Biblica® Open Lao Contemporary Version
ສຸພາສິດ 3
ປັນຍາເຮັດໃຫ້ມີຄວາມເປັນຢູ່ທີ່ດີ
ລູກເອີຍ, ຢ່າລືມຄຳສັ່ງສອນຂອງພໍ່,
ແຕ່ຈົ່ງຮັກສາຄຳສັ່ງຂອງພໍ່ໄວ້ໃນໃຈຂອງເຈົ້າ,
ເພາະສິ່ງເຫລົ່ານີ້ຈະເຮັດໃຫ້ເຈົ້າມີຊີວິດຍືນຍາວ
ແລະ ນຳເອົາສັນຕິສຸກ ແລະ ຄວາມຈະເລີນຮຸ່ງເຮືອງມາສູ່ເຈົ້າ.
ຢ່າໃຫ້ຄວາມຮັກ ແລະ ຄວາມສັດຊື່ໜີໄປຈາກເຈົ້າ;
ຈົ່ງມັດມັນໄວ້ອ້ອມຄໍຂອງເຈົ້າ,
ຈົ່ງຂຽນມັນໃສ່ແຜ່ນຫົວໃຈຂອງເຈົ້າ.
ແລ້ວເຈົ້າຈະເປັນທີ່ພໍໃຈ ແລະ ມີຊື່ສຽງດີ
ໃນສາຍຕາພຣະເຈົ້າ ແລະ ໃນສາຍຕາມະນຸດ.
ຈົ່ງໄວ້ວາງໃຈໃນພຣະເຈົ້າຢາເວດ້ວຍສຸດໃຈຂອງເຈົ້າ
ແລະ ຢ່າເພິ່ງພາຄວາມເຂົ້າໃຈຂອງເຈົ້າເອງ;
ຈົ່ງຍອມຈໍານົນຕໍ່ພຣະອົງໃນທຸກວິຖີທາງຂອງເຈົ້າ,
ແລະ ພຣະອົງຈະເຮັດໃຫ້ທາງຂອງເຈົ້າຊື່ໄປ.1
ຢ່າຄິດວ່າຕົນເປັນຄົນສະຫລາດ;
ຈົ່ງຢຳເກງພຣະເຈົ້າຢາເວ ແລະ ຈົ່ງຫລີກໜີຈາກຄວາມຊົ່ວຮ້າຍ.
ສິ່ງນີ້ຈະນໍາສຸຂະພາບທີ່ດີມາສູ່ຮ່າງກາຍຂອງເຈົ້າ
ແລະ ບໍາລຸງລ້ຽງກະດູກຂອງເຈົ້າ.
ຈົ່ງໃຫ້ກຽດພຣະເຈົ້າຢາເວດ້ວຍຊັບສິນຂອງເຈົ້າ,
ດ້ວຍຜົນທໍາອິດຈາກຜົນລະປູກທັງໝົດຂອງເຈົ້າ;
ແລ້ວເລົ້າເຂົ້າຂອງເຈົ້າຈະເຕັມລົ້ນ,
ແລະ ຖັງຂອງເຈົ້າຈະເຕັມໄປດ້ວຍເຫລົ້າອະງຸ່ນໃໝ່.
ລູກເອີຍ, ຢ່າໜິ່ນປະໝາດການຕີສອນຂອງພຣະເຈົ້າຢາເວ,
ຢ່າຄຽດຕໍ່ຄໍາຕັກເຕືອນຂອງພຣະອົງ,
ເພາະພຣະເຈົ້າຢາເວຕີສອນຜູ້ທີ່ພຣະອົງຮັກ,
ເໝືອນດັ່ງພໍ່ຕີສອນລູກຜູ້ທີ່ເພິ່ນພູມໃຈນຳ.2
ຄວາມສຸກເປັນຂອງຜູ້ທີ່ພົບປັນຍາ,
ຜູ້ທີ່ໄດ້ຮັບຄວາມເຂົ້າໃຈ,
ເພາະປັນຍາໃຫ້ປະໂຫຍດຫລາຍກວ່າເງິນ
ແລະ ໃຫ້ຜົນຕອບແທນຫລາຍກວ່າຄຳ.
ປັນຍາມີຄຸນຄ່າຫລາຍກວ່າເພັດພອຍ;
ບໍ່ມີສິ່ງໃດທີ່ເຈົ້າປາຖະໜາຈະປຽບທຽບກັບປັນຍາໄດ້.
ໃນມືຂວາຂອງປັນຍາມີຊີວິດຍືນຍາວ;
ໃນມືຊ້າຍມີຄວາມຮັ່ງມີ ແລະ ກຽດສັກສີດ້ວຍ.
ທາງຂອງປັນຍາເປັນທາງອັນລາບລື່ນ
ວິຖີທາງທັງສິ້ນຂອງປັນຍາຄືສັນຕິສຸກ.
ປັນຍາເປັນຕົ້ນໄມ້ແຫ່ງຊີວິດແກ່ຜູ້ທີ່ຢຶດປັນຍາໄວ້;
ຄວາມສຸກຈະເປັນຂອງຜູ້ທີ່ຢຶດປັນຍາໄວ້ໃຫ້ແໜ້ນ.
ດ້ວຍປັນຍາ ພຣະເຈົ້າຢາເວໄດ້ວາງຮາກຖານຂອງແຜ່ນດິນໂລກ,
ດ້ວຍຄວາມເຂົ້າໃຈ ພຣະອົງຕັ້ງຟ້າສະຫວັນໄວ້ໃນທີ່ນັ້ນ;
ດ້ວຍຄວາມຮອບຮູ້ຂອງພຣະອົງ ນໍ້າເລິກກໍຖືກແຍກອອກ,
ແລະ ເມກກໍເຮັດໃຫ້ນ້ຳໝອກຕົກລົງມາ.
ລູກເອີຍ, ຢ່າໃຫ້ປັນຍາ ແລະ ຄວາມເຂົ້າໃຈໜີໄປຈາກສາຍຕາຂອງເຈົ້າໄດ້,
ຈົ່ງຮັກສາການການຕັດສິນອັນຖືກຕ້ອງ ແລະ ຄວາມຮອບຄອບໄວ້;
ສິ່ງເຫລົ່ານີ້ຈະເປັນຊີວິດໃຫ້ແກ່ເຈົ້າ,
ແລະ ເປັນເຄື່ອງເອ້ຍ້ອງເພື່ອປະດັບຄໍຂອງເຈົ້າ.
ແລ້ວເຈົ້າຈະເດີນໄປຕາມທາງຂອງຕົນຢ່າງປອດໄພ,
ແລະ ຕີນຂອງເຈົ້າຈະບໍ່ເຕະສະດຸດລົ້ມ.
ເມື່ອເຈົ້ານັ່ງລົງ, ເຈົ້າຈະບໍ່ຢ້ານ;
ເມື່ອເຈົ້ານອນຫລັບ, ເຈົ້າກໍຈະນອນຫລັບສະບາຍ.
ຢ່າຢ້ານກົວໄພພິບັດທີ່ມາຢ່າງກະທັນຫັນ
ຫລື ຄວາມຈິບຫາຍທີ່ໂຈມຕີຄົນຊົ່ວ,
ເພາະພຣະເຈົ້າຢາເວຈະຢູ່ຄຽງຂ້າງເຈົ້າ3
ແລະ ຈະຮັກສາຕີນຂອງເຈົ້າຈາກບ້ວງແຮ້ວ.
ຢ່າເກັບສິ່ງທີ່ດີໄວ້ຈາກຜູ້ທີ່ສົມຄວນໄດ້ຮັບ,
ເມື່ອມັນຢູ່ໃນອຳນາດຂອງເຈົ້າທີ່ຈະກະທຳໄດ້.
ຢ່າເວົ້າກັບເພື່ອນບ້ານຂອງເຈົ້າວ່າ,
“ຈົ່ງກັບມາມື້ອື່ນ ແລ້ວຂ້ອຍຈະເອົາມັນໃຫ້ເຈົ້າ”
ໃນເມື່ອເຈົ້າມີມັນຢູ່ແລ້ວ.
ຢ່າວາງແຜນຮ້າຍຕໍ່ເພື່ອນບ້ານຂອງເຈົ້າ,
ຜູ້ອາໄສຢູ່ໃກ້ເຈົ້າທີ່ໄວ້ວາງໃຈໃນຕົວເຈົ້າ.
ຢ່າກ່າວຫາຜູ້ໃດໂດຍບໍ່ມີເຫດຜົນ
ໃນເມື່ອພວກເຂົາບໍ່ໄດ້ທໍາຮ້າຍເຈົ້າ.
ຢ່າອິດສາຄົນທີ່ໃຊ້ຄວາມຮຸນແຮງ
ຫລື ຢ່າເລືອກເອົາວິຖີທາງຂອງພວກເຂົາ.
ເພາະພຣະເຈົ້າຢາເວກຽດຊັງຜູ້ທີ່ມັກປີ້ນຄວາມ
ແຕ່ໄວ້ວາງໃຈນໍາຄົນທ່ຽງທຳຂອງພຣະອົງ.
ຄຳສາບແຊ່ງຂອງພຣະເຈົ້າຢາເວຢູ່ເທິງເຮືອນຂອງຄົນຊົ່ວຮ້າຍ,
ແຕ່ພຣະອົງອວຍພອນເຮືອນຂອງຄົນຊອບທຳ.
ພຣະອົງເຢາະເຢີ້ຍຄົນທີ່ມັກເຢາະເຢີ້ຍ
ແຕ່ສະແດງຄວາມເມດຕາແກ່ຄົນຖ່ອມຕົວ ແລະ ຄົນທີ່ຖືກກົດຂີ່.
ຄົນມີປັນຍາຈະໄດ້ຮັບກຽດເປັນມໍລະດົກ
ແຕ່ຄົນໂງ່ຈ້າຈະໄດ້ຮັບພຽງແຕ່ຄວາມອັບອາຍ.
Source notes (3)
- Footnote ຫລື ຈະຊີ້ທາງໃຫ້
- Footnote ສະບັບ LXX. ວ່າ ແລະ ພຣະອົງລົງໂທດບຸດທີ່ພຣະອົງຊື່ນຊົມ
- Footnote ຫລື ເພາະອົງພຣະຜູ້ເປັນເຈົ້າຈະເປັນຄວາມຫມັ້ນໃຈຂອງເຈົ້າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.