Biblica® Open Lao Contemporary Version
ສຸພາສິດ 28
ຄົນຊົ່ວຮ້າຍໜີໄປໂດຍບໍ່ມີຜູ້ໃດໄລ່ຕາມ,
ແຕ່ຄົນຊອບທຳກ້າຫານເໝືອນດັ່ງໂຕສິງ.
ເມື່ອປະເທດຊາດເກີດການກະບົດ,1 ປະເທດນັ້ນກໍຈະມີຜູ້ປົກຄອງຫລາຍຄົນ,
ແຕ່ຜູ້ປົກຄອງທີ່ມີຄວາມສະຫລາດຫລັກແຫລມ ແລະ ມີຄວາມຮູ້ຮັກສາຄວາມເປັນລະບຽບໄວ້ໄດ້.
ຜູ້ປົກຄອງ2 ທີ່ກົດຂີ່ຄົນທຸກຍາກ
ກໍເປັນເໝືອນຝົນຕົກໜັກທີ່ທຳລາຍຜົນລະປູກ.
ຜູ້ທີ່ປະຖິ້ມກົດບັນຍັດກໍຍົກຍ້ອງຄົນຊົ່ວຮ້າຍ,
ແຕ່ຜູ້ທີ່ຮັກສາກົດບັນຍັດກໍຕໍ່ຕ້ານຄົນຊົ່ວຮ້າຍ.
ຄົນທີ່ເຮັດຊົ່ວບໍ່ເຂົ້າໃຈສິ່ງທີ່ຖືກຕ້ອງ,
ແຕ່ຜູ້ທີ່ສະແຫວງຫາພຣະເຈົ້າຢາເວມີຄວາມເຂົ້າໃຈຢ່າງແທ້ຈິງ.
ເປັນຄົນທຸກຍາກທີ່ດຳເນີນຊີວິດຢ່າງບໍ່ມີຕຳໜິ
ກໍດີກວ່າເປັນຄົນຮັ່ງມີທີ່ຢູ່ໃນທາງຄົດໂກງ.
ລູກທີ່ສະຫລາດກໍປະຕິບັດຕາມຄຳສັ່ງສອນ,
ແຕ່ລູກທີ່ມີໝູ່ເປັນຄົນຂີ້ໂລບກໍເຮັດໃຫ້ພໍ່ຂອງຕົນອັບອາຍຂາຍໜ້າ.
ຜູ້ທີ່ຮັ່ງມີເພີ່ມຂຶ້ນດ້ວຍດອກເບ້ຍ ຫລື ຜົນກໍາໄລຈາກຄົນທຸກຍາກ
ກໍສະສົມໄວ້ໃຫ້ຄືນອື່ນ, ທີ່ເມດຕາຕໍ່ຄົນທຸກຍາກ.
ຜູ້ທີ່ປິດຫູບໍ່ຍອມຟັງຄຳສັ່ງສອນຂອງພຣະເຈົ້າ,
ແມ່ນແຕ່ຄຳພາວັນນາອະທິຖານຂອງພວກເຂົາກໍເປັນທີ່ກຽດຊັງ.
ຜູ້ທີ່ນໍາພາຄົນທ່ຽງທຳໄປໃນທາງຊົ່ວ
ຈະຕົກລົງໄປໃນບ້ວງແຮ້ວຂອງຕົນເອງ,
ແຕ່ຜູ້ທີ່ບໍ່ມີຕຳໜິຈະໄດ້ຮັບສິ່ງດີເປັນມໍລະດົກ.
ຄົນຮັ່ງມີມັກຄິດວ່າຕົນເປັນຄົນມີປັນຍາ;
ແຕ່ຄົນທຸກຈົນ ແລະ ຄົນສະຫລາດເຫັນວ່າພວກເຂົາເປັນຄົນຫລອກລວງຫລາຍສໍ່າໃດ.
ເມື່ອຄົນຊອບທຳມີໄຊຊະນະ, ກໍປິຕິຍິນດີຢ່າງຍິ່ງ;
ແຕ່ເມື່ອຄົນຊົ່ວຮ້າຍຂຶ້ນມີອຳນາດ, ປະຊາຊົນກໍພາກັນໄປຫລົບລີ້.
ຜູ້ທີ່ປົກປິດບາບຂອງຕົນຈະບໍ່ຈະເລີນຮຸ່ງເຮືອງ,
ແຕ່ຜູ້ທີ່ສາລະພາບບາບ ແລະ ປະຖິ້ມບາບນັ້ນຈະໄດ້ຮັບຄວາມເມດຕາ.
ຄວາມສຸກເປັນຂອງຜູ້ທີ່ຢຳເກງພຣະເຈົ້າຢູ່ສະເໝີ,
ແຕ່ຜູ້ທີ່ເຮັດໃຈແຂງກະດ້າງຈະຕົກຢູ່ໃນຄວາມເດືອດຮ້ອນ.
ຜູ້ປົກຄອງຊົ່ວປົກຄອງຄົນທຸກຍາກ
ກໍເໝືອນດັ່ງໂຕສິງທີ່ຮ້ອງແຜດສຽງ ຫລື ໝີທີ່ພ້ອມໂດດຄຸບ.
ຜູ້ປົກຄອງທີ່ຂາດຄວາມເຂົ້າໃຈກໍຂູດຮີດປະຊາຊົນ,
ແຕ່ຜູ້ທີ່ກຽດຊັງຜົນປະໂຫຍດທີ່ໄດ້ມາໂດຍບໍ່ຖືກຕ້ອງຈະໄດ້ປົກຄອງຍາວນານ.
ຜູ້ໃດທຸກທໍລະມານຍ້ອນຄວາມຜິດຈາກການຂ້າຄົນ
ຈະຊອກຫາບ່ອນຫລົບໄພໃນຂຸມຝັງສົບ;
ຢ່າໃຫ້ຜູ້ໃດຖ່ວງພວກເຂົາໄວ້.
ຄົນທີ່ດຳເນີນຊີວິດຢ່າງບໍ່ມີຕຳໜິຈະໄດ້ຮັບຄວາມປອດໄພ,
ແຕ່ຄົນທີ່ຢູ່ໃນທາງຄົດໂກງຈະຕົກລົງໄປໃນຂຸມເລິກ.
ຜູ້ທີ່ເຮັດວຽກໄຖດິນຂອງຕົນຈະມີອາຫານຢ່າງອຸດົມສົມບູນ,
ແຕ່ຄົນທີ່ມີແຕ່ໃຝ່ຝັນກໍຈະມີຄວາມທຸກຍາກ.
ຄົນສັດຊື່ຈະໄດ້ຮັບພຣະພອນຢ່າງລົ້ນເຫລືອ,
ແຕ່ຄົນທີ່ຢາກຮັ່ງມີທາງລັດກໍຈະໜີບໍ່ພົ້ນໂທດ.
ຄວາມລໍາອຽງເປັນສິ່ງທີ່ບໍ່ດີ
ແຕ່ກໍຍັງມີຄົນເຮັດຜິດເພື່ອແລກກັບເຂົ້າຈີ່ປ່ຽງດຽວ.
ຄົນເຫັນແກ່ຕົວກໍຢາກຮັ່ງມີໄວ
ແລະ ຄວາມທຸກຍາກລໍຖ້າພວກເຂົາໂດຍທີ່ບໍ່ຮູ້ໂຕ.
ຜູ້ທີ່ຕິຕຽນຄົນແບບເຊິ່ງໜ້າຈະໄດ້ຮັບການຊົມເຊີຍໃນບັ້ນປາຍ
ຫລາຍກວ່າຜູ້ທີ່ເວົ້າປະຈົບປະແຈງ.
ລູກທີ່ປຸ້ນພໍ່ ຫລື ແມ່ຂອງຕົນ
ແລະ ເວົ້າວ່າ, “ມັນບໍ່ຜິດ”,
ກໍເປັນໝູ່ເພື່ອນກັບຄົນຂີ້ລັກ.
ຄົນເຫັນແກ່ຕົວກໍເຮັດໃຫ້ເກີດການຜິດຖຽງກັນ,
ແຕ່ຜູ້ທີ່ໄວ້ວາງໃຈໃນພຣະເຈົ້າຢາເວຈະຈະເລີນຮຸ່ງເຮືອງ.
ຜູ້ທີ່ໄວ້ວາງໃຈໃນຕົນເອງກໍເປັນຄົນໂງ່ຈ້າ,
ແຕ່ຜູ້ທີ່ດຳເນີນຕາມຄົນມີປັນຍາຈະໄດ້ຮັບການປົກປ້ອງໃຫ້ປອດໄພ.
ຜູ້ທີ່ເອົາໃຫ້ຄົນທຸກຍາກຈະບໍ່ຂັດສົນ,
ແຕ່ຜູ້ທີ່ເມີນເສີຍຕໍ່ພວກເຂົາຈະຖືກສາບແຊ່ງຢ່າງຫລວງຫລາຍ.
ເມື່ອຄົນຊົ່ວຮ້າຍຂຶ້ນມີອຳນາດ, ປະຊາຊົນກໍພາກັນໄປຫລົບລີ້;
ແຕ່ເມື່ອຄົນຊົ່ວຮ້າຍຈິບຫາຍໄປ, ຄົນຊອບທຳກໍຈະເລີນຮຸ່ງເຮືອງ.
Source notes (2)
- Footnote ຫລື ເພາະຄວາມບາບຂອງແຜ່ນດິນ
- Footnote ຫລື ຄົນຍາກຈົນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.