຂອງພວກເຂົາ.

ພຣະອົງກ່າວ ແລ້ວຝູງຕັກແຕນກໍມາ,

ຢ່າງມະຫາສານຈົນນັບບໍ່ຖ້ວນ;

ມັນໄດ້ກັດກິນທຸກຢ່າງທີ່ຂຽວສົດໃນແຜ່ນດິນນັ້ນ,

ກັດກິນຜົນຜະລິດທັງໝົດຈາກພື້ນດິນຂອງພວກເຂົາ.

ຈາກນັ້ນພຣະອົງກໍໄດ້ຂ້າລູກຊາຍກົກໃນດິນແດນຂອງພວກເຂົາ

ເຊິ່ງເປັນຜົນທຳອິດຈາກໄວໜຸ່ມຂອງພວກເຂົາ.

ພຣະອົງໄດ້ນຳອິດສະຣາເອນອອກມາພ້ອມກັບເງິນ ແລະ ຄຳ

ບໍ່ມີຈັກຄົນໃນຕະກຸນຕ່າງໆທີ່ລັງເລ.

ເອຢິບມີຄວາມຍິນດີເມື່ອພວກເຂົາອອກໄປ

ເພາະພວກເຂົາຢ້ານກົວອິດສະຣາເອນຫລາຍ.

ພຣະອົງໄດ້ແຜ່ເມກອອກເປັນຮົ່ມກຳບັງໃຫ້,

ແລະ ໃຫ້ໄຟເພື່ອໃຫ້ມີແສງສະຫວ່າງໃນເວລາກາງຄືນ.

ພວກເຂົາໄດ້ຮ້ອງຂໍ ພຣະອົງກໍສົ່ງນົກຂຸ້ມມາໃຫ້;

ພຣະອົງໄດ້ລ້ຽງພວກເຂົາໃຫ້ອິ່ມເຕັມດ້ວຍອາຫານທີ່ມາຈາກສະຫວັນ.

ພຣະອົງໄດ້ເປີດຫີນ ແລະ ນ້ຳກໍພຸ່ງອອກມາ;

ນ້ຳນັ້ນໄດ້ໄຫລເໝືອນດັ່ງແມ່ນ້ຳໃນຖິ່ນແຫ້ງແລ້ງກັນດານ.

ເພາະພຣະອົງໄດ້ລະນຶກເຖິງສັນຍາອັນສັກສິດຂອງພຣະອົງ

ທີ່ໃຫ້ແກ່ອັບຣາຮາມຜູ້ຮັບໃຊ້ຂອງພຣະອົງ.

ພຣະອົງຈຶ່ງນຳປະຊາຊົນຂອງພຣະອົງອອກມາດ້ວຍຄວາມຍິນດີ,

ນຳຜູ້ທີ່ພຣະອົງໄດ້ເລືອກໄວ້ ອອກມາດ້ວຍຄວາມຊື່ນຊົມຍິນດີ;

ພຣະອົງໃຫ້ດິນແດນຂອງຊົນຊາດຕ່າງໆ ແກ່ພວກເຂົາ,

ແລະ ພວກເຂົາໄດ້ຄອບຄອງກຳມະສິດໃນສິ່ງທີ່ຄົນອື່ນລົງແຮງເຮັດໄວ້

ເພື່ອພວກເຂົາຈະໄດ້ຮັກສາຂໍ້ບັງຄັບຂອງພຣະອົງ

ແລະ ເຮັດຕາມກົດບັນຍັດຂອງພຣະອົງ.

ຈົ່ງສັນລະເສີນພຣະເຈົ້າຢາເວ.1

Source notes (1)

Footnote ພາສາເຮັບເຣີວ່າ ຮາເລລູຢາ

Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.