Biblica® Open Lao Contemporary Version
ເພງສັນລະເສີນ 104
ຈິດໃຈຂອງຂ້ານ້ອຍ ຈົ່ງສັນລະເສີນພຣະເຈົ້າຢາເວ.
ຂ້າແດ່ພຣະເຈົ້າຢາເວຂອງຂ້ານ້ອຍ ພຣະອົງຍິ່ງໃຫຍ່;
ພຣະອົງຫົ່ມດ້ວຍສະຫງ່າລາສີ ແລະ ບາລະມີ.
ພຣະເຈົ້າຢາເວໄດ້ຄຸມພຣະອົງເອງດ້ວຍແສງສະຫວ່າງເໝືອນດັ່ງເສື້ອຜ້າ;
ພຣະອົງໄດ້ຄຶງຟ້າສະຫວັນອອກເໝືອນດັ່ງຄຶງເຕັນ
ແລະ ວາງຄານຂອງທີ່ຢູ່ຂອງພຣະອົງໄວ້ເໜືອນ້ຳ.
ພຣະອົງໃຊ້ເມກເປັນລົດມ້າ
ແລະ ຂີ່ມາເທິງປີກຂອງລົມ.
ພຣະອົງໃຊ້ລົມເປັນຜູ້ສົ່ງຂ່າວ1
ແລະ ແປວໄຟເປັນຜູ້ຮັບໃຊ້ຂອງພຣະອົງ.
ພຣະອົງໄດ້ຕັ້ງໂລກໄວ້ເທິງຮາກຖານ;
ໂລກຈະບໍ່ມີວັນເຄື່ອນຍ້າຍ.
ພຣະອົງຫໍ່ຫຸ້ມໂລກດ້ວຍຫ້ວງນ້ຳເລິກເໝືອນກັບຫໍ່ຫຸ້ມດ້ວຍເຄື່ອງນຸ່ງ;
ນ້ຳໄດ້ຖ້ວມເໜືອພູເຂົາທັງຫລາຍ.
ແຕ່ເມື່ອພຣະອົງຈັດການ ນ້ຳນັ້ນກໍໜີໄປ,
ເມື່ອໄດ້ຍິນສຽງຟ້າຮ້ອງຂອງພຣະອົງ ພວກມັນກໍບິນໜີໄປ;
ນ້ຳໄດ້ໄຫລຖ້ວມພູເຂົາທັງຫລາຍ,
ນ້ຳໄດ້ໄຫລລົງຮ່ອມພູທັງຫລາຍ,
ໄປຍັງບ່ອນທີ່ພຣະອົງໄດ້ກຳນົດໄວ້ໃຫ້.
ພຣະອົງໄດ້ວາງເຂດກັ້ນເພື່ອບໍ່ໃຫ້ນ້ຳຂ້າມໄປ;
ເພື່ອບໍ່ໃຫ້ນ້ຳນັ້ນຖ້ວມແຜ່ນດິນໂລກອີກຈັກເທື່ອ.
ພຣະອົງເຮັດໃຫ້ນ້ຳພຸທັງຫລາຍຫລັ່ງນ້ຳໃຫ້ແກ່ຫ້ວຍທັງຫລາຍ;
ນ້ຳໄຫລໄປຕາມຫວ່າງພູເຂົາ.
ໃຫ້ສັດທັງໝົດທີ່ຢູ່ໃນທົ່ງນາໄດ້ດື່ມ;
ໃຫ້ລໍປ່າໄດ້ເຊົາກະຫາຍນ້ຳ.
ນົກໃນທ້ອງຟ້າຈຶ່ງສ້າງຮັງຢູ່ຕາມແຄມນ້ຳ
ແລະ ຮ້ອງເພງຢູ່ຕາມງ່າໄມ້.
ພຣະອົງໄດ້ຫົດພູເຂົາຈາກບ່ອນຢູ່ເບື້ອງເທິງຂອງພຣະອົງ;
ແຜ່ນດິນໂລກກໍອິ່ມໃຈດ້ວຍຜົນແຫ່ງກິດຈະການຂອງພຣະອົງ.
ພຣະອົງໄດ້ໃຫ້ຫຍ້າງອກງາມຂຶ້ນເພື່ອຝູງສັດ,
ແລະ ໃຫ້ພືດພັນແກ່ມະນຸດສຳລັບປູກຝັງ
ໃຫ້ພືດຜັກງອກງາມຈາກແຜ່ນດິນໂລກ.
ໃຫ້ເຫລົ້າອະງຸ່ນທີ່ເຮັດໃຫ້ໃຈມະນຸດມ່ວນຊື່ນ,
ນ້ຳມັນໝາກກອກທີ່ເຮັດໃຫ້ໃບໜ້າຂອງພວກເຂົາຜ່ອງໃສ,
ແລະ ເຂົ້າຈີ່ເພື່ອຄ້ຳຊູໃຈຂອງພວກເຂົາ.
ຕົ້ນໄມ້ຂອງພຣະເຈົ້າຢາເວໄດ້ນ້ຳຢ່າງອຸດົມສົມບູນ,
ຄືຕົ້ນແປກແຫ່ງເລບານອນທີ່ພຣະອົງໄດ້ປູກໄວ້.
ນົກທັງຫລາຍໄດ້ສ້າງຮັງຂອງຕົນຢູ່ທີ່ນັ້ນ;
ນົກຍາງກໍອາໄສຢູ່ໃນບໍລິເວນຕົ້ນແປກທັງຫລາຍ.
ພູເຂົາສູງທັງຫລາຍເປັນຂອງບັນດາແບ້ປ່າ,
ຫລືບຫີນທັງຫລາຍກໍເປັນບ່ອນລີ້ໄພຂອງໂຕອົ້ນ.
ພຣະອົງໄດ້ໃຫ້ດວງເດືອນຊີ້ບອກລະດູການຕ່າງໆ,
ແລະ ໃຫ້ດວງຕາເວັນຮູ້ເວລາຕົກດິນ.
ເມື່ອພຣະອົງນຳຄວາມມືດມາ ກາງເວັນກໍກັບກາຍເປັນກາງຄືນ,
ແລະ ສັດປ່າທັງໝົດຄືບຄານອອກມາ.
ສິງກໍແຜດສຽງຮ້ອງຫາເຫຍື່ອຂອງຕົນ
ແລະ ຮ້ອງຫາອາຫານຈາກພຣະເຈົ້າ.
ພໍດວງຕາເວັນຂຶ້ນ ສິງທັງຫລາຍກໍລັບຫາຍໄປ;
ພວກມັນກັບຄືນໄປ ແລະ ນອນລົງໃນຖ້ຳຂອງມັນ.
ແລ້ວມະນຸດກໍອອກມາເຮັດວຽກຂອງຕົນ,
ປະກອບພາລະກິດຂອງຕົນຈົນເຖິງຕອນແລງ.
ຂ້າແດ່ພຣະເຈົ້າຢາເວພາລະກິດຂອງພຣະອົງນັ້ນມີຫລວງຫລາຍແທ້!
ພຣະອົງໄດ້ສ້າງສິ່ງເຫລົ່ານີ້ທັງໝົດຂຶ້ນໂດຍປັນຍາ
ໂລກເຕັມໄປດ້ວຍສິ່ງທີ່ພຣະອົງສ້າງ.
ມີທະເລທີ່ກວ້າງໃຫຍ່ໄພສານ
ເຕັມໄປດ້ວຍສິ່ງມີຊີວິດທີ່ເກີນກວ່າຈະນັບໄດ້
ຄືສິ່ງທີ່ມີຊີວິດທັງໃຫຍ່ ແລະ ນ້ອຍ.
ມີເຮືອແລ່ນໄປມາ
ແລະ ມີເລວີອາທານທີ່ພຣະອົງໄດ້ສ້າງມາ ໃຫ້ຫລິ້ນນ້ຳຢູ່ທີ່ນັ້ນ.
ທຸກຊີວິດເຫລົ່ານີ້ໄດ້ເຝົ້າເບິ່ງພຣະອົງ
ໃຫ້ອາຫານພວກມັນຕາມເວລາທີ່ກຳນົດໄວ້.
ເມື່ອພຣະອົງໃຫ້ອາຫານນັ້ນແກ່ພວກມັນ,
ພວກມັນກໍເກັບຮວບຮວມໄວ້;
ເມື່ອພຣະອົງແບມືຂອງພຣະອົງອອກ,
ພວກມັນກໍອິ່ມເຕັມດ້ວຍສິ່ງດີ.
ເມື່ອພຣະອົງເຊື່ອງໜ້າຂອງພຣະອົງໄວ້,
ພວກມັນກໍຕົກໃຈຢ້ານກົວ;
ເມື່ອພຣະອົງເອົາລົມຫາຍໃຈຂອງພວກມັນໄປ,
ພວກມັນກໍຕາຍ ແລະ ກັບສູ່ຂີ້ຝຸ່ນດິນ.
ເມື່ອພຣະອົງໃຫ້ພຣະວິນຍານບໍລິສຸດຂອງພຣະອົງ,
ພວກມັນກໍຖືກສ້າງຂຶ້ນມາ,
ແລະ ພຣະອົງໄດ້ປ່ຽນໂສມໜ້າຂອງແຜ່ນດິນຄືນໃໝ່.
ຂໍໃຫ້ສະຫງ່າລາສີຂອງພຣະເຈົ້າຢາເວ ດຳລົງຢູ່ນິລັນດອນ;
ຂໍໃຫ້ພຣະເຈົ້າຢາເວຊື່ນຊົມຍິນດີໃນພາລະກິດຂອງພຣະອົງ
ເມື່ອພຣະອົງແນມເບິ່ງໂລກ ແລະ ໂລກກໍສັ່ນສະທ້ານ,
ເມື່ອແຕະຕ້ອງພູເຂົາທັງຫລາຍ ແລະ ຄວັນກໍພຸ່ງຂຶ້ນ.
ຂ້ານ້ອຍຈະຮ້ອງເພງຖວາຍພຣະເຈົ້າຢາເວຕະຫລອດຊີວິດຂອງຂ້ານ້ອຍ;
ຂ້ານ້ອຍຈະຮ້ອງເພງສັນລະເສີນພຣະເຈົ້າຂອງຂ້ານ້ອຍຕາບໃດທີ່ຂ້ານ້ອຍມີຊີວິດຢູ່.
ຂໍໃຫ້ຄວາມຄິດສຳນຶກຂອງຂ້ານ້ອຍເປັນທີ່ພໍໃຈພຣະອົງ,
ເພາະຂ້ານ້ອຍຊື່ນຊົມຍິນດີໃນພຣະເຈົ້າຢາເວ.
ແຕ່ຂໍໃຫ້ຄົນບາບທັງຫລາຍໝົດສິ້ນໄປຈາກໂລກນີ້
ແລະ ບໍ່ມີຄົນຊົ່ວຮ້າຍອີກຕໍ່ໄປ.
ຈິດໃຈຂອງຂ້ານ້ອຍ ຈົ່ງສັນລະເສີນພຣະເຈົ້າຢາເວ.
ຈົ່ງສັນລະເສີນພຣະເຈົ້າຢາເວ.2
Source notes (2)
- Footnote ຫລື ເທວະດາ
- Footnote ພາສາເຮັບເຣີວ່າ ຮາເລລູຢາ ໃນສະບັບເຊັບຕູອາຈິນ. ບັນທັດນີ້ເປັນບັນທັດທຳອິດຂອງເພງສັນລະເສີນ ບົດທີ 105
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.