Biblica® Open Lao Contemporary Version
ສຸພາສິດ 30
ຄຳສອນຂອງອາກູ
ນີ້ແມ່ນຄຳສອນຂອງອາກູລູກຊາຍຂອງຢາເກ ເປັນຄຳເວົ້າທີ່ໄດ້ຮັບການດົນໃຈ.1
ຊາຍຄົນນີ້ທີ່ເວົ້າກັບອິທີເອນວ່າ:
“ຂ້າແດ່ພຣະເຈົ້າ, ຂ້ານ້ອຍອ່ອນແຮງຫລາຍ
ແຕ່ຂ້ານ້ອຍມີໄຊຊະນະໄດ້.2
ແນ່ນອນວ່າ ຂ້ານ້ອຍເປັນພຽງສັດໂຕໜຶ່ງ, ບໍ່ແມ່ນມະນຸດ;
ຂ້ານ້ອຍຈຶ່ງບໍ່ມີຄວາມເຂົ້າໃຈແບບມະນຸດ.
ຂ້ານ້ອຍບໍ່ໄດ້ຮຽນຮູ້ເລື່ອງປັນຍາ,
ແລະ ບໍ່ໄດ້ຮູ້ເຖິງຄວາມຮອບຮູ້ຂອງອົງບໍລິສຸດ.
ຜູ້ໃດໄດ້ຂຶ້ນໄປສະຫວັນ ແລະ ລົງມາຈາກສະຫວັນ?
ຜູ້ໃດແດ່ຈັບລົມໄວ້ໃນມື?
ຜູ້ໃດແດ່ຫໍ່ນ້ຳໄວ້ໃນເສື້ອຄຸມໄດ້?
ຜູ້ໃດຕັ້ງທີ່ສຸດປາຍຂອງແຜ່ນດິນໂລກ?
ເພິ່ນຊື່ຫຍັງ? ແລະ ລູກຂອງເພິ່ນຊື່ຫຍັງ?
ແນ່ນອນວ່າ ເຈົ້າຮູ້!
“ທຸກຖ້ອຍຄໍາຂອງພຣະເຈົ້າບໍ່ມີຕໍາໜິ;
ພຣະອົງເປັນໂລ່ໃຫ້ແກ່ບັນດາຜູ້ທີ່ລີ້ໄພໃນພຣະອົງ.3
ຢ່າຕື່ມຫຍັງໃສ່ຖ້ອຍຄໍາຂອງພຣະອົງ,
ບໍ່ດັ່ງນັ້ນ ພຣະອົງຈະຕຳໜິເຈົ້າ ແລະ ພິສູດໃຫ້ເຫັນວ່າເຈົ້າເປັນຄົນຂີ້ຕົວະ.
“ມີສອງຢ່າງທີ່ຂ້ານ້ອຍຂໍຈາກພຣະເຈົ້າຢາເວ;
ຂໍຢ່າປະຕິເສດກ່ອນທີ່ຂ້ານ້ອຍຈະຕາຍໄປຄື:
ຂໍໃຫ້ການຫລອກລວງ ແລະ ຄວາມຕົວະຫ່າງໄກຈາກຂ້ານ້ອຍ;
ຂໍຢ່າໃຫ້ຂ້ານ້ອຍທຸກຍາກ ຫລື ຮັ່ງມີ,
ແຕ່ຂໍໂຜດໃຫ້ອາຫານປະຈຳວັນແກ່ຂ້ານ້ອຍເທົ່ານັ້ນ.
ບໍ່ດັ່ງນັ້ນ, ຂ້ານ້ອຍອາດຈະມີຫລາຍເກີນໄປ ແລ້ວປະຕິເສດພຣະອົງ
ແລະ ເວົ້າວ່າ, ‘ພຣະເຈົ້າຢາເວແມ່ນຜູ້ໃດ?’
ຫລື ຂ້ານ້ອຍອາດຈະກາຍເປັນຄົນທຸກຍາກ ແລ້ວກາຍເປັນຄົນຂີ້ລັກ,
ແລະເຮັດໃຫ້ນາມຊື່ຂອງພຣະເຈົ້າຂອງຂ້ານ້ອຍເສື່ອມເສຍ.
“ຢ່າເວົ້າໃສ່ຮ້າຍຄົນຮັບໃຊ້ໃຫ້ນາຍຂອງພວກເຂົາຟັງ,
ບໍ່ດັ່ງນັ້ນ ພວກເຂົາຈະສາບແຊ່ງເຈົ້າ, ແລະ ເຈົ້າຈະຖືກລົງໂທດ.
“ມີບາງຄົນສາບແຊ່ງພໍ່ຂອງຕົນເອງ
ແລະ ບໍ່ອວຍພອນແມ່ຂອງຕົນ;
ບາງຄົນຄິດວ່າຕົນເອງບໍລິສຸດ
ແລະ ຍັງບໍ່ໄດ້ຮັບການຊຳລະລ້າງມົນທິນຂອງຕົນ;
ຄົນເຫລົ່ານັ້ນມີຕາທີ່ອວດອົງຈອງຫອງຕະຫລອດ,
ຄືຄົນທີ່ມີສາຍຕາມັກໝິ່ນປະໝາດຜູ້ອື່ນ;
ບາງຄົນແຂ້ວຄືກັນກັບດາບ
ແລະ ບາງຄົນປາກຄົມຄືກັນກັບມີດ
ເພື່ອກືນກິນຄົນທຸກຍາກໄປຈາກແຜ່ນດິນໂລກ
ແລະ ຄົນຂັດສົນອອກຈາກທ່າມກາງມະນຸດ.
“ໂຕປີງມີລູກສາວສອງຄົນ
ພວກມັນຮ້ອງວ່າ ‘ເອົາມາ! ເອົາມາ!’
“ມີສາມສິ່ງທີ່ບໍ່ເຄີຍອີ່ມຈັກເທື່ອ,
ມີສີ່ສິ່ງທີ່ບໍ່ເຄີຍເວົ້າວ່າ ‘ພໍແລ້ວ!’ ຄື:
ຂຸມຝັງສົບ
ແລະ ມົດລູກທີ່ເປັນໝັນ;
ດິນແດນບໍ່ເຄີຍອີ່ມນ້ຳ,
ແລະ ໄຟ, ທີ່ບໍ່ເຄີຍເວົ້າວ່າ ‘ພໍແລ້ວ!’
“ຕາທີ່ເຢາະເຢີ້ຍພໍ່,
ດູໜິ່ນແມ່ທີ່ເຖົ້າແກ່,
ຈະຖືກຝູງກາແຫ່ງຮ່ອມພູເຈາະແກ່ນຕາ
ແລະ ຈະຖືກຝູງແຮ້ງກັດກິນ.
“ມີສາມຢ່າງທີ່ເຮັດໃຫ້ຂ້ອຍອັດສະຈັນໃຈຫລາຍທີ່ສຸດ,
ມີສີ່ຢ່າງທີ່ຂ້ອຍບໍ່ເຂົ້າໃຈຄື:
ການບິນຂອງນົກອິນຊີໃນທ້ອງຟ້າ,
ການເລືອຄານຂອງງູເທິງກ້ອນຫີນ,
ການແລ່ນຂອງເຮືອຢູ່ໃນທະເລເລິກ,
ແລະ ຄວາມຮັກຂອງຜູ້ຊາຍກັບຜູ້ຍິງ.
“ນີ້ແມ່ນການປະພຶດຂອງຍິງຫລິ້ນຊູ້:
ນາງກິນແລ້ວເຊັດປາກຂອງຕົນ
ແລະ ເວົ້າວ່າ, ‘ຂ້ອຍບໍ່ໄດ້ເຮັດຫຍັງຜິດ’.
“ມີສາມຢ່າງທີ່ເຮັດໃຫ້ແຜ່ນດິນໂລກສັ່ນສະທ້ານ,
ມີສີ່ຢ່າງທີ່ແຜ່ນດິນໂລກຮັບບໍ່ໄດ້ຄື:
ຄົນຮັບໃຊ້ທີ່ກາຍເປັນກະສັດ,
ຄົນໂງ່ຈ້າມີອາຫານກິນຈົນເຫລືອເຟືອ,
ຍິງທີ່ເປັນຕາຊັງໄດ້ແຕ່ງງານ
ສາວໃຊ້ທີ່ຂຶ້ນມາແທນທີ່ນາຍຍິງຂອງຕົນ.
“ມີສີ່ຢ່າງໃນແຜ່ນດິນໂລກທີ່ມີຂະໜາດນ້ອຍ,
ແຕ່ພວກມັນສະຫລາດທີ່ສຸດຄື:
ມົດເປັນສັດທີ່ມີກຳລັງນ້ອຍ,
ແຕ່ພວກມັນສະສົມອາຫານໄວ້ໃນລະດູຮ້ອນ;
ຕຸ່ນເປັນສັດທີ່ບໍ່ແຂງແຮງ,
ແຕ່ພວກມັນເຮັດຮັງເທິງໂງ່ນຫີນ;
ຕັກແຕນບໍ່ມີກະສັດ,
ແຕ່ພວກມັນເຄື່ອນທີ່ພ້ອມກັນໄປເປັນແຖວ;
ຂີ້ກ້ຽມເອົາມືຈັບກໍໄດ້,
ແຕ່ມັນກໍມີຫລາຍໂຕຢູ່ໃນວັງຂອງກະສັດ.
“ມີສາມສິ່ງທີ່ມີຮູບຮ່າງສະຫງ່າງາມ
ມີສີ່ສິ່ງທີ່ເຄື່ອນໄຫວຢ່າງສະຫງ່າງາມຄື:
ສິງ, ເປັນສັດທີ່ແຂງແຮງກວ່າໝູ່, ຄືຜູ້ທີ່ບໍ່ຢ້ານຫຍັງເລີຍ;
ໄກ່ໂອກ,
ແບ້ເຖິກທີ່ຍ່າງວາງມາດ,
ແລະ ກະສັດທີ່ມີຄວາມປອດໄພຈາກການກະບົດ.
“ຖ້າເຈົ້າເຮັດຕົນເປັນຄົນໂງ່ຈ້າ ແລະ ຍ້ອງຍໍຕົນເອງ,
ຫລື ຖ້າເຈົ້າວາງແຜນຊົ່ວ,
ຈົ່ງເອົາມືປິດປາກຂອງເຈົ້າໄວ້!
ເພາະເມື່ອກວນນໍ້ານົມກໍໄດ້ເນີຍ,
ຫລື ເມື່ອຊົກດັງເລືອດກໍຈະອອກມາ,
ດັ່ງນັ້ນ, ການຍົວະໃຫ້ໃຈຮ້າຍກໍເຮັດໃຫ້ຜິດຖຽງກັນ”.
Source notes (3)
- Footnote ຫລື ຄຳສອນຂອງອາກູບຸດຢາເກແຫ່ງມັດສາ
- Footnote ໃນພາສາເຮັບເຣີອາດມີຄວາມຫມາຍອີກຢ່າງໜຶ່ງວ່າ ລາວເວົ້າກັບອີທຽນ ກັບອີທຽນ ແລະ ກັບອູກາເສວ່າ ຫລື ຂ້າແດ່ພຣະເຈົ້າ ຂ້ານ້ອຍອ່ອນລ້າ ຂ້າແດ່ພຣະເຈົ້າ ຂ້ານ້ອຍອ່ອນລ້າ ແລະ ອິດອ່ອນເມື່ອຍແຮງ
- Footnote ເບິ່ງ 2ຊມອ 22:31-32 ແລະ ພສສ 18:30-31
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.