Biblica® Open Lao Contemporary Version
ສຸພາສິດ 1
ຈຸດປະສົງ ແລະ ຫົວໃຈຂອງສຸພາສິດ
ສຸພາສິດຂອງໂຊໂລໂມນລູກຊາຍຂອງດາວິດ, ກະສັດແຫ່ງອິດສະຣາເອນ:
ເພື່ອໃຫ້ເກີດມີປັນຍາ ແລະ ໄດ້ຮັບຄຳແນະນໍາ;
ເພື່ອຄວາມເຂົ້າໃຈເຖິງຖ້ອຍຄຳທີ່ມີຄວາມໝາຍອັນເລິກເຊິ່ງ;
ເພື່ອຮັບຟັງຄຳສັ່ງສອນໃນການປະພຶດຢ່າງສະຫລາດ,
ເຮັດໃນສິ່ງທີ່ຖືກຕ້ອງ, ຍຸຕິທຳ ແລະ ທ່ຽງທຳ;
ເພື່ອໃຫ້ຄົນທີ່ອ່ອນຕໍ່ໂລກ1ຮູ້ທັນເລ່ຫລຽ່ມ
ໃຫ້ຄວາມຮູ້ ແລະ ແນວທາງອັນຖືກຕ້ອງແກ່ຄົນໜຸ່ມ
ໃຫ້ຄົນສະຫລາດຮັບຟັງ ແລະ ເພີ່ມພູນການຮຽນຮູ້ຂອງຕົນ,
ແລະ ໃຫ້ຄົນທີ່ມີວິຈາລະຍານໄດ້ຮັບການແນະນໍາ
ເພື່ອໃຫ້ເຂົ້າໃຈບັນດາຄໍາສຸພາສິດ ແລະ ຄຳອຸປະມາ,
ບັນດາຄຳສອນ ແລະ ຄຳປິດສະໜາຂອງນັກປາດ.2
ການຢຳເກງພຣະເຈົ້າຢາເວເປັນບໍ່ເກີດແຫ່ງຄວາມຮູ້,
ສ່ວນຄົນໂງ່3ປະໝາດປັນຍາ ແລະ ຄຳສັ່ງສອນ.
ບົດນຳ: ຄຳເຕືອນໃຫ້ໂອບກອດເອົາປັນຍາ
ຄໍາເຕືອນຕໍ່ສູ້ການເຊື້ອເຊີນຂອງຄົນບາບ
ຈົ່ງຟັງ, ລູກຂອງພໍ່, ຈົ່ງເອົາໃຈໃສ່ຄຳສັ່ງສອນຂອງພໍ່ເຈົ້າ
ແລະ ຢ່າປະຖິ້ມຄຳສອນຂອງແມ່ເຈົ້າ.
ສິ່ງເຫລົ່ານີ້ເປັນພວງມະໄລປະດັບຫົວຂອງເຈົ້າ
ແລະ ເປັນສາຍຄໍເພື່ອປະດັບຄໍຂອງເຈົ້າ.
ລູກຂອງພໍ່, ຖ້າຄົນບາບມາຊັກຊວນເຈົ້າ,
ຢ່າຍອມເຮັດຕາມພວກເຂົາ.
ຖ້າພວກເຂົາເວົ້າວ່າ, “ຈົ່ງມາກັບພວກເຮົາ;
ໃຫ້ພວກເຮົາດັກລໍຖ້າເອົາເລືອດບໍລິສຸດ,
ໃຫ້ພວກເຮົາດັກຊຸ້ມໂຈມຕີຄົນບໍລິສຸດ;
ໃຫ້ພວກເຮົາເປັນເໝືອນຂຸມຝັງສົບທີ່ກືນພວກເຂົາທັງເປັນ,
ແລະ ກືນກິນພວກເຂົາໝົດໂຕ, ເໝືອນກັບບັນດາຄົນທີ່ຕົກລົງໄປໃນຂຸມ;
ພວກເຮົາຈະຢຶດເຄື່ອງຂອງມີຄ່າທຸກຊະນິດ
ແລະ ເອົາເຄື່ອງຂອງທີ່ປຸ້ນມາເກັບໄວ້ໃຫ້ເຕັມເຮືອນຂອງພວກເຮົາ;
ມາຈັບສະຫລາກຮ່ວມກັບພວກເຮົາ;
ພວກເຮົາທຸກຄົນຈະໄດ້ໃຊ້ເງິນຖົງດຽວກັນ”
ລູກຂອງພໍ່, ຢ່າໄປຮ່ວມທາງກັບພວກເຂົາ,
ຢ່າຍ່າງໃນທາງຂອງພວກເຂົາ;
ເພາະຕີນຂອງພວກເຂົາແລ່ນໄປຫາຄວາມຊົ່ວຮ້າຍ,
ພວກເຂົາຟ້າວເຮັດໃຫ້ເລືອດຕົກ.
ບໍ່ມີປະໂຫຍດຫຍັງທີ່ຈະກາງຕາໜ່າງໄວ້
ໃນບ່ອນທີ່ນົກທຸກໂຕສາມາດເບິ່ງເຫັນ!
ຄົນເຫລົ່ານີ້ດັກລໍຖ້າເອົາເລືອດຂອງຕົນເອງ;
ພວກເຂົາດັກຊຸ້ມເອົາຊີວິດຕົນເອງ!
ວິຖີທາງຂອງທຸກຄົນທີ່ຫາຜົນປະໂຫຍດອັນຊົ່ວຊ້າກໍເປັນເຊັ່ນນີ້;
ມັນຈະເອົາຊີວິດຂອງບັນດາຜູ້ທີ່ຮັບເອົາມັນໄວ້ໄປເອງ.
ການຕໍາໜິຂອງປັນຍາ
ປັນຍາຮ້ອງດັງອອກມາຢ່າງເປີດເຜີຍ,
ນາງເປັ່ງສຽງຂອງຕົນຢູ່ທີ່ເດີ່ນສາທາລະນະ;
ນາງຮ້ອງຫາຢູ່ເທິງຍອດກຳແພງ,4
ນາງຮ້ອງບອກທີ່ປະຕູເມືອງວ່າ:
“ເຈົ້າຜູ້ບໍ່ຮູ້ຈັກຄິດ, ເຈົ້າຈະຮັກວິຖີທາງອັນໂງ່ຈ້າອີກດົນປານໃດ?
ຄົນທີ່ມັກເຢາະເຢີ້ຍ, ເຈົ້າຈະພໍໃຈການດູຖູກອີກດົນປານໃດ?
ແລະ ຄົນໂງ່ຈ້າຈະກຽດຊັງຄວາມຮູ້ອີກດົນປານໃດ?
ຈົ່ງກັບໃຈຟັງຄຳຕັກເຕືອນຂອງເຮົາ!
ແລ້ວເຮົາຈະເທຄວາມຄິດຕ່າງໆຂອງເຮົາໃຫ້ແກ່ເຈົ້າ,
ແລະ ເຮົາຈະໃຫ້ເຈົ້າເຂົ້າໃຈຄຳສັ່ງສອນຂອງເຮົາ.
ແຕ່ເພາະເຈົ້າປະຕິເສດທີ່ຈະຟັງ ເມື່ອເຮົາເອີ້ນຫາເຈົ້າ
ແລະ ບໍ່ມີຜູ້ໃດສົນໃຈເມື່ອເຮົາຍື່ນມືໄປຫາ,
ເພາະເຈົ້າເມີນເສີຍຕໍ່ຄຳແນະນຳທັງໝົດຂອງເຮົາ
ແລະ ບໍ່ຍອມຮັບຄຳຕັກເຕືອນຂອງເຮົາ,
ສະນັ້ນ, ເມື່ອໄພພິບັດໂຈມຕີເຈົ້າ, ເຮົາຈະຫົວຂວັນໃສ່ເຈົ້າ;
ເຮົາຈະເຢາະເຢີ້ຍ ເມື່ອຄວາມຈິບຫາຍມາເຖິງເຈົ້າ
ເມື່ອຄວາມຈິບຫາຍມາເຖິງເຈົ້າດັ່ງພະຍຸ,
ເມື່ອຄວາມພິນາດພັດໃສ່ເຈົ້າດັ່ງລົມພະຍຸໝຸນ,
ເມື່ອຄວາມເດືອດຮ້ອນ ແລະ ຄວາມລຳບາກຖ້ວມເຈົ້າ.
“ເມື່ອນັ້ນ ພວກເຂົາຈະເອີ້ນຫາເຮົາ ແຕ່ເຮົາຈະບໍ່ຕອບ;
ພວກເຂົາຈະຊອກຫາເຮົາ ແຕ່ຈະບໍ່ພົບເຮົາ,
ເພາະພວກເຂົາໄດ້ກຽດຊັງຄວາມຮູ້
ແລະ ເລືອກທີ່ຈະບໍ່ຢຳເກງພຣະເຈົ້າຢາເວ.
ເພາະພວກເຂົາບໍ່ຍອມຮັບຄຳແນະນຳຂອງເຮົາ
ແລະ ໄດ້ປະຕິເສດຄຳຕັກເຕືອນຂອງເຮົາ,
ພວກເຂົາຈະໄດ້ກິນຜົນຈາກວິຖີທາງຂອງພວກເຂົາ
ແລະ ອິ່ມເຕັມໄປດ້ວຍຜົນຈາກແຜນການຮ້າຍຂອງຕົນ.
ຄົນອ່ອນຕໍ່ໂລກຈະຕາຍເພາະຫັນອອກນອກທາງ,
ແລະ ຄວາມເມີນເສີຍຂອງຄົນໂງ່ຈ້າຈະທຳລາຍພວກເຂົາ;
ແຕ່ຜູ້ທີ່ຮັບຟັງເຮົາຈະອາໄສຢູ່ຢ່າງປອດໄພ
ແລະ ຈະສະບາຍໃຈໂດຍບໍ່ຢ້ານໄພອັນຕະລາຍ”.
Source notes (4)
- Footnote ຄຳພາສາເຮັບເຣີ ຄຳວ່າອ່ອນຕໍ່ໂລກໃນໜັງສືສຸພາສິດໝາຍເຖິງຄົນຫູເບົາບໍ່ມີສິນທຳ ແລະ ຫັນໄປຫາຄວາມຊົ່ວ
- Footnote ຫລື ເພື່ອໃຫ້ເຂົ້າໃຈສຸພາສິດ ໄດ້ແກ່ ຄຳອຸປະມາ ຄຳສອນ ແລະ ຄຳປິດສະໜາຂອງນັກປາດ
- Footnote ໃນພາສາເຮັບເຣີຄຳວ່າ ຄົນໂງ່ ໃນພະທຳສຸພາສິດ ແລະ ທີ່ອື່ນໆ ໃນພັນທະສັນຍາເດີມໝາຍເຖິງຄົນທີ່ບົກຜ່ອງທາງດ້ານສິນທຳ
- Footnote ຫລື ຢູ່ຫົວຖະໜົນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.