Biblica® Open Lao Contemporary Version
ສຸພາສິດ 29
ຜູ້ທີ່ຖືກຕັກເຕືອນຫລາຍເທື່ອແຕ່ຍັງດື້ດ້ານ
ຈະຖືກທໍາລາຍທັນທີໂດຍບໍ່ມີທາງແກ້ໄຂ.
ເມື່ອຄົນຊອບທຳປົກຄອງ, ປະຊາຊົນກໍຊື່ນຊົມຍິນດີ;
ເມື່ອຄົນຊົ່ວຮ້າຍຂຶ້ນປົກຄອງ, ປະຊາຊົນກໍຮ້ອງຄວນຄາງ.
ລູກທີ່ຮັກປັນຍາເຮັດໃຫ້ພໍ່ຂອງຕົນມີຄວາມສຸກ,
ແຕ່ຄົນທີ່ຄົບກັບໂສເພນີກໍຜານຊັບສົມບັດຂອງຕົນ.
ກະສັດເຮັດໃຫ້ປະເທດຊາດໝັ້ນຄົງດ້ວຍຄວາມຍຸຕິທຳ,
ແຕ່ກະສັດທີ່ໂລບສິນບົນ1 ກໍທຳລາຍປະເທດຊາດໃຫ້ຫລົ້ມຈົມລົງ.
ຜູ້ທີ່ປະຈົບປະແຈງເພື່ອນບ້ານຂອງຕົນ
ກໍຫ້າງແຮ້ວໃສ່ຕີນຂອງຕົນເອງ.2
ຄົນເຮັດຊົ່ວກໍຖືກບ້ວງແຮ້ວເພາະບາບກຳຂອງຕົນ,
ແຕ່ຄົນຊອບທຳຮ້ອງໂຮຢ່າງມີຄວາມສຸກ ແລະ ດ້ວຍຄວາມດີໃຈ.
ຄົນຊອບທຳກໍເປັນຫວງນໍາຄວາມຍຸຕິທຳເພື່ອຄົນທຸກຍາກ,
ແຕ່ຄົນຊົ່ວຮ້າຍບໍ່ມີຄວາມກັງວົນເລີຍ.
ຄົນມັກເຢາະເຍີ້ຍເຮັດໃຫ້ບ້ານເມືອງວຸ້ນວາຍ,
ແຕ່ຄົນມີປັນຍາເຮັດໃຫ້ຄວາມໃຈຮ້າຍສະຫງົບລົງ.
ຖ້າຄົນມີປັນຍາໄປຂຶ້ນສານກັບຄົນໂງ່ຈ້າ,
ຄົນໂງ່ຈ້າກໍສະແດງຄວາມໂມໂຫ, ເວົ້າເຢາະເຢີ້ຍ ແລະ ບໍ່ມີຄວາມສະຫງົບສຸກ.
ຄົນກະຫາຍເລືອດກຽດຊັງຄົນສັດຊື່
ແລະ ຊອກຫາທາງຂ້າຜູ້ທີ່ທ່ຽງທຳ.
ຄົນໂງ່ຈ້າກໍລະບາຍຄວາມໂມໂຫຂອງຕົນ,
ແຕ່ຄົນມີປັນຍານໍາເອົາຄວາມສະຫງົບມາໃນທີ່ສຸດ.
ຖ້າຜູ້ປົກຄອງຟັງຄວາມຕົວະ,
ຂ້າລາຊະການທັງໝົດຂອງເພິ່ນຈະກາຍເປັນຄົນຊົ່ວຮ້າຍໄປນໍາ.
ຄົນທຸກຍາກ ແລະ ຜູ້ຂົ່ມເຫັງກໍມີສິ່ງໜຶ່ງຄືກັນຄື:
ພຣະເຈົ້າຢາເວໃຫ້ສາຍຕາທີ່ເບິ່ງເຫັນແກ່ພວກເຂົາທັງສອງ.
ຖ້າກະສັດຕັດສິນຄວາມຄົນທຸກຍາກຢ່າງຍຸຕິທໍາ,
ບັນລັງຂອງເພິ່ນກໍຈະໝັ້ນຄົງຕະຫລອດໄປ.
ໄມ້ແສ້ ແລະ ຄຳຕຳໜິຕິຕຽນເຮັດໃຫ້ເກີດປັນຍາ,
ແຕ່ເດັກນ້ອຍທີ່ບໍ່ມີລະບຽບວິໄນເຮັດໃຫ້ແມ່ຂອງຕົນອັບອາຍຂາຍໜ້າ.
ເມື່ອຄົນຊົ່ວຮ້າຍຈະເລີນ, ຄວາມບາບກໍເພີ່ມທະວີຂຶ້ນ,
ແຕ່ຄົນຊອບທຳຈະເຫັນຄວາມຫລົ້ມຈົມຂອງພວກເຂົາ.
ຈົ່ງອົບຮົມບົ່ມສອນລູກຂອງເຈົ້າ, ແລ້ວພວກເຂົາຈະໃຫ້ສັນຕິສຸກແກ່ເຈົ້າ;
ພວກເຂົາຈະໃຫ້ຄວາມຍິນດີຕາມທີ່ເຈົ້າປາຖະໜາ.
ບ່ອນທີ່ບໍ່ມີນິມິດ, ປະຊາຊົນກໍປະຖິ້ມການຄວບຄຸມອາລົມ;
ແຕ່ຄວາມສຸກເປັນຂອງຜູ້ທີ່ຍອມຮັບຄຳສັ່ງສອນແຫ່ງປັນຍາ.
ຄົນຮັບໃຊ້ຈະໄດ້ຮັບການອົບຮົມບົ່ມສອນດ້ວຍຄຳເວົ້າຢ່າງດຽວບໍ່ໄດ້.
ເຖິງແມ່ນວ່າພວກເຂົາເຂົ້າໃຈ, ແຕ່ພວກເຂົາຈະບໍ່ຍອມເຮັດຕາມ.
ເຈົ້າເຫັນຄົນທີ່ມັກເວົ້າແບບບໍ່ຄິດບໍ?
ຄົນໂງ່ຈ້າກໍມີຄວາມຫວັງຫລາຍກວ່າພວກເຂົາ.
ການເຮັດຕາມໃຈຄົນຮັບໃຊ້ຕັ້ງແຕ່ຍັງນ້ອຍ,
ລາວຈະກາຍເປັນຄົນຈອງຫອງ.3
ຄົນທີ່ໃຈຮ້າຍງ່າຍກໍເຮັດໃຫ້ເກີດການຜິດຖຽງກັນ,
ແລະ ຄົນໃຈຮ້ອນເຮັດບາບຢ່າງຫລວງຫລາຍ.
ການໂອ້ອວດເຮັດໃຫ້ຄົນຕົກຕ່ຳລົງ,
ແຕ່ຜູ້ທີ່ມີໃຈຖ່ອມຈະໄດ້ຮັບກຽດ.
ການສົມຮູ້ຮ່ວມຄິດກັບຄົນຂີ້ລັກກໍເປັນສັດຕູຕໍ່ຕົນເອງ;
ພວກເຂົາຕ້ອງສາບານ ແຕ່ບໍ່ກ້າເປັນພະຍານ.
ຄວາມຢ້ານຂອງຄົນຈະເປັນການຫ້າງແຮ້ວ,
ແຕ່ຜູ້ທີ່ໄວ້ວາງໃຈໃນພຣະເຈົ້າຢາເວກໍປອດໄພ.
ຫລາຍຄົນເຂົ້າຫາຜູ້ທີ່ມີອໍານາດ,
ແຕ່ຄົນໄດ້ຮັບຄວາມຍຸຕິທຳມາຈາກພຣະເຈົ້າຢາເວ.
ຄົນຊອບທຳກຽດຊັງຄົນບໍ່ສັດຊື່;
ແຕ່ຄົນຊົ່ວຮ້າຍກຽດຊັງຄົນທ່ຽງທໍາ.
Source notes (3)
- Footnote ຫລື ໃຫ້ສິນບົນ
- Footnote ຫລື ຂອງເຂົາ
- Footnote ຫລື ເຂົາຈະກາຍເປັນລູກ ຫລື ເຂົາຈະກາຍເປັນຜູ້ຮັບມໍລະດົກ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.