Biblica® Open Lao Contemporary Version
ຈົດບັນຊີ 28
ເຄື່ອງບູຊາປະຈຳວັນ
ພຣະເຈົ້າຢາເວເວົ້າກັບໂມເຊວ່າ, “ຈົ່ງມອບຄຳສັ່ງນີ້ແກ່ຄົນອິດສະຣາເອນ ແລະ ກ່າວກັບພວກເຂົາວ່າ: ‘ຈົ່ງໃຫ້ແນ່ໃຈວ່າພວກເຈົ້າຈະນຳເອົາອາຫານບູຊາມາຖວາຍແກ່ເຮົາຕາມເວລາທີ່ໄດ້ກຳນົດໄວ້, ເພື່ອເປັນກິ່ນຫອມທີ່ເຮົາພໍໃຈ’. ຈົ່ງບອກພວກເຂົາວ່າ: ‘ນີ້ແມ່ນອາຫານບູຊາທີ່ພວກເຈົ້າຈະນຳມາຖວາຍແກ່ພຣະເຈົ້າຢາເວຄື: ລູກແກະອາຍຸໜຶ່ງປີບໍ່ມີຕຳໜິສອງໂຕ, ເປັນເຄື່ອງເຜົາບູຊາທັງໂຕທີ່ຖວາຍເປັນປະຈຳ. ລູກແກະໂຕໜຶ່ງຖວາຍໃນຕອນເຊົ້າ ແລະ ອີກໂຕໜຶ່ງຖວາຍຕອນຫົວຄ່ຳ, ພ້ອມດ້ວຍເຄື່ອງຖວາຍພືດພັນເປັນເມັດໜຶ່ງສ່ວນສິບເອຟາ1ຂອງແປ້ງລະອຽດປະສົມກັບນ້ຳມັນໝາກກອກໜຶ່ງສ່ວນສີ່ຂອງຮິນ2. ນີ້ເປັນເຄື່ອງເຜົາບູຊາປະຈຳວັນທີ່ກຳນົດໄວ້ທີ່ພູເຂົາຊີນາຍເພື່ອເປັນກິ່ນຫອມທີ່ພໍໃຈ, ເປັນອາຫານບູຊາແກ່ພຣະເຈົ້າຢາເວ. ເຄື່ອງດື່ມບູຊາທີ່ຖວາຍຄູ່ກັບລູກແກະແຕ່ລະໂຕນັ້ນຄືເຄື່ອງດື່ມທີ່ໝັກແລ້ວໜຶ່ງສ່ວນສີ່ຂອງຮິນ. ຈົ່ງຖອກເຄື່ອງດື່ມບູຊານີ້ຕໍ່ໜ້າພຣະເຈົ້າຢາເວໃນສະຖານນະມັດສະການ. ຈົ່ງຖວາຍລູກແກະໂຕທີສອງໃນຕອນຫົວຄ່ຳ, ພ້ອມກັບເຄື່ອງຖວາຍພືດພັນເປັນເມັດ ແລະ ເຄື່ອງດື່ມບູຊາຢ່າງດຽວກັບທີ່ພວກເຈົ້າຖວາຍໃນຕອນເຊົ້າ. ນີ້ເປັນອາຫານບູຊາ, ເປັນກິ່ນຫອມທີ່ພຣະເຈົ້າຢາເວພໍໃຈ.
ເຄື່ອງບູຊາສຳລັບວັນຊະບາໂຕ
“ ‘ໃນວັນຊະບາໂຕ, ຈົ່ງຖວາຍລູກແກະອາຍຸໜຶ່ງປີບໍ່ມີຕຳໜິສອງໂຕ, ພ້ອມກັບເຄື່ອງດື່ມບູຊາ ແລະ ເຄື່ອງຖວາຍພືດພັນເປັນເມັດສອງສ່ວນສິບຂອງໜຶ່ງເອຟາ3ຂອງແປ້ງລະອຽດປະສົມກັບນໍ້າມັນໝາກກອກ. ນີ້ແມ່ນເຄື່ອງເຜົາບູຊາສຳລັບທຸກໆວັນຊະບາໂຕ, ນອກຈາກເຄື່ອງເຜົາບູຊາທັງໂຕທີ່ຖວາຍເປັນປະຈຳ ແລະ ເຄື່ອງດື່ມບູຊາ.
ເຄື່ອງບູຊາປະຈຳທຸກເດືອນ
“ ‘ທຸກວັນທຳອິດຂອງເດືອນ, ຈົ່ງຖວາຍເຄື່ອງເຜົາບູຊາແກ່ພຣະເຈົ້າຢາເວຄື: ງົວເຖິກສອງໂຕ, ແກະຜູ້ໜຶ່ງໂຕ ແລະ ລູກແກະຜູ້ອາຍຸໜຶ່ງປີເຈັດໂຕ, ທັງໝົດບໍ່ມີຕຳໜິ. ງົວຜູ້ແຕ່ລະໂຕຕ້ອງຖວາຍພ້ອມກັບເຄື່ອງຖວາຍພືດພັນເປັນເມັດສາມສ່ວນສິບເອຟາ4ຂອງແປ້ງລະອຽດປະສົມກັບນ້ຳມັນ; ພ້ອມກັບແກະຜູ້, ເຄື່ອງຖວາຍພືດພັນເປັນເມັດສອງສ່ວນສິບເອຟາຂອງແປ້ງລະອຽດປະສົມກັບນ້ຳມັນ; ເຄື່ອງຖວາຍພືດພັນເປັນເມັດໜຶ່ງສ່ວນສິບເອຟາຂອງແປ້ງລະອຽດປະສົມກັບນ້ຳມັນ ພ້ອມກັບແກະແຕ່ລະໂຕ. ນີ້ເປັນເຄື່ອງເຜົາບູຊາທັງໂຕ, ເປັນກິ່ນຫອມທີ່ພຣະເຈົ້າພໍໃຈ, ເປັນອາຫານບູຊາຖວາຍແກ່ພຣະເຈົ້າຢາເວ. ເຄື່ອງດື່ມບູຊາພ້ອມກັບງົວຄືເຫລົ້າອະງຸ່ນເຄິ່ງຮິນ5; ແກະຜູ້ພ້ອມກັບເຫລົ້າອະງຸ່ນໜຶ່ງສ່ວນສາມຮິນ6; ແລະ ລູກແກະຜູ້ພ້ອມກັບເຫລົ້າອະງຸ່ນໜຶ່ງສ່ວນສີ່ຮິນ. ນີ້ເປັນເຄື່ອງເຜົາບູຊາທີ່ຈະຕ້ອງຖວາຍທຸກເດືອນໃນວັນອອກໃໝ່ຕະຫລອດທັງປີ. ນອກຈາກເຄື່ອງເຜົາບູຊາທັງໂຕທີ່ຖວາຍເປັນປະຈຳພ້ອມກັບເຄື່ອງດື່ມບູຊາແລ້ວ, ຈະຕ້ອງໄດ້ເອົາແບ້ໂຕໜຶ່ງມາຖວາຍແກ່ພຣະເຈົ້າຢາເວເພື່ອເປັນເຄື່ອງຖວາຍບູຊາໄຖ່ບາບ.7
ເທດສະການປັດສະຄາ
(ອພຍ 12:14-20; ລລວ 23:4-8; ພບຍ 16:1-8)
“ ‘ໃນມື້ທີສິບສີ່ຂອງເດືອນທີໜຶ່ງ ຈົ່ງຈັດເທດສະການປັດສະຄາຂອງພຣະເຈົ້າຢາເວຂຶ້ນ. ໃນວັນທີສິບຫ້າຂອງເດືອນດຽວກັນນີ້ເປັນການສະຫລອງເທດສະການ; ໂດຍກິນເຂົ້າຈີ່ບໍ່ມີເຊື້ອແປ້ງເປັນເວລາເຈັດວັນ. ໃນມື້ທຳອິດຈົ່ງເຕົ້າໂຮມເພື່ອນະມັດສະການ ແລະ ຢ່າເຮັດວຽກໃດໆ. ຈົ່ງຖວາຍເຄື່ອງຖວາຍບູຊາອາຫານແກ່ພຣະເຈົ້າຢາເວປະກອບດ້ວຍເຄື່ອງເຜົາບູຊາຄື: ງົວເຖິກສອງໂຕ, ແກະຜູ້ໜຶ່ງໂຕ ແລະ ລູກແກະຜູ້ອາຍຸໜຶ່ງປີເຈັດໂຕ, ທັງໝົດລ້ວນບໍ່ມີຕຳໜິ. ຈົ່ງຖວາຍພືດພັນເປັນເມັດຄື: ແປ້ງລະອຽດສາມສ່ວນສິບເອຟາປະສົມກັບນ້ຳມັນພ້ອມກັບງົວແຕ່ລະຕົວ; ແປ້ງສອງສ່ວນສິບເອຟາຖວາຍພ້ອມກັບແກະຜູ້ແຕ່ລະໂຕ; ແລະ ແປ້ງລະອຽດໜຶ່ງສ່ວນສິບເອຟາພ້ອມກັບລູກແກະແຕ່ລະໂຕ. ຈົ່ງຖວາຍແບ້ຜູ້ໜຶ່ງໂຕເປັນເຄື່ອງບູຊາໄຖ່ບາບຂອງເຈົ້າດ້ວຍ. ຈົ່ງຖວາຍເຄື່ອງບູຊາເຫລົ່ານີ້ເພີ່ມເຕີມໃສ່ເຄື່ອງເຜົາບູຊາປົກກະຕິໃນຕອນເຊົ້າ. ໂດຍວິທີນີ້ຈົ່ງຖວາຍເຄື່ອງຖວາຍບູຊາອາຫານທຸກວັນເປັນເວລາເຈັດວັນເພື່ອເປັນກິ່ນຫອມທີ່ພຣະເຈົ້າຢາເວພໍໃຈ; ສິ່ງນີ້ຈະຕ້ອງໄດ້ຖວາຍເພີ່ມເຕີມຈາກເຄື່ອງເຜົາບູຊາ ແລະ ເຄື່ອງດື່ມບູຊາປົກກະຕິ. ໃນມື້ທີເຈັດຈົ່ງຈັດການໂຮມຊຸມນຸມເພື່ອນະມັດສະການ ແລະ ຢ່າເຮັດວຽກໃດໆ.
ເທດສະການປະຈຳອາທິດ
(ລລວ 23:15-22; ພບຍ 16:9-12)
“ ‘ໃນວັນຖວາຍພືດຜົນຫົວປີນັ້ນ, ເມື່ອເຈົ້ານຳເອົາພືດພັນເປັນເມັດໃໝ່ມາຖວາຍແກ່ພຣະເຈົ້າຢາເວໃນຊ່ວງເທດສະການແຫ່ງອາທິດນັ້ນ, ຈົ່ງຈັດໂຮມຊຸມນຸມເພື່ອນະມັດສະການຂຶ້ນ ແລະ ຢ່າອອກແຮງງານໃດໆ. ຈົ່ງຖວາຍງົວເຖິກສອງໂຕ, ແກະຜູ້ໜຶ່ງໂຕ ແລະ ລູກແກະໂຕຜູ້ອາຍຸໜຶ່ງປີເຈັດໂຕເປັນເຄື່ອງເຜົາບູຊາເພື່ອເປັນກິ່ນຫອມທີ່ພຣະເຈົ້າຢາເວພໍໃຈ. ຄຽງຄູ່ກັບການຖວາຍງົວແຕ່ລະໂຕນັ້ນ ຕ້ອງມີການຖວາຍພືດພັນເປັນເມັດຄືແປ້ງລະອຽດສາມສ່ວນສິບເອຟາປະສົມນ້ຳມັນ; ແປ້ງລະອຽດສອງສ່ວນສິບພ້ອມກັບແກະຜູ້; ແລະ ຖວາຍແປ້ງໜຶ່ງສ່ວນສິບເອຟາໄປພ້ອມກັບລູກແກະແຕ່ລະໂຕ. ແລະ ຈົ່ງຖວາຍແບ້ຜູ້ໜຶ່ງໂຕເປັນເຄື່ອງຖວາຍໄຖ່ບາບສຳລັບເຈົ້າ. ນອກເໜືອຈາກເຄື່ອງເຜົາບູຊາປົກກະຕິ ແລະ ເຄື່ອງຖວາຍພືດພັນເປັນເມັດແລ້ວ ຈົ່ງຖວາຍເຄື່ອງດື່ມບູຊາອີກດ້ວຍ. ຈົ່ງໃຫ້ແນ່ໃຈວ່າບັນດາສັດທີ່ນຳມາຖວາຍນັ້ນບໍ່ມີຕຳໜິໃດໆເລີຍ.
Source notes (7)
- Footnote ຄື ປະມານ 1,6 ກິໂລກຣາມ; ເໝືອນກັນໃນ ຂໍ້ 13, 21 ແລະ 29
- Footnote ຄື ປະມານ 1 ລິດ; ເໝືອນກັນ ໃນ ຂໍ້ 7 ແລະ 14
- Footnote ຄື ປະມານ 3,2 ກິໂລກຣາມ; ເໝືອນກັນໃນຂໍ້ 12, 20 ແລະ 28
- Footnote ຄື ປະມານ 5 ກິໂລກຣາມ; ເໝືອນກັນໃນຂໍ້ 20 ແລະ 28
- Footnote ຄື ປະມານ 1,9 ລິດ
- Footnote ຄື ປະມານ 1,3 ລິດ
- Footnote ເຄື່ອງຖວາຍເພື່ອການຊຳລະລ້າງ; ເໝືອນກັນໃນຂໍ້ 22
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.