Biblica® Open Lao Contemporary Version
ສຸພາສິດ 17
ກິນເຂົ້າແຫ້ງຢ່າງມິດງຽບ ແລະ ສະຫງົບສຸກ
ກໍດີກວ່າເຮືອນທີ່ເຕັມໄປດ້ວຍງານລ້ຽງພ້ອມກັບການຜິດຖຽງກັນ.
ຄົນຮັບໃຊ້ທີ່ສະຫລາດຈະປົກຄອງລູກທີ່ໜ້າອັບອາຍຂາຍໜ້າ.
ແລະ ຈະໄດ້ຮັບສ່ວນແບ່ງມໍລະດົກເໝືອນດັ່ງຄົນໃນຄອບຄົວ.
ເຕົາຫລອມໃຊ້ທົດສອບເງິນ ແລະ ເຕົາໄຟທົດສອບຄຳເຕົາໄຟສັນໃດ,
ພຣະເຈົ້າຢາເວກໍທົດສອບຈິດໃຈ.
ຄົນຊົ່ວຮ້າຍມັກຟັງຄໍາເວົ້າທີ່ຫລອກລວງ;
ຄົນຂີ້ຕົວະກໍມັກຟັງລີ້ນທີ່ຫວັງທໍາລາຍ.
ຜູ້ທີ່ເຢາະເຢີ້ຍຄົນທຸກຍາກກໍໝິ່ນປະໝາດພຣະເຈົ້າຜູ້ສ້າງຂອງພວກເຂົາ;
ຜູ້ທີ່ດີໃຈເມື່ອເຫັນຄົນພົບໄພພິບັດຈະໜີບໍ່ພົ້ນການລົງໂທດ.
ລູກຫລານເປັນມົງກຸດຂອງຜູ້ເຖົ້າ,
ແລະ ພໍ່ແມ່ເປັນຄວາມພູມໃຈຂອງພວກລູກ.
ຄໍາເວົ້າທີ່ມວນບໍ່ເໝາະສົມກັບຄົນທີ່ບໍ່ນັບຖືພຣະເຈົ້າສັນໃດ
ຄຳເວົ້າຕົວະກໍຍິ່ງບໍ່ເໝາະສົມກັບຜູ້ປົກຄອງສັນນັ້ນ!
ການໃຫ້ສິນບົນຖືເປັນສະເໜ່ຂອງຜູ້ໃຫ້;
ພວກເຂົາຄິດວ່າຄວາມສຳເລັດຈະເກີດຂຶ້ນທຸກຄັ້ງ.
ຜູ້ທີ່ສົ່ງເສີມຄວາມຮັກກໍປິດບັງຄວາມຜິດ,
ແຕ່ຜູ້ທີ່ເວົ້າຟື້ນເລື່ອງເກົ່າກໍເຮັດໃຫ້ໝູ່ສະໜິດແຕກແຍກກັນ.
ໃຫ້ຄໍາຕັກເຕືອນພຽງຄັ້ງດຽວແກ່ຄົນສະຫລາດ
ກໍດີກວ່າຂ້ຽນຕີຄົນໂງ່ຈ້າຮ້ອຍບາດ.
ຄົນຊົ່ວຮ້າຍສົ່ງເສີມການກະບົດຕໍ່ສູ້ພຣະເຈົ້າ;
ແຕ່ຜູ້ນຳຂ່າວແຫ່ງຄວາມຕາຍຈະຖືກສົ່ງມາຕໍ່ສູ້ພວກເຂົາ.
ພົບໝີແມ່ທີ່ຖືກລັກລູກນ້ອຍໄປ
ກໍດີກວ່າໄປພົບຄົນໂງ່ຈ້າທີ່ຫລົງຢູ່ໃນຄວາມໂງ່.
ຄວາມຊົ່ວຈະບໍ່ໜີຈາກບ້ານໄປ
ຫາກຄົນນັ້ນຕອບແທນຄວາມດີດ້ວຍຄວາມຊົ່ວ.
ເລີ່ມຜິດຖຽງກັນກໍເປັນດັ່ງເຂື່ອນທີ່ກໍາລັງຈະແຕກ;
ດັ່ງນັ້ນ ຈົ່ງຢຸດເລື່ອງນີ້ກ່ອນການຜິດຖຽງກັນຈະເກີດຂຶ້ນ.
ສອງສິ່ງທີ່ພຣະເຈົ້າຢາເວກຽດຊັງຄື
ການປ່ອຍໃຫ້ຄົນຜິດໜີໄປ ແລະ ການລົງໂທດຄົນຊອບທຳ.
ເປັນຫຍັງພວກຄົນໂງ່ຈ້າຈຶ່ງມີເງິນໃນມືເພື່ອຊື້ປັນຍາ,
ເມື່ອພວກເຂົາບໍ່ສາມາດເຂົ້າໃຈປັນຍາໄດ້?
ໝູ່ມີຄວາມຮັກຕໍ່ກັນຢູ່ຕະຫລອດເວລາ,
ແລະ ອ້າຍເອື້ອຍນ້ອງກັນກໍເກີດມາເພື່ອຊ່ວຍກັນໃນຍາມຍາກລໍາບາກ.
ຄົນບໍ່ຮູ້ຈັກຄິດຈັບມືໃຫ້ຄໍາສັນຍາ
ແລະ ຄ້ຳປະກັນໃຫ້ເພື່ອນບ້ານ.
ຜູ້ທີ່ມັກການຜິດຖຽງກັນກໍຮັກຄວາມບາບ;
ຜູ້ທີ່ຍິ່ງອວດຕົວກໍນໍາຄວາມຈິບຫາຍມາສູ່ຕົນ.
ຄົນທີ່ມີຈິດໃຈຄົດໂກງຈະບໍ່ຈະເລີນ,
ຄົນທີ່ເວົ້າປີ້ນຄວາມຈະຕົກລົງໃນຄວາມຍາກລຳບາກ.
ການທີ່ມີລູກເປັນຄົນໂງ່ຈ້າຈະນໍາຄວາມໂສກເສົ້າມາ;
ພໍ່ແມ່ຂອງຄົນໂງ່ຈ້າບໍ່ມີຄວາມສຸກ.
ຈິດໃຈທີ່ມ່ວນຊື່ນກໍເປັນຢາຊັ້ນດີ
ແຕ່ຈິດວິນຍານທີ່ແຕກສະຫລາຍກໍເຮັດໃຫ້ກະດູກຫ່ຽວແຫ້ງ.
ຄົນຊົ່ວຮ້າຍຍອມຮັບສິນບົນຢ່າງລັບໆ
ເພື່ອບິດເບືອນທາງແຫ່ງຄວາມຍຸຕິທຳ.
ຄົນສະຫລາດຍ່ອມຮັກສາປັນຍາໄວ້,
ແຕ່ຕາຂອງຄົນໂງ່ຈ້າແນມຫາໄປຈົນສຸດປາຍແຜ່ນດິນໂລກ.
ລູກໂງ່ຈ້ານໍາຄວາມໂສກເສົ້າມາສູ່ພໍ່ຂອງຕົນ
ແລະ ນໍາຄວາມຂົມຂື່ນມາສູ່ແມ່ຂອງຕົນ ຜູ້ໃຫ້ກຳເນີດຕົນມາ.
ຖ້າການລົງໂທດຄົນບໍລິສຸດເປັນເລື່ອງບໍ່ດີ
ການຂ້ຽນຕີເຈົ້າໜ້າທີ່ທີ່ຊື່ສັດກໍບໍ່ຖືກຕ້ອງຢ່າງແນ່ນອນ.
ຜູ້ທີ່ມີຄວາມຮູ້ກໍຈະໃຊ້ຄໍາເວົ້າດ້ວຍຄວາມລະມັດລະວັງ
ຜູ້ທີ່ມີຄວາມເຂົ້າໃຈກໍເປັນຄົນໃຈເຢັນ.
ແມ່ນແຕ່ຄົນໂງ່ຈ້າກໍຖືວ່າເປັນຄົນມີປັນຍາ
ຖ້າພວກເຂົາມິດງຽບຢູ່ ແລະ ຖ້າພວກເຂົາງັບປາກໄວ້ໄດ້ກໍຖືວ່າພວກເຂົາເປັນຄົນສະຫລາດ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.