Biblica® Open Lao Contemporary Version
ຈົດບັນຊີ 4
ຄົນໂກຮາດ
ພຣະເຈົ້າຢາເວໄດ້ເວົ້າກັບໂມເຊ ແລະ ອາໂຣນວ່າ: “ຈົ່ງຈົດຈຳນວນພົນຂອງຄົນໂກຮາດ ເຊິ່ງເປັນເຊື້ອສາຍຂອງຄົນເລວີຕາມຕະກຸນ ແລະ ຄອບຄົວຂອງພວກເຂົາ. ຈົ່ງນັບຜູ້ຊາຍທຸກຄົນທີ່ມີອາຍຸຕັ້ງແຕ່ 30 ປີຫາ 50 ປີ ເຊິ່ງມີຄຸນສົມບັດທີ່ຈະມາຮັບໃຊ້ໃນເຕັນນັດພົບ.
“ວຽກງານຂອງຄົນໂກຮາດໃນເຕັນນັດພົບນັ້ນມີຄື: ໃຫ້ເບິ່ງແຍງບັນດາສິ່ງບໍລິສຸດທີ່ສຸດ. ເມື່ອມີການຍົກຍ້າຍຄ້າຍພັກ, ອາໂຣນ ແລະ ລູກຊາຍຂອງລາວຈະຕ້ອງເຂົ້າໄປທາງໃນ ແລະ ປົດຜ້າກັ້ງທີ່ຂັ້ນນັ້ນລົງມາ ແລ້ວຄຸມຫີບພັນທະສັນຍາໄວ້. ຫລັງຈາກນັ້ນ ພວກເຂົາຈະຕ້ອງປົກຄຸມຜ້າກັ້ງດ້ວຍໜັງສັດຢ່າງດີ,1 ພືຜ້າສີຟ້າປົກທັບອີກ ແລ້ວສອດໄມ້ຄານໃສ່ຫີບພັນທະສັນຍາ.
“ຈົ່ງພືຜ້າສີຟ້າປົກໂຕະເຄື່ອງຖວາຍເບື້ອງໜ້າ ວາງຈານ, ຊາມ ແລະ ຖ້ວຍ, ເຢືອກສຳລັບເຄື່ອງດື່ມບູຊາ; ເຂົ້າຈີ່ທີ່ຕ້ອງຕັ້ງໄວ້ຢູ່ເທິງໂຕະນັ້ນບໍ່ໃຫ້ຂາດ. ພວກເຂົາຈະຕ້ອງປູຜ້າສີແດງໃສ່ເທິງສິ່ງເຫລົ່ານັ້ນ, ແລ້ວໃຊ້ໜັງສັດຢ່າງດີປົກຄຸມໄວ້ ແລ້ວສອດໄມ້ຄານໃສ່ທີ່ຫວ່ງຂອງໂຕະ.
“ພວກເຂົາຈະຕ້ອງເອົາຜ້າສີຟ້າປົກຄຸມຫລັກຕະກຽງ ພ້ອມກັບຕະກຽງ, ມີດຕັດແຕ່ງໄສ້ຕະກຽງກັບຖາດ ແລະ ພາຊະນະທັງໝົດສຳລັບບັນຈຸນ້ຳມັນໝາກກອກເພື່ອເຕີມຕະກຽງ. ແລ້ວໃຊ້ໜັງສັດຢ່າງດີຫຸ້ມຫໍ່ອີກ ແລ້ວນຳຂຶ້ນໄປວາງໃສ່ໄວ້ເທິງຮ່າງໄມ້ຄານຫາມ.
“ພວກເຂົາຈະຕ້ອງປູຜ້າສີຟ້າປົກແທ່ນບູຊາຄຳ ແລະ ຫຸ້ມດ້ວຍໜັງສັດຢ່າງດີອີກແລ້ວສອດໄມ້ຄານໃສ່.
“ພວກເຂົາຕ້ອງໃຊ້ຜ້າສີຟ້າຫໍ່ເຄື່ອງໃຊ້ທັງໝົດທີ່ໃຊ້ໃນສະຖານນະມັດສະການ, ຫຸ້ມເຄື່ອງເຫລົ່ານັ້ນດ້ວຍໜັງສັດຢ່າງດີອີກ ແລ້ວນຳໄປວາງເທິງຮ່າງໄມ້ຄານຫາມ.
“ໃຫ້ພວກເຂົາເອົາຂີ້ເທົ່າອອກຈາກແທ່ນບູຊາທອງສຳລິດ ແລະ ໃຊ້ຜ້າສີມ່ວງປົກເທິງແທ່ນນັ້ນ. ແລ້ວພວກເຂົາຈະຕ້ອງນຳເອົາເຄື່ອງໃຊ້ທັງໝົດສຳລັບແທ່ນບູຊາເຊັ່ນ: ຖາດຮອງໄຟ, ສ້ອມສຽບຊີ້ນ, ຊ້ວນ ແລະ ຖ້ວຍສຳລັບຊິດເລືອດ. ວາງຢູ່ເທິງຜ້ານັ້ນແລ້ວປົກດ້ວຍໜັງສັດຢ່າງດີອີກ ແລະ ເອົາໄມ້ຄານສອດໃສ່.
“ຫລັງຈາກອາໂຣນ ແລະ ບັນດາລູກຊາຍຂອງລາວຫຸ້ມຫໍ່ເຄື່ອງຕົບແຕ່ງສັກສິດ ແລະ ເຄື່ອງໃຊ້ສັກສິດທັງໝົດເຫລົ່ານີ້ແລ້ວ, ແລະ ເມື່ອຄ້າຍພັກພ້ອມທີ່ຈະເຄື່ອນຍ້າຍນັ້ນ, ຄົນໂກຮາດກໍຈະເຂົ້າມາ ແລະ ພຽງແຕ່ເພື່ອແບກຫາມເທົ່ານັ້ນ. ແຕ່ພວກເຂົາຈະແຕະຕ້ອງສິ່ງສັກສິດນີ້ບໍ່ໄດ້ເດັດຂາດ ຫລື ບໍ່ດັ່ງນັ້ນພວກເຂົາຈະຕາຍ. ຊາວໂກຮາດຈະເປັນຜູ້ແບກຫາມສິ່ງຕ່າງໆທີ່ຢູ່ໃນເຕັນນັດພົບ.
“ປະໂລຫິດເອເລອາຊາລູກຊາຍຂອງອາໂຣນ ຈະຕ້ອງຮັບຜິດຊອບນ້ຳມັນຕະກຽງ, ເຄື່ອງຫອມ, ເຄື່ອງຖວາຍພືດຜົນເປັນເມັດ ແລະ ນ້ຳມັນເຈີມ. ລາວມີໜ້າທີ່ກວດກາເບິ່ງແຍງຫໍເຕັນທັງໝົດ ແລະ ທຸກໆສິ່ງທີ່ຢູ່ໃນຫໍເຕັນນັ້ນ, ລວມທັງເຄື່ອງຕົບແຕ່ງ ແລະ ເຄື່ອງໃຊ້ສັກສິດຂອງຫໍເຕັນ”.
ພຣະເຈົ້າຢາເວກ່າວແກ່ໂມເຊ ແລະ ອາໂຣນວ່າ, “ຈົ່ງເບິ່ງວ່າຕະກຸນໂກຮາດຈະບໍ່ຖືກຕັດອອກຈາກເຜົ່າເລວີ. ເພື່ອວ່າພວກເຂົາຈະມີຊີວິດຢູ່ ແລະ ບໍ່ຕາຍເມື່ອພວກເຂົາເຂົ້າມາໃກ້ສິ່ງບໍລິສຸດທີ່ສຸດ, ເຈົ້າຈົ່ງເຮັດດັ່ງນີ້ສຳລັບພວກເຂົາ: ອາໂຣນ ແລະ ບັນດາລູກຊາຍຂອງລາວຈະຕ້ອງເຂົ້າໄປໃນສະຖານນະມັດສະການ ແລະ ມອບວຽກໃຫ້ແຕ່ລະຄົນເຮັດ ແລະ ມອບສິ່ງທີ່ພວກເຂົາຈະແບກຫາມດ້ວຍ. ແຕ່ຄົນໂກຮາດຈະຕ້ອງບໍ່ເຂົ້າໄປຂ້າງໃນເພື່ອເບິ່ງສິ່ງສັກສິດ, ແມ່ນແຕ່ນາທີດຽວ, ຫລື ບໍ່ດັ່ງນັ້ນພວກເຂົາຈະຕາຍ”.
ຊາວເກໂຊນ
ພຣະເຈົ້າຢາເວກ່າວແກ່ໂມເຊວ່າ, “ຈົ່ງຈົດຈຳນວນພົນຊາວເກໂຊນຕາມຄອບຄົວ ແລະ ຕາມຕະກຸນຂອງພວກເຂົາ. ຈົ່ງນັບຜູ້ຊາຍທັງໝົດທີ່ມີອາຍຸຕັ້ງແຕ່ສາມສິບເຖິງຫ້າສິບປີ ຜູ້ທີ່ຈະມາຮັບໃຊ້ໃນວຽກງານທີ່ເຕັນນັດພົບ.
“ນີ້ຄືໜ້າທີ່ຂອງຕະກຸນຊາວເກໂຊນໃນການແບກຫາມ ແລະ ວຽກງານອື່ນໆຂອງພວກເຂົາ: ພວກເຂົາຈະຕ້ອງແບກຫາມຜ້າກັ້ງຂອງຫໍເຕັນ, ຄືເຕັນນັດພົບ, ເຊິ່ງມີຜ້າປົກຄຸມຊັ້ນໃນ ແລະ ຜ້າປົກຄຸມຊັ້ນນອກທີ່ຫຸ້ມດ້ວຍໜັງສັດຢ່າງດີ, ຜ້າກັ້ງທາງເຂົ້າເຕັນນັດພົບ, ຜ້າກັ້ງທີ່ອ້ອມຮອບຫໍເຕັນ ແລະ ແທ່ນບູຊາ, ຜ້າກັ້ງທາງເຂົ້າໄປເດີ່ນຫໍເຕັນ, ບັນດາເຊືອກ ແລະ ອຸປະກອນທັງໝົດທີ່ນຳໃຊ້ໃນເຕັນ. ຊາວເກໂຊນຈະຕ້ອງເຮັດກ່ຽວກັບສິ່ງເຫລົ່ານີ້ໃຫ້ສຳເລັດ. ການຮັບໃຊ້ທັງໝົດຂອງພວກເຂົາ, ທັງການແບກຫາມ ຫລື ວຽກອື່ນໆ, ແມ່ນຈະຕ້ອງເຮັດພາຍໃຕ້ການຊີ້ນຳຂອງອາໂຣນ ແລະ ລູກຊາຍຂອງລາວ. ນີ້ແມ່ນການຮັບໃຊ້ຂອງຕະກຸນເກໂຊນທີ່ເຕັນນັດພົບ. ໜ້າທີ່ຂອງພວກເຂົາແມ່ນໃຫ້ຢູ່ໃຕ້ການຊີ້ນຳຂອງປະໂລຫິດອີທາມາລູກຊາຍຂອງອາໂຣນ.
ຊາວເມຣາຣີ
“ຈົ່ງນັບຊາວເມຣາຣີຕາມຕະກຸນ ແລະ ຕາມຄອບຄົວຂອງພວກເຂົາ. ຈົ່ງນັບຜູ້ຊາຍທຸກຄົນທີ່ມີອາຍຸແຕ່ສາມສິບປີເຖິງຫ້າສິບປີ ຜູ້ທີ່ຈະມາຮັບໃຊ້ໃນວຽກງານທີ່ເຕັນນັດພົບ. ດ້ວຍວ່າເປັນການຮັບໃຊ້ຂອງພວກເຂົາທີ່ເຕັນ, ພວກເຂົາຈະຕ້ອງແບກຫາມໂຄງຂອງຫໍເຕັນ, ຄານ, ເສົາ ແລະ ຖານຮອງຮັບ, ລວມທັງເສົາທີ່ອ້ອມເດີ່ນຂອງຫໍເຕັນພ້ອມກັບຖານຮອງຮັບ, ຫລັກປັກເຕັນ, ເຊືອກ, ອຸປະກອນທັງໝົດຂອງເຕັນ ແລະ ເຄື່ອງໃຊ້ທີ່ກ່ຽວຂ້ອງໃນເຕັນທຸກຢ່າງ. ຈົ່ງມອບໜ້າທີ່ແບກຫາມສະເພາະໃຫ້ແກ່ຜູ້ຊາຍແຕ່ລະຄົນ. ນີ້ຄືການຮັບໃຊ້ຂອງຕະກຸນເມຣາຣິທີ່ເຕັນນັດພົບພາຍໃຕ້ການຊີ້ນຳຂອງປະໂລຫິດອີທາມາລູກຊາຍຂອງອາໂຣນ”.
ການນັບຈຳນວນຄົນໃນຕະກຸນເລວີ
ໂມເຊ, ອາໂຣນ ແລະ ບັນດາຜູ້ນຳຂອງຊຸມຊົນໄດ້ນັບຄົນໂກຮາດຕາມຕະກຸນ ແລະ ຕາມຄອບຄົວຕ່າງໆຂອງພວກເຂົາ.
ຜູ້ຊາຍທັງໝົດທີ່ມີອາຍຸແຕ່ສາມສິບປີເຖິງຫ້າສິບປີ ຜູ້ທີ່ຈະມາຮັບໃຊ້ໃນວຽກງານທີ່ເຕັນນັດພົບ, ນັບຕາມຕະກຸນມີ 2.750 ຄົນ. ນີ້ຄືຈຳນວນຂອງຜູ້ທີ່ຢູ່ໃນຕະກຸນໂກຮາດທັງໝົດຮັບໃຊ້ໃນເຕັນນັດພົບ. ໂມເຊ ແລະ ອາໂຣນໄດ້ນັບຈຳນວນພວກເຂົາຕາມທີ່ພຣະເຈົ້າຢາເວສັ່ງຜ່ານທາງໂມເຊ.
ເຂົາໄດ້ນັບຊາວເກໂຊນຕາມຕະກຸນ ແລະ ຕາມຄອບຄົວຂອງພວກເຂົາ.
ຜູ້ຊາຍທັງໝົດທີ່ມີອາຍຸແຕ່ສາມສິບປີເຖິງຫ້າສິບປີທີ່ຈະມາຮັບໃຊ້ໃນວຽກງານໃນເຕັນນັດພົບ, ເຊິ່ງໄດ້ນັບຕາມຕະກຸນ ແລະ ຕາມຄອບຄົວມີ 2.630 ຄົນ. ນີ້ແມ່ນຈຳນວນຄົນຂອງຕະກຸນເກໂຊນທັງໝົດທີ່ຮັບໃຊ້ໃນເຕັນນັດພົບ. ໂມເຊ ແລະ ອາໂຣນໄດ້ນັບພວກເຂົາຕາມຄຳສັ່ງຂອງພຣະເຈົ້າຢາເວສັ່ງໂມເຊ.
ເຂົາໄດ້ນັບຊາວເມຣາຣີຕາມຕະກຸນ ແລະ ຕາມຄອບຄົວຂອງພວກເຂົາ.
ຜູ້ຊາຍທັງໝົດທີ່ມີອາຍຸແຕ່ສາມສິບປີເຖິງຫ້າສິບປີ ຜູ້ທີ່ຮັບໃຊ້ໃນວຽກງານທີ່ເຕັນນັດພົບ, ໄດ້ນັບຕາມຕະກຸນຂອງພວກເຂົາມີ 3.200 ຄົນ. ນີ້ແມ່ນຈຳນວນຄົນທັງໝົດໃນຕະກຸນເມຣາຣິ. ໂມເຊກັບອາໂຣນນັບຈຳນວນພວກເຂົາຕາມຄຳສັ່ງຂອງພຣະເຈົ້າຢາເວຜ່ານທາງໂມເຊ.
ດັ່ງນັ້ນໂມເຊ, ອາໂຣນ ແລະ ບັນດາຜູ້ນຳຂອງອິດສະຣາເອນໄດ້ນັບຄົນເລວີທັງໝົດຕາມຕະກຸນ ແລະ ຄອບຄົວຂອງພວກເຂົາ. ຜູ້ຊາຍທັງໝົດທີ່ມີອາຍຸແຕ່ສາມສິບປີເຖິງຫ້າສິບປີ ຜູ້ທີ່ຈະມາເຮັດວຽກງານຮັບໃຊ້ ແລະ ແບກຫາມເຕັນນັດພົບ ລວມມີ 8.580 ຄົນ. ຕາມຄຳສັ່ງຂອງພຣະເຈົ້າຢາເວຜ່ານທາງໂມເຊ, ແຕ່ລະຄົນໄດ້ຮັບມອບໝາຍວຽກງານຂອງຕົນ ແລະ ໄດ້ຮັບການຊີ້ນຳໃນສິ່ງທີ່ຈະແບກຫາມ.
ດັ່ງນັ້ນພວກເຂົາຈຶ່ງນັບຈຳນວນ, ຕາມທີ່ພຣະເຈົ້າຢາເວໄດ້ສັ່ງໂມເຊ.
Source notes (1)
- Footnote ອາດຈະເປັນໜັງສັດຂອງສັດນ້ຳທີ່ລ້ຽງລູກດ້ວຍນ້ຳນົມ; ຄືກັນກັບໃນ ຂໍ້ 8, 10, 11, 12, 14 ແລະ 25
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.