Biblica® Open Lao Contemporary Version
ສຸພາສິດ 31
ຄຳສອນຂອງກະສັດເລມູເອນ
ນີ້ແມ່ນຄຳສອນຂອງກະສັດເລມູເອນ ເປັນຖ້ອຍຄຳທີ່ໄດ້ຮັບການດົນໃຈ1 ທີ່ແມ່ຂອງເພິ່ນໄດ້ສອນເພິ່ນໄວ້.
ຈົ່ງຟັງ, ລູກຂອງແມ່! ຈົ່ງຟັງ, ລູກມາຈາກມົດລູກຂອງແມ່!
ຈົ່ງຟັງ, ລູກຂອງແມ່, ລູກຄືຄໍາຕອບແຫ່ງຄຳອະທິຖານຂອງແມ່!
ຢ່າໃຊ້ເຫື່ອແຮງກັບບັນດາແມ່ຍິງ,2
ຢ່າເສຍກຳລັງໃຫ້ແກ່ຜູ້ທີ່ທຳລາຍກະສັດ.
ເລມູເອນ, ມັນບໍ່ເໝາະສົມສຳລັບກະສັດ
ມັນບໍ່ເໝາະສົມທີ່ກະສັດຈະດື່ມເຫລົ້າອະງຸ່ນ,
ມັນບໍ່ສົມຄວນທີ່ຜູ້ປົກຄອງຈະດື່ມເບຍ,
ຢ້ານວ່າເມື່ອພວກເຂົາດື່ມແລ້ວ ຈະລືມສິ່ງທີ່ກົດໝາຍໄດ້ກໍານົດໄວ້,
ແລະ ຖອນສິດຂອງຜູ້ທີ່ຖືກກົດຂີ່ທັງໝົດ.
ເບຍມີໄວ້ສໍາລັບຄົນທີ່ກຳລັງຈະຈິບຫາຍ,
ເຫລົ້າອະງຸ່ນມີໄວ້ສໍາລັບຄົນທີ່ມີຄວາມທຸກໃຈ!
ຈົ່ງໃຫ້ພວກເຂົາດື່ມ ແລະ ລືມຄວາມທຸກຍາກ
ແລະ ບໍ່ລະນຶກເຖິງຄວາມທຸກຂອງຕົນອີກຕໍ່ໄປ.
ຈົ່ງເວົ້າແທນຜູ້ທີ່ເວົ້າແທນຕົນເອງບໍ່ໄດ້,
ເພື່ອສິດຂອງຜູ້ທີ່ຂັດສົນທຸກຄົນ.
ຈົ່ງເວົ້າແທນພວກເຂົາ ແລະ ຕັດສິນຢ່າງຍຸຕິທຳ;
ຈົ່ງປົກປ້ອງສິດຕ່າງໆຂອງຄົນທຸກຍາກ ແລະ ຄົນຂັດສົນ.
ບົດສົ່ງທ້າຍ: ລັກສະນະຂອງເມຍທີ່ດີເລີດ
ຜູ້ໃດຈະພົບເມຍທີ່ດີເລີດ?
ນາງມີຄຸນຄ່າຫລາຍກວ່າເພັດພອຍ.
ຜົວຂອງນາງໄວ້ໃຈນາງໄດ້ທຸກຢ່າງ
ແລະ ນາງບໍ່ຂາດສິ່ງທີ່ມີຄ່າເລີຍ.
ນາງນຳສິ່ງທີ່ດີມາໃຫ້ລາວ, ບໍ່ເຮັດໃຫ້ຜົວເສຍຫາຍ,
ຕະຫລອດຊົ່ວຊີວິດຂອງນາງ.
ນາງເລືອກຂົນແກະ ແລະ ຜ້າປ່ານ
ແລະ ເຮັດວຽກດ້ວຍມືຢ່າງດຸໝັ່ນ.
ນາງເປັນດັ່ງເຮືອຂອງພໍ່ຄ້າ,
ທີ່ບັນທຸກອາຫານຂອງນາງມາຈາກແດນໄກ.
ນາງຕື່ນເຊົ້າ ໃນຂະນະທີ່ຍັງມືດຢູ່;
ນາງຈັດຕຽມອາຫານສຳລັບຄອບຄົວຂອງນາງ
ແລະ ແບ່ງອາຫານໃຫ້ພວກສາວໃຊ້ຂອງນາງ.
ນາງອອກໄປເບິ່ງທົ່ງນາ ແລະ ຊື້ມັນໄວ້;
ແລະ ນາງເຮັດສວນອະງຸ່ນດ້ວຍເງິນທີ່ນາງຫາມາໄດ້.
ນາງຕັ້ງໃຈເຮັດວຽກຂອງນາງຢ່າງດຸໝັ່ນ;
ແຂນຂອງນາງແຂງແຮງເພື່ອວຽກງານຂອງຕົນ.
ນາງເບິ່ງແຍງການຄ້າຂາຍໃຫ້ເກີດຜົນກໍາໄລ,
ແລະ ໃນຕອນກາງຄືນຕະກຽງຂອງນາງກໍບໍ່ດັບ.
ມືຂອງນາງເຂັນຝ້າຍ ແລະ
ນິ້ວຂອງນາງຕໍ່າຜ້າຂອງນາງເອງ
ນາງຍິນດີຕ້ອນຮັບຄົນທຸກຍາກ
ແລະ ໃຫ້ຄວາມຊ່ວຍເຫລືອແກ່ຄົນຂັດສົນ.
ເມື່ອຫິມະຕົກ, ນາງບໍ່ມີຄວາມກັງວົນກ່ຽວກັບຄອບຄົວຂອງນາງ;
ເພາະພວກເຂົາທຸກຄົນມີເຄື່ອງນຸ່ງຢ່າງອົບອຸ່ນ.
ນາງເຮັດຜ້າປູບ່ອນນອນຂອງນາງເອງ;
ນາງນຸ່ງເຄື່ອງທີ່ເຮັດດ້ວຍຜ້າຝ້າຍລິນິນເນື້ອລະອຽດ ແລະ ຜ້າສີມ່ວງ.
ຜົວຂອງນາງໄດ້ຮັບຄວາມເຄົາລົບນັບຖືທີ່ປະຕູເມືອງ,
ບ່ອນທີ່ລາວນັ່ງຮ່ວມກັບບັນດາຜູ້ອາວຸໂສຂອງດິນແດນ.
ນາງໄດ້ເຮັດເສື້ອຜ້າລິນິນໄວ້ຂາຍ,
ແລະ ເຮັດສາຍຮັດແອວຂາຍໃຫ້ພໍ່ຄ້າ.
ກໍາລັງ ແລະ ກຽດສັກສີຄືເຄື່ອງນຸ່ງຂອງນາງ;
ນາງຈຶ່ງຫົວຂວັນຕໍ່ອະນາຄົດທີ່ຈະມາເຖິງ.
ນາງເວົ້າດ້ວຍປັນຍາ,
ແລະ ຄຳສັ່ງສອນທີ່ສັດຊື່ຢູ່ເທິງລີ້ນຂອງນາງ.
ນາງເບິ່ງແຍງວຽກງານຕ່າງໆໃນຄອບຄົວຂອງຕົນ
ແລະ ບໍ່ກິນອາຫານແຫ່ງຄວາມຂີ້ຄ້ານ.
ລູກທັງຫລາຍຂອງນາງລຸກຢືນຂຶ້ນ ແລະ ກ່າວຍ້ອງຍໍວ່າ ນາງໄດ້ຮັບພຣະພອນ;
ຜົວຂອງນາງ, ກໍກ່າວຊົມເຊີຍນາງວ່າ:
“ແມ່ຍິງຫລາຍຄົນເຮັດສິ່ງທີ່ດີເລີດ,
ແຕ່ເຈົ້າເຮັດສິ່ງທີ່ດີເລີດກວ່າພວກເຂົາທັງໝົດ”.
ສະເໜ່ເປັນສິ່ງຫລອກລວງ, ແລະ ຄວາມງາມກໍຢູ່ພຽງຊົ່ວຄາວ;
ແຕ່ຍິງທີ່ຢຳເກງພຣະເຈົ້າຢາເວຈະຕ້ອງໄດ້ຮັບການຍ້ອງຍໍ.
ຈົ່ງໃຫ້ກຽດນາງເພາະທຸກສິ່ງທີ່ນາງໄດ້ເຮັດ,
ແລະ ໃຫ້ຜົນງານຂອງນາງເຮັດໃຫ້ນາງໄດ້ຮັບການຍ້ອງຍໍທີ່ປະຕູເມືອງ.
Source notes (2)
- Footnote ຫລື ເລມູເອນແຫ່ງມັດສາ
- Footnote ຫລື ຊັບສິນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.