Biblica® Open Lao Contemporary Version
ສຸພາສິດ 4
ຈົ່ງຮັບເອົາປັນຍາໂດຍບໍ່ເສຍຄ່າ
ລູກທັງຫລາຍເອີຍ, ຈົ່ງຟັງຄຳສັ່ງສອນຂອງພໍ່ເຈົ້າ;
ຈົ່ງຕັ້ງໃຈ ແລະ ຈະມີຄວາມເຂົ້າໃຈເພີ່ມຂຶ້ນ.
ເຮົາຈະມອບຄຳສອນທີ່ດີໃຫ້ແກ່ເຈົ້າ
ດັ່ງນັ້ນ ຢ່າປະຖິ້ມຄຳສັ່ງສອນຂອງພໍ່.
ເມື່ອພໍ່ເປັນເດັກນ້ອຍຄື ລູກຊາຍຄົນດຽວຂອງພໍ່,
ເມື່ອຍັງນ້ອຍ ແລະ ໄດ້ຮັບການທະນຸຖະໜອມຈາກແມ່.
ປູ່ກໍໄດ້ສອນ ແລະ ບອກພໍ່ວ່າ
“ຈົ່ງຢຶດຄຳສອນຂອງພໍ່ດ້ວຍສຸດໃຈຂອງເຈົ້າ;
ຈົ່ງຮັກສາຄຳສັ່ງຂອງພໍ່ໄວ້ ແລະ ເຈົ້າຈະມີຊີວິດຢູ່.
ຈົ່ງຮັບເອົາປັນຍາ, ແລະ ຄວາມເຂົ້າໃຈ;
ຢ່າລືມ ຫລື ຢ່າຫັນໜີຈາກຄຳສອນຂອງພໍ່.
ຢ່າປະຖິ້ມປັນຍາ, ແລະ ປັນຍາຈະຊ່ວຍປົກປ້ອງເຈົ້າໄວ້;
ຈົ່ງຮັກປັນຍາ ແລະ ປັນຍາຈະເບິ່ງແຍງເຈົ້າ.
ຈຸດເລີ່ມຕົ້ນຂອງປັນຍາຄື: ຈົ່ງຮັບເອົາປັນຍາໄວ້.
ເຖິງແມ່ນວ່າຈະຕ້ອງສູນເສຍທຸກສິ່ງທີ່ເຈົ້າມີ, ຈົ່ງຢຶດຄວາມເຂົ້າໃຈໄວ້.
ຈົ່ງທະນຸຖະໜອມປັນຍາໄວ້ ແລະ ປັນຍາຈະຍົກເຈົ້າຂຶ້ນ.
ຈົ່ງກອດເອົາປັນຍາໄວ້ ແລະ ປັນຍາຈະໃຫ້ກຽດເຈົ້າ.
ປັນຍາຈະມອບມົງກຸດອັນງົດງາມປະດັບຫົວຂອງເຈົ້າ
ແລະ ຈະໃຫ້ມົງກຸດອັນສະຫງ່າລາສີແກ່ເຈົ້າ”.
ລູກເອີຍ, ຈົ່ງຟັງ ແລະ ຍອມຮັບສິ່ງທີ່ພໍ່ສອນ,
ແລະ ເຈົ້າຈະມີຊີວິດຍືນຍາວ.
ພໍ່ສັ່ງສອນເຈົ້າໄປໃນທາງແຫ່ງປັນຍາ
ແລະ ນຳເຈົ້າໄປຕາມທາງທີ່ຊື່.
ເມື່ອເຈົ້າເດີນໄປ, ບາດກ້າວຂອງເຈົ້າຈະບໍ່ຖືກຂັດຂວາງ;
ເມື່ອເຈົ້າແລ່ນໄປ, ເຈົ້າຈະບໍ່ສະດຸດ.
ຈົ່ງຢຶດຄຳສັ່ງສອນໄວ້ໃຫ້ໝັ້ນຄົງ, ຢ່າປ່ອຍໃຫ້ມັນໜີໄປ;
ຈົ່ງຮັກສາມັນໄວ້ໃຫ້ດີ, ເພາະມັນເປັນຊີວິດຂອງເຈົ້າ.
ຢ່າຍ່າງໄປຕາມທາງຂອງຄົນຊົ່ວຮ້າຍ
ຫລື ເດີນໃນທາງຂອງຄົນບໍ່ດີ.
ຈົ່ງຫລີກເວັ້ນມັນໄປ, ຢ່າເດີນໄປຕາມທາງນັ້ນ;
ຈົ່ງຫັນໜີຈາກມັນ ແລະ ໄປຕາມທາງຂອງເຈົ້າ.
ເພາະສຳລັບຄົນຊົ່ວຮ້າຍນັ້ນ ຈະບໍ່ພັກຜ່ອນຈົນພວກເຂົາໄດ້ເຮັດຊົ່ວ;
ພວກເຂົາຈະນອນບໍ່ຫລັບຈົນກວ່າຈະໄດ້ເຮັດໃຫ້ຜູ້ໃດຜູ້ໜຶ່ງສະດຸດ.
ພວກເຂົາກິນອາຫານແຫ່ງຄວາມຊົ່ວ
ແລະ ດື່ມເຫລົ້າອະງຸ່ນແຫ່ງຄວາມຮຸນແຮງ.
ທາງຂອງຄົນຊອບທຳເປັນດັ່ງດວງຕາເວັນໃນຍາມເຊົ້າ,
ສ່ອງແສງແຈ້ງຂຶ້ນເລື້ອຍໆຈົນເຖິງກາງເວັນ.
ແຕ່ທາງຂອງຄົນຊົ່ວຮ້າຍເປັນເໝືອນຄວາມມືດ;
ພວກເຂົາບໍ່ຮູ້ວ່າຕົນເອງສະດຸດຫຍັງ.
ລູກເອີຍ, ຈົ່ງເອົາໃຈໃສ່ໃນສິ່ງທີ່ພໍ່ເວົ້າ;
ຈົ່ງງ່ຽງຫູຂອງເຈົ້າຟັງຖ້ອຍຄຳຂອງພໍ່.
ຢ່າໃຫ້ຖ້ອຍຄໍານັ້ນໜີຈາກສາຍຕາຂອງເຈົ້າ,
ຈົ່ງຮັກສາພວກມັນໄວ້ໃນໃຈຂອງເຈົ້າ;
ເພາະຖ້ອຍຄຳເຫລົ່ານັ້ນເປັນຊີວິດແກ່ຜູ້ທີ່ຄົ້ນພົບ
ແລະ ເຮັດໃຫ້ຮ່າງກາຍທັງໝົດຂອງຜູ້ນັ້ນແຂງແຮງດີ.
ເໜືອກວ່າສິ່ງອື່ນໃດ, ຈົ່ງຮັກສາໃຈຂອງເຈົ້າໄວ້ໃຫ້ດີ,
ເພາະທຸກສິ່ງທີ່ເຈົ້າເຮັດກໍລ້ວນແຕ່ໄຫລອອກມາຈາກໃຈ.
ຈົ່ງຮັກສາປາກຂອງເຈົ້າໄວ້ຈາກສິ່ງທີ່ບໍ່ເປັນຄວາມຈິງ;
ຈົ່ງຮັກສາສົບຂອງເຈົ້າໃຫ້ຫ່າງໄກຈາກຄຳເວົ້າທີ່ຫລອກລວງ.
ຈົ່ງໃຫ້ຕາຂອງເຈົ້າເບິ່ງກົງໄປຂ້າງໜ້າ;
ຈົ່ງຈົດຈໍ່ເບິ່ງສິ່ງທີ່ຢູ່ຕໍ່ໜ້າເຈົ້າຢ່າງໜັກແໜ້ນ.
ຈົ່ງຄິດຢ່າງຮອບຄອບເຖິງທາງທີ່ເຈົ້າກ້າວເດີນໄປ1
ແລະ ເດີນຢູ່ໃນທາງນັ້ນຢ່າງໝັ້ນຄົງ.
ຢ່າຫັນໄປທາງຂວາ ຫລື ທາງຊ້າຍ;
ຈົ່ງຮັກສາຕີນຂອງເຈົ້າໄວ້ຈາກຄວາມຊົ່ວຮ້າຍ.
Source notes (1)
- Footnote ຫລື ຈົ່ງເຮັດທາງ ທີ່ ຮາບລຽບໃຫ້ຕີນຂອງເຈົ້າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.