Biblica® Open Lao Contemporary Version
ສຸພາສິດ 2
ຜົນດີທາງສິນທໍາຂອງປັນຍາ
ລູກຂອງພໍ່, ຖ້າເຈົ້າຍອມຮັບຄຳສອນຂອງພໍ່
ແລະ ເກັບຮັກສາຄຳສັ່ງຂອງພໍ່ໄວ້ຢູ່ພາຍໃນເຈົ້າ,
ຈົ່ງງ່ຽງຫູຂອງເຈົ້າໄປຟັງປັນຍາ
ແລະ ເອົາໃຈໃສ່ປະຕິບັດຕາມຄວາມເຂົ້າໃຈນັ້ນ
ແທ້ຈິງແລ້ວ, ຖ້າເຈົ້າເອີ້ນຫາຄວາມຮູ້
ແລະ ຮ້ອງຫາຄວາມເຂົ້າໃຈ,
ແລະ ຖ້າເຈົ້າຊອກຫາປັນຍາດັ່ງຫາເງິນ
ແລະ ຄົ້ນຫາປັນຍາດັ່ງຂຸມຊັບທີ່ຖືກເຊື່ອງໄວ້,
ແລ້ວເຈົ້າຈະເຂົ້າໃຈເຖິງການຢຳເກງພຣະເຈົ້າຢາເວ
ແລະ ພົບຄວາມຮູ້ຂອງພຣະເຈົ້າ.
ເພາະພຣະເຈົ້າຢາເວເປັນຜູ້ໃຫ້ປັນຍາ;
ຄວາມຮູ້ ແລະ ຄວາມເຂົ້າໃຈກໍອອກມາຈາກປາກຂອງພຣະອົງ.
ພຣະອົງຖືຮັກສາຄວາມສໍາເລັດ1 ໄວ້ໃຫ້ຄົນທ່ຽງທຳ,
ພຣະອົງເປັນໂລ່ໃຫ້ຜູ້ທີ່ດຳເນີນຊີວິດຢ່າງບໍ່ມີຕໍາໜິ,
ເພາະພຣະອົງເຝົ້າຮັກສາທາງຂອງຜູ້ທີ່ທ່ຽງທຳ
ແລະ ປົກປ້ອງຮັກສາທາງຂອງຜູ້ທີ່ສັດຊື່ຂອງພຣະອົງ.
ແລ້ວເຈົ້າຈະເຂົ້າໃຈສິ່ງທີ່ຖືກຕ້ອງ ແລະ ຍຸຕິທຳ
ແລະ ຄວາມທ່ຽງທຳຄື ເຂົ້າໃຈທາງອັນດີທຸກຢ່າງ,
ເພາະປັນຍາຈະເຂົ້າໄປໃນຫົວໃຈຂອງເຈົ້າ
ແລະ ຄວາມຮູ້ຈະເຮັດໃຫ້ຈິດວິນຍານຂອງເຈົ້າຍິນດີ.
ຄວາມຮອບຄອບຈະປົກປ້ອງເຈົ້າ,
ແລະ ຄວາມເຂົ້າໃຈຈະເຝົ້າຮັກສາເຈົ້າ.
ປັນຍາຈະຊ່ວຍເຈົ້າໃຫ້ພົ້ນຈາກທາງຂອງຄົນຊົ່ວຮ້າຍ,
ປັນຍາຈະຊ່ວຍເຈົ້າໃຫ້ພົ້ນຈາກຜູ້ທີ່ມັກປີ້ນຄວາມ.
ຜູ້ທີ່ປະຖິ້ມວິຖີທາງອັນຊອບທໍາ
ກໍຈະເດີນໄປໃນທາງທີ່ມືດ,
ຜູ້ທີ່ພໍໃຈໃນການກະທໍາຜິດ
ແລະ ຊື່ນຊົມໃນການປະພຶດຊົ່ວ,
ເສັ້ນທາງຂອງພວກເຂົາກໍຄົດງໍ
ແລະ ວິຖີທາງຂອງພວກເຂົາກໍຄົດໂກງ.
ປັນຍາຍັງຈະຊ່ວຍເຈົ້າໃຫ້ພົ້ນຈາກຍິງຫລິ້ນຊູ້,
ຈາກຍິງຂ້າງທາງດ້ວຍຄຳເວົ້າອັນລໍ້ລວງຂອງນາງ,
ຜູ້ທີ່ປະຖິ້ມຄູ່ຊີວິດຂອງນາງທີ່ຢູ່ນໍາກັນມາຕັ້ງແຕ່ໜຸ່ມ
ແລະ ລືມໄລຕໍ່ຄຳໝັ້ນສັນຍາທີ່ນາງເຮັດໄວ້ຕໍ່ໜ້າພຣະເຈົ້າ.2
ບ້ານຂອງນາງນຳໄປສູ່ຄວາມຕາຍຢ່າງແນ່ນອນ
ແລະ ທາງຂອງນາງກໍນໍາໄປສູ່ວິນຍານແຫ່ງຄົນຕາຍ.
ບໍ່ມີຜູ້ໃດທີ່ໄປຫານາງແລ້ວໄດ້ກັບຄືນມາ
ຫລື ກັບເຂົ້າໄປສູ່ຫົນທາງແຫ່ງຊີວິດໄດ້ອີກ.
ດັ່ງນັ້ນ ເຈົ້າຈະເດີນໃນທາງທີ່ດີ
ແລະ ຢຶດໝັ້ນໃນວິຖີທາງອັນຊອບທຳ
ເພາະຄົນທ່ຽງທຳຈະໄດ້ອາໄສໃນດິນແດນນັ້ນ,
ແລະ ຄົນທີ່ບໍ່ມີຕຳໜິຈະຕັ້ງໝັ້ນຄົງຢູ່ທີ່ນັ້ນ
ແຕ່ຄົນຊົ່ວຮ້າຍຈະຖືກຕັດອອກຈາກດິນແດນນັ້ນ,
ແລະ ຄົນບໍ່ສັດຊື່ຈະຖືກຖອນຮາກອອກຈາກດິນແດນນັ້ນ.
Source notes (2)
- Footnote ຫລື ຄວາມສຳເລັດ
- Footnote ຫລື ຄຳໝັ້ນສັນຍາຂອງພຣະເຈົ້າຂອງນາງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.