Biblica® Open Lao Contemporary Version
ສຸພາສິດ 8
ສຽງເອີ້ນຂອງປັນຍາ
ປັນຍາບໍ່ໄດ້ເອີ້ນຫາບໍ?
ຄວາມເຂົ້າໃຈບໍ່ໄດ້ສົ່ງສຽງເອີ້ນບໍ?
ປັນຍາຢືນຢູ່ເທິງບ່ອນສູງໄປຕາມທາງຍ່າງ,
ແລະ ໄປຕາມທາງແຍກ, ປັນຍາຢືນຢູ່ທີ່ນັ້ນ;
ຢູ່ຂ້າງປະຕູເຂົ້າໄປໃນເມືອງ,
ຢູ່ປາກປະຕູທາງເຂົ້າ, ປັນຍາຮ້ອງສຽງດັງວ່າ:
“ໂອ ປະຊາຊົນ, ເຮົາຮ້ອງຫາພວກເຈົ້າ;
ເຮົາຍົກສຽງຂຶ້ນຮ້ອງຫາມະນຸດທຸກຄົນ.
ເຈົ້າຜູ້ຜູ້ເປັນຄົນອ່ອນຕໍ່ໂລກ, ຈົ່ງມີຄວາມສຸຂຸມຮອບຄອບ;
ເຈົ້າຜູ້ເປັນຄົນໂງ່ຈ້າ ຈົ່ງໃສ່ໃຈໃນສິ່ງນີ້.1
ຈົ່ງຟັງ, ເພາະເຮົາມີສິ່ງທີ່ສໍາຄັນຫລາຍຈະມາບອກ;
ເຮົາອ້າປາກຂອງເຮົາເພື່ອເວົ້າສິ່ງທີ່ຖືກຕ້ອງ.
ປາກຂອງເຮົາເວົ້າສິ່ງທີ່ເປັນຄວາມຈິງ,
ເພາະຮີມສົບຂອງເຮົາກຽດຊັງຄວາມຊົ່ວຮ້າຍ.
ຄໍາເວົ້າທັງໝົດຈາກປາກຂອງເຮົາແມ່ນຍຸຕິທຳ;
ບໍ່ມີຄຳໃດທີ່ຫລອກລວງ ຫລື ບິດເບືອນ.
ສໍາລັບຜູ້ທີ່ພິຈາລະນາຄໍາເວົ້າທັງໝົດຈະເຂົ້າໃຈ;
ເປັນຄໍາເວົ້າທີ່ທ່ຽງທຳຕໍ່ບັນດາຜູ້ທີ່ຄົ້ນພົບຄວາມຮູ້.
ຈົ່ງເລືອກເອົາຄຳສັ່ງສອນຂອງເຮົາແທນທີ່ຈະເລືອກເອົາເງິນ,
ຈົ່ງເລືອກເອົາຄວາມຮູ້ຫລາຍກວ່າເລືອກເອົາຄໍາເນື້ອດີ,
ເພາະປັນຍາມີຄ່າກວ່າເພັດພອຍ,
ແລະ ບໍ່ມີສິ່ງໃດທີ່ເຈົ້າປາຖະໜາຈະປຽບທຽບກັບປັນຍາໄດ້.
“ເຮົາ, ຄືປັນຍາ, ຢູ່ຮ່ວມກັນກັບຄວາມຮອບຄອບ;
ເຮົາມີຄວາມຮູ້ ແລະ ຄວາມສະຫລາດ.
ການຢຳເກງພຣະເຈົ້າຢາເວແມ່ນການກຽດຊັງຄວາມຊົ່ວຮ້າຍ;
ເຮົາກຽດຊັງຄວາມຈອງຫອງ ແລະ ຄວາມໂອ້ອວດ,
ການປະພຶດຊົ່ວ ແລະ ການເວົ້າປີ້ນຄວາມ.
ຄຳປຶກສາ ແລະ ການຕັດສິນທີ່ຖືກຕ້ອງເປັນຂອງເຮົາ;
ເຮົາມີຄວາມເຂົ້າໃຈ ແລະ ມີອຳນາດ.
ໂດຍປັນຍາ ບັນດາກະສັດຈຶ່ງໄດ້ຂຶ້ນປົກຄອງ
ແລະ ຜູ້ປົກຄອງກໍອອກກົດໝາຍຢ່າງຍຸຕິທຳ;
ໂດຍປັນຍາ ບັນດາເຈົ້ານາຍຈຶ່ງໄດ້ຂຶ້ນປົກຄອງ,
ແລະ ບັນດາຂຸນນາງຄືຜູ້ທີ່ປົກຄອງທັງໝົດຢູ່ໃນໂລກ.2
ເຮົາຮັກຄົນທັງຫລາຍທີ່ຮັກເຮົາ,
ແລະ ຜູ້ທີ່ຊອກຫາເຮົາກໍໄດ້ພົບເຮົາ.
ເຮົາມີຊັບສົມບັດ ແລະ ມີກຽດ,
ມີຄວາມຮັ່ງມີ ແລະ ຈະເລີນຮຸ່ງເຮືອງຕະຫລອດໄປດ້ວຍ.
ຜົນຂອງເຮົາກໍດີກວ່າຄຳບໍລິສຸດ;
ສິ່ງທີ່ເຮົາໃຫ້ນັ້ນກໍມີຄຸນຄ່າຫລາຍກວ່າເງິນເນື້ອດີ.
ເຮົາເດີນໃນທາງແຫ່ງຄວາມຊອບທຳ,
ຕາມວິຖີແຫ່ງຄວາມຍຸຕິທຳ,
ເຮົາໃຫ້ມໍລະດົກລ້ຳຄ່າແກ່ຜູ້ທີ່ຮັກເຮົາ
ແລະ ເຮັດໃຫ້ຄັງສົມບັດຂອງພວກເຂົາເຕັມ.
“ພຣະເຈົ້າຢາເວໄດ້ສ້າງເຮົາຂຶ້ນມາເປັນຜົນງານຊິ້ນທຳອິດ,34
ກ່ອນກິດຈະການຂອງພຣະອົງຕັ້ງແຕ່ດົນນານມາແລ້ວ;
ເຮົາໄດ້ຖືກສ້າງມາເມື່ອດົນນານມາແລ້ວ,
ຕັ້ງແຕ່ປະຖົມມະການ, ເມື່ອໂລກຖືກສ້າງຂຶ້ນມາ.
ເຮົາເກີດຂຶ້ນມາກ່ອນຈະມີຫ້ວງນໍ້າເລິກ,
ກ່ອນນ້ຳພຸທີ່ມີນ້ຳພຸ່ງຂຶ້ນມາ;
ກ່ອນບັນດາພູເຂົາຈະຖືກໄວ້ສ້າງຂຶ້ນໄວ້ຢູ່ໃນບ່ອນຂອງມັນ,
ກ່ອນມີເນີນພູ, ເຮົາກໍເກີດແລ້ວ,
ກ່ອນທີ່ພຣະເຈົ້າໄດ້ສ້າງໂລກ ຫລື ທົ່ງຫຍ້າທັງຫລາຍ
ຫລື ກ່ອນຂີ້ຝຸ່ນດິນໃດໆຂອງໂລກ.
ເຮົາຢູ່ທີ່ນັ້ນ ເມື່ອພຣະອົງຈັດວາງຟ້າສະຫວັນ,
ເມື່ອພຣະອົງຂີດເສັ້ນຂອບຟ້າເທິງໜ້າມະຫາສະໝຸດ,
ເມື່ອພຣະອົງວາງຕຳແໜ່ງເມກເບື້ອງເທິງ
ແລະ ໄດ້ກຳນົດຕານໍ້າແຫ່ງບາດານຢ່າງໝັ້ນຄົງ,
ເມື່ອພຣະອົງຂີດພົມແດນຂອງທະເລ
ເພື່ອບໍ່ໃຫ້ນ້ຳລົ້ນຂຶ້ນເກີນເຂດຄໍາສັ່ງຂອງພຣະອົງ,
ແລະ ເມື່ອພຣະອົງວາງຮາກຖານຂອງໂລກ.
ໃນເວລານັ້ນ ເຮົາຢູ່ຄຽງຂ້າງພຣະອົງຕະຫລອດເວລາ.5
ເຮົາກໍເຕັມໄປດ້ວຍຄວາມຍິນດີວັນຕໍ່ວັນ,
ຊື່ນຊົມຍິນດີຢູ່ຕໍ່ໜ້າພຣະອົງສະເໝີ,
ຊື່ນຊົມຍິນດີຢູ່ໃນໂລກທັງໝົດຂອງພຣະອົງ
ແລະ ມີຄວາມຍິນດີໃນມະນຸດຊາດ.
“ບັດນີ້ ລູກເອີຍ, ຈົ່ງຟັງເຮົາ;
ຄວາມສຸກເປັນຂອງຜູ້ທີ່ຮັກສາວິຖີທາງຂອງເຮົາ.
ຄວາມສຸກເປັນຂອງຜູ້ທີ່ຟັງຄໍາສັ່ງສອນຂອງເຮົາ ແລະ ຈະກາຍເປັນຄົນມີປັນຍາ;
ຢ່າເມີນເສີຍຕໍ່ຄໍາສັ່ງສອນນັ້ນເລີຍ.
ພຣະພອນເປັນຂອງຜູ້ທີ່ຟັງເຮົາ,
ຄື ຜູ້ທີ່ກໍາລັງລໍຖ້າຢູ່ທີ່ປະຕູຂອງເຮົາທຸກໆວັນ,
ລໍຖ້າຢູ່ປະຕູເຮືອນຂອງເຮົາ.
ເພາະຄົນທີ່ພົບເຮົາຍ່ອມພົບຊີວິດ
ແລະ ໄດ້ຮັບຄວາມພໍໃຈຈາກພຣະເຈົ້າຢາເວ.
ແຕ່ຄົນທີ່ບໍ່ພົບເຮົາກໍຮັກຄວາມຕາຍ;
ທຸກຄົນທີ່ກຽດຊັງເຮົາກໍຮັກຄວາມຕາຍ”.
Source notes (5)
- Footnote ພາສາເຮັບເຣີສະບັບເຊັບຕູອາຈິນ ວ່າ ໂງ່ ຈົ່ງສັ່ງສອນຈິດໃຈຂອງຕົນເອງ
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ໂດຍເຮົາ ບັນດາເຈົ້າຊີວິດຈຶ່ງປົກຄອງ ແລະ ບັນດາຂຸນນາງ ຄືຜູ້ປົກຄອງທີ່ຊອບທຳທັງໝົດກໍເຊັ່ນກັນ
- Footnote ຫລື ທາງ ຫລື ອານາຈັກ
- Footnote ຫລື ພຣະເຈົ້າຢາເວຄອບຄອງເຮົາຕັ້ງແຕ່ເລີ່ມງານຂອງພຣະອົງ ຫລື ພຣະເຈົ້າຢາເວນຳເຮົາອອກມາຕັ້ງແຕ່ເລີ່ມງານຂອງພຣະອົງ
- Footnote ຫລື ໃນຕອນນັ້ນເຮົາເປັນນາຍຊ່າງເອກຢູ່ຄຽງຂ້າງພຣະອົງ ຫລື ໃນຕອນນັ້ນເຮົາເປັນເດັກນ້ອຍໆຢູ່ຄຽງຂ້າງພຣະອົງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.