Biblica® Open Lao Contemporary Version
ສຸພາສິດ 7
ຄຳເຕືອນເລື່ອງຍິງຫລິ້ນຊູ້
ລູກເອີຍ, ຈົ່ງຮັກສາຖ້ອຍຄໍາຂອງພໍ່ໄວ້
ຈົ່ງເກັບສະສົມຄຳສັ່ງສອນຂອງພໍ່ໄວ້ພາຍໃນຕົວເຈົ້າ.
ຈົ່ງຮັກສາຄຳສັ່ງຂອງພໍ່ໄວ້ ແລ້ວເຈົ້າຈະມີຊີວິດຢູ່;
ຈົ່ງຖືຮັກສາຄຳສອນຂອງພໍ່ໄວ້ດັ່ງແກ້ວຕາຂອງເຈົ້າ.
ຈົ່ງພັນມັນໄວ້ອ້ອມນິ້ວມືຂອງເຈົ້າເປັນເຄື່ອງເຕືອນໃຈ;
ຈົ່ງຂຽນມັນໃສ່ແຜ່ນຫົວໃຈຂອງເຈົ້າ.
ຈົ່ງເວົ້າຕໍ່ປັນຍາວ່າ, “ເຈົ້າເປັນເອື້ອຍຂອງຂ້ອຍ”,
ແລະ ຈົ່ງເວົ້າຕໍ່ຄວາມເຂົ້າໃຈອັນເລິກເຊິ່ງວ່າ, “ເຈົ້າເປັນຍາດພີ່ນ້ອງຂອງຂ້ອຍ”.
ສິ່ງເຫລົ່ານີ້ຈະປົກປ້ອງເຈົ້າຈາກຍິງຫລິ້ນຊູ້,
ຈາກຍິງເອົາແຕ່ໃຈດ້ວຍຄຳເວົ້າອັນລໍ້ລວງຂອງນາງ.
ຢູ່ປ່ອງຢ້ຽມເຮືອນຂອງເຮົາ
ເຮົາແນມເບິ່ງຜ່ານຕາໜ່າງລົງໄປ.
ເຮົາເຫັນບັນດາຄົນທີ່ຍັງອ່ອນຕໍ່ໂລກ,
ເຮົາສັງເກດທ່າມກາງບັນດາຊາຍໜຸ່ມ,
ມີຊາຍຄົນໜຶ່ງທີ່ບໍ່ຮູ້ຈັກຄິດ.
ລາວກໍາລັງຍ່າງໄປຕາມຖະໜົນໃກ້ແຈບ້ານຂອງນາງ,
ກໍາລັງຍ່າງຊື່ໄປຫາເຮືອນຂອງນາງ
ໃນຕອນຄໍ່າ, ຂະນະທີ່ຕາເວັນກໍາລັງຕົກດິນ,
ເມື່ອຄວາມມືດໃນຕອນຄໍ່າກໍາລັງມາ.
ມີຍິງຄົນໜຶ່ງອອກມາພົບລາວ,
ນາງແຕ່ງຕົວດັ່ງຍິງໂສເພນີ ແລະ ມີເລ້ຫລ່ຽມຢູ່ໃນໃຈ.
(ນາງດື້ດ້ານ ແລະ ບໍ່ຮູ້ຈັກອາຍ,
ນາງບໍ່ເຄີຍຢູ່ບ້ານ;
ຕອນນີ້ ນາງຢູ່ຕາມຖະໜົນ, ບັດນີ້ ຢູ່ຕາມລານສາທາລະນະ,
ນາງດັກຊຸ້ມຢູ່ຕາມທຸກແຈຖະໜົນ.)
ນາງໂດດກອດລາວ ແລະ ຈູບລາວ
ແລະ ເວົ້າແບບໜ້າບໍ່ອາຍວ່າ:
“ມື້ນີ້ ຂ້ອຍໄດ້ເຮັດຕາມທີ່ຂ້ອຍສາບານໄວ້,
ແລະ ຂ້ອຍມີອາຫານມາຈາກການຖວາຍເຄື່ອງບູຊາເພື່ອຄວາມສາມັກຄີທຳຢູ່ເຮືອນແລ້ວ.
ດັ່ງນັ້ນ ຂ້ອຍຈຶ່ງອອກມາພົບເຈົ້າ;
ຂ້ອຍໄດ້ຊອກຫາເຈົ້າ ແລະ ຂ້ອຍກໍໄດ້ພົບເຈົ້າແລ້ວ!
ຂ້ອຍໄດ້ປູບ່ອນນອນຂອງຂ້ອຍໄວ້
ດ້ວຍຜ້າຝ້າຍລີນິນສີສົດໃສຈາກເອຢິບ.
ຂ້ອຍໄດ້ພົມບ່ອນນອນໃຫ້ຫອມ
ດ້ວຍຢາງໄມ້ຫອມ ແລະ ອົບເຊີຍ.
ຈົ່ງມາ, ມາດື່ມດໍ່າຄວາມຮັກນຳກັນຈົນເຖິງຕອນເຊົ້າ;
ໃຫ້ພວກເຮົາມ່ວນຊື່ນນໍາກັນກັບຄວາມຮັກ!
ຜົວຂອງຂ້ອຍບໍ່ຢູ່ເຮືອນ;
ລາວໄດ້ເດີນທາງໄປໄກ.
ລາວຖືເງິນໄປເຕັມກະເປົາ
ແລະ ຈະບໍ່ຢູ່ເຮືອນຈົນເຖິງວັນເດືອນເຕັມດວງ”.
ນາງໄດ້ເຮັດໃຫ້ລາວຫລົງດ້ວຍຄຳເວົ້າອັນອ່ອນຫວານ;
ນາງຫລອກລໍ້ລາວດ້ວຍຄຳເວົ້າອັນນິ້ມນວນ.
ທັນໃດນັ້ນ ລາວກໍຕິດຕາມນາງໄປ
ດັ່ງງົວເຖິກທີ່ຖືກຈູງໄປຂ້າ,
ດັ່ງກວາງທີ່ກໍາລັງຖືກຕ້ອນລົງໄປຂຸມແຮ້ວ
ຈົນຖືກລູກທະນູແທງທະລຸເຖິງຕັບ,
ລາວເປັນດັ່ງນົກບິນເຂົ້າໄປໃນບ້ວງແຮ້ວ,
ໂດຍບໍ່ຮູ້ເລີຍວ່າຄວາມຕາຍຈະເອົາຊີວິດຂອງລາວໄປ.
ບັດນີ້ ລູກເອີຍ, ຈົ່ງຟັງພໍ່;
ຈົ່ງເອົາໃຈໃສ່ໃນສິ່ງທີ່ພໍ່ບອກ.
ຢ່າປ່ອຍໃຈຂອງເຈົ້າໄປຕາມທາງຂອງນາງ
ຫລື ຢ່າຫລົງໄປຕາມວິຖີທາງຂອງນາງ.
ມີຜູ້ຊາຍຫລາຍຄົນເປັນເຫຍື່ອທີ່ນາງໄດ້ເຮັດໃຫ້ລົ້ມລົງ;
ຄົນຍິ່ງໃຫຍ່ກໍຕາຍເພາະນາງ.
ເຮືອນຂອງນາງເປັນທາງຫລວງໄປສູ່ຂຸມຝັງສົບ,
ນຳລົງໄປສູ່ຫ້ອງແຫ່ງຄວາມຕາຍ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.